Print 
PDF
ក្រុមមន្ត្រីពាក់ព័ន្ធនឹងក្រុមហ៊ុនសម្បទានចិន យួន កំពុងឆ្លើយដាក់គ្នាអំពីសកម្មភាពកាប់បំផ្លាញព្រៃឈើនៅតំបន់ជម្រកសត្វព្រៃលំផាត់ ដែលប៉ុន្មានសប្តាហ៍មុននេះ អ្នកភូមិនិងអង្គការសង្គមស៊ីវិលចូលល្បាតក្នុងព្រៃ ហើយប្រទះឃើញគំនរឈើដែលបានកាប់បំផ្លាញថ្មីៗជាង ១៦០០០ដើមស្ថិតនៅរាយពេញព្រៃ ហើយត្រូវ បានគេដឹកជញ្ជូនយកទៅស្តុកទុកក្នុងទីតាំងក្រុមហ៊ុនដីសម្បទានរបស់យួនឈ្មោះ ហ៊ង អាន យ៉ាងអនាធិបតេយ្យបំផុតសម្រាប់នាំចេញទៅលក់នៅក្រៅប្រទេសផ្ទុយពីបទបញ្ជាលេខ ០១របស់លោកនាយករដ្ឋមន្ត្រី ហ៊ុន សែន។ គេមិនច្បាស់ទេថាតើនាយខណ្ឌរដ្ឋបាលព្រៃឈើខេត្តរតនគិរី ទទួលបានប្រយោជន៍ពីការរកស៊ីដឹកជញ្ជូនឈើខុសច្បាប់របស់ក្រុមហ៊ុន ហ៊ង អាន ឬក៏យ៉ាងណានោះទេ ទើបគេមិនដែលឃើញចាត់វិធានការបង្ក្រាបការរកស៊ីដឹកជញ្ជូនឈើខុសច្បាប់របស់ក្រុមហ៊ុននេះ។
ប្រជាពលរដ្ឋបានរាយការណ៍ថាក្រុមហ៊ុន ហ៊ង អាន ទទួលបានសិទ្ធិអភិវឌ្ឍន៍ដំណាំកៅស៊ូលើផ្ទៃដីរាប់ពាន់ហិកតានៅចំណុចឃុំតាឡាវ ស្រុកអណ្តូងមាស ខេត្តរតនគិរី ហើយក្រុមហ៊ុននេះមិនបានអភិវឌ្ឍន៍ដំ ណាំកៅស៊ូជាដុំកំភួនតាមកិច្ចសន្យាជាមួយរដ្ឋាភិបាលនោះទេ ប៉ុន្តែតំ ណាងរបស់ក្រុមហ៊ុន ហ៊ង អាន បាន ធ្វើសកម្មភាពជួញដូរឈើប្រណីតខុសច្បាប់ច្រើនឆ្នាំមកហើយ។ អ្វីដែលគួរឲ្យកត់សម្គាល់នោះគឺ ក្នុងថ្ងៃបុណ្យចូលឆ្នាំខ្មែរ ទី១៦ ខែមេសា ឆ្នាំ២០១៣ កន្លងមកនេះ តំណាងរដ្ឋបាលព្រៃឈើបានចុះល្បាតហើយរកឃើញឈើប្រណីតរាប់រយកំណាត់ ដែលត្រូវបានក្រុមឈ្មួញស្តុកទុកក្នុងទីតាំងក្រុមហ៊ុន ហ៊ង អាន ដោយមានធ្វើរបងស័ង្កសី ហ៊ុំព័ទ្ធពីខាងក្រៅ និងដាក់បារ៉ាស់មិនឲ្យអ្នកដទៃចូលទៅក្បែរឡើយ ហើយឈើប្រណីតទាំងនោះភាគច្រើនប្រភេទបេង ធ្នង់ នាងនួន សុទ្ធតែជាឈើមានតម្លៃ សម្រាប់នាំចេញ ទៅក្រៅប្រទេស។
មានការបញ្ជាក់ផងដែរថា ក្រុមហ៊ុន ហ៊ង អាន បានលួចលាក់ធ្វើសកម្មភាពរកស៊ីដឹកជញ្ជូនឈើខុសច្បាប់ចេញទៅលក់នៅក្រៅប្រទេសជាច្រើនឆ្នាំមកហើយពោលគឺក្រុមហ៊ុន ហ៊ង អាន គ្រាន់តែយកអាជ្ញាប័ណ្ណក្រុមហ៊ុនសម្បទានមកបិទបាំងសកម្មភាពរកស៊ីឈើខុសច្បាប់របស់ពួកគេតែប៉ុណ្ណោះ ដែលទាមទារឲ្យរដ្ឋ មន្ត្រីក្រសួងកសិកម្មលោកច័ន្ទ សារុន ពិនិត្យមើលបញ្ហានេះឡើង វិញជាបន្ទាន់ មិនគួរបណ្តែតបណ្តោយឲ្យក្រុមហ៊ុន ហ៊ង អាន ធ្វើអ្វីៗតាមតែអំពើចិត្តនោះទេ ព្រោះរដ្ឋាភិបាលកម្ពុជា បានចេញបទបញ្ជាលេខ០១ ក្នុងការបង្ការបង្ក្រាបទប់ស្កាត់ការដឹកជញ្ជូននិងការនាំចេញឈើខុសច្បាប់ចេញទៅក្រៅប្រទេសរួចហើយ។ ក្រុមហ៊ុន ហ៊ង អាន បានទទួលទិញឈើដែលក្រុមឈ្មួញតូចតាចកាប់បំផ្លាញនៅតាមតំបន់ជម្រកសត្វព្រៃឬតំបន់អភិរក្សមួយចំនួន យកទៅលក់ឲ្យក្រុមហ៊ុននេះទាំងយប់ទាំងថ្ងៃ ដូចជាការដឹកជញ្ជូនតាមរថយន្តកាមរីហើម និងរថយន្តកែច្នៃ ហើយឃ្លាំងស្តុកឈើប្រណីតនៅក្នុងក្រុមហ៊ុន ហ៊ង អាន នេះទៀតសោតមិនបានសុំការអនុញ្ញាតពីមន្ត្រីជំនាញនិងសមត្ថកិច្ចពាក់ព័ន្ធនោះទេ។
មន្ត្រីតូចតាចមួយចំនួនបានបង្ហើបឲ្យដឹងថា ក្រុមហ៊ុន ហ៊ង អាន មានសិទ្ធិដឹកជញ្ជូនឈើប្រភេទលេខ២ ដែលត្រូវបានកាប់បំផ្លាញនៅក្នុងបរិវេណដីក្រុមហ៊ុនរាប់ពាន់ហិកតា របស់ខ្លួន ហើយឈើប្រណីតដែលប្រមូលទិញពីតំបន់ផ្សេងៗយកទៅស្តុកទុកក្នុងបរិវេណរបស់ក្រុមហ៊៊ុន ហ៊ង អាន ត្រូវបានដឹកជញ្ជូនចេញដោយបង្កប់នៅពីក្រោមឈើក្រហម ឬឈើប្រភេទលេខ២ យ៉ាងអនាធិបតេយ្យបំផុត ហើយយូរៗម្តងមន្ត្រីជំនាញនិងសមត្ថកិច្ចពាក់ព័ន្ធសុំចូលទៅត្រួតពិនិត្យក៏ចេញមកវិញបន្ទាប់ពីមានការត្រូវរ៉ូវគ្នាលើបញ្ហាផលប្រយោជន៍។ ក្រុមហ៊ុន ហ៊ង អាន ដែលកំពុងតែរកស៊ីដឹកជញ្ជូនឈើខុសច្បាប់យ៉ាងអនាធិបតេយ្យមិនខ្លាចបញ្ជារបស់រដ្ឋាភិបាល មិនដឹងជាបង់ពន្ធជូនរដ្ឋសម្រាប់ការកាប់បំផ្លាញព្រៃ ឈើដ៏រាលដាលបានប៉ុន្មាននោះទេ ក្នុងមួួយឆ្នាំៗ ព្រោះជាគោលការណ៍ក្រុមហ៊ុនសម្បទានត្រូវបង់ពន្ធជូនរដ្ឋនៅពេលដឹកជញ្ជូនឈើចេញពីដីសម្បទានធ្វើអាជីវកម្ម។
កន្លងមកមន្ត្រីជំនាញ និងសមត្ថកិច្ចពាក់ព័ន្ធមិនបានយកចិត្ត ទុកដាក់ជំរុញឲ្យក្រុមហ៊ុនសម្បទាន អស់ទាំងនោះអនុវត្តន៍ឲ្យបានត្រឹមត្រូវតាមច្បាប់នោះទេ គ្រាន់តែនាំគ្នា ទៅប្រមូលផលប្រយោជន៍យកទៅធ្វើមានធ្វើបានផ្ទាល់ខ្លួនប៉ុណ្ណោះ មិន ដែលខ្វល់ខ្វាយអ្វីឡើយ ដូចជាបទបញ្ជាលេខ០១របស់រដ្ឋាភិបាលដែលសំដៅបង្ការបង្ក្រាបទប់ស្កាត់ ការដឹកជញ្ជូននិងការនាំចេញឈើខុសច្បាប់មិនត្រូវបានមន្ត្រីជំនាញនិងសមត្ថកិច្ចពាក់ព័ន្ធអើពើនោះទេ ព្រោះការប្រ មូលលុយច្រកហោប៉ៅវាងាយស្រួលជាងការទៅត្រួតពិនិត្យឬការបង្ក្រាបការដឹកជញ្ជូនឈើខុសច្បាប់។ សូមបញ្ជាក់ថា សកម្មភាពដឹកជញ្ជូនឈើខុសច្បាប់នៅតំបន់ភូមិភាគឦសានចាប់ផ្តើមកម្រើកឡើងវិញគួរឲ្យកត់សម្គាល់ បង្ហាញយ៉ាងច្បាស់ថា បទបញ្ជាលេខ០១ របស់លោក ហ៊ុន សែន គ្មានប្រសិទ្ធអនុវត្តន៍ទៀតទេ បើទោះបីជាលោក ឧបនាយករដ្ឋមន្ត្រី យឹម ឆៃលី ធ្លាប់បានចុះទៅផ្សព្វផ្សាយបទបញ្ជារបស់រដ្ឋាភិបាលនៅទីនោះច្រើនលើក ច្រើនសាររួចហើយក៏ដោយ គឺទាមទារឲ្យលោក ហ៊ុន សែន ពិនិត្យមើលឡើងវិញជាបន្ទាន់លើបញ្ហានេះ ហើយមិនត្រូវមើលរំលងសមត្ថកិច្ចពុករលួយ និងក្រុមហ៊ុនបំពានច្បាប់នោះទេ៕
0 comments:
Post a Comment