Print 
PDFក្នុងតួនាទីជាប្រធានពេទ្យសត្វប្រចាំរាជធានីភ្នំពេញ លោក ចេត ផល្លា មានមោទនភាពខ្លាំងបំផុតក្នុងការប្រមូលលុយពីសកម្មភាពដឹកជ្រូកក្រហមមកពីស្រុកយួន និងស្រុកសៀម មកកាប់នៅតាមបណ្តាកុងស៊ីមួយចំនួនក្នុងរាជធានីភ្នំពេញ ហើយជំនាញពេទ្យសត្វរបស់លោក ចេត ផល្លា អង្គុយសំកុកចាំតែរាប់ក្បាលជ្រូកយកលុយប៉ុណ្ណោះ មិនដែលខ្វល់ខ្វាយពីការវិធានការចាត់បង្ក្រាបឬត្រួតពិនិត្យសុខភាពសត្វ ឲ្យស្របតាមសេចក្តីណែនាំរបស់ថ្នាក់លើម្តងណាឡើយ ហើយការដឹកជញ្ជូនជ្រូកខុសច្បាប់ចូលមករាជធានីភ្នំពេញកាន់តែច្រើន ធ្វើឲ្យលោក ចេត ផល្លា ទទួលបានផលប្រយោជន៍ច្រកហោប៉ៅផ្ទាល់ខ្លួនកាន់តែច្រើនទៅតាមនោះផងដែរ។
សេចក្តីរាយការណ៍ព័ត៌មានពីឈ្មួញតូចតាចមួយចំនួនបានឲ្យដឹង ថា បច្ចុប្បន្ននេះមានការដឹកជញ្ជូន ជ្រូកក្រហមចូលរាជធានីភ្នំពេញមកកាប់តាមកុងស៊ីសំខាន់ៗចំនួន២ គឺកុងស៊ីទី១ នៅសង្កាត់បឹងសាឡាង ខណ្ឌទួលគោករបស់ឈ្មោះ ហៀង ហើយកុងស៊ីទី២ ស្ថិតនៅភូមិបឹងឈូកសង្កាត់គីឡូម៉ែត្រលេខ៦ ខណ្ឌ ប្ញស្សីកែវ របស់ឈ្មោះប្រា គឺទីតាំងកុងស៊ីកាប់ជ្រូកទាំង២កន្លែងនេះ នាំចូលសុទ្ធតែជ្រូកត្រចៀកក្រហមពីស្រុកយួន និងស្រុកសៀម ជាប្រភេទជ្រូកដែលមានជំងឺ ហើយនៅស្រុកគេមិនបរិភោគជ្រូកទាំងនេះទេ ព្រោះវាត្រូវបានចិញ្ចឹមដោយសារធាតុគីមី ធ្វើឲ្យឆាប់ធំធាត់យកទៅលក់បានលុយនិងចំណេញច្រើន។
ទីតាំងកុងស៊ីកាប់ជ្រូករបស់ឈ្មោះ ហៀង និងឈ្មោះ ប្រា មិនបានអនុវត្តន៍ទៅតាមបទដ្ឋានរបស់ក្រសួងកសិកម្មនោះទេ គឺបង្កផលប៉ះពាល់ចំពោះប្រជាពលរដ្ឋនៅក្បែរខាងយ៉ាងធ្ងន់ធ្ងរបំផុត តាមរយៈការបង្ហូរកាកសំណល់ ក្លិនស្អុយប៉ះពាល់ដល់បរិយាកាសរស់នៅ របស់ប្រជាពលរដ្ឋ ហើយករណីនេះក៏ធ្លាប់មានការតវ៉ាជាច្រើនលើកច្រើនសាទៅកាន់អាជ្ញាធរមូលដ្ឋានឲ្យជួយដោះស្រាយផងដែរ ប៉ុន្តែស្ងាត់ឈឹងទំនងជាម្ចាស់កុងស៊ីកាប់ជ្រូកទាំងនោះយកផលប្រយោជន៍ទៅញ៉ុកមាត់អាជ្ញាធរនិងមន្ត្រីជំនាញហើយមើលទៅ។ ពលរដ្ឋបានបញ្ជាក់ថា កុងស៊ីទាំង២កន្លែងនេះ បានបង្ហូរកាកសំ ណល់ទៅលើផ្លូវសាធារណៈដោយគ្មានកន្លែងស្តុក ឬបង្ហូរចូលទៅក្នុងលូ ដើម្បីធានាចំពោះអនាម័យនិងបរិស្ថាននោះទេ ហើយវាប្រឈមនឹងជំងឺឆ្លងច្រើនប្រភេទចំពោះពលរដ្ឋដែលរស់នៅក្បែរកុងស៊ីកាប់ជ្រូកទាំង នោះដោយសារតែកង្វះអនាម័យនិង គ្មានការត្រួតពិនិត្យពីមន្ត្រីជំនាញនិង សមត្ថកិច្ចពាក់ព័ន្ធ។
ក្នុងមួយថ្ងៃៗគេសង្កេតឃើញក្រុមឈ្មួញដឹកជញ្ជូនជ្រូកក្រហមមកពីស្រុកយួននិងស្រុកសៀមតាមរថយន្តកូរ៉េ និងរថយន្តនីសាន់រាប់រយក្បាលចូលមកកាប់តាមកុងស៊ីទាំងនោះ ហើយមន្ត្រីជំនាញពេទ្យសត្វមិនដែលត្រួតពិនិត្យសុខភាពជ្រូកទាំងនោះម្តងណាឡើយរាប់ទាំងការដឹកជញ្ជូនចូលតាមកុងស៊ីនិងការយកទៅចែកចាយនៅតាមទីផ្សារ។ ជំនាញពេទ្យសត្វនិងសមត្ថកិច្ចពាក់ព័ន្ធមានភារកិច្ចចុះត្រួតពិនិត្យ តាមកុងស៊ីទាំងនោះពីបញ្ហាបរិស្ថាន និងអនាម័យ ក៏ដូចជាការពិឃាតសត្វ ដើម្បីធានាថាវាមានសុវត្ថិភាព ប៉ុន្តែជាក់ស្តែងសមត្ថកិច្ចពាក់ព័ន្ធមិនដែល បានបំពេញតួនាទីរបស់ខ្លួនឲ្យបានត្រឹមត្រូវនោះទេ គឺចាំតែប្រមូលផលប្រយោជន៍ច្រកហោប៉ៅប៉ុណ្ណោះ។
លោក ចេត ផល្លា បានដាក់ពង្រាយមន្ត្រីជំនិតៗរបស់គាត់ឲ្យចុះប្រចាំការតាមដងផ្លូវមួយចំនួនជាច្រកចេញចូលរាជធានីភ្នំពេញដើម្បីចាំរាប់ក្បាលឡានដឹកជ្រូកមកពីស្រុកយួន និងស្រុកសៀមយកលុយ យ៉ាងអនាធិបតេយ្យបំផុត ពោលគឺមន្ត្រីជំនាញពេទ្យសត្វរាជធានីភ្នំ ពេញ ក្រោមការដឹកនាំបញ្ជាផ្ទាល់របស់លោក ចេត ផល្លា បានដាក់ប៉ុស្តិ៍ជជុះចាំស្ទាក់ចាប់រថយន្តដឹកជញ្ជូនជ្រូកយកលុយផ្ទុយពីការរឹតបន្តឹងរបស់ថ្នាក់លើ ហើយនៅមានរថយន្តដឹកមាន់ ទា និងស៊ុត ជាច្រើនប្រភេទទៀត សុទ្ធសឹងជាប្រភពចំណូលមិនចេះរីងស្ងួតរបស់លោក ចេត ផល្លា។
ក្រុមឈ្មួញអាចដំណើរការរកស៊ីដឹកជញ្ជូនជ្រូកក្រហមចូលមកកាប់តាមកុងស៊ីនៅក្នុងរាជធានីភ្នំពេញយ៉ាងអនាធិបតេយ្យ ធ្វើឲ្យប្រជាពលរដ្ឋមួយចំនួនខឹងសម្បាយ៉ាងខ្លាំង ព្រោះថាការបញ្ជូនសាច់ជ្រូកយកទៅលក់ចែកចាយតាមទីផ្សារអាចធ្វើឲ្យប៉ះពាល់សុខភាពប្រជាពលរដ្ឋយ៉ាងធ្ងន់ធ្ងរដែលទាមទារឲ្យផ្នែកពាក់ព័ន្ធយកចិត្តទុកដាក់ទប់ស្កាត់បញ្ហានេះកុំឲ្យក្រុមឈ្មួញនាំចូលជ្រូកក្រហមមកកាប់នៅតាមកុងស៊ីដោយគ្មានការត្រួតពិនិត្យ ហើយយកទៅចែកចាយតាមទីផ្សារ ព្រោះអាចធ្វើឲ្យប្រជាពលរដ្ឋជាអ្នកបរិភោគមានជំងឺជាច្រើនប្រភេទ។
នៅចំណុចកុងស៊ីទាំង២កន្លែងនេះ ក្រៅពីការនាំចូលជ្រូកក្រហមមកលក់ចែកចាយយ៉ាងអនាធិបតេយ្យ គេសង្កេតឃើញមានការលួចលាក់លេងល្បែងស៊ីសងយ៉ាងគគ្រឹកគគ្រេងផងដែរ គឺមិនដែលរំខានដល់សមត្ថកិច្ចនិងជំនាញពាក់ព័ន្ធនោះទេ បើទោះបីជាគោលការណ៍អាជ្ញាធរនិងសមត្ថកិច្ចត្រូវតែលុបបំបាត់ភាពអសកម្មនៃការប្រព្រឹត្តល្បែងស៊ីសងក៏ដោយ។ គេចង់ឃើញអភិបាលរាជធានីភ្នំពេញចុះត្រួតពិនិត្យស្ថានភាពកាប់ជ្រូកក្រហមនៅតាមកុងស៊ីទាំងនោះឡើងវិញជាបន្ទាន់ ដើម្បីធានាចំពោះអនាម័យបរិស្ថាននិងបញ្ឈប់ការកាប់ជ្រូកមានជំងឺដែលនាំចូលពីស្រុកយួននិងស្រុកសៀមយ៉ាងគគ្រឹកគគ្រេង៕
0 comments:
Post a Comment