Print 
PDF
អ្នកភូមិដើរល្បាតព្រៃឡង់ កាលពីពេលកន្លងមក។ រូបថត សហការី
លោក សឹម សៀន តំណាងពលរដ្ឋសហគមន៍ព្រៃឡង់ ខេត្តកំពង់ធំ បានថ្លែងឲ្យដឹងថា នៅខណៈពេលដើរល្បាត អស់រយៈពេល៥ថ្ងៃមកនេះ បណ្តាញសហគមន៍ព្រៃឡង់ បានប្រទះឃើញនូវបទល្មើសព្រៃឈើជាង ១០០ ម៉ែត្រគូប និងរឹបអូសបានម៉ាស៊ីនអារឈើចំនួន ២ នៅត្រង់ចំណុចអូរទឹកវិល អូរឆ្នូរ និងអូរច្រោក ឃុំដងកាំបិត ខេត្តកំពង់ធំ។ នៅឯខេត្តព្រះវិហារវិញ បណ្តាញសហគមន៍ ចាប់បានឈើ២០ ម៉ែត្រគូប និងម៉ាស៊ីនអារឈើមួយគ្រឿងដែរ។ លោកបន្តថា ៖«ពួកយើងគ្រប់ខេត្តនឹងចេញពីព្រៃវិញ នៅថ្ងៃស្អែក(ថ្ងៃអង្គារ)ហើយសប្តាហ៍ក្រោយ យើងនឹងយកវត្ថុតាង បទល្មើស ដែលបានថតទុកទាំងអស់នោះ ដាក់ទៅគ្រប់ស្ថាប័នរដ្ឋាភិបាល ដើម្បីស្នើសុំឲ្យជួយទប់ស្កាត់។ យើងសោកស្តាយណាស់ យើងខំការពារព្រៃឈើ តែបទល្មើសនៅតែមាន»។
លោក ឲ្យដឹងទៀតថា លោកសោកស្តាយ នៅពេលចុះល្បាត បានប្រទះឃើញឈ្មួញកាប់ព្រៃឈើយ៉ាងច្រើនលើសលប់ ហើយក្រុមអ្នកភូមិរបស់លោក មិនបានដុតឈើទាំងអស់នោះទេ គឺបានត្រឹមតែរាយការណ៍ ឲ្យសមត្ថកិច្ចជំនាញតែប៉ុណ្ណោះ។ ក្រុមសហគមន៍ ក៏បានថតរូបទុក ដើម្បីទុកជាវត្ថុតាង ដាក់ទៅរដ្ឋាភិបាលផងដែរ។ លោកបានបញ្ជាក់ថា៖«យើងមិនដុតឈើទៀតទេកុំឲ្យគេយកលេសមកចោទយើង ថា ធ្វើខុសច្បាប់ ដូច្នេះទុកឲ្យអាជ្ញាធរចាត់វិធានការដោយខ្លួនឯង»។
លោកថៃ ប៊ុនលៀង តំណាងប្រជាពលរដ្ឋ មកពីខេត្តក្រចេះបានឲ្យដឹងថា ក្នុងការដើរល្បាតព្រៃរយៈពេលប៉ុន្មានថ្ងៃ ដើម្បីទប់ស្កាត់បទល្មើសព្រៃឈើនោះបណ្តាញសហគមន៍ បានជួបប្រទះ នូវបទល្មើសជាច្រើន ដែលពួកឈ្មួញបានកាប់ទុកនៅកណ្តាលព្រៃប្រមាណជា២០ម៉ែត្រគូប និងចាប់បានរណារមួយគ្រឿង។ លោកនិយាយថា៖«យើងនឹងយកវត្ថុតាងទាំងនោះ ដាក់ជូនទៅរដ្ឋាភិបាល ដើម្បីឲ្យជួយទប់ស្កាត់បទល្មើស។ ប្រសិនបើរដ្ឋាភិបាលមិនចាត់វិធានការទប់ស្កាត់ទាន់ពេលទេ ព្រៃឡង់នឹងជួបគ្រោះមហន្តរាយយ៉ាងធ្ងន់ធ្ងរ»។
ពលរដ្ឋប្រមាណ ជា៣៥០នាក់ ពីខេត្តចំនួន ៤ ជុំវិញព្រៃឡង់មានដូចជា ខេត្តព្រះវិហារ កំពង់ធំ ស្ទឹងត្រែង និងក្រចេះបានដើរល្បាតនិងជិះម៉ូតូប្រឆាំងនឹងបទល្មើសព្រៃឈើ ចាប់តាំងពីថ្ងៃទី ១៣ ដល់ថ្ងៃទី ១៨ ខែកញ្ញា ឆ្នាំ ២០១២។ ពលរដ្ឋទាំងនោះបានចុះទៅតាមចំណុចសំខាន់ៗដែលកំពុងមានការកាប់ បំផ្លាញនិងឈូសឆាយព្រៃឈើដែលក្នុងនោះមានតំបន់ទូកមាសនិងតំបន់ ប្រាំ នៅជាប់ព្រំប្រទល់ខេត្តព្រះវិហារ និងស្ទឹងត្រែង តំបន់អូរក្រាក់ក្នុងខេត្តក្រចេះ និងតំបន់ក្បាលទឹកថ្លា ក្នុងខេត្តកំពង់ធំ។ នេះគឺលើកទី ៦ ហើយដែលសហគមន៍បានចូលល្បាតព្រៃទ្រង់ទ្រាយធំបែបនេះ។
លោក ឈឹម សាវុធ អ្នកសម្របសម្រួលសម្រាប់វេទិកាសាធារណៈនៅមជ្ឈមណ្ឌលសិទិ្ធមនុស្ស កម្ពុជាបានថ្លែងឲ្យដឹងថា៖«យើងនឹងប្រមូលវត្ថុតាងទាំងនោះដាក់ ទៅរដ្ឋាភិបាល ពីព្រោះការរុករានកាប់ព្រៃយកដីខុសច្បាប់កំពុងកើតមានយ៉ាងអនា ធិបតេយ្យនៅក្នុងព្រៃឡង់»។
អភិបាលរងខេត្តកំពង់ធំ លោក អ៊ុត សំអន បានថ្លែងថា រហូតមកដល់ពេលនេះ លោកពុំទាន់បានទទួលព័ត៌មាន ពីពលរដ្ឋដែលដើរល្បាតព្រៃឡង់នៅឡើយទេ។ លោកឲ្យដឹងទៀតថា៖ «ទោះបីជាពួកគាត់ ពុំបានស្នើសុំសមត្ថកិច្ចឲ្យចូលរួមក៏ដោយ ក៏យើងបានដាក់កម្លាំងតាមឃ្លាំមើលដើម្បីការពារសុវត្ថិភាពរបស់ពួក គាត់ដែរ»។
ព្រៃឡង់គឺជាប្រភពនៃអនុផលព្រៃឈើយ៉ាងសំខាន់ សម្រាប់ប្រជាពលរដ្ឋ ដែលភាគច្រើនជាជនជាតិភាគតិចប្រមាណជាង៦០០០០ គ្រួសារ ក្នុងភូមិជិត៤០០ ភូមិដែលស្ថិតនៅក្នុងខេត្តព្រះវិហារ កំពង់ធំ ស្ទឹងត្រែង និងក្រចេះ។ អ្នកភូមិ ចូលព្រៃ ដើម្បី បោចវល្លិ រកជ័រ និងបេះផ្លែឈើលក់ចិញ្ចឹមជីវិត៕
0 comments:
Post a Comment