Print 
PDFនៅច្រកទ្វារអន្តរជាតិប៉ោយប៉ែតមានសមត្ថកិច្ចពីបណ្តាស្ថាប័នជាច្រើនឈរជើងជំរិតយកលុយពីប្រជាពលរដ្ឋធ្វើឱ្យប្រជាពលរដ្ឋរិះគន់ជាបន្តបន្ទាប់ ហើយអំពាវនាវដល់រាជរដ្ឋាភិបាល ក៏ដូចជាក្រសួងនិងស្ថាប័នពាក់ព័ន្ធឱ្យចាត់វិធានការ ទប់ស្កាត់ជាបន្ទាន់។ ក្នុងចំណោមសមត្ថកិច្ចពុករលួយដែលជាឈ្លើងជញ្ជក់ឈាមប្រជាពលរដ្ឋក្រីក្ររកស៊ីអូសរទេះដឹកជញ្ជូនទំនិញដើម្បីបានប្រាក់ចំណូលចិញ្ចឹមជីវិតមានដូចជាសមត្ថកិច្ចគយ កាំកុងត្រូលនិង នគរបាលបង្ក្រាបបទល្មើសសេដ្ឋកិច្ចជាដើម។ ជាពិសេសនៅតំបន់ច្រកទ្វារអន្តរជាតិប៉ោយប៉ែត គេសង្កេតឃើញសមត្ថកិច្ចកាំកុងត្រូលធ្វើបាបប្រជាពលរដ្ឋក្រីក្រដែលជាកម្មករអូសរទេះស្រេចតែអំពើចិត្តដោយគ្មានយោគយល់បន្តិចណាឡើយ។ ប្រការនេះធ្វើឱ្យប្រជាពលរដ្ឋជួបការលំបាកកាន់តែខ្លាំងក្នុងជីវភាព រស់នៅប្រចាំថ្ងៃ ព្រោះជួនកាលប្រាក់ចំណូលដែលពួកគាត់រកបានគ្រាន់តែបង់ឱ្យសមត្ថកិច្ចពុករលួយស្ទើរតែមិនគ្រប់ ដូច្នេះជីវភាពពួកគាត់កាន់តែយ៉ាប់យឺុនថែមទៀត។
ប្រភពពីកម្មករអូសរទេះជញ្ជូនទំនិញនៅច្រកអន្តរជាតិប៉ោយប៉ែតបានឱ្យដឹងថាសមត្ថកិច្ចកាំកុងត្រូលជំរិតយកលុយពីពួកគាត់ជារៀងរាល់ថ្ងៃដោយតម្រូវឱ្យពួកគាត់បង់លុយថ្លៃក្បាលរទេះចាប់ពី៥០បាតដល់៥០០បាត ស្រេចតែការកំណត់របស់ពួកគេ។ មន្ត្រីកាំកុងត្រូលទាំងនោះគាបសង្កត់តែលើប្រជាពលរដ្ឋក្រី ក្រប៉ុណ្ណោះ រីឯឈ្មួញធំៗពួកគេបែរជាធូររលុងដើម្បីផលប្រយោជន៍ទៅវិញ ព្រោះជួនកាលឈ្មួញគ្រាន់តែហុចប័ណ្ណសម្គាល់ទៅឱ្យសមត្ថកិច្ចកាំកុងត្រូល ហើយរង់ចាំទូទាត់នៅពេលក្រោយ។ កម្មករក្រីក្រអូសរទេះជញ្ជូនទំនិញបន្តិចបន្តួចត្រូវបានមន្ត្រីកាំកុងត្រូលកំណត់ឱ្យបង់លុយយ៉ាងទៀងទាត់ ប៉ុន្តែសម្រាប់ក្រុមឈ្មួញធំៗអាចធ្វើអ្វីៗស្រេចតែអំពើចិត្តជាពិសេសការបង្កប់ទំនិញខុសច្បាប់និង ទំនិញគេចពន្ធ។ ជាក់ស្តែងទំនិញខ្លះមានក្រុមហ៊ុនមួយចំនួនទទួលបានសិទ្ធិផ្តាច់មុខក្នុងការនាំចូលរួចទៅហើយ ប៉ុន្តែមន្ត្រីកាំកុងត្រូល និងសមត្ថកិច្ចពាក់ព័ន្ធផ្សេងទៀតបានឃុបឃិតអនុញ្ញាតឱ្យឈ្មួញខិលខូចនាំចូលតាមអំពើចិត្ត។
ប្រភពបានឱ្យដឹងទៀតថារទេះដឹកជញ្ជូនទំនិញធំៗត្រូវបង់លុយពី៥០០បាត ទៅ១០០០បាត ប៉ុន្តែពួកគេអាចទូទាត់ជាមួយសមត្ថកិច្ចនៅពេលក្រោយ ដោយពុំមានការរំខានអ្វីទាំងអស់ គឺទាំងមន្ត្រីកាំកុងត្រូលនិងមន្ត្រីគយមានការអនុគ្រោះដល់ក្រុមឈ្មួញទាំងនោះគ្រប់ពេលវេលា។ ចំណែករថយន្តដឹកទំនិញពីទឹកដីសៀមចូលទឹកដីខ្មែរវិញត្រូវ ទូទាត់ជាមួយមន្ត្រីគយជាប្រចាំខែដោយក្នុងមួយរថយន្តត្រូវបង់ចាប់ពី១៦០០បាត ហើយជារៀងរាល់ថ្ងៃមានរថយន្តដឹកទំនិញរាប់រយគ្រឿងឯណោះ។ រថយន្តដឹកទំនិញទាំងនោះជាប្រភពចំណូលរបស់មន្ត្រីកាំកុងត្រូល និងសមត្ថកិច្ចគយពុករលួយ ហើយរហូតមកដល់ពេលនេះមិនដែលឃើញអង្គភាពប្រឆាំងអំពើពុករលួយរបស់លោក ឱម យុិនទៀង និងស្ថាប័នពាក់ព័ន្ធចាត់វិធានការស៊ើបអង្កេតម្តងណាឡើយ។ ប្រការនេះហើយដែលសមត្ថកិច្ចគយ និងកាំកុងត្រូលពុករលួយជិះជាន់ធ្វើបាបជំរិតយកលុយពីប្រជាពលរដ្ឋជាកម្មករអូសរទេះតាមអំពើចិត្ត ហើយពួកគេឃុបឃិតជាមួយឈ្មួញធំៗបើកដៃឱ្យឈ្មួញនាំទំនិញគេចពន្ធ និងទំនិញខុសច្បាប់ចូលស្រុកខ្មែរ។
តាមសេចក្តីរាយការណ៍ប្រជាពលរដ្ឋបានឱ្យដឹងទៀតថាសមត្ថកិច្ចកាំកុងត្រូលឈរជើងនៅច្រកទ្វារអន្តរជាតិប៉ោយប៉ែត ឬហៅថាច្រកប្រាសាទកំពូល៣នោះ មានលោក អ៊ុត សុភាព ជាប្រធាន និងលោក ស៊ាន ស៊ីណាត ជាប្រធានក្រុម ព្រមទាំងបក្ខពួកពីរនាក់ទៀត។ មន្ត្រីកាំកុងត្រូលទាំងអស់នេះឈរជើងចាំជំរិតយកលុយពីប្រជាពលរដ្ឋជារៀងរាល់ថ្ងៃ ហើយពុំមានពលរដ្ឋណាអាចតវ៉ាបានឡើយ គឺត្រូវតែបង់លុយតាមការកំណត់ជាប្រចាំ ទើបអាចអូសរទេះជញ្ជូនទំនិញពីទឹកដីសៀមចូលទឹកដីខ្មែរ។ ក្នុងនោះលោក អ៊ុត សុភាព ដែលជាប្រធានកាំកុងត្រូលប្រចាំច្រកព្រំដែនប៉ោយប៉ែតត្រូវបានគេដឹងថាផ្តល់អំណាចដល់ប្រធានក្រុម និងបក្ខពួកឱ្យធ្វើសកម្មភាពជំរិតយកលុយពីពលរដ្ឋតាមអំពើចិត្ត។ ចំណែកលោក អ៊ុត សុភាព ខ្លួនឯងមិនសូវឃើញមុខប្រចាំការប៉ុន្មានទេ គឺ ភាគច្រើនគេឃើញបុគ្គលនោះអង្គុយលេងល្បែងក្នុងកាស៊ីណូយ៉ាងត្រជាក់ចិត្តបំផុត។ ជាញឹកញាប់គេឃើញលោក អ៊ុត សុភាព ទៅអើតកន្លែងតែមួយភ្លែតៗប៉ុណ្ណោះបន្ទាប់មកគាត់ទៅលេងល្បែងក្នុងកាស៊ីណូយ៉ាងរំភើយរង់ចាំកូនចៅក្រោមឱវាទប្រមូលលុយយកទៅឱ្យចាត់ចែងបែងចែកតាមការគួរ។
ប្រជាពលរដ្ឋដែលជាកម្មករអូសរទេះជញ្ជូនទំនិញបន្តិចបន្តួចដើម្បីបានប្រាក់ចំណូលសម្រាប់ដោះស្រាយជីវភាពប្រចាំថ្ងៃ បានឱ្យដឹងថា ពួកគាត់ជួបការលំបាកខ្លាំងណាស់ ដោយសារសមត្ថកិច្ចច្រកព្រំដែនគាប សង្កត់ហួសហេតុពេក។ បើនិយាយពីសមត្ថកិច្ចគយគឺលោក ឈួន ហៃប្រធានស្នាក់ការគយច្រកព្រំដែនប៉ោយប៉ែតបណ្តោយឱ្យកូនចៅក្រោម ឱវាទជំរិតយកលុយពីពួកគាត់ស្រេចតែអំពើចិត្ត ធ្វើឱ្យពួកគាត់ស្ទើរតែគ្មានសល់លុយសម្រាប់ទិញអង្ករច្រកឆ្នាំង។ បើនិយាយពីសមត្ថកិច្ចកាំកុងត្រូលវិញគឺលោក អ៊ុត សុភាពប្រធានកាំកុងត្រូលប្រចាំច្រកព្រំដែនមិនដែលចេះយោគយល់ដល់កម្មករក្រីក្រដែលរកមួយថ្ងៃសម្រាប់រស់មួយថ្ងៃនោះទេ គឺគេតម្រូវឱ្យបង់លុយតាមការកំណត់។ បើមិនដូច្នេះទេគេនឹងរកលេសផ្សេងៗដើម្បីឃាត់រទេះទំនិញរបស់ពួកគាត់ទុកជាច្រើនម៉ោងដើម្បីជាការព្រមាន ប្រការនេះកំពុងតែធ្វើឱ្យពួកគាត់មានការឈឺចាប់យ៉ាងខ្លាំង ព្រោះសមត្ថកិច្ចប្រចាំច្រកព្រំដែនប្រព្រឹត្តអំពើពុករលួយធ្វើបាបប្រជាពលរដ្ឋក្រីក្រយ៉ាងគួរឱ្យស្អប់ខ្ពើមបំផុត។
ប្រភពពីសមត្ថកិច្ចតូចតាចប្រចាំច្រកព្រំដែនប៉ោយប៉ែតបានរិះគន់ថាលោក អ៊ុត សុភាព ប្រធានកាំកុងត្រូលច្រកទ្វារប៉ោយប៉ែត និងបក្ខពួកធ្វើអ្វីៗសព្វបែបយ៉ាងដើម្បីផលប្រយោជន៍ផ្ទាល់ខ្លួន ដោយធ្វើការគាបសង្កត់ដល់កម្មករអូសរទេះយ៉ាងកំរោលបំផុត។ អំពើពុករលួយរបស់លោក អ៊ុត សុភាព និងបក្ខពួកមិនមែនជារឿងតូចតាចទេ ព្រោះជារៀងរាល់ថ្ងៃពួកគេបើកដៃឱ្យឈ្មួញនាំសាច់មាន់ និងប្រហិតខូចគុណភាពព្រមទាំងទំនិញហួសកាលកំណត់ប្រើប្រាស់ចូលទឹកដីខ្មែរយ៉ាងពេញបន្ទុក។ ប្រការនេះក្រសួងនិងស្ថាប័នពាក់ព័ន្ធមិនត្រូវមើលរំលងទេព្រោះដោយសារតែអំពើពុករលួយរបស់មន្ត្រីកាំកុងត្រូលច្រកព្រំដែនប៉ោយប៉ែតទើបឈ្មួញអាចនាំទំនិញនិងចំណីអាហារខូចគុណភាពមកចែកចាយពេញទីផ្សារស្រុកខ្មែរធ្វើឱ្យប៉ះពាល់ដល់សុខភាពរបស់ពលរដ្ឋខ្មែរដែលជាអ្នកទទួលទាន។ ហេតុនេះល្មមដល់ពេលដែលក្រសួង និងស្ថាប័នពាក់ព័ន្ធចាត់វិធានការលើមន្ត្រីកាំកុងត្រូលច្រកអន្តរជាតិប៉ោយប៉ែតដោយមិនត្រូវមើលរំលងឡើយ បើមិនដូច្នេះទេពួកគេនៅតែបន្តប្រព្រឹត្តអំពើពុករលួួយហើយបើកដៃឱ្យឈ្មួញ ខិលខូចនាំទំនិញខូចគុណភាពយកមកបំផ្លាញសុខភាពប្រជាពលរដ្ឋខ្មែរយ៉ាងគឃ្លើនជាមិនខាន៕
0 comments:
Post a Comment