បើទោះបីរដ្ឋាភិបាលលោក ហ៊ុន សែន ដាក់ចេញនូវគោលនយោបាយ ភូមិ ឃុំ សង្កាត់ មានសុវត្ថិភាពយ៉ាងណាក៏ដោយក៏បទឧក្រិដ្ឋប្លន់ប្រដាប់ អាវុធកំពុងតែកើតឡើងយ៉ាងពេញបន្ទុកមុនពេលបុណ្យចូលឆ្នាំថ្មីប្រពៃណីខ្មែរឈានចូលមកដល់។ ប្រការនេះជំរុញឱ្យក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិយកចិត្តទុកដាក់ឡើងវិញចំពោះការពង្រឹងសន្តិសុខ និងសណ្តាប់ធ្នាប់សង្គមដើម្បីឱ្យប្រជាពលរដ្ឋទូទាំងប្រទេសរស់នៅ និងប្រកបរបរចិញ្ចឹមជីវិតដោយសុខសាន្ត។ ជាក់ស្តែងប៉ុន្មានថ្ងៃកន្លងទៅនេះមិនមែនតែនៅក្នុងរាជធានីភ្នំពេញទេ ដែលអំពើប្លន់ប្រដាប់អាវុធកើតឡើងជាបន្តបន្ទាប់សូម្បីតែនៅខេត្តព្រៃវែង ខេត្តកំពង់ចាម និងបណ្តាខេត្តមួយចំនួនទៀតក៏មានបទឧក្រិដ្ឋប្លន់ប្រដាប់អាវុធកើតឡើងគួរឱ្យព្រួយបារម្ភដែរ។
ជាក់ស្តែងនៅខេត្តព្រៃវែងចោរប្លន់មួយក្រុមដែលមានគ្នា៤នាក់ប្រដាប់ដោយកាំភ្លើងអាកាស្វាយបត់មួយដើម បានធ្វើសកម្មភាពប្លន់ផ្ទះអាជីវករលក់គ្រឿងទេសមួយកន្លែងនៅភូមិពោធិ៍ ឃុំក្រាំងស្វាយ ស្រុកព្រះស្តេច និងបានបាញ់រះចំនួន ៤គ្រាប់ដើម្បីរត់គេចខ្លួន ពេលប្រឈមមុខជាមួយកម្លាំងនគរបាល។ ហេតុការណ៍ប្លន់ប្រដាប់អាវុធនោះបានកើតឡើងកាលពីវេលាម៉ោង៧យប់ថ្ងៃទី០៣ ខែមេសា ឆ្នាំ២០១៣ រួចបើតាមម្ចាស់ផ្ទះបានឱ្យដឹងថាក្រុមចោរបានប្រមូលយកលុយខ្មែរអស់៥០លានរៀល លុយដុល្លារ១៥០០០ ដុល្លារ ប្លាទីន៣តម្លឹង និងមាស៥ជីព្រមទាំងកាតទូរស័ព្ទមួយចំនួនធំ។ នៅក្នុងសកម្មភាពប្លន់នោះក្រុមចោរបានចាប់ម្ចាស់ផ្ទះឈ្មោះ ហួត វីរៈ ភេទប្រុស អាយុ៤៥ឆ្នាំ ចងស្លាបសេក រួចរុញផ្តួលទៅនឹងដីហើយវាយទាត់ធាក់យ៉ាងដំណំនៅក្រៅផ្ទះ។ ពេលនោះកូនស្រីជនរងគ្រោះដោយខ្លាចឪពុកមានគ្រោះថ្នាក់ក៏ព្រមបើកទ្វារផ្ទះចេញមកឃាត់ក្រុមចោរកុំឱ្យវាយទាត់ធាក់ឪពុក ហើយបណ្តោយឱ្យក្រុមចោរប្លន់ប្រមូលយកទ្រព្យសម្បត្តិលុយកាក់តាមអំពើចិត្ត។
ប្រភពពីក្រុមគ្រួសារជនរងគ្រោះបានឱ្យដឹងទៀតថាក្រោយពេលប្លន់ប្រមូលយកទ្រព្យសម្បត្តិរួចហើយក្រុមចោរបានគេចខ្លួនចេញទៅវិញតែដោយជួបនឹងមន្ត្រីនគរបាលមួយរូបស្រែកឱ្យឈប់ក្រុមចោរក៏បានបាញ់រះចំនួន៤គ្រាប់ដើម្បីរំដោះខ្លួន ហើយគេចបាត់អស់ដោយសុវត្ថិភាពតែម្តង។ អំពើប្លន់នោះបានធ្វើឱ្យប្រជាពលរដ្ឋក្នុងស្រុកព្រះស្តេចទាំងមូលមានសេចក្តីព្រួយបារម្ភយ៉ាងខ្លាំងអំពីសន្តិសុខក្នុងការរស់នៅព្រោះ ក្រុមចោរប្លន់ធ្វើសកម្មភាពស្រេចតែអំពើចិត្តមិនរំខានដល់សេចក្តីសុខរបស់មន្ត្រីអាជ្ញាធរ និងសមត្ថកិច្ចម្តងណាឡើយ។ ជាក់ស្តែងនៅក្នុងអំពើប្លន់កាលពីយប់ថ្ងៃទី០៣ ខែមេសា នៅឃុំក្រាំងស្វាយ គឺសមត្ថកិច្ចបានត្រឹមតែសួរចម្លើយជនរងគ្រោះតែប៉ុណ្ណោះ ព្រោះក្រុមចោរប្លន់បានគេចខ្លួនអស់ទៅហើយ។ ដូច្នេះទើបប្រជាពលរដ្ឋនៅស្រុកព្រះស្តេច ខេត្តព្រៃវែង ក៏ដូចជានៅតាមបណ្តាខេត្ត- ក្រុងដទៃទៀតអំពាវនាវឱ្យក្រសួងមហាផ្ទៃ ក៏ដូចជាអគ្គស្នងការនគរបាលជាតិនាយឧត្តមសេនីយ៍ នេត សាវឿន ចាត់វិធានការរក្សាសន្តិសុខ និងសណ្ដាប់ធ្នាប់សង្គមឡើងវិញ ដើម្បីផ្តល់ភាពកក់ក្តៅសម្រាប់ប្រជាពលរដ្ឋ។ ដោយហេតុថានៅមុនពេលចូលឆ្នាំថ្មីប្រពៃណីខ្មែរអំពើប្លន់ប្រដាប់អាវុធបានកើតឡើងជាច្រើនករណីបណ្តាលឱ្យប្រជាពលរដ្ឋស្លូតត្រង់ត្រូវស្លាប់និងរងរបួសជាបន្តបន្ទាប់ ដោយសារតែស្នាដៃក្រុមចោរប្លន់ដ៏សាហាវទាំងនោះ។
ករណីប្លន់ប្រដាប់អាវុធមួយទៀតកើតឡើងនៅក្នុងខេត្តកំពង់ចាម គឺប្តីប្រពន្ធ និងកូនពីរនាក់ពេលកំពុងនាំគ្នាដោតសន្លឹកថ្នាំជក់នៅរោងមុខផ្ទះស្ថិតក្នុងភូមិបឹងកំបោរ ឃុំបឹងព្រួល ស្រុកត្បូងឃ្មុំ វេលាម៉ោង៩និង១០នាទីយប់ ថ្ងៃទី០៣ ខែមេសា ឆ្នាំ២០១៣ ត្រូវបានចោរមួយក្រុមមានគ្នាពី ៣ទៅ៥នាក់ប្រដាប់ដោយអាវុធអាកាមួយដើមចូលទៅភ្ជង់គំរាមប្លន់យកទ្រព្យសម្បត្តិ។ នៅក្នុងអំពើប្លន់នោះម្ចាស់ផ្ទះក៏បានប្រតាយប្រតប់ដណ្តើមយកកាំភ្លើងពីក្រុមចោរធ្វើឱ្យផ្ទុះពីរគ្រាប់បណ្តាលឱ្យត្រូវបុរសជាម្ចាស់ផ្ទះមួយគ្រាប់ចំចង្កេះខាងស្តាំរបួសធ្ងន់ត្រូវបញ្ជូនមក សង្គ្រោះនៅមន្ត្រីពេទ្យបង្អែកខេត្ត កំពង់ចាម បន្ទាប់មកដឹកទៅសង្គ្រោះនៅមន្ទីរពេទ្យរាជធានីភ្នំពេញ។ មន្ត្រីសមត្ថកិច្ចនគរបាលស្រុកត្បូងឃ្មុំបនាឱ្យដឹងថាបុរសជាជនរងគ្រោះឈ្មោះ ថុង វ៉ាន់នី អាយុ៥៥ឆ្នាំ និងប្រពន្ធឈ្មោះ សេង ណាវី អាយុ៥៣ឆ្នាំ ព្រមទាំងកូនបាននាំគ្នាដោតស្លឹកថ្នាំជក់ដើម្បីដាក់ទៅក្នុងឡចំហុយនៅខាងមុខផ្ទះរបស់ខ្លួន ហើយវេលាម៉ោង ៩យប់ស្រាប់តែមានក្រុមចោរប្លន់ពី៣ទៅ៥នាក់ប្រដាប់ដោយអាវុធអាកាមួយដើមបានចូលទៅភ្ជង់គំរាមឱ្យប្រមូលប្រាក់ឱ្យពួកគេ ហើយត្រូវម្ចាស់ផ្ទះប្រតាយប្រតប់ជាមួយចោរដែលកាន់កាំភ្លើង ទើបចោរបាញ់ចំនួន២គ្រាប់បណ្តាលឱ្យត្រូវមួយគ្រាប់ចំចង្កេះខាងស្តាំធ្លាយមកពោះរងរបួសធ្ងន់ដេកដួល ហើយស្រែកឱ្យអ្នកភូមិដទៃមកជួយ។
ដោយឡែកនៅរាជធានីភ្នំពេញគឺសន្តិសុខកោះពេជ្រម្នាក់បានស្លាប់នៅនឹងកន្លែង ហើយមិត្តភក្តិពីរនាក់ទៀតរងរបួសត្រូវបានរថយន្តបញ្ជូនទៅកាន់មន្ទីរពេទ្យកាលម៉ែតដោយសារក្រុមចោរពីរនាក់ជិះម៉ូតូ១គ្រឿងប្រដាប់ដោយកាំភ្លើងខ្លីមួយដើមធ្វើសកម្មភាពបាញ់ ៤ ទៅ ៥គ្រាប់ប្លន់យកម៉ូតូេស១២៥ ស៊េរីឆ្នាំ២០១២ មួយគ្រឿង កាលពីរំលងអធ្រាត្រឈានចូលថ្ងៃទី០៤ ខែមេសា ឆ្នាំ២០១៣។ អំពើប្លន់នេះកើតឡើងនៅក្នុងភូមិបាក់ខែង សង្កាត់បាក់ខែង ខណ្ឌឫស្សីកែវ ពេលដែលសន្តិសុខរងគ្រោះរួមទាំងមិត្តភក្តិអង្គុយផឹកស៊ីលំហែកាយលើសួនច្បារផ្លូវភ្លោះលីយ៉ុងផាត់ ក្បែរបញ្ជរបង់ប្រាក់ចម្ងាយប្រមាណជាង២០០ម៉ែត្រពីផ្លូវជាតិលេខ ៦។ ជនរងគ្រោះរងគ្រោះដែលត្រូវចោរបាញ់ស្លាប់ឈ្មោះ មុំ ភារុន អាយុ២៦ឆ្នាំ ជាសន្តិសុខយាមនៅកោះពេជ្រមានទីលំនៅភូមិបាក់ខែង ត្រូវក្រុមចោរបាញ់ពីរគ្រាប់ គឺត្រូវចំខ្នងមួយគ្រាប់ និងចំដៃស្តាំមួយគ្រាប់ស្លាប់នៅកន្លែងកើតហេតុតែម្តង។ ចំណែកជនរងគ្រោះពីរនាក់ទៀតជានិស្សិតនិងជាកម្មករសំណង់រស់នៅក្នុងសង្កាត់បាក់ខែង រងរបួសធ្ងន់ម្នាក់ស្រាលម្នាក់ត្រូវបញ្ជូនទៅសង្គ្រោះនៅមន្ទីរពេទ្យជាបន្ទាន់។
ប្រជាពលរដ្ឋក្នុងរាជធានីភ្នំពេញកំពុងតែមានសេចក្តីព្រួយបារម្ភយ៉ាងខ្លាំងព្រោះតាំងពីលោកឧត្តមសេនីយ៍ឯក ជួន សុវណ្ណ មកកាន់តំណែងជាស្នងការនគរបាលរាជធានីភ្នំពេញពេលណាអំពើប្លន់ប្រដាប់អាវុធ និងបទឧក្រិដ្ឋផ្សេងៗកើតឡើងច្រើនជាងពេលដែលលោក ទូច ណារ៉ុថ នៅធ្វើជាស្នងការនគរបាលរាជធានីភ្នំពេញទៅទៀត។ នៅក្នុងរាជធានីភ្នំពេញសព្វថ្ងៃអំពើប្លន់ប្រដាប់អាវុធ និងសកម្មភាពចោរប្លន់កើតឡើងមិនលស់ថ្ងៃឡើយ ធ្វើឱ្យប្រជាពលរដ្ឋព្រួយបារម្ភយ៉ាងខ្លាំងអំពីសុវត្ថិភាពក្នុងការរស់នៅ និងប្រកបរបរចិញ្ចឹមជីវិត។ សូម្បីតែមន្ត្រីនគរបាលចរាចរណ៍នៅតាមដងផ្លូវក៏ធ្វើសកម្មភាពមិនខុសពីក្រុមចោរប្លន់ដែរ ធ្វើឱ្យប្រជាពលរដ្ឋអស់ជំនឿទាំងស្រុងលើអាជ្ញាធរ និងសមត្ថកិច្ចរាជធានីភ្នំពេញក្នុងការអនុវត្តគោលនយោ បាយភូមិ សង្កាត់ មានសុវត្ថិភាពព្រោះបទឧក្រិដ្ឋនិងអំពើប្លន់ប្រដាប់អាវុធកំពុងកើតមានពេញបន្ទុក៕
0 comments:
Post a Comment