នៅក្នុងទិវាពលកម្មអន្តរជាតិលើកទី១២៧ ថ្ងៃទី០១ ខែឧសភា ឆ្នាំ២០១៣ បានបង្ហាញឱ្យឃើញយ៉ាងច្បាស់អំពីកម្រិតជីវភាពដ៏លំបាករបស់កម្មករ-កម្មការិនី និយោជិត និងមន្ត្រីរាជការនៅក្នុងប្រទេសកម្ពុជាដោយសារតែពួកគេមានប្រាក់ខែតិចតួចមិនអាចទប់ទល់តម្លៃប្រេងសាំង និងទំនិញលើទីផ្សារដែលមានការកើនឡើងយ៉ាងគំហុក។ នៅក្នុងការដង្ហែក្បួនរបស់សហជីពធំៗមួយចំនួនដែលមានកម្មករ-កម្មការិនី និងអ្នកចូលរួមប្រមាណ១០០០០នាក់ គឺកម្មករ-កម្មការិនីបានទាមទារឱ្យមានការដំឡើងប្រាក់ខែសមរម្យដល់ពួកគេ ហើយទាមទារឱ្យរដ្ឋាភិបាលលោក ហ៊ុន សែន បញ្ចុះតម្លៃប្រេងសាំងឱ្យនៅត្រឹម ៣៥០០រៀល ក្នុង១លីត្រផងដែរ។ ការទាមទាររបស់សហជីព និងកម្មករ-កម្មការិនីក្នុងទិវាពលកម្មអន្តរជាតិថ្ងៃទី០១ ខែឧសភា ឆ្នាំ២០១៣ បានបង្ហាញយ៉ាងច្បាស់ថារដ្ឋាភិបាលលោក ហ៊ុន សែន មិនបានយកចិត្តទុកដាក់ចំពោះជីវភាពរស់នៅរបស់ប្រជាពលរដ្ឋ កម្មករ-កម្មការិនី មន្ត្រីរាជការ និងកងកម្លាំងប្រដាប់អាវុធទូទៅនោះឡើយ។
តាមពិនិត្យជាក់ស្តែងមានតែគោលនយោបាយរបស់គណបក្សសង្គ្រោះជាតិដែលមានលោក សម រង្ស៊ី ជាប្រធានប៉ុណ្ណោះទើបមានការយកចិត្តទុកដាក់យ៉ាងខ្លាំងទៅលើជីវភាពរស់នៅរបស់ពលរដ្ឋ កម្មករ-កម្មការិនី មន្ត្រីរាជការ និងកម្លាំងប្រដាប់អាវុធទូទៅដែលកំពុងប្រឈមនឹងការលំបាកសព្វបែបយ៉ាង។ ដូច្នេះនៅក្នុងការបោះឆ្នោតជាតិអាណត្តិទី៥ ថ្ងៃទី២៨ ខែកក្កដាឆាប់ៗខាងមុខនេះប្រជាពលរដ្ឋ កម្មករ-កម្មការិនី មន្ត្រីរាជការ និងកម្លាំងប្រដាប់អាវុធទូទាំងប្រទេសត្រូវបោះឆ្នោតគាំទ្រគណបក្សសង្គ្រោះជាតិដើម្បីផ្លាស់ប្តូរជីវភាពរស់នៅរបស់ខ្លួនឱ្យបានប្រសើរជាងបច្ចុប្បន្ន។
នៅក្នុងទិវាពលកម្មអន្តរជាតិលើកទី១២៧ ថ្ងៃទី០១ ខែឧសភា ឆ្នាំ២០១៣ សហជីពធំៗមួយចំនួនទាមទារឱ្យរាជរដ្ឋាភិបាលកំណត់ប្រាក់ខែគោលកម្មករ-កម្មការិនី មន្ត្រីរាជការ កម្លាំងប្រដាប់អាវុធគ្រប់ប្រភេទនិងបញ្ចុះតម្លៃប្រេងសាំងដែលខ្ពស់ហួសហេតុនោះឱ្យមកនៅត្រឹម ៣៥០០រៀល ក្នុង១លីត្រ។ នៅក្នុងសេចក្តីថ្លែងការណ៍រួមរបស់តំណាងសហជីព ចែកចាយដល់បណ្តាញព័ត៌មានបានឱ្យដឹងថាសហជីពធំៗ ត្រូវដង្ហែក្បួនពីសួនប្រជាធិបតេយ្យទៅកាន់រដ្ឋសភាដោយទាមទារឱ្យរាជរដ្ឋាភិបាលបញ្ចុះតម្លៃប្រេងសាំង មកនៅត្រឹម៣៥០០រៀល។ នៅព្រឹកថ្ងៃទី០១ ខែឧសភា ក្បួនដង្ហែបានប្រព្រឹត្តទៅតាមការគ្រោងទុកដោយមានអ្នកចូលរួមប្រមាណ១០០០០នាក់ ហើយការទាមទារ គឺធ្វើឡើងដូចមានការផ្សព្វផ្សាយក្នុងសេចក្តីថ្លែងការណ៍រួមរបស់តំណាងសហជីព។ សហជីពធំៗទាំងនោះស្នើឱ្យកំណត់ប្រាក់ឈ្នួលអប្បបរមាសម្រាប់កម្មករគ្រប់វិស័យយ៉ាងតិច ១៥០ដុល្លារ ក្នុងមួយខែ។ សម្រាប់ប្រាក់បៀវត្សរ៍គ្រូបង្រៀន មន្ត្រីរាជការ និងកម្លាំងប្រដាប់អាវុធទូទៅត្រូវមានប្រាក់ខែអប្បបរមា ១លានរៀលក្នុងមួយខែ ទើបពួកគេអាចមានជីវភាពរស់នៅសមរម្យនិងធ្វើការបម្រើប្រទេសជាតិឱ្យអស់ពីកម្លាំងកាយចិត្ត។
នៅក្នុងការទាមទាររបស់សហជីពធំៗដែលដឹកនាំដង្ហែក្បួនអបអរទិវាពលកម្មអន្តរជាតិលើកទី១២៧ បានលើកឡើងទៀតថារាជរដ្ឋាភិបាលគួរផ្តល់ប្រាក់ឧបត្ថម្ភដល់មន្ត្រីរាជការ កម្លាំងប្រដាប់អាវុធទូទៅក្នុងឱកាសបុណ្យចូលឆ្នាំ និងបុណ្យភ្ជុំបិណ្ឌចំនួន ៦មុឺនរៀល។ លើសនេះទៅទៀតសហជីពទាំងនោះសុំឱ្យរាជរដ្ឋាភិបាលជំរុញឱ្យថៅកែរោងចក្រ សហគ្រាសក្រុមហ៊ុននានាតម្កល់ប្រាក់អតីតភាពការងារកម្មករនៅក្នុងរតនាគារជាតិដើម្បីបើកជូនកម្មករពេលក្រុមហ៊ុនក្ស័យធន ឬបិទទ្វារ ព្រមទាំងធានាឱ្យមានការគោរពច្បាប់ការងារនៃប្រទេសកម្ពុជា។ ជាមួយគ្នានេះក្រុមហ៊ុនត្រូវលុបបំបាត់កិច្ចសន្យារយៈពេលខ្លីដែលប៉ះពាល់ដល់ផលប្រយោជន៍ និងសិទ្ធិរបស់កម្មករ ហើយជំរុញឱ្យតុលាការចាត់វិធានការករណីបាញ់កម្មការិនីនៅក្រុងបាវិតឱ្យមានយុត្តិធម៌ និងស្វែងរកឃាតកពិតបាញ់សម្លាប់លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជាយកទៅផ្តន្ទាទោសតាមច្បាប់។ ការទាមទារបែបនេះត្រូវបានក្រុមមន្ត្រីសង្គមស៊ីវិលដែលឃ្លាំមើលស្ថានភាពរស់នៅរបស់មន្ត្រីរាជការ កម្លាំងប្រដាប់អាវុធ និងកម្មករ-កម្មការិនីខ្មែរបានទទួលស្គាល់ថាជារឿងសមស្រប ព្រោះកន្លងមករដ្ឋាភិបាលលោក ហ៊ុន សែន មិនបានយកចិត្តទុកដាក់ឱ្យដិតដល់ចំពោះជីវភាពរស់នៅរបស់ប្រជាពលរដ្ឋ មន្ត្រីរាជការ កម្លាំងប្រដាប់អាវុធ និងកម្មករ-កម្មការិនីទូទាំងប្រទេសឡើយ។
អ្នកសង្កេតការណ៍មួយចំនួនបានកត់សម្គាល់ថាកន្លងមកកម្មករ-កម្មការិនីខ្មែរតែងតែនាំគ្នាធ្វើបាតុកម្មជាបន្តបន្ទាប់ដើម្បីឱ្យរាជរដ្ឋាភិបាលគិតគូរដំឡើងប្រាក់ខែដល់ពួកគេឱ្យបានយ៉ាងតិច ១៥០ដុល្លារ ឬ៦០មុឺនរៀល ដើម្បីពួកគេអាចរស់នៅក្នុងជីវភាពសមរម្យ ព្រោះប្រេងសាំងនិងទំនិញលើទីផ្សារចេះតែឡើងថ្លៃឥតឈប់ឈរ។ ក៏ប៉ុន្តែលោកនាយករដ្ឋមន្ត្រី ហ៊ុន សែន តែងតែដោះសាបិទបាំងរឿងមិនអាចដំឡើងប្រាក់ខែដល់កម្មករ-កម្មការិនីឱ្យរស់នៅក្នុងជីវភាពសមរម្យ ហើយការទាមទាររបស់កម្មករ-កម្មការិនីបានទទួលលទ្ធផលតិចតួចបំផុត។ ទន្ទឹមនឹងនេះថៅកែរោងចក្រសហគ្រាសកាត់ដេរមួយចំនួនបានលើកឡើងថាប្រសិនបើលុបបំបាត់អំពើពុករលួយក្នុងវិស័យកាត់ដេរ គឺពួកគេអាចមានលុយដំឡើងប្រាក់ខែដល់កម្មករ-កម្មការិនីតាមការទាមទារជាមិនខាន។ ថៅកែរោងចក្រ សហគ្រាសកាត់ដេរទាំងនោះបានបង្ហើបប្រាប់មន្ត្រីគណបក្សប្រឆាំង និងក្រុមសង្គមស៊ីវិលថា ប្រសិនបើពួកគេមិនចំណាយក្រោមតុច្រើនតទៅទៀត គឺអាចដំឡើងប្រាក់ខែដល់កម្មករ-កម្មការិនីឱ្យរស់នៅក្នុងជីវភាពសមរម្យប្រមាណ ៨០មុឺនរៀលក្នុងមួយខែ។
សម្រាប់មន្ត្រីរាជការ គ្រូបង្រៀន និងកងកម្លាំងប្រដាប់អាវុធទូទៅកំពុងរស់នៅក្នុងស្ថានភាពលំបាកយ៉ាងខ្លាំងដោយសារពួកគេមានប្រាក់ខែតិចតួច ហើយប្រេងសាំង និងទំនិញលើទីផ្សារចេះតែឡើងថ្លៃយ៉ាងគំហុកធ្វើឱ្យប៉ះពាល់ដល់ជីវភាពរស់នៅរបស់ពួកគេ។ នៅពេលដែលគ្រូបង្រៀន មន្ត្រីរាជការ និងកម្លាំងប្រដាប់អាវុធទូទៅទាមទារឱ្យមានការដំឡើងប្រាក់ខែ គឺលោកនាយករដ្ឋមន្ត្រី ហ៊ុន សែន ប្រើពាក្យដោះសាដដែលៗដោយអះអាងថារដ្ឋគ្មានលុយសម្រាប់ដំឡើងប្រាក់ខែដល់គ្រូបង្រៀន មន្ត្រីរាជការ និងកម្លាំងប្រដាប់អាវុធបានឡើយ។ ប៉ុន្តែជាមួយគ្នានេះគេឃើញមេដឹកនាំ និងមន្ត្រីជាន់ខ្ពស់ក្នុងជួររាជរដ្ឋាភិបាលមានជីវភាពធូរធារ មានទ្រព្យសម្បត្តិយ៉ាងមហាសាលដោយសារតែពួកគេអាចប្រព្រឹត្តអំពើពុករលួយលួចជាតិបំផ្លាញជាតិស្រេចតែអំពើចិត្ត។ លើសនេះទៅទៀតក្រោមការដឹកនាំរបស់លោកនាយករដ្ឋមន្ត្រី ហ៊ុន សែន និងគណបក្សប្រជាជនកម្ពុជារយៈពេលជាង៣៤ឆ្នាំ កន្លងទៅនេះពុំបានធ្វើឱ្យប្រទេសជាតិមានការរីកចម្រើនដូចប្រទេសជិតខាងនិងប្រទេសក្នុងតំបន់ឡើយ ហើយប្រជាពលរដ្ឋប្រមាណ៤០ភាគរយបន្តរស់ក្រោមបន្ទាត់នៃភាពក្រីក្រ ប្រឈមហានិភ័យខ្វះស្បៀងអាហារងើបមិនរួច។
អ្នកតាមដានស្ថានការណ៍នយោបាយ និងបញ្ហាសង្គមក្នុងប្រទេសកម្ពុជាបានកត់សម្គាល់ថានៅក្នុងការបោះឆ្នោតជាតិអាណត្តិទី៥ ថ្ងៃទី២៨ ខែកក្កដា ខាងមុខនេះមានតែគណបក្សធំៗពីរប៉ុណ្ណោះ ដែលមានកម្លាំងអាចប្រកួតប្រជែងគ្នាបាន គឺគណបក្សប្រជាជនរបស់លោក ហ៊ុន សែន និងគណបក្សសង្គ្រោះជាតិក្រោមការដឹកនាំរបស់លោក សម រង្ស៊ី។ ក្នុងចំណោមគណបក្សទាំងពីរនេះមានតែគណបក្សសង្គ្រោះជាតិទេដែលមានគោលនយោបាយច្បាស់លាស់ក្នុងការលើកកម្ពស់ជីវភាពរស់នៅរបស់ប្រជាពលរដ្ឋ កម្មករ-កម្មការិនី មន្ត្រីរាជការ គ្រូបង្រៀន និងកម្លាំងប្រដាប់អាវុធនៅទូទាំងប្រទេស។ ដូច្នេះនៅក្នុងការបោះឆ្នោតថ្ងៃទី២៨ ខែកក្កដាខាងមុខប្រជាពលរដ្ឋ កម្មករ-កម្មការិនី មន្ត្រីរាជការ គ្រូបង្រៀននិងកម្លាំងប្រដាប់អាវុធទូទៅត្រូវបោះឆ្នោតគាំទ្រគណបក្សសង្គ្រោះជាតិដើម្បីឱ្យគណបក្សនេះទទួលបានជ័យជំនះ ហើយអនុវត្តន៍ឱ្យបានជោគជ័យទៅតាមគោលនយោបាយរបស់ខ្លួន។ ហេតុនេះការបោះឆ្នោតគាំទ្រគណបក្សសង្គ្រោះជាតិ គឺជារឿងត្រឹមត្រូវ ព្រោះលោក សម រង្ស៊ី ធ្លាប់ចូលរួមតវ៉ាឱ្យមានការដំឡើងប្រាក់ខែដល់មន្ត្រីរាជការ គ្រូបង្រៀន កម្លាំងប្រដាប់អាវុធទូទៅ និងកម្មករ-កម្មការិនីជាបន្តបន្ទាប់ផងដែរ។ នៅពេលដែលគណបក្សសង្គ្រោះជាតិឈ្នះឆ្នោត ហើយដឹកនាំរាជរដ្ឋាភិបាល គឺគណបក្សនេះអាចលើកកម្ពស់ជីវភាពរស់នៅរបស់ពលរដ្ឋខ្មែរឱ្យបានល្អប្រសើរជាងបច្ចុប្បន្នជាមិនខាន ព្រោះគោលនយោបាយគណបក្សសង្គ្រោះជាតិស្របទៅតាមសេចក្តីត្រូវការជាក់ស្តែងរបស់ប្រជាពលរដ្ឋខ្មែរ៕
0 comments:
Post a Comment