Print 
PDFដោយ ដែន អយុធ្យា 2011-10-02
ពលរដ្ឋរងគ្រោះដោយទឹកជំនន់នៅស្រុកបាធាយ ខេត្តកំពង់ចាម បានចោទអាជ្ញាធរមូលដ្ឋានថាបានដើរស្រង់ឈ្មោះពលរដ្ឋរងគ្រោះដោយផ្ទះលិចទឹកដើម្បីទទួលអំណោយមានការរើសអើង។ប្រជាពលរដ្ឋរាប់រយគ្រួសារ មកពី៦ឃុំ ដែលលំនៅឋានរបស់គាត់ត្រូវលិចទឹក ស្ថិតក្នុងស្រុកបាធាយ ខេត្តកំពង់ចាម។ លោកបានចោទអាជ្ញាធរឃុំ និងអាជ្ញាធរស្រុករបស់ខ្លួនថាបានដើរស្រង់ស្ថិតិពលរដ្ឋរងគ្រោះពីទឹកជំនន់ ឲ្យទទួលអំណោយពីស្ថាប័នកាកបាទក្រហម ឬអំណោយរដ្ឋាភិបាល បានជ្រើសយកតែបក្សពួកខ្លួន។
ពលរដ្ឋរងគ្រោះដោយទឹកជំនន់នៅឃុំច្បារអំពៅ ស្ថិតក្នុងចំណោមពលរដ្ឋរាប់រយគ្រួសារទៀត បានស្នើដល់មន្ត្រីរដ្ឋាភិបាល ពិសេសមន្ត្រីស្ថាប័នកាកបាទក្រហម ឲ្យចុះស៊ើបអង្កេតដល់មូលដ្ឋាន ជុំវិញភាពមិនប្រក្រតីនៃការស្រង់ឈ្មោះពលរដ្ឋរងគ្រោះ ទៅទទួលអំណោយឲ្យបានឆាប់ ៖ «រាជរដ្ឋាភិបាល និងកាកបាទក្រហមសូមលោកចុះមកផ្ទាល់ដល់ឃុំច្បារអំពៅរបស់យើងខ្ញុំ ដែលលិចលង់ដោយទឹកជំនន់ពិតប្រាកដឲ្យផ្ដល់អំណោយឲ្យបានផ្ទាល់ដៃ។ ឲ្យឃើញពលរដ្ឋទទួលអំណោយឲ្យពិតប្រាកដ កុំឲ្យតាមរយៈបក្សពួកនិយមនេះ។ ចង់ឲ្យបានស្មើភាពអ្នកលិចទឹកដូចគ្នា»។
ពលរដ្ឋបន្តថា អំណោយសប្បុរសរបស់កាកបាទក្រហម និងរដ្ឋាភិបាល ចុះចែកជូនពលរដ្ឋរងគ្រោះនៅស្រុកបាធាយចំនួនពីរលើក កាលពីថ្ងៃទី២៩ ខែកញ្ញា ១លើក និងនៅថ្ងៃច័ន្ទ ទី៣ ខែតុលា គឺមានតែឈ្មោះពលរដ្ឋជាសាច់ញាតិ ឬបក្សពួករបស់អាជ្ញាធរឃុំ ឬស្រុកប៉ុណ្ណោះ រីឯពលរដ្ឋរងគ្រោះពិតប្រាកដមិនបានទទួលទេ។
ឆ្លើយតបការចោទប្រកាន់ អ្នកស្រី ពៅ សារឿន មេឃុំច្បារអំពៅ ស្រុកបាធាយ ខេត្តកំពង់ចាម។ អ្នកស្រីបានបដិសេធន៍នៅថ្ងៃទី២ ខែតុលា ថាអាជ្ញាធរមិនបានរើសអើងនិន្នាការនយោបាយ ឬក៏មានបក្សពួកនិយមក្នុងការស្រង់ឈ្មោះពលរដ្ឋរងគ្រោះទឹកជំនន់ ដើម្បីទទួលបានអំណោយនេះទេ។
អ្នកស្រីបន្តថា ពលរដ្ឋរងគ្រោះត្រូវទទួលអំណោយ គឺអាជ្ញាធរស្រង់យកតែពលរដ្ឋរងគ្រោះធ្ងន់ធ្ងរ ត្រូវជម្លៀសចេញពីលំនៅឋាន ទៅកាន់ទីទួលសុវត្ថិភាពទើបបានទទួលអំណោយ ៖ «ប្រជាពលរដ្ឋខ្លះគាត់លិចមែន ផ្ទះគាត់តែគាត់អាចរស់នៅបាន ផ្ទះគាត់ផ្ទះក្បឿងធំ។ ហើយយើងសង្គ្រោះនេះគឺសង្គ្រោះតែប្រជាពលរដ្ឋមានផ្ទះតូចតាចលិចដល់ដំបូល គឺសង្គ្រោះបន្ទាន់សិន។ ខ្ញុំអត់មានប្រកាន់បក្សនេះ ឬបក្សនោះអីទេ ឲ្យតែរងគ្រោះពិតប្រាកដសង្គ្រោះទាំងអស់»។
អ្នកស្រីឲ្យដឹងថា ឃុំច្បារអំពៅមានភូមិចំនួន៤ ត្រូវលិចទឹកទាំងស្រុង ហើយមានពលរដ្ឋចំនួនជិត ៤រយគ្រួសារទេ មានឈ្មោះទទួលអំណោយ។
លោក ឡោ ចន្នី ជាអភិបាលស្រុកបាធាយ ខេត្តកំពង់ចាម។ លោកឲ្យដឹងថា ក្នុងចំណោមឃុំចំនួន១២ ក្នុងមូលដ្ឋាននេះ មានឃុំចំនួន៦ ត្រូវទឹកលិចធ្ងន់ធ្ងរ។ លោកថា សម្រាប់ពលរដ្ឋរងគ្រោះលិចទឹកធ្ងន់ធ្ងរជិត ១ពាន់គ្រួសារ ត្រូវបានអាជ្ញាធរស្រង់ឈ្មោះឲ្យទទួលអំណោយសង្គ្រោះបន្ទាន់។ ចំណែកពលរដ្ឋមានផ្ទះលិចទឹក ប៉ុន្តែរស់នៅបាន មិនបានទទួលអំណោយទេ។ លោកបដិសេធន៍ថា អាជ្ញាធរមិនបានប្រព្រឹត្តិមិនគប្បីជុំវិញការចុះឈ្មោះពលរដ្ឋទទួលអំណោយ ដូចពលរដ្ឋមួយចំនួនចោទនោះទេ ៖ «យើងអត់មានបក្សពួកនិយមអីទេ។ ពីព្រោះគោលការណ៍ដែលយើងចែកនេះ គឺចែកអ្នកដែលលិចផ្ទះខ្លួនឯងស្នាក់នៅ ឬដេកអត់កើត ត្រូវជម្លៀសចល័តទៅនៅផ្ទះបងប្អូន ឬទីទួលសុវត្ថិភាព។ យើងអត់ចែកសម្រាប់ផ្ទះត្រឹមសរសេរផ្ទះគឺអត់ចែកឲ្យទេ»។
លោកបន្តថា ស្រុកបាធាយចាប់តាំងពីមានទឹកជំនន់កាលពីខែសីហា មកដល់ថ្ងៃទី២ ខែតុលា មានមនុស្សស្លាប់ចំនួន ១១នាក់។ ក្នុងនោះមាន ២នាក់ ទើបលង់ទឹកស្លាប់នៅព្រឹកថ្ងៃអាទិត្យ ទី២ ខែតុលា។
អាជ្ញាធរខេត្តកំពង់ចាមបានឲ្យដឹងថា គ្រោះទឹកជំនន់គិតចាប់ពីខែសីហា មកដល់ថ្ងៃទី២ ខែតុលា មានមនុស្សស្លាប់ប្រមាណ ៤០នាក់។ សព្វថ្ងៃនេះស្ថានការណ៍ទឹកទន្លេមេគង្គលើបានស្រកតិចតួច ប៉ុន្តែសម្រាប់ពលរដ្ឋមានលំនៅឋានតាមទន្លេសាបទឹកមិនទាន់ស្រកនៅឡើយទេ។
រហូតមកដល់ពេលនេះ អាជ្ញាធរបានឲ្យដឹងថា ចំនួនមនុស្សស្លាប់នៅទូទាំងប្រទេសកម្ពុជា គិតចាប់ពីខែសីហា មកដល់ថ្ងៃទី២ ខែតុលា ឆ្នាំ២០១១ អាចកើនជាង ១៥០នាក់ ក្នុងនោះមានកុមារជាង ៥០នាក់៕
0 comments:
Post a Comment