Print 
PDF
ក្រុមកម្មករមួយក្រុមដែលទើបតែត្រឡប់មកពីប្រទេសថៃ ដោយសារគាត់មានជំងឺ អះអាងថា ពួកគាត់ត្រូវក្រុមហ៊ុននាំពលករមួយឈ្មោះ ខេ.អិល.អឹម. មែនផាវើ (KLM Manpower) នាំយកទៅឲ្យធ្វើការជាកម្មករសំណង់នៅប្រទេសថៃ។
ពលករចំណាកស្រុកស្របច្បាប់ អំពាវនាវនៅថ្ងៃទី១ ខែមករា ឆ្នាំ២០១៣ ថា អ្នកគ្មានការងារធ្វើនៅក្នុងប្រទេសកម្ពុជា សូមកុំជឿការឃោសនារបស់ក្រុមហ៊ុននាំពលករទៅធ្វើការនៅបរទេស ព្រោះពួកគាត់បានចាញ់បោករួចហើយ។
ដោយ អ៊ុក សាវបូរី 2013-01-01 វិទ្យុអាស៊ីសេរី
ក្រុមអ្នកកាសែតថតរូបរថយន្តដែលដឹកពលករខ្មែរ ២១នាក់ បញ្ជូនមកពីប្រទេសថៃ មកដល់ទឹកដីខ្មែរនៅជាប់គល់ស្ពានមិត្តភាពកម្ពុជា-ថៃ ក្នុងក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី២៩ ខែកញ្ញា ឆ្នាំ២០១០។ RFA/Soun Sophalmony
ប៉ុន្តែ ក្រុមកម្មករទាំងនោះបានចោទថា ពេលគាត់ទៅដល់ប្រទេសថៃ បែរជាក្រុមហ៊ុននោះលក់គាត់ឲ្យធ្វើកម្មករសំណង់បែបម៉ៅការទៅវិញ មិនមែនសំណង់ស្របច្បាប់ដែលមានការធានាអាយុជីវិត និងផ្តល់កម្រៃឈ្នួលតាមការសន្យាមុនចេញដំណើរនោះទេ។
ការអំពាវនាវនេះបានធ្វើឡើងបន្ទាប់ពីពួកគាត់មានជំងឺ ហើយបានវិលត្រឡប់មកដល់ប្រទេសកម្ពុជា វិញ កាលពីខែធ្នូ ឆ្នាំ២០១២ ក្រោយពីថៅកែថៃ បង្ខំឲ្យធ្វើការហួសកម្លាំង និងទទួលកម្រៃឈ្នួលពលកម្មមិនបានដូចការសន្យាមុនចេញដំណើរទៅធ្វើការ។
ពលករខេត្តព្រៃវែង លោក សាវី ថ្លែងនៅថ្ងៃទី១ ខែមករា ឆ្នាំ២០១៣ ថា គាត់បានចេញទៅធ្វើកម្មករនៅប្រទេសថៃ តាមរយៈក្រុមហ៊ុន ខេ.អិល.អឹម មែនផាវើ។ គាត់បានបង់ប្រាក់ក្នុងការធ្វើលិខិតឆ្លងដែនចំនួន ១៥០ដុល្លារ។ លោកថា ៣ខែក្រោយពីបង់ប្រាក់ទៅឲ្យក្រុមហ៊ុន ទើបគេឲ្យលិខិតឆ្លងដែនមកគាត់។ នៅមុនភ្ជុំបិណ្ឌ គាត់ត្រូវក្រុមហ៊ុននាំចេញទៅធ្វើការជាមួយពលករដទៃទៀតចំនួន ៣៧នាក់។ គាត់ទៅដល់ប្រទេសថៃ បែរជាមិនបានធ្វើការក្នុងក្រុមហ៊ុនសំណង់ស្របច្បាប់ដូចការសន្យា បែរជាធ្វើការជាកម្មករម៉ៅការសំណង់ទៅវិញ។
គាត់ត្រូវថៅកែថៃ ប្រាប់ថា ក្រុមហ៊ុនពីភ្នំពេញលក់គាត់ក្នុងតម្លៃ ១ឆ្នាំ ២ម៉ឺនបាត។ ថៅកែថៃ ឲ្យគាត់ធ្វើការ ១០ខែ ទើបរួចលុយនោះ។ ពួកគាត់ខំធ្វើការមិនហ៊ានតវ៉ា ហើយក៏ធ្លាក់ខ្លួនឈឺ ទើបគេបញ្ជូនមកប្រទេសខ្មែរ វិញ នៅខែធ្នូ ឆ្នាំ២០១២៖ «ខ្ញុំមើលទៅឃើញថា ធ្វើការទៅអត់សល់ ចាញ់នៅស្រុកខ្មែរ ២៧០បាត ខ្ញុំគុណលុយមើលបានតែ ៣ម៉ឺនជាង ហើយម្ហូបស្រុកគេ គេចាយលុយសុទ្ធតែលុយបាត ដូចស្រុកខ្មែរដែរ»។
បុរសម្នាក់ទៀត សុំមិនប្រាប់ឈ្មោះ អះអាងថា គាត់ជាភ្នាក់ងារក្រុមហ៊ុន ខេ.អិល.អឹម មែនផាវើ គាត់ជាអ្នកទាក់ទាញមនុស្សឲ្យចេញទៅធ្វើការតាមរយៈក្រុមហ៊ុនផង និងជាពលករផ្ទាល់ផង។ គាត់បានរងគ្រោះដូចពលករទាំងនោះដែរ។ លោកថាមិនត្រឹមតែក្រុមហ៊ុនលក់ពួកគាត់បន្តទេ គាត់ថែមទាំងក្លាយជាអ្នកជំពាក់លុយថៅកែថៃ ២ម៉ឺនបាត ដោយមិនដឹងខ្លួន។ គាត់ថា ពេលទៅដល់ប្រទេសថៃ ថៅកែដកយកលិខិតឆ្លងដែនទុក ហើយបង្ខំឲ្យធ្វើការដើម្បីឲ្យសំណង់គេម៉ៅការនោះ សង់ឆាប់រួច។ លោកថា ការបង្ខំឲ្យធ្វើការនោះ ក្រុមគាត់ទាំង ៣៧នាក់ មានពលករម្នាក់ធ្លាក់ខ្លួនពិការ ព្រោះប្រឹងលើកដែក និងលើកខ្សាច់ហួសកម្លាំង គ្មានអាហារហូបគ្រប់គ្រាន់។
លោកអំពាវនាវសុំឲ្យក្រសួងការងារពិនិត្យក្រុមហ៊ុននាំពលករទៅបរទេស និងអំពាវនាវឲ្យប្រជាពលរដ្ឋស្វែងរកការងារធ្វើនៅក្នុងប្រទេសកម្ពុជា ប្រសើរជាងធ្វើចំណាកស្រុក ទោះបីស្របច្បាប់ក្តី ក៏មិនគួរចាកចោលស្រុកកំណើតដែរ៖ «គាត់មិនមែនយកទៅដាក់ក្រុមហ៊ុនឯណា គាត់យកទៅដាក់ខាងម៉ៅការ។ ពាក្យថាម៉ៅការនោះ យ៉ាប់ណាស់ ធ្វើមិនរួចទេ ការងារលីស៊ីម៉ងត៍លីសែងៗធ្លាក់ខ្លួនឈឺ។ ឥឡូវសព្វថ្ងៃ អ្នកដែលឈឺរងគ្រោះដោយក្រុមហ៊ុនមិនបានមើលខ្វិនម្នាក់ទៀត។ ហើយសុំពីក្រុមហ៊ុនជួយព្យាបាលអីខ្លះ គាត់បែរជាថា ទៅសុំនៅខាងថៅកែថៃ។ ឯថៅកែថៃ ផ្ដោតមកខាងខ្មែរ ឥឡូវគ្នាខ្វិននៅរាល់ថ្ងៃ។ ខាងថៅកែថៃ នោះ តែមនុស្សអីចឹង គេមិនមើលទេស្រុកគេ គេបញ្ជូនមក បានខ្ញុំបានមកហ្នឹង កុំអីខ្ញុំក៏ជាប់ខ្លួននៅទីនោះដែរ អត់បានមកទេ»។
អ្នកស្រី សុភាព គឺជាភរិយាកម្មករ សោម កុល ថ្លែងថា ប្ដីគាត់ឈឺ ទើបក្រុមហ៊ុននៅប្រទេសថៃ បញ្ជូនមកប្រទេសកម្ពុជា វិញ កាលពីពាក់កណ្ដាលខែធ្នូ។ អ្នកស្រីថា ប្ដីគាត់ទៅធ្វើការជាង ២ខែ ថៅកែថៃ បើកប្រាក់ឲ្យតែ ៥ពាន់បាតទេ។ ពេលមកដល់ស្រុកខ្មែរ ទទួលបានតែ ៥០ម៉ឺនរៀលប៉ុណ្ណោះ។ អ្នកស្រីអំពាវនាវសុំឲ្យអ្នកគ្មានការងារធ្វើទាំងអស់ កុំប្រថុយទៅធ្វើការងារនៅប្រទេសថៃ ទោះបីតាមក្រុមហ៊ុនស្របច្បាប់ក៏ដោយ៖«នៅក្នុងស្រុក វាស្រួលជាងទៅក្រៅ។ ស្រុកគេពិបាកណាស់ ទៅស្រុកគេវាមិនស្រួលដូចនៅស្រុកយើងទេ»។
ពាក់ព័ន្ធការចោទប្រកាន់នេះ វិទ្យុអាស៊ីសេរី មិនអាចទាក់ទងក្រុមហ៊ុន ខេ.អិល.អឹម មែនផាវើ ជម្រាបសួរព័ត៌មានបានភ្លាមៗនៅថ្ងៃទី១ ខែមករា ឆ្នាំ២០១៣ បានទេ៕
0 comments:
Post a Comment