Print 
PDF
ស្ថានភាពនៃការហូរចូលទំនិញពី ស្រុកសៀមតាមច្រកស្រែអំបិលដែលកាន់តែគគ្រឹកគគ្រេងមានរថយន្តធំតូចដឹកជញ្ជូនទំនិញសឹងខូងផ្លូវទៅហើយ ប៉ុន្តែប្រភពចំណូលពីការបង់ពន្ធទំនិញមានតិចតួចប៉ុណ្ណោះ ក៏ព្រោះតែលោក កុក ឆាយ ដែលជាប្រធានការិយាល័យគយប្រចាំច្រកស្រែអំបិលមានជំនាញសម្របសម្រួល ឲ្យក្រុមឈ្មួញរកស៊ីនាំចូលទំនិញគេចពន្ធនិងទំនិញខុសច្បាប់ ហើយការបង់ពន្ធជាក់ស្តែងមិនបាន២០ភាគរយផងទេ។ ដូច្នេះអគ្គនាយកគយនិងរដ្ឋាករជាពិសេសអង្គភាពប្រឆាំងអំពើពុករលួយត្រូវតែចាត់វិធានការលុបបំបាត់អំពើរត់ពន្ធទំនិញខុសច្បាប់នៅច្រកស្រែអំបិលជាបន្ទាន់ ដែលយ៉ាងហោចណាស់អាចបង្កើនចំណូលថវិកាជាតិ និងរួមចំណែកលុបបំបាត់អំពើពុករលួយឲ្យមានប្រសិទ្ធភាពផងដែរ។
ក្រុមឈ្មួញរកស៊ីដឹកជញ្ជូនទំនិញតាមច្រកស្រែអំបិលមួយចំនួនបានលើកឡើងថា ទំនិញខុសច្បាប់និងមិនបង់ពន្ធអាចនាំចូលតាមច្រកស្រែអំបិលយ៉ាងរលូនល្អដោយគ្រាន់ តែទាក់ទងជាមួយលោក កុក ឆាយ ដែលមានជំនាញសម្របសម្រួលឲ្យក្រុមឈ្មួញនាំចូលទំនិញតាមតែអំពើចិត្ត ហើយការបង់ពន្ធជាក់ស្តែងចូលជាថវិកាជាតិមានតិចតួចបំផុតសឹងថាមិនស្មើនឹងផលប្រយោជន៍ដែលហូរចូលហោប៉ៅរបស់មន្ត្រីគយពុករលួយនោះទេ។ អគ្គនាយកគយនិងរដ្ឋាករគួរស៊ើបអង្កេតឡើងវិញពីសកម្មភាពដែលក្រុមឈ្មួញនាំចូលទំនិញតាមច្រកស្រែអំបិល ដែលមិនមានតុល្យភាពទៅនឹងប្រាក់ចំណូលដែលបានមកពីការបង់ពន្ធ ហើយបញ្ហាមួយចំនួនទៀតដូចជាក្រុមឈ្មួញជាអ្នកចេញមុខបង់ប្រាក់ពន្ធនាំចូលនៅច្រកស្រែអំបិលទៅតាមការកំណត់របស់អគ្គនាយកគយមិនឲ្យបាត់មួយរៀល ប៉ុន្តែជំនាញគយនៅទីនោះមិនត្រូវប៉ះពាល់ការនាំចូលទំនិញរបស់ពួកគេ ហើយបើសិនរឿងនេះជាការពិតអាចចាត់ទុកជាកំហុសឆ្គងធ្ងន់ធ្ងរបំផុតរបស់លោក កុក ឆាយ មេគយស្រែអំបិល។
កម្មករលើកដាក់ទំនិញនៅផែស្រែអំបិលជាច្រើនបានលើកឡើងថា នៅពេលមានទូកដឹកទំនិញចូលច្រកស្រែអំបិលម្តងៗគឺក្នុងមួយទូកមានផ្ទុកទំនិញរាប់ពាន់តោន ហើយទូកមួយគ្រឿងដែលដឹកទំនិញមកពីស្រុកសៀមចូលតាមច្រកស្រែអំបិលយ៉ាងហោចណាស់ក៏ត្រូវប្រើប្រាស់រថយន្តយីឌុបខ្នាតយក្សប្រមាណ១០ គ្រឿងចាំសាងទំនិញពីទូកដឹកជញ្ជូនមកកាន់រាជធានីភ្នំពេញ។ សកម្មភាពនាំចូលទំនិញតាមច្រកស្រែអំបិល គឺមិនចាញ់ច្រកព្រំដែនផ្សេងៗទៀតនោះទេ ប៉ុន្តែចំណូលពន្ធវិញក៏គ្មានអ្វីជាដុំកំភួននោះដែរ ព្រោះចំណូលភាគច្រើនត្រូវបាត់បង់ដោយសារអំពើពុករលួយ ដូចដែលមន្ត្រីតូចតាចមួយចំនួនបានបង្ហើបឲ្យដឹងថា កាលពីប៉ុន្មានសប្តាហ៍មុននេះ មានការនាំចូលទំនិញខុសច្បាប់និងទំនិញចម្រុះមួយទូកត្រូវបានសាងដាក់រថយន្តយីឌុបប្រមាណ៦គ្រឿង ប៉ុន្តែចំណូលដែលបានមកពីការបង់ពន្ធគឺមិនបាន៥លានរៀលផងទេ បើទោះបីជាគេវាយតម្លៃពីប្រភេទទំនិញដែលនាំចូលនោះ មានតម្លៃមិនតិចជាង១លានដុល្លារអាមេរិក ហើយចំណូលពន្ធប្រមាណ៥លានរៀលនោះ គឺគេគិតតែពន្ធនាំចូលសម្រាប់ទឹកដោះគោ និងទំនិញតូចតាចប៉ុណ្ណោះ។
មន្ត្រីតូចតាចបានបង្ហើបឲ្យដឹងទៀតថា ទំនិញជាច្រើនប្រភេទដូចជាទំនិញដែលមានកេសឈើគឺគេស្គាល់យ៉ាងច្បាស់ថា ជាប្រភេទទូរស័ព្ទដៃទំនើបៗយកមកលក់តាមទីផ្សារក្នុងមួយគ្រឿងតម្លៃមិនតិចជាង៥០០ដុល្លារអាមេរិកនោះទេ ហើយសម្រាប់កេសក្រហមៗវិញ គឺគេសម្គាល់ទៅលើស្រា ចននីវ៉កឃើ ដែលមានតម្លៃបំផុត ហើយមានការនាំចូលជាប់ជាប្រចាំតាមច្រកស្រែអំបិល ដោយបំពានទៅលើសិទ្ធិផ្តាច់មុខរបស់ក្រុមហ៊ុន អ៊ែតវូត ផងដែរ។ មានការបញ្ជាក់ផងដែរថា លោក កុក ឆាយ មិនដែលក្រែងញញើតអ្វីឡើយ ក្នុងការឃុបឃិតឲ្យក្រុមឈ្មួញនាំចូល ទំនិញខុសច្បាប់តាមច្រកស្រែអំបិលទាំងយប់ទាំងថ្ងៃដូចជាករណីនាំចូល ស្រាថ្លៃៗដែលបំពានលើសិទ្ធិផ្តាច់មុខ របស់ក្រុមហ៊ុនស្របច្បាប់ ក៏ដូចជាការឃុបឃិតឲ្យនាំទំនិញប្រភេទទូរស័ព្ទដៃទំនើបៗដែលមានការសម្រប សម្រួលបង់ពន្ធជាប្រភេទទូរស័ព្ទចិន ឬគ្មានការបង់ពន្ធទាំងស្រុងតែម្តង។
ជំនាញគយប្រចាំច្រកស្រែអំបិល ធ្លាប់មានបញ្ហាប្រទាំងប្រទើសជាមួយសមត្ថកិច្ចនគរបាលដែលជាប្រធានច្រកកាលពីប៉ុន្មានឆ្នាំមុននៅពេលដែលក្រុមឈ្មួញនាំចូលទំនិញមិនប្រក្រតីនិងមានការបង់តិចតួច ដែលមិនសមទំនងសមត្ថកិច្ចនគរបាលក៏បានហៅអ្នកកាសែតឲ្យទៅជួយពិនិត្យមើលធ្វើឲ្យបែករឿងអាស្រូវពុករលួយរបស់មន្ត្រីគយហើយ កាលនោះលោក កែវ សុខឃាង ក្នុងតួនាទីជាមេគយចល័តបានចុះទៅពិ និត្យមើលជាក់ស្តែងក្នុងការលើកដាក់ ទំនិញដើម្បីរាប់ឡើងវិញ រកឃើញភាពមិនប្រក្រតីជាច្រើន ប៉ុន្តែក្រោយមកប្រធានច្រកដែលហ៊ានធ្វើឲ្យបែករឿងអាស្រូវរបស់ជំនាញគយ ត្រូវបានគេដកហូតពីមុខតំណែង។ បន្តមកទៀតមានការតែងតាំងប្រធានច្រកស្រែអំបិល ប៉ុន្តែមន្ត្រីក្រោយៗមិនហ៊ានធ្វើឲ្យប៉ះពាល់អារម្មណ៍របស់ជំនាញគយទេ នៅពេលមានកញ្ចប់បែងចែកផលប្រយោជន៍ជាប់ជាប្រចាំដែលក្រុមឈ្មួញចេះចែករំលែកឲ្យទៅប្រធានច្រកដើម្បីកុំឲ្យមុខជំនួញរកស៊ីនាំចូលទំនិញគេចពន្ធនិងទំនិញខុសច្បាប់របស់ពួកគេត្រូវបែកខ្ចរខ្ចាយ។
បើយោងតាមកម្មករលើកដាក់ទំនិញមួយចំនួនបានឲ្យដឹងថាទំនិញ ប្រភេទម៉ូតូគុបឬរថយន្តទំនើបក៏ត្រូវ បាននាំចូលតាមច្រកស្រែអំបិលនេះផងដែរដោយមានការសម្របសម្រួល ពីលោក កុក ឆាយ ដែលធ្លាប់មានរឿងអាស្រូវពុករលួយ ហើយក៏ធ្លាប់មានស្ត្រីម្នាក់ប្តឹងទៅកាន់អគ្គនាយកដ្ឋានគយនិងក្រសួងសេដ្ឋកិច្ចឲ្យជួយអន្តរាគមន៍រកយុត្តិធម៌ផងដែរ។ ក្រុម ឈ្មួញដ៏មានអំណាចដែលរកស៊ីដឹកជញ្ជូនទំនិញខុសច្បាប់សឹងប៉ាវផ្តាច់នៅច្រកស្រែអំបិលក៏បានជួយជ្រោមជ្រែងផ្តល់លុយឲ្យជំនាញគយយកទៅបង់ចូលជាថវិកាជាតិប្រចាំខែទៅតាមការកំណត់របស់អគ្គនាយកដ្ឋានគយ គឺមិនដែលមានបញ្ហាអ្វីទេ នាំឲ្យលោក កុក ឆាយ ជោគជ័យតែរហូតប្រមូលចំណូលបានលើសផែនការរហូត ហើយចំណូលក្រៅពីនេះត្រូវហូលចូលក្នុងហោប៉ៅលោក កុក ឆាយ យ៉ាងត្រជាក់ចិត្ត៕
0 comments:
Post a Comment