Print 
PDF
វិទ្យុសម្លេងវៀតណាម មានបំណងជួយផ្សព្វផ្សាយពីព្រឹត្តិការណ៍បោះឆ្នោតនៅកម្ពុជា
25 September
ភ្នំពេញ ៖ យោងតាមកិច្ចព្រមព្រៀងសហប្រតិបត្តិការរវាងវិទ្យុជាតិកម្ពុជា និងវិទ្យុសម្លេងវៀតណាមដែលបានឯកភាពនាពេលកន្លងមក ស្តីពីការផ្សព្វផ្សាយព្រឹត្តិការណ៍បោះឆ្នោតសកល ក៏ដូចជាព្រឹត្តិការណ៍ធំៗរវាងប្រទេសទាំងពីរកម្ពុជា-វៀតណាម
គណៈប្រតិភូវិទ្យុសម្លេងវៀតណាមមួយក្រុម ដឹកនាំដោយលោក ង្វៀន ដាន ទៀន អគ្គនាយកវិទ្យុសម្លេងវៀតណាម បានអញ្ជើញចូលជួបសំដែងការគួរសម និងពិភាក្សាការងារលើការផ្សព្វផ្សាយព័ត៌មានទាក់ទងនឹងការបោះឆ្នោតនៅកម្ពុជាជាមួយលោករដ្ឋមន្ត្រីក្រសួងព័ត៌មាន ខៀវ កាញារីទ្ធ នារសៀលថ្ងៃទី ២៤ ខែកញ្ញាឆ្នាំ២០១២នេះនៅទីស្តីការក្រសួង។
នៅក្នុងជំនួបនោះលោក ង្វៀន ដាន ទៀន បានជំរាបជូនថា វិទ្យុសម្លេងវៀតណាមមានបំណងជួយផ្សព្វផ្សាយលើការងារបោះឆ្នោតនៅកម្ពុជា ទៅតាមកិច្ចព្រមព្រៀងសហប្រតិបត្តិការជាមួយគ្នា ព្រោះថានៅសល់តែ១០ខែទៀតទេគឺជារយៈពេលខ្លី បើមិនពង្រឹងចំណុចទាំងនេះទេមិនអាចធ្វើទាន់ឡើយ។ បញ្ហាមួយទៀតវៀតណាមអាចបញ្ជូនបានភ្លាមៗក្រុមជំនាញការវៀតណាមមកជួយខាងវិទ្យុជាតិកម្ពុជា ដើម្បីធ្វើយ៉ាងណាឲ្យផ្នែកបច្ចេកទេសជួយរក្សាឲ្យការផ្សព្វផ្សាយបានជាប់។ លោកដឹងថានៅកម្ពុជាមានប្រជាជនប្រមាណ ៣០ភាគរយ ដែលមិនទាន់ចាប់រលកវិទ្យុជាតិកម្ពុជាបាន ពោលគឺប្រហែល៤លាន២សែននាក់ ដែលពួកគេមិនបានស្តាប់សម្លេងវិទ្យុជាតិកម្ពុជា ជាពិសេសក្នុងដំណើរឃោសនាបោះឆ្នោត។ ការងារមួយទៀតលោកក៏បានពិគ្រោះយោបល់ជាមួយលោក តុនយ៉ាន អគ្គនាយកវិទ្យុជាតិកម្ពុជា ដើម្បីស្នើឲ្យបង្កើតជាក្រុមអ្នកកាសែតមួយដែលមានជំនាញបទពិសោធន៍ខ្លះៗក្នុងបញ្ហាព័ត៌មានបោះឆ្នោតនេះ ដើម្បីធ្វើយ៉ាងណាឲ្យប្រជាជនយល់ត្រឹមត្រូវពីគោលនយោបាយនៃការបោះឆ្នោត ហើយបើសិនជាត្រូវការអ្នកកាសែតខាងវៀតណាមក៏មានអ្នកកាសែត ដែលមានបទពិសោធន៍ខ្លះៗនឹងបញ្ហាព័ត៌មានពីការបោះឆ្នោត ឬ ព្រឹត្តិការណ៍ធំៗរបស់ជាតិ អាចដោះដូរបទពិសោធន៍ជាមួយគ្នាបាន។ ក្នុងនាមឲ្យគណៈប្រតិភូវិទ្យុសម្លេងវៀតណាម លោកសូមសំដែងអំណរគុណយ៉ាងជ្រាលជ្រៅចំពោះលោករដ្ឋមន្ត្រីក្រសួងព័ត៌មានកម្ពុជា ដែលអនុញ្ញាតឲ្យគណៈប្រតិភូរបស់លោកបានចូលជួបនាពេលនេះ ព្រមទាំងធ្វើបដិសណ្ឋារកិច្ចយ៉ាងកក់ក្តៅរាក់ទាក់បំផុត។
លោករដ្ឋមន្ត្រីក្រសួងព័ត៌មាន ខៀវ កាញារីទ្ធ បានសំដែងនូវកាស្វាគមន៍ និងមានសេចក្តីសប្បាយរីករាយ ចំពោះវត្តមានរបស់គណៈប្រតិភូវិទ្យុសម្លេងវៀតណាមនាពេលនេះគឺមានសារសំខាន់ណាស់។ លោករដ្ឋមន្ត្រីបានបញ្ជាក់ថា និយាយរួមទំនាក់ទំនងរបស់ព័ត៌មានកម្ពុជា និងវៀតណាម គឺមានជាយូរយារណាស់មកហើយ តាំងពីមុនថ្ងៃរំដោះ៧មករាមកម្ល៉េះ ក្នុងនោះវៀតណាមបានជួយវិទ្យុសម្លេងរបស់រណសិរ្សខ្មែរក្នុងសម័យរំដោះ និងទីភ្នាក់ងារសារព័ត៌មានកម្ពុជា AKP។ និយាយរួមថ្នាក់ដឹកនាំនៃក្រសួងព័ត៌មានគឺសុទ្ធតែបានទទួលការបណ្តុះបណ្តាលពីវៀតណាម ទាំងវិទ្យុជាតិ ទាំងទូរទស្សន៍ជាតិ ទាំងទីភ្នាក់ងារ AKP ហើយអស់លោកដែលអញ្ជើញមកនេះគឺសុទ្ធតែមិត្តចាស់ធ្លាប់ស្គាល់គ្នា។ លោករដ្ឋមន្ត្រីមានការរីករាយផងដែរដោយឃើញថា តាំងពីដើមរហូតបច្ចុប្បន្នទំនាក់ទំនងសហប្រតិបត្តិការរវាងផ្នែកព័ត៌មានកម្ពុជា និងវៀតណាមមានការផ្លាស់ប្តូរ និងរឹងមាំថែមទៀត។ លោករដ្ឋមន្ត្រីក៏បានជំរាបជូនថា ដូចលោកប្រធានគណៈប្រតិភូមានប្រសាសន៍អំបាញ់មិញអញ្ចឹងការបោះឆ្នោតនៅកម្ពុជាម្តងៗ មានការគៀបសង្កត់ពីប្រទេសខាងក្រៅច្រើនណាស់ ប៉ុន្តែដោយមានការជួយឧបត្ថម្ភពីវិទ្យុសម្លេងវៀតណាម ធ្វើឲ្យកម្ពុជាទប់ទល់បាន។ ដូចជាកន្លងមកគឺការជួយផ្តល់ឲ្យស្ថានីយវិទ្យុតូចៗតាមបណ្តាខេត្ត មិនគ្រាន់តែបម្រើឲ្យការផ្សព្វផ្សាយជូនប្រជាពលរដ្ឋបានមួយផ្នែកធំទេ ប៉ុន្តែធ្វើឲ្យយើងទប់ទល់នឹងការផ្សាយរបស់វិទ្យុធំៗរបស់គេបាន។ លោករដ្ឋមន្ត្រីបានបញ្ជាក់ជូនថា ដោយមានវត្តមានគណៈប្រតិភូវៀតណាមនៅទីនេះស្រាប់ ក្រសួងព័ត៌មានកម្ពុជាមានបំណងចង់បង្កើតឲ្យមានកម្មវិធីផ្សាយជាភាសាវៀតណាមនៅកម្ពុជា ដើម្បីឲ្យប្រជាជនវៀតណាមនៅកម្ពុជាអាចស្តាប់បាន ហើយបានយល់ពីសភាពការណ៍នៅកម្ពុជា និងសភាពការណ៍នៅវៀតណាម បើទោះមិនបានកម្មវិធីវែងក្តី ក៏យើងអាចធ្វើកម្មវិធីខ្លីៗបានដែរ ព្រោះម្យ៉ាងនៅមិនទាន់មានបុគ្គលិកគ្រប់គ្រាន់នៅឡើយ ពិសេសខ្វះបុគ្គលិកផ្នែកបច្ចេកទេស ជួសជុលថែទាំម៉ាស៊ីន ក៏ដូចជាបុគ្គលិកខាងផ្នែកសំឡេងនៅក្នុងស្ទុឌីយោ បើសិនជាវៀតណាមជួយលើការបណ្តុះបណ្តាលនោះជាការល្អណាស់។ លោករដ្ឋមន្ត្រីបានលើកឡើងថា ក្រសួងព័ត៌មានកម្ពុជាត្រូវការខាងផ្នែកសមត្ថភាពបច្ចេកទេស មុខជំនាញ ទាំងជំហរនយោបាយ ដូច្នេះសហប្រតិបត្តិការរវាងប្រទេសយើងទាំងពីរនេះសំខាន់ណាស់ សង្ឃឹមថាលោកប្រធានគណៈប្រតិភូនឹងបន្តជំរុញសហប្រតិបត្តិការនេះ ក៏ដូចជាជួយផ្តល់ការបណ្តុះបណ្តាលដល់មន្ត្រីក្រសួងព័ត៌មានកម្ពុជា ដើម្បីបង្កើនប្រសិទ្ធភាពការងារឲ្យបានល្អ។
ឆ្លើយតបនឹងសំណើររបស់អគ្គនាយកវិទ្យុសម្លេងវៀតណាម លោករដ្ឋមន្ត្រីបានមានប្រសាសន៍ប្រគល់ភារកិច្ចនេះឲ្យលោក តន់ យ៉ាន អគ្គនាយកវិទ្យុជាតិកម្ពុជា ទទួលភារកិច្ចដើម្បីរៀបចំឯកសារ និងសំភារៈទាក់ទងដែលមានពីមុន មកឲ្យក្រសួងព័ត៌មាន និងខាងសារគមនាគមន៍ ដើម្បីជំរុញកិច្ចសហប្រតិបត្តិការនេះឲ្យបានកាន់តែលឿនថែមទៀត៕
.jpg)
.jpg)
0 comments:
Post a Comment