អង្គភាពប្រឆាំងអំពើពុករលួយដែលមានលោក ឱម យុិនទៀង ជាប្រធានបានឃាត់ខ្លួនមន្ត្រីមន្ទីរសង្គម កិច្ច និងអតីតយុទ្ធជនខេត្តពោធិ៍សាត់ ចំនួន៣នាក់ បញ្ជូនទៅសាលាដំបូងខេត្តពោធិ៍សាត់ ហើយតុលាការក៏បានសម្រេចឃុំខ្លួនមន្ត្រី២នាក់ បន្ទាប់ ពីធ្វើការសាកសួរជាបឋមរួចមក។ ទាក់ទងនឹងបញ្ហានេះក្រុមមន្ត្រីសង្គមស៊ីវិលបានគាំទ្រចំណាត់ការរបស់អង្គភាពប្រឆាំងអំពើពុករលួយដែលមានលោក ឱម យុិនទៀង ជាប្រធានក៏ប៉ុន្តែគេបានលើកឡើងថា វិធានការលើមន្ត្រីពុករលួយធំៗនៅក្រសួងសង្គមកិច្ចអតីតយុទ្ធជន និងយុវនីតិសម្បទាទើបជារឿងសមស្រប។ ទោះជាយ៉ាងក្រុមមន្ត្រីសង្គមស៊ីវិលនៅតែជំរុញឱ្យអង្គភាពប្រឆាំងអំពើពុករលួយចាត់វិធានការលើមន្ត្រីពុករលួយឱ្យកាន់តែមានប្រសិទ្ធភាពព្រោះបច្ចុប្បន្នអំពើពុករលួយកំពុងរាលដាលយ៉ាងពេញបន្ទុក ហើយកន្លងមកមន្ត្រីពុករលួយធំៗក្នុងក្រសួងសង្គមកិច្ចអាចគេចផុតពីការផ្តន្ទាទោសយ៉ាងក្រអឺតក្រទម។
ប្រភពព័ត៌មានពីមន្ត្រីសាលាដំបូងខេត្តពោធិ៍សាត់ដែលសុំមិនបញ្ចេញឈ្មោះបានឱ្យដឹងថា មន្ត្រីមន្ទីរសង្គមកិច្ច២នាក់ត្រូវបានសាលាដំបូងខេត្តពោធិ៍សាត់សម្រេចឃុំខ្លួនបណ្តោះអាសន្ន និង១ម្នាក់ទៀតត្រូវបានសម្រេច ឱ្យរួចពីការឃុំខ្លួនបន្ទាប់ពីអង្គភាពប្រឆាំងអំពើពុករលួយបានចាប់ខ្លួន និងបញ្ជូនទៅឱ្យតុលាការសម្រេច។ ព្រះរាជអាជ្ញាអមសាលាដំបូងខេត្តពោធិ៍សាត់លោក តន់ សីហតេជះ ក៏បានឱ្យដឹងដែរថាតាមការស៊ើបសួរបឋមតំណាងអយ្យការសាលាដំបូងខេត្តសម្រេចចោទប្រកាន់មន្ត្រីមន្ទីរសង្គមកិច្ចខេត្តពោធិ៍សាត់២នាក់ និងសម្រេចមិនចោទប្រកាន់ម្នាក់ ដោយសាររកមិនឃើញកំហុស។ ចំណែកចៅក្រមស៊ើបសួរនៃសាលាដំបូងខេត្តពោធិ៍សាត់ ក៏បានឱ្យដឹងដែរថា មន្ត្រីមន្ទីរសង្គមកិច្ចដែលត្រូវឃាត់ខ្លួននោះ មាន២នាក់គឺលោក ឃឹម ដេត ប្រធានការិយាល័យអតីតយុទ្ធជន និងលោក គង់ វិសាល ជាមន្ត្រីជាប់កិច្ចសន្យានៃមន្ទីរសង្គមកិច្ចខេត្ត។ មន្ត្រីទាំងពីរនាក់នេះក្រោយពីតុលាការសួរនាំអស់មួយព្រឹករួចមក ក៏សម្រេចឃុំខ្លួនបណ្តោះអាសន្នដោយចោទពីបទប្រព្រឹត្តខុសច្បាប់នីតិក្រមមាត្រា៥៩២ និង៥៩៣។ ចំណែកមន្ត្រីឈ្មោះ គង់ ប៊ុនថន ប្រធានការិយាល័យសង្គមកិច្ចស្រុកបាកាន មិនត្រូវបានបញ្ជូនមកតុលាការទេ ព្រោះមន្ត្រីរូបនោះមិនជាប់ពាក់ព័ន្ធនឹងការប្រព្រឹត្តខុសច្បាប់។
ទោះជាយ៉ាងណាចៅក្រមស៊ើបសួរនៃសាលាដំបូងខេត្តពោធិ៍សាត់ មិនទាន់បានបញ្ជាក់អំពីទោសកំហុសរបស់មន្ត្រីទាំងពីរនាក់ដែលត្រូវតុលាការសម្រេចឱ្យបញ្ជូនទៅឃុំខ្លួនជាបណ្តោះអាសន្នក្នុងពន្ធនាគារនោះនៅឡើយទេ។ កាលពីព្រឹកថ្ងៃទី០៤ ខែមេសា អង្គភាពប្រឆាំងអំពើពុករលួយដែលមានលោក ឱម យុិនទៀងជាប្រធានបានឃាត់ខ្លួនមន្ត្រីសង្គមកិច្ចខេត្តពោធិ៍សាត់ពីរនាក់ហើយថ្ងៃបន្ទាប់មកក៏បានឃាត់ខ្លួនបន្ថែមម្នាក់ទៀតសរុបទាំងអស់បីនាក់ ហើយនៅថ្ងៃទី០៦ ខែមេសា អង្គភាពប្រឆាំងអំពើពុករលួយក៏បញ្ជូនជនសង្ស័យចំនួនពីរនាក់ទៅតុលាការដើម្បីធ្វើការស៊ើបសួររួចតុលាការក៏សម្រេចឃុំខ្លួនតែម្តង។ ប្រការនេះធ្វើឱ្យមានបញ្ហាភ្ញាក់ផ្អើលយ៉ាងខ្លាំងនៅខេត្តពោធិ៍សាត់ ព្រោះកន្លងមកអតីតព្រះរាជអាជ្ញាអមសាលាដំបូងខេត្តនេះ គឺលោក តុប ច័ន្ទសិរីវុទ្ធ ត្រូវបានអង្គភាពប្រឆាំងអំពើពុករលួយចាប់ខ្លួនពីបទប្រព្រឹត្តអំពើពុករលួយជំរិតយកប្រាក់ និងបង្ខាំងមនុស្សខុសច្បាប់ ហើយត្រូវតុលាការកាត់ទោសឱ្យជាប់ពន្ធនាគារច្រើនឆ្នាំតាមកំហុស និងបទល្មើសដែលលោក តុប ច័ន្ទសិរីវុទ្ធ ប្រព្រឹត្ត។
ក្រុមមន្ត្រីអង្គការក្រៅរដ្ឋាភិបាលដែលឃ្លាំមើលអំពើពុករលួយក្នុងប្រទេសកម្ពុជាបានសម្តែងការគាំទ្រចំពោះចំណាត់ការរបស់អង្គភាពប្រឆាំងអំពើពុករលួយដែលបានចាត់វិធានការទៅលើមន្ត្រីមន្ទីរសង្គមកិច្ចខេត្តពោធិ៍សាត់ ដែលប្រព្រឹត្តអំពើពុករលួយបំពានច្បាប់។ ក្រុមមន្ត្រីអង្គការក្រៅរដ្ឋាភិបាលបានលើកឡើងថានេះជាជំហានថ្មីមួយទៀតក្នុងការបង្ក្រាបអំពើពុករលួយនៅកម្ពុជាដែលកំពុងញាំញីយ៉ាងពេញបន្ទុកក្នុងស្ថាប័នរដ្ឋតាំងពីលើរហូតដល់ក្រោម។ ទោះជាយ៉ាងណានៅមានករណីធំៗជាច្រើនទៀតដែលអង្គភាពប្រឆាំងអំពើពុករលួយត្រូវយកចិត្តទុកដាក់លុបបំបាត់អំពើពុករលួយតាមច្បាប់ប្រកបដោយប្រសិទ្ធ ភាព ហើយវិធានការទៅលើថ្នាក់ដឹកនាំក្រសួងសង្គមកិច្ច អតីតយុទ្ធជនដែលមានលោក អុិត សំហេង ជារដ្ឋមន្ត្រី គឺជាប្រការចាំបាច់បំផុត។ដោយហេតុថាបើគ្មានការបើកដៃពីមន្ត្រីជាន់ខ្ពស់នៅខាងលើទេ គឺមន្ត្រីថ្នាក់ខេត្តថ្នាក់ស្រុកក៏មិនហ៊ានធ្វើអ្វីៗស្រេចតែអំពើចិត្តរបស់ពួកគេដែរ ព្រោះខ្លាចមានទោស។
ក្រុមមន្ត្រីអង្គការក្រៅរដ្ឋាភិបាលបានជំរុញឱ្យអង្គភាពប្រឆាំងអំពើពុករលួយរបស់លោក ឱម យុិនទៀង បន្តអនុវត្តន៍ផែនការប្រឆាំងអំពើពុករលួយឱ្យមានប្រសិទ្ធភាពពិតប្រាកដទើបជារឿងប្រសើរ ដើម្បីកុំឱ្យអំពើពុករលួយរាលដាលយ៉ាងពេញបន្ទុកតទៅទៀត។ ក៏ប៉ុន្តែទោះជាយ៉ាងណាមជ្ឈដ្ឋានជាច្រើនពុំមានការជឿជាក់ទៅលើអង្គភាពប្រឆាំងអំពើពុករលួយក្នុងការលុបបំបាត់អំពើពុករលួយប្រកបដោយប្រសិទ្ធភាពនោះទេ ព្រោះកន្លងមកអង្គភាពប្រឆាំងអំពើពុករលួយមិនទាន់ធ្វើឱ្យបានសម្រេចតាមផែនការ និងការប្តេជ្ញាចិត្តរបស់ខ្លួនឡើយ។ ជាក់ស្តែងនៅមុនពេលបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៣ ថ្ងៃទី០៣ ខែមិថុនា ឆ្នាំ២០១២ អង្គភាពប្រឆាំងអំពើពុករលួយបានដាក់ចេញនូវគោលដៅលុបបំបាត់អំពើពុករលួយនៅថ្នាក់ឃុំ-សង្កាត់ឱ្យខាងតែបានក៏ប៉ុន្តែរហូតមកដល់ពេលនេះអំពើពុករលួយនៅថ្នាក់មូលដ្ឋានកំពុងបន្តកើតមានយ៉ាងពេញបន្ទុកនៅឡើយ។ ចំណែកវិធានការរបស់អង្គភាពប្រឆាំងអំពើពុករលួយនៅតាមដងផ្លូវ ក៏ឥតប្រយោជន៍ដែរ ព្រោះបច្ចុប្បន្នសមត្ថកិច្ចនគរបាល កងរាជអាវុធហត្ថ និងស្ថាប័នពាក់ពាក់ជាច្រើនទៀតនៅតែអាចប្រព្រឹត្តអំពើពុករលួយជំរិតយកលុយពលរដ្ឋដោយគ្មានសេចក្តីអៀនខ្មាស។
មន្ត្រីអង្គការក្រៅរដ្ឋាភិបាលបានលើកឡើងថាការចាប់ខ្លួនមន្ត្រីមន្ទីរសង្គមកិច្ចក្នុងខេត្តពោធិ៍សាត់ កាលពីពេលថ្មីៗនេះគឺជាការព្រមានដល់មន្ត្រីមន្ទីរសង្គមកិច្ច និងអតីតយុទ្ធជនតាមបណ្តាខេត្តនានានៅទូទាំងប្រទេស។ ក៏ប៉ុន្តែប្រសិនបើអង្គភាពប្រឆាំងអំពើពុករលួយមានឆន្ទៈពិតប្រាកដក្នុងការលុបបំបាត់អំពើពុករលួយនោះគួរតែចាត់ការមន្ត្រីជាន់ខ្ពស់ក្នុងក្រសួងសង្គមកិច្ចទើបជារឿងសមស្រប។ ដោយហេតុថាកន្លងមកមន្ត្រីជាន់ខ្ពស់ក្រសួងសង្គមកិច្ចបានប្រព្រឹត្តអំពើពុករលួយកេងប្រវ័ញ្ចថវិការដ្ឋអស់ជាង ៥លានដុល្លារសហរដ្ឋអាមេរិក ប៉ុន្តែនៅទីបំផុតក្រុមមន្ត្រីពុករលួយទាំងនោះអាចគេចផុតពីការដាក់ទោសទណ្ឌយ៉ាងក្រអឺតក្រទមបំផុត។ ប្រការនេះហើយដែលធ្វើឱ្យអំពើពុករលួយក្នុងក្រសួងសង្គមកិច្ចរាលដាលតាំងពីលើរហូតដល់ក្រោមសូម្បីតែមន្ត្រីថ្នាក់ខេត្ត ថ្នាក់ស្រុក ក៏ជាប់ពាក់ព័ន្ធ នឹងអំពើពុករលួយដែរ ធ្វើឱ្យប៉ះពាល់ដល់កិត្តិយសជាតិយ៉ាងខ្លាំង៕
0 comments:
Post a Comment