បាតុភាពដែលកំពុងកើតមាននៅក្រុងប៉ោយប៉ែត មិនមែនជារឿងធម្មតាទេ ដែលទាមទារឲ្យប្រធានរដ្ឋបាលជលផល និងរដ្ឋមន្ត្រីក្រសួងកសិកម្ម ធ្វើការត្រួតពិនិត្យឡើងវិញ ហើយដោះស្រាយឲ្យបានទាន់ពេលវេលា ព្រោះថាបញ្ហានេះអាចបន្តរីករាលដាលកាន់តែខ្លាំងដោយសារតែជំនាញជលផលឃុបឃិតជាមួយមេឈ្មួញហុកជ្រាគាបសង្កត់បង្ខំឲ្យអាជីវករដែលរកស៊ីដឹកជញ្ជូនត្រីទៅលក់នៅក្រុងប៉ោយប៉ែត បង់លុយសំអាងលើសិទ្ធិផ្តាច់មុខក្នុងការនាំចូលនិងចែកចាយត្រី ប៉ះពាល់ផលប្រយោជន៍ដល់អាជីវករដទៃទៀត ដែលនាំត្រីយកទៅលក់ស្រុកសៀម ដោយត្រូវដឹកឆ្លងកាត់ក្រុងប៉ោយប៉ែតក៏ត្រូវចូលបង់លុយឲ្យជំនាញជលផល និងក្រុមហ៊ុនរបស់មេឈ្មួញ ហុក ជ្រា ដោយមិនសមទំនង។
សេចក្តីរាយការណ៍ព័ត៌មានពីក្រុងប៉ោយប៉ែតបានឲ្យដឹងថា មន្ត្រីជំនាញជលផលក្រុងប៉ោយប៉ែតដែល ដឹកនាំដោយលោក សី ស៊ីល័យ បានឃុបឃិតជាមួយក្រុមហ៊ុនរបស់មេឈ្មួញ ហុក ជ្រា ធ្វើការគំរាមនិងគាបសង្កត់ឲ្យក្រុមអាជីវករដែលរកស៊ីដឹកជញ្ជូនត្រីតាមរថយន្តយកទៅលក់នៅក្រុងប៉ោយប៉ែតបង់លុយថ្លៃក្បាល ឡានក្នុងមួយរថយន្តចំនួន ៤ ម៉ឺនរៀល ហើយអាជីវករដែលបានដឹកជញ្ជូនត្រីទៅលក់នៅក្រុងប៉ោយប៉ែតនាពេលបច្ចុប្បន្ននេះ មានប្រមាណ៣០ទៅ៤០រថយន្តក្នុងមួយថ្ងៃៗ។សម្រាប់ក្រុមអាជីវករទាំងឡាយណា ដែលមិនបានបង់លុយទៅតាមការទាមទាររបស់ជំនាញជលផល គឺត្រូវគេចាប់យករថយន្តដឹកត្រីទៅផាកពិន័យធ្វើឲ្យខូចខាតហើយបញ្ហានេះកើតមានជារៀងរាល់ថ្ងៃ ដែលឈ្មួញខ្លះខ្ជិលមានរឿងវែងឆ្ងាយក៏បង់លុយចំនួន៤ម៉ឺនរៀលថ្លៃក្បាលឡានឲ្យ ទៅជំនាញជលផល និងក្រុមហ៊ុនរបស់មេឈ្មួញ ហុក ជ្រា ហើយខ្លះទៀតក៏មានប្រតិកម្មតវ៉ា ត្រូវក្រុមមន្ត្រីជលផលចាប់រថយន្តដឹកត្រីបង្កឲ្យមានការខូចខាត។
ដូចជាករណីដែលមន្ត្រីជំនាញជលផលក្រុងប៉ោយប៉ែតរបស់លោក សី ស៊ីល័យ ដែលបានឃាត់ចាប់រថយន្តដឹកត្រីប្រភេទកាមរីមួយគ្រឿងគំរាមឲ្យបង់លុយពិន័យ១លានរៀល ខណៈដែលម្ចាស់រថយន្តមិនបានបង់លុយថ្លៃក្បាលឡានចំនួន៤ម៉ឺនរៀលតាមការទាមទារហើយបាតុភាពមួយ នេះបានធ្វើឲ្យផ្អើលក្រុងប៉ោយប៉ែតនិងចាប់ផ្តើមបែកពាងប្រហុកចំពោះអំពើពុករលួយរបស់ជំនាញជលផល ដែលគាបក្រុមអ្នករកស៊ីដឹកជញ្ជូនត្រីថ្លៃជំរិតបង្ខំឲ្យបង់លុយក្បាលឡានចំនួន៤ម៉ឺនរៀលរាប់សិបឆ្នាំមកហើយ។ ចាប់តាំងពីហេតុការណ៍នេះបានកើតឡើង គេសង្កេតឃើញអាជីវករមួយចំនួនបានចាប់ផ្តើមខ្លាចញញើតមិនហ៊ានដឹកជញ្ជូនត្រីទៅលក់នៅក្រុងប៉ោយប៉ែតដូចពេលមុនទៀតទេ ព្រោះអាចប្រឈមនឹងការចាប់រថយន្តដឹកត្រីយកទៅផាកពិ ន័យរាប់លានរៀល ហើយធ្វើឲ្យងាប់ត្រីខូចខាតលក់មិនកើតផងដែរ។
កន្លងមកក្រុមអាជីវករដែលបានរកស៊ីដឹកជញ្ជូនត្រីទៅលក់នៅក្រុងប៉ោយប៉ែត បានស្វះស្វែងរកអាជ្ញាប័ណ្ណពីជំនាញជលផល ដើម្បីដឹកជញ្ជូនត្រីទៅលក់នៅស្រុកសៀម ដោយឆ្លងកាត់ក្រុងប៉ោយប៉ែត ប៉ុន្តែនៅពេលក្រុមអាជីវករទាំងនោះបានដាក់ពាក្យសុំអាជ្ញាប័ណ្ណមកកាន់រដ្ឋបាលជលផល ក៏បានបែកធ្លាយព័ត៌មានដល់មេឈ្មួញ ហុក ជ្រា ទើបមេឈ្មួញដ៏មានឥទ្ធិពលរូបនេះ បានចំណាយប្រាក់និងរកខ្សែទុយោដើម្បីការពារអាជីពចែកចាយត្រីផ្តាច់មុខរបស់ខ្លួនប្រចាំក្រុងប៉ោយប៉ែត។ក្រុមអាជីវករតូចតាចមិនអាចសុំអាជ្ញាប័ណ្ណដឹកជញ្ជូនត្រីទៅលក់នៅក្រុងប៉ោយប៉ែតបានទេ ព្រោះវាជាន់លើអាជ្ញាប័ណ្ណនៃសិទ្ធិចែកចាយត្រីផ្តាច់មុខរបស់មេឈ្មួញហុក ជ្រា ជាពិសេសមន្ត្រីជំនាញជលផលរបស់លោក សី ស៊ីល័យ ក៏មានឱកាសប្រើប្រាស់សិទ្ធិផ្តាច់មុខរបស់មេឈ្មួញ ហុក ជ្រា ទៅគាបជំរិតឲ្យក្រុមអាជីវករដែលរកស៊ីដឹកជញ្ជូនត្រីឆ្លងកាត់ភូមិសាស្ត្រក្រុងប៉ោយប៉ែតបង់លុយថ្លៃក្បាលឡានចំនួន ៤ ម៉ឺនរៀលសម្រាប់រថយន្តដឹកត្រីមួយគ្រឿង ដោយគ្មានការយោគយល់នោះទេ។
ក្រុមអាជីវករដែលធ្លាប់ដឹកជញ្ជូនត្រីទៅលក់នៅក្រុងប៉ោយប៉ែតបានលើកឡើងថាពួកគាត់ដែលបាន រកស៊ីដឹកជញ្ជូនត្រីពីខេត្តពោធិ៍សាត់ កំពង់ឆ្នាំង បាត់ដំបង និងពីខេត្តសៀមរាប ទៅលក់នៅក្រុងប៉ោយប៉ែត ក៏មានការបង់ពន្ធជូនរដ្ឋត្រឹមត្រូវ ដូច្នេះពួកគាត់ទទូចសុំឲ្យលោករដ្ឋមន្ត្រីក្រសួងកសិកម្ម ច័ន្ទ សារុន ពិនិត្យមើលបញ្ហានេះឡើងវិញផង ព្រោះការផ្តល់សិទ្ធិឲ្យមេឈ្មួញ ហុក ជ្រា ដឹកជញ្ជូននិងចែកចាយត្រីផ្តាច់មុខនៅក្រុងប៉ោយប៉ែត បានបង្កផលប៉ះពាល់ខ្លាំងសម្បើមណាស់សម្រាប់ អាជីវករដទៃទៀត ហើយការផ្តល់សិទ្ធិឲ្យមេឈ្មួញ ហុក ជ្រា បែបនេះមិនទំនងថាអាចទទួលបានប្រាក់ចំ ណូលពីការបង់ពន្ធបានច្រើននោះ ទេ។ រឿងហេតុដែលនាំរដ្ឋបាលជលផលផ្តល់អាជ្ញាប័ណ្ណឲ្យមេឈ្មួញ ហុក ជ្រា រកស៊ីដឹកជញ្ជូននិងចែកចាយត្រី ផ្តាច់មុខនៅក្រុងប៉ោយប៉ែត គឺជារឿងមិនសមទំនងទាល់តែសោះ មិនត្រឹមតែធ្វើឲ្យប៉ះពាល់ដល់មុខរកស៊ីប្រចាំថ្ងៃរបស់អាជីវករតូចតាចមួយចំនួននោះទេ ថែមទាំងធ្វើឲ្យខាតបង់ ចំណូលថវិកាជាតិផងដែរ។
ដោយឡែកប្រជាពលរដ្ឋដែលរស់នៅក្រុងប៉ោយប៉ែតក៏កំពុងជួបផលប៉ះពាល់ខ្លាំងសម្បើមពីការផ្តល់ សិទ្ធិឲ្យមេឈ្មួញ ហុក ជ្រា រកស៊ីដឹក ជញ្ជូននិងចែកចាយត្រីផ្តាច់មុខនៅក្រុងប៉ោយប៉ែត ព្រោះនៅពេលដែលមេឈ្មួញ ហុក ជ្រា ទទួលបានសិទ្ធិផ្តាច់មុខ គឺគ្មានអាជីវករណាផ្សេង ទៀត ហ៊ានដឹកជញ្ជូនត្រីទៅលក់នៅក្រុងប៉ោយប៉ែតទេ ធ្វើឲ្យមេឈ្មួញ ហុក ជ្រា មានឱកាសដំឡើងថ្លៃត្រីតាមតែអំពើចិត្ត។ ពលរដ្ឋបានលើកឡើងថា មានបញ្ហាជាច្រើនដែលត្រូវកែសម្រួលឡើងវិញ ដើម្បីជាការទប់ស្កាត់ភាពអនាធិបតេយ្យផង និងជាការសម្រួលកុំឲ្យតម្លៃត្រីនៅក្រុងប៉ោយប៉ែតឡើងថ្លៃខ្ពស់ជាងកន្លែងដទៃព្រោះវាប៉ះពាល់ខ្លាំងណាស់ដល់ ការរស់នៅរបស់ប្រជាពលរដ្ឋក្រីក្រទន់ខ្សោយហើយមានតែការលុបចោលសិទ្ធិផ្តាច់មុខរបស់មេឈ្មួញ ហុក ជ្រា ប៉ុណ្ណោះ ទើបអាចជួយឲ្យអាជីវករតូចតាចប្រកបអាជីពចែកចាយត្រីដូចពេលមុន។
សូមបញ្ជាក់ថា មេឈ្មួញ ហុក ជ្រា មានទំនាក់ទំនងជិតដិតជាមួយមន្ត្រីធំៗនៅក្នុងរដ្ឋបាលជលផលនិងក្រសួងកសិកម្ម ហើយមេឈ្មួញ ហុក ជ្រា មានសិទ្ធិអំណាចធំណាស់ក្នុងការនាំចូលដឹកជញ្ជូន និងចែកចាយត្រីខុសច្បាប់ស្ទើរមួយចំហៀងប្រទេសកម្ពុជាទៅហើយ ដូចជាត្រីឆ្តោ និងត្រីរ៉ស់យួន សុទ្ធសឹងតែជាត្រីខុសច្បាប់ ដែលក្រសួងកសិកម្មបានដាក់កំហិតមិនឲ្យមានការនាំចូលនិងចែកចាយតាមទីផ្សារ។ សូមបញ្ជាក់ថា ការនាំចូលត្រីរបស់មេឈ្មួញ ហុក ជ្រា គឺមានមន្ត្រីជលផលជាអ្នកជួយសម្របសម្រួលយ៉ាងរលូនល្អ ហើយត្រីមួយចំនួនក៏មានប្រើប្រាស់សារធាតុគីមី ធ្វើឲ្យប៉ះពាល់ដល់សុខភាពរបស់ពលរដ្ឋ ជាអ្នកបរិភោគផងដែរ គឺពិតជាគ្រោះថ្នាក់ធំណាស់ សម្រាប់ប្រជាពលរដ្ឋខ្មែរ៕
0 comments:
Post a Comment