Print 
PDFដោយ រដ្ឋា វីសាល
2011-05-24
នៅ ឯតំបន់ព្រំប្រទល់ខេត្តមណ្ឌលគិរី និងខេត្តក្រចេះ មានការប្រឈមមុខដាក់គ្នារវាងក្រុមអាវុធហត្ថប្រដាប់អាវុធការពារ ក្រុមហ៊ុនសម្បទានសេដ្ឋកិច្ចមួយជាមួយប្រជាពលរដ្ឋជាសហគមន៍ជនជាតិដើម ភាគតិចព្នង ទាក់ទិននឹងជម្លោះកាប់ដើមឈើផលិតជ័រទឹករបស់អ្នកភូមិ។អ្នកភូមិនៃសហគមន៍ជនជាតិដើមភាគតិចព្នងនៅភូមិស្រែអំពិល ឃុំស្រែខ្ទុំ ស្រុកកែវសីមា ខេត្តមណ្ឌលគិរី ឲ្យដឹងនៅថ្ងៃអង្គារ ទី២៤ ខែឧសភា ឆ្នាំ២០១១ថា អ្នកភូមិចំនួន ៣នាក់ និងម៉ូតូប្រាំគ្រឿងត្រូវក្រុមអាវុធហត្ថការពារក្រុមហ៊ុនសម្បទាន សេដ្ឋកិច្ចឈ្មោះ សុវណ្ណ រាជសី មួយក្រុមបាញ់កាំភ្លើងគំរាម ហើយចាប់នាំខ្លួនទៅទីតាំងក្រុមហ៊ុន ខណៈដែលអ្នកភូមិចាប់ឃាត់យានយន្ត និងសម្ភារៈមួយចំនួនរបស់ក្រុមហ៊ុនផងដែរ។
ហេតុការណ៍នេះកើតមានឡើងកាលពីថ្ងៃច័ន្ទ ទី២៣ ខែឧសភា ឆ្នាំ២០១១ នៅចម្ងាយប្រមាណ ១គីឡូម៉ែត្រពីភូមិស្រែអំពិល បន្ទាប់ពីអ្នកភូមិប្រមាណ ៣០នាក់ កាលពីថ្ងៃទី២២ ខែឧសភា ឆ្នាំ២០១១ បានចាប់ឃាត់រថយន្តមួយគ្រឿង រណារយន្តពីរគ្រឿង និងឧបករណ៍លើកឈើមួយរបស់ក្រុមហ៊ុន បំណងយកមកធ្វើជាវត្ថុតាងជូនអាជ្ញាធរ បន្ទាប់ពីក្រុមហ៊ុនសម្បទានខាងលើចូលមកកាប់ដើមឈើផលិតទឹកជ័ររបស់ អ្នកភូមិរាប់រយដើមអស់គ្មានសល់ ចាប់តាំងពីខែមីនា ឆ្នាំ២០១១ រហូតមកដល់បច្ចុប្បន្ន។
តំណាងសហគមន៍ភូមិស្រែអំពិល លោក យ៉ែង ពង់ មានប្រសាសន៍បញ្ជាក់ថា តំបន់ព្រៃចំណុចអូរប៉ោ ស្ថិតក្នុងភូមិសាស្ត្រភូមិស្រែអំពិល ជាប់ព្រំប្រទល់ខេត្តក្រចេះ ជាតំបន់ដែលអ្នកភូមិជនជាតិដើមព្នងនៅតំបន់នោះនាំគ្នាចូលព្រៃ ស្វែងរកអនុផលព្រៃឈើ និងផលិតជ័រទឹកជាច្រើនឆ្នាំមកហើយ ក៏ប៉ុន្តែថ្មីៗនេះក្រុមហ៊ុនសម្បទានខាងលើបានចូលមកកាប់យកដើមឈើ សម្រាប់មុខរបររបស់អ្នកភូមិអស់ ទើបអ្នកភូមិសម្រេចចិត្តនាំគ្នាទៅស្ទាក់ចាប់រថយន្ត និងវត្ថុតាងដើម្បីប្រគល់ជូនអាជ្ញាធរមានសមត្ថកិច្ចជួយដោះស្រាយ ក៏ប៉ុន្តែក្រុមអាវុធហត្ថបានបាញ់កាំភ្លើង ហើយរំដោះយករថយន្តនោះបានវិញ។
លោក យ៉ែង ពង់ បានឲ្យបន្តដូច្នេះ ៖ «ដឹកឈើរណ្ដៅជ័រពួកខ្ញុំ ហ្នឹងណា! ពួកខ្ញុំហ្នឹងចាប់អូសយកឡានមកជិតដល់គោលដៅកន្លែងភូមិហើយ ពួកហ្នឹងជួលប៉េអឹមបាញ់សម្លុតពួកខ្ញុំ ៣គ្រាប់»។
អនុប្រធានភូមិស្រែអំពិល លោក ញ៉េវ នី មានប្រសាសន៍បញ្ជាក់ថា ពិតជាមានការប៉ះទង្គិច និងការបាញ់គំរាមដូចអ្នកភូមិរាយការណ៍មែន ក៏ប៉ុន្តែមិនមានគ្រោះថ្នាក់អ្វីក្នុងហេតុការណ៍នោះទេ ហើយនៅថ្ងៃដដែលនោះ ភាគីអាវុធហត្ថដែលចាប់ខ្លួនអ្នកភូមិ បានធ្វើការដោះលែងអ្នកភូមិទាំងបីនាក់ និងម៉ូតូបីគ្រឿងមកវិញ ដោយរក្សាទុកម៉ូតូ ២គ្រឿងដើម្បីជាថ្នូរនឹងកិច្ចសន្យាថា អ្នកភូមិនឹងប្រគល់សម្ភារៈរបស់ក្រុមហ៊ុនមកវិញ ហើយត្រូវបញ្ឈប់សកម្មភាពចាប់ឃាត់គ្រឿងសម្ភារៈរបស់ក្រុមហ៊ុនតទៅ ទៀត។
លោក ញ៉េវ នី បញ្ជាក់បន្ថែម ៖ «ឡានហ្នឹងគេយកវិញហើយ។ មុននឹងគេយកហ្នឹង ប៉េអឹមខាងក្រុមហ៊ុនហ្នឹងសម្លុត។ អត់មានមនុស្សការពារទេ មានតែសហគមន៍។ ក្រុមហ៊ុនហ្នឹងគឺកាត់ដើមជ័រអស់ហើយ»។
វិទ្យុអាស៊ីសេរីមិនអាចស្វែងរកអាសយដ្ឋាន និងការទាក់ទងសុំការបំភ្លឺករណីនេះពីក្រុមហ៊ុន សុវណ្ណ រាជសី បានទេ នៅថ្ងៃអង្គារ ទី២៤ ខែឧសភា ឆ្នាំ២០១១។
យ៉ាងនេះក្ដី មេឃុំស្រែអំពិល លោក ជាតិ សឹង មានប្រសាសន៍បញ្ជាក់ថា នៅព្រឹកថ្ងៃអង្គារ ទី២៤ ខែឧសភា ឆ្នាំ២០១១ លោកបានសម្របសម្រួលឲ្យក្រុមហ៊ុនប្រគល់ម៉ូតូដែលនៅសល់មកអ្នកភូមិ វិញ ហើយអ្នកភូមិក៏បានយល់ព្រមប្រគល់រណារយន្ត និងសម្ភារៈលើកឈើទៅឲ្យក្រុមហ៊ុនវិញដែរ។
លោកបន្តថា ដោយសារដើមឈើផលិតទឹកជ័ររបស់អ្នកភូមិត្រូវក្រុមហ៊ុនកាប់រំលំ អស់នោះ លោកកំពុងធ្វើការសម្របសម្រួលឲ្យក្រុមហ៊ុនផ្ដល់សំណងជាគោលនយោបាយដល់ អ្នកភូមិវិញ ដើម្បីបញ្ចប់ជម្លោះ ៖ «ដីដែលគាត់ធ្លាប់ទៅរកស៊ី ពីដើមៗមកហ្នឹង គឺនៅក្នុងតំបន់ដែលថា ប៉ះពាល់ជាប់ព្រំក្រចេះហ្នឹង។ ក្រុមហ៊ុនគាត់អះអាងថា ជាដីក្រុមហ៊ុនរបស់គាត់ ហើយខាងសហគមន៍ហ្នឹងទៅជីករណ្ដៅជ័ររបស់គាត់»។
ទាក់ទងនឹងទំនាស់អ្នកស្រុកជាមួយក្រុមហ៊ុនសម្បទានសេដ្ឋកិច្ចនេះ នាយខណ្ឌរដ្ឋបាលព្រៃឈើខេត្តមណ្ឌលគិរី លោក សុង ឃាង បញ្ជាក់ពីករណីនេះថា ៖ «ខ្ញុំដឹងហើយ កើតតាំងពីថ្ងៃអាទិត្យណោះ។ ដើមជ័រទឹកជាសិទ្ធិរបស់ប្រជាជន ប្រពៃណីរបស់គាត់តាមច្បាប់ព្រៃឈើ។ កិច្ចការនេះយើងកំពុងចាប់ផ្ដើមស្រាវជ្រាវមើលដែរហើយ ខ្ញុំកំពុងធ្វើការងារហ្នឹង»។
យ៉ាងនេះក្ដីអ្នកភូមិជាសហគមន៍ភូមិស្រែអំពិល ឲ្យដឹងថា ក្រុមហ៊ុនខាងលើបានតម្រូវឲ្យអ្នកភូមិបង់ប្រាក់ពិន័យ ៦១ម៉ឺនរៀលទៅក្រុមហ៊ុនជាថ្នូរនឹងការប្រគល់ម៉ូតូពីរគ្រឿងរបស់ អ្នកភូមិមកវិញ ហើយករណីនេះពួកគាត់អះអាងថា នឹងបន្តប្ដឹងតវ៉ាចំពោះសកម្មភាពរំលោភច្បាប់ និងសិទ្ធិជនជាតិដើមភាគតិចពីសំណាក់ក្រុមហ៊ុនខាងលើនេះ៕
0 comments:
Post a Comment