Print 
PDF
ប្រជាពលរដ្ឋរាប់សិបគ្រួសាររស់នៅសង្កាត់ច្បារអំពៅ ២ តាមបណ្តោយផ្លូវលេខ៦២០ បានរងទុក្ខវេទនា ដោយសារអាជ្ញាធរខណ្ឌ និងសង្កាត់ និងគណៈកម្មការផ្សារច្បារអំពៅ ដែលបានយកផ្លូវសាធារណៈយកទៅធ្វើអាជីវកម្មយ៉ាងអនាធិបតេយ្យមិនខ្វល់ខ្វាយពីផលប៉ះពាល់របស់ប្រជាពលរដ្ឋនោះទេ ហើយបញ្ហានេះលោក គួច ចំរើន ដែលជាអភិបាលខណ្ឌមានជ័យ ចេះតែរក្សាភាពស្ងៀមស្ងាត់យូរមកហើយ មិនដែលយកចិត្តទុកដាក់ជួយដោះស្រាយ បញ្ហាដែលប្រជាពលរដ្ឋកំពុងជួបប្រទះនោះទេ គឺមន្ត្រីនិងអាជ្ញាធរពាក់ ព័ន្ធគិតតែម្យ៉ាងគត់ធ្វើយ៉ាងណាឲ្យតែពួកគេអាចប្រមូលលុយយកទៅ ធ្វើមានធ្វើបានផ្ទាល់ខ្លួន។
តំណាងប្រជាពលរដ្ឋបានឲ្យដឹងថា បច្ចុប្បន្ននេះផ្លូវលេខ ៦២០ដែលជាផ្លូវសាធារណៈ បម្រើឲ្យការធ្វើដំណើររបស់ប្រជាពលរដ្ឋបែរជាត្រូវបានអាជ្ញាធរនិងសមត្ថកិច្ចពាក់ព័ន្ធយកទៅជួលឲ្យក្រុមអាជីវករយកទៅធ្វើជាកន្លែងលក់ដូរយ៉ាងអនាធិបតេយ្យបំផុត ហើយក្រុមសន្តិសុខសង្កាត់ច្បារអំពៅ២ ក៏បានយកផ្លូវសាធារណៈមួយចំនួនទៀត ធ្វើជាចំណតម៉ូតូសម្រាប់ប្រមូលលុយយ៉ាង គគ្រឹកគគ្រេង។ជារៀងរាល់ថ្ងៃក្រុមអាជីវករបាននាំគ្នាទៅលក់ដូរដោយជួលតូបជាប្រចាំខែ ឬប្រចាំថ្ងៃហើយមានការបង់ប្រាក់ថ្លៃភាស៊ីអនាម័យ ភាស៊ីសណ្តាប់ធ្នាប់ និងភាស៊ីសន្តិសុខផ្សេងៗទៀត ដែលមន្ត្រីនិងអាជ្ញាធរខណ្ឌ សង្កាត់ មានឱកាសប្រមូលលុយពីការយកផ្លូវសាធារណៈទៅធ្វើអាជីវកម្មយ៉ាងងាយស្រួលបំផុត ហើយប្រភពចំណូលដែលបានមកពីការជួលតូប ឬថ្លែភាស៊ីផ្សេងៗមានទំហំធំធេង។
ប្រជាពលរដ្ឋបានឲ្យដឹងទៀតថាក្រុមអាជីវករដែលបានលក់ដូរនៅលើផ្លូវសាធារណៈទាំងនោះ បានចោលឥវ៉ាន់រាយប៉ាយពេញផ្លូវបង្កើត ឲ្យមានភក់ជ្រាំ ក្លិនស្អុយ ប៉ះពាល់ដល់ការរស់នៅរបស់ពលរដ្ឋនៅជុំវិញផ្សារច្បារអំពៅហើយនៅពេលយប់ឡើង ក្រុមអាជីវករត្រឡប់ទៅផ្ទះវិញពួកគេបានទុកគ្រែសម្រាប់លក់ដូរនៅរាយប៉ាយពេញផ្លូវប៉ះពាល់ដល់ការធ្វើដំណើរចេញចូលផ្ទះសម្បែងរបស់ប្រជាពលរដ្ឋច្រើនឆ្នាំមកហើយគេមិនដែលអាជ្ញាធរយកចិត្តទុកដាក់ចុះរៀបចំសណ្តាប់ធ្នាប់តាមដងផ្លូវលេខ៦២០ ទៅតាមសំណូមពររបស់ប្រជាពលរដ្ឋនោះទេ។ ជាពិសេសអាជ្ញាធរសង្កាត់ច្បារអំពៅ២ មិនដែលយកចិត្តទុកដាក់ជួយដោះស្រាយផលលំបាករបស់ប្រជាពលរដ្ឋនោះទេ បើទោះបីជាញឹកញាប់តំណាងប្រជាពលរដ្ឋបាននាំគ្នាសុំអន្តរាគមន៍ឲ្យជួយសម្របសម្រួលបើកផ្លូវឲ្យប្រជាពលរដ្ឋបានចេញចូលផ្ទះសម្បែងសឹងរាប់ភ្លេចទៅហើយក៏ដោយ គឺគេយល់ថាព្រោះតែបញ្ហាផលប្រយោជន៍ មន្ត្រីនិងសមត្ថកិច្ចពាក់ព័ន្ធមិនដែលឈឺក្បាលវិលមុខពីការរិះគន់ឬការសុំអន្តរាគមន៍អ្វីឡើយ។
ជាធម្មតាសាលារាជធានីភ្នំពេញបានណែនាំឲ្យមន្ត្រី និងសមត្ថកិច្ចពាក់ព័ន្ធយកចិត្តទុកដាក់រក្សាសណ្តាប់ ធ្នាប់សាធារណៈ ហើយដាច់ខាតមិនត្រូវយកផ្លូវសាធារណៈទៅធ្វើអាជីវករជួលឲ្យអាជីវករដាក់តូបលក់ដូរ ឬយកផ្លូវសាធារណៈទៅធ្វើជាកន្លែង ផ្ញើម៉ូតូ ប៉ះពាល់ដល់ការធ្វើដំណើរក៏ដូចជាការចេញចូលផ្ទះសម្បែងពលរដ្ឋនោះទេ។ ប៉ុន្តែអាជ្ញាធរខណ្ឌមានជ័យ ក្រោមការដឹកនាំរបស់លោក គួច ចំរើន នៅតែធ្វើមិនដឹងមិន ឮចំពោះបញ្ហានេះដូចរូបភាពជាក់ស្តែង គឺមានការយកផ្លូវលេខ ៦២០ ទៅជួលឲ្យក្រុមអាជីវករដាក់គ្រែលក់ដូររាយប៉ាយពេញផ្លូវនៅ ពេលថ្ងៃ រហូតដល់ពេលយប់ក្រុមអាជីវករទាំងនោះ ត្រឡប់ទៅផ្ទះវិញ ទុកគ្រែលក់ដូរនៅតែរាយប៉ាយពេញ ផ្លូវរកតែធ្វើដំណើរ ចេញចូលផ្ទះសម្បែងមិនកើត។ ដោយឡែកមន្ត្រីសណ្តាប់ធ្នាប់សង្កាត់ច្បារអំពៅ ២ បែរជាសុខស្រួលក្នុងការយកផ្លូវទៅជួលឲ្យក្រុមឈ្មួញធ្វើកន្លែងផ្ញើកង់ ម៉ូតូ យ៉ាងអនាធិបតេយ្យ ហើយប្រភពចំណូលដែលបានមកពីការផ្ញើកង់ ម៉ូតូ នេះមានច្រើនសន្ធឹកសន្ធាប់ដែលមន្ត្រីសង្កាត់និងសណ្តាប់ធ្នាប់ខណ្ឌឃុបឃិតគ្នាយកទៅធ្វើមានធ្វើបានយ៉ាងត្រជាក់ចិត្តបំផុត។
ស្ថានភាពសណ្តាប់ធ្នាប់នៅក្នុងសង្កាត់ច្បារអំពៅ២ ជាពិសេសនៅជុំវិញបរិវេណផ្សារច្បារអំពៅមានភាពអនាធិបតេយ្យខ្លាំងបំផុត នាំឲ្យកកស្ទះចរាចរណ៍ប៉ះពាល់ការធ្វើដំណើររបស់ប្រជាពលរដ្ឋ និងរកតែផ្លូវចេញចូលផ្ទះសម្បែងគ្មានផង បើដូច្នេះតើពលរដ្ឋអាចជឿជាក់លើការរៀបចំសណ្តាប់ធ្នាប់សាធារណៈ ដែលអភិបាលរាជធានីភ្នំពេញ ធ្លាប់បានប្រកូកប្រកាសដោយរបៀបណា។ គេចង់ឃើញសាលារាជធានី ភ្នំពេញ ដែលគ្រោងធ្វើការផ្លាស់ប្តូរសមាសភាពដឹកនាំនាពេលខាងមុខនេះចុះត្រួតពិនិត្យមើលផលប៉ះពាល់ ចំពោះប្រជាពលរដ្ឋ ដែលរស់នៅតាមផ្លូវលេខ៦២០ និងប្រជាពលរដ្ឋដែលមានផ្ទះសម្បែងនៅជុំវិញផ្សារច្បារអំពៅឡើងវិញផងកុំឲ្យពួកគាត់រងទុក្ខវេទនាដោយសារ មន្ត្រី សាលាខណ្ឌមានជ័យ និង សាលាសង្កាត់ច្បារអំពៅ ២ យកផ្លូវទៅធ្វើអាជីវកម្មជួលឲ្យអាជីវករលក់ដូរ ឬធ្វើជាកន្លែងផ្ញើកង់ ម៉ូតូ ប្រមូលផលប្រយោជន៍តទៅទៀត ៕
0 comments:
Post a Comment