ការចុះទៅវាស់វែងដីព្រៃដើម្បីឲ្យប្រជាពលរដ្ឋធ្វើជាដីព្រៃសហគមន៍ប្រចាំឃុំស្នាអន្សា របស់អាជ្ញាធរដែនដី ត្រូវបានប្រជាពលរដ្ឋនៅឃុំនេះចោទថា អាជ្ញាធរមិនហ៊ានកាត់យកដីពីព្រៃសម្បទានរបស់ក្រុមហ៊ុនភាពីម៉ិច នោះទេ។
អ្នកភូមិអន្សក្ដាម ជួបជុំគ្នានៅទីដីដែលអាជ្ញាធរសម្រេចរឹបយកធ្វើព្រៃសហគមន៍ នាឃុំស្នាអន្សា ស្រុកក្រគរ ខេត្តពោធិ៍សាត់ កាលពីថ្ងៃទី១៩ សីហា ឆ្នាំ២០១២។
ផ្ទុយទៅវិញ ប្រជាពលរដ្ឋ ៣៥គ្រួសារនៅភូមិអន្សក្ដាម ឃុំស្នាអន្សា ស្រុកក្រគរ ខេត្តពោធិ៍សាត់ បានប្រតិកម្មតវ៉ា និងចោទប្រកាន់អាជ្ញាធរដែនដីថា បានមកវាស់វែងប៉ះពាល់លើដីស្រែ និងចំការវិលជុំរបស់ពួកគាត់។ បុរសអ្នកភូមិឈ្មោះ សោម សារាវុត អាយុ ៣៨ឆ្នាំ ជាប្រជាពលរដ្ឋនៅភូមិអន្សក្ដាម។
គាត់បានឲ្យដឹងនៅព្រឹកថ្ងៃទី១៩ ខែសីហា ថា ដីស្រែ និងដីចំការវិលជុំរបស់គាត់សរុបប្រមាណ ២១ហិកតារ ដែលជាដីភូមិចាស់របស់ក្រុមគ្រួសារគាត់។ គាត់បន្តថា ក្រុមគ្រួសារគាត់បានមករស់នៅ និងបង្កបង្កើនផលលើដីនេះតាំងពីឆ្នាំ១៩៨៣ មក ស្រាប់តែឥឡូវអាជ្ញាធរភូមិ ឃុំ និងស្រុក បានប្រើកម្លាំងប្រដាប់អាវុធមកដកបង្គោលរបងស្រែគាត់ចោល ហើយប្រាប់ថា ដីនេះអាជ្ញាធរយកធ្វើជាដីព្រៃសហគមន៍វិញ។ គាត់ថា សកម្មភាពនេះគឺជាការរំលោភបំពានលើការណែនាំរបស់ប្រមុខរាជរដ្ឋាភិបាលដែលបានណែនាំឲ្យកាត់ចេញនូវផលប៉ះពាល់ចំពោះដីរបស់ប្រជាពលរដ្ឋ៖
«ចំការនេះគឺជាភូមិចាស់តាំងពីដូនតាមក តែឥឡូវគេថា ខ្ញុំធ្វើលើដីសហគមន៍គេ។ អាជ្ញាធរស្រុក ឃុំ គេមករើរបងខ្ញុំចោលអស់ហើយ គេប្រាប់ថា យកទៅធ្វើព្រៃសហគមន៍។ អ្នកភូមិខ្ញុំមិនដែលឮថា មានសហគមន៍សោះ...»។ ស្ត្រីអ្នកភូមិឈ្មោះ ហុវ ចាន់ អាយុ ៤៥ឆ្នាំ បានឲ្យដឹងបន្ថែមថា ដីស្រែគាត់ក៏ត្រូវអាជ្ញាធរភូមិ ឃុំ និងស្រុកប្រើកម្លាំងប្រដាប់អាវុធមកដកបង្គោលព្រំចោលដែរ ព្រមទាំងបានគំរាមគាត់ថា បើគាត់ហ៊ានដាំបង្គោលរបងវិញ គាត់នឹងប្រឈមនឹងការកោះហៅរបស់តុលាការ។ ស្ត្រី ហុវ ចាន់៖
«ម៉ោង ១០ព្រឹកមកដករបងស្រែ។ ខ្ញុំអង្វរថា អស់លោកអើយខ្ញុំជំពាក់បំណុលគេច្រើនណាស់! គេមិនព្រមទេ។ ម៉ោង ២រសៀលគេទៅដករបងចំការខ្ញុំទៀត ហើយស្រូវខ្ញុំផើមអស់ហើយ ក្របីគោចូលស៊ីម្សិលមិញអស់ជិតមួយចំហៀងហើយ។ ខ្ញុំថា ខ្ញុំសុំធ្វើរបងវិញ គេថា បើហ៊ានធ្វើគេចាប់ដាក់គុក...»។ ឆ្លើយតបចំពោះការចោទប្រកាន់របស់ប្រជាពលរដ្ឋភូមិអន្សក្ដាម មេឃុំស្នាអន្សា គឺលោក មោគ កោ មានប្រសាសន៍ថា មិនដូចការចោទប្រកាន់នោះទេ។ អាជ្ញាធរនឹងកាត់ចេញដីស្រែដែលប្រជាពលរដ្ឋកំពុងបង្កបង្កើនផល។ តែចំពោះដីដែលប្រជាពលរដ្ឋថា ជាចំការវិលជុំនោះ គឺមិនអាចប្រគល់ជូនប្រជាពលរដ្ឋបានទេ ព្រោះដីនោះគឺជាដីព្រៃរបស់រដ្ឋ។ លោក មោគ កោ៖
«យើងត្រូវឆ្វៀលដីស្រែជូនទៅគាត់ លុះត្រាតែគាត់អាស្រ័យផលមុនការចុះវាស់វែងរបស់ក្រុមហ៊ុន និងអាជ្ញាធរ។ តែនេះគាត់ទើបតែរុករានបង្កបង្កើនផលក្រោយពេលដែលក្រុមហ៊ុនវាស់វែងប្រគល់ឲ្យអាជ្ញាធរឃុំ ដើម្បីធ្វើព្រៃសហគមន៍។ ដល់អ៊ីចឹងបើយើងឲ្យគាត់តាមការទាមទារ គឺអស់ហើយដី ៣០០ហិកតារ ដែលក្រុមហ៊ុនប្រគល់មកឲ្យនោះ...»។ ទីស្ដីការគណៈរដ្ឋមន្ត្រី កាលពីថ្ងៃទី១៤ មីនា ឆ្នាំ២០១១ បានចេញសេចក្ដីណែនាំឲ្យអាជ្ញាធរដែនដីកាត់ដីព្រៃ ៦.៧១៣ហិកតារ ចេញពីដីសម្បទានសេដ្ឋកិច្ចដែលរាជរដ្ឋាភិបាលបានប្រគល់ឲ្យក្រុមហ៊ុនភាពីម៉ិច មកឲ្យប្រជាពលរដ្ឋ ដើម្បីធ្វើជាដីព្រៃសហគមន៍។ ក្នុងនោះឃុំស្នាអន្សា ទទួលបាន ៣០០ហិកតារ។ ថ្មីៗនេះលោកនាយករដ្ឋមន្ត្រី ហ៊ុន សែន បានបញ្ជាឲ្យអាជ្ញាធរគ្រប់លំដាប់ថ្នាក់ប្រើរូបមន្តស្បែកខ្លា ក្នុងការដោះស្រាយបញ្ហាផលប៉ះពាល់នេះ។ ប៉ុន្តែអំពើពុករលួយគួបផ្សំនឹងកង្វះឆន្ទៈនៃមន្ត្រីទទួលបន្ទុកស្វែងរកដំណោះស្រាយ ធ្វើឲ្យបញ្ហាទំនាស់ដីធ្លីនៅតែកើតមានមិនចេះចប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Print 
PDF
0 comments:
Post a Comment