ប្រជាពលរដ្ឋ និងមន្ត្រីរាជការក្នុងរាជធានីភ្នំពេញ បានរិះគន់ថាប៉ុន្មានថ្ងៃកន្លងទៅនេះ សមត្ថកិច្ចនគរបាលចរាចរណ៍រាជធានីភ្នំពេញកំពុងប្រឹងប្រែងធ្វើសកម្មភាពជំរិតយកលុយពីប្រជាពលរដ្ឋដោយគ្មានសេចក្តីអៀនខ្មាសបន្តិចណាឡើយ។ មន្ត្រីនគរបាលចរាចរណ៍ទាំងនោះមិនបានយកតួនាទី និងភារកិច្ចរបស់ខ្លួនទៅរៀបចំសណ្តាប់ធ្នាប់តាមដងផ្លូវឱ្យមានរបៀបរៀបរយដើម្បីកាត់បន្ថយគ្រោះថ្នាក់ចរាចរណ៍ទេ ប៉ុន្តែពួកគេបែរជាធ្វើសកម្មភាពជំរិតយកលុយពីប្រជាពលរដ្ឋដែលជិះម៉ូតូគ្មានស្លាកលេខ គ្មានកញ្ចក់ និងប្រព្រឹត្តខុសច្បាប់ចរាចរណ៍បន្តិចបន្តួចយ៉ាងកំរោល។ ពលរដ្ឋដែលបានឃើញសកម្មភាពនគរបាលចរាចរណ៍តាមដងផ្លូវក្នុងរាជធានីភ្នំពេញនាំគ្នារិះគន់ថាសកម្មភាពរបស់ពួកគេមិនខុសពីក្រុមចោរប្លន់ឡើយ ហើយករណីខ្លះសាហាវជាងចោរប្លន់ទៅទៀតព្រោះពួកគេលើកម៉ូតូប្រជាពលរដ្ឋដាក់លើរថយន្តដើម្បីជំរិតយកលុយពីម្ចាស់ម៉ូតូយ៉ាងងងើល។
ប្រជាពលរដ្ឋបានរិះគន់ថាក្រុមនគរបាលចរាចរណ៍ដែលឈរជើងនៅស្តុបអំបាសាឌ័រ ក្បែរវិទ្យាស្ថានបច្ចេកវិទ្យាកម្ពុជាកាលពីថ្ងៃទីចន្ទ ទី០៨ ខែមេសា ម្សិលមិញបានធ្វើសកម្មភាពស្ទាក់ឃាត់ប្រជាពលរដ្ឋដែល ប្រព្រឹត្តខុសច្បាប់ចរាចរណ៍បន្តិចបន្តួចជំរិតយកលុយស្រេចតែអំពើចិត្ត។ ប្រជាពលរដ្ឋដែលរងគ្រោះដោយសារនគរបាលចរាចរណ៍ជំរិតយកលុយមិនខុសពីក្រុមចោរប្លន់បានរិះគន់ថានគរបាលចរាចរណ៍ទាំងនោះ មិនបានណែនាំពួកគាត់ឱ្យគោរពច្បាប់ចរាចរណ៍ ឬណែនាំឱ្យមានការប្រុងប្រយ័ត្ននៅពេលបើកបរទេ។ ផ្ទុយទៅវិញនគរបាលចរាចរណ៍ទាំងនោះសម្លុតគំរាមកំហែងឱ្យពួកគាត់បង់លុយតាមការទាមទាររបស់ពួកគេបើពុំដូច្នេះទេ ពួកគេនឹងលើកម៉ូតូដាក់លើរថយន្តយកទៅកាន់អធិការដ្ឋាននគរបាលខណ្ឌទួលគោក ឬការិយាល័យចរាចរណ៍ជើងគោករាជធានីជាមិនខាន។ ចំណែកនៅស្តុបទេពផន ក៏មន្ត្រីនគរបាលចរាចរណ៍ធ្វើសកម្មភាពជំរិតយកលុយពីប្រជាពលរដ្ឋយ៉ាងឥតអៀនខ្មាសដែរ ហើយសកម្មភាពរបស់ពួកគេមិនដែលត្រូវបានលោកឧត្តមសេនីយ៍ឯក ជួន សុវណ្ណ ធ្វើការណែនាំឱ្យបញ្ឈប់ឡើយ។ ប្រការនេះត្រូវគេសង្ស័យថាប្រហែលលោក ជួន សុវណ្ណ ទទួលបានផលប្រយោជន៍ពីនគរបាលចរាចរណ៍ពុករលួយទើបសម្ងំស្ងៀមធ្វើមិនដឹងមិនឮអ្វីទាំងអស់ រហូតមកដល់ពេលនេះ។
ប្រភពពីប្រជាពលរដ្ឋរស់នៅក្នុងខណ្ឌទួលគោកបានរិះគន់ថាសមត្ថកិច្ចនគរបាលចរាចរណ៍ខណ្ឌទួលគោកដែលមានលោក ហួត ចាន់យ៉ារ៉ាន់ ជាអធិការនគរបាលខណ្ឌបានធ្វើសកម្មភាពជំរិតយកលុយពីប្រជាពលរដ្ឋយ៉ាងពេញបន្ទុកដោយមិនខ្វល់ពីការរិះគន់ជេរប្រទេចដាក់បណ្តាសាអ្វីទាំងអស់។ តាមបណ្តាផ្លូវនានាក្នុងខណ្ឌទួលគោកទាំងនៅក្នុងសង្កាត់ទឹកល្អក់ទី១ សង្កាត់ទឹកល្អក់ទី២ និងសង្កាត់បឹងសាឡាងជាដើម សមត្ថកិច្ចនគរបាលចរាចរណ៍តែងតែធ្វើសកម្មភាពស្ទាក់ឃាត់ជំរិតយកលុយពីប្រជាពលរដ្ឋដែលជិះម៉ូតូមិនពាក់មួកកសុវត្ថិភាព គ្មានបំពាក់កញ្ចក់ និងគ្មានស្លាកលេខជាដើមស្រេចតែអំពើចិត្ត។ សកម្មភាពរបស់នគរបាលចរាចរណ៍ខណ្ឌទួលគោកត្រូវបានប្រជាពលរដ្ឋស្អប់ខ្ពើមបំផុត និងជេរប្រទេចដាក់បណ្តាសាជារៀងរាល់ថ្ងៃ ព្រោះមន្ត្រីនគរបាលចរាចរណ៍ទាំងនោះយកតួនាទីនិងភារកិច្ចរបស់ខ្លួនទៅគាបសង្កត់ធ្វើបាបប្រជាពលរដ្ឋក្រីក្រទន់ខ្សោយដោយគ្មានយោគយល់អ្វីទាំងអស់។
ប្រជាពលរដ្ឋរស់នៅតាមបណ្តាសង្កាត់នានាក្នុងខណ្ឌទួលគោកបានរិះគន់ថានៅពេលដែលមានចោរឆក់ចោរប្លន់តាមដងផ្លូវគឺមិនដែលឃើញសមត្ថកិច្ចនគរបាលខណ្ឌទួលគោកបង្ក្រាបបានមួយករណីណាឡើយពួកគាត់មានការព្រួយបារម្ភយ៉ាងខ្លាំងអំពីអសន្តិសុខសង្គម។ ប៉ុន្តែនៅពេលស្ងាត់ៗបែរជាមន្ត្រីនគរបាលចរាចរណ៍ពុករលួយចាប់ផ្តើមធ្វើសកម្មភាពដូចចោរប្លន់យ៉ាងប្រសេចប្រសាចជំរិតយកលុយពីប្រជាពលរដ្ឋតាមទំនើងចិត្តគ្មានអៀនខ្មាស និងគ្មានសីលធម៌ជាសមត្ថកិច្ចរបស់រដ្ឋាភិបាលឡើយ។ បើគេចង់ដឹងការពិតអំពីបញ្ហានេះសូមទៅពិ និត្យមើលនគរបាលចរាចរណ៍ប៉ុន្មាននាក់ដែលឈរជើងនៅក្បែរភ្លើងស្តុបម៉ុងឌីយ៉ាល់គេប្រាកដជាមើលឃើញការពិតច្បាស់នឹងភ្នែកជាមិនខាន។ មន្ត្រីនគរបាលប៉ុន្មាននាក់ឈរជើងនៅភ្លើងស្តុបម៉ុងឌីយ៉ាល់ ភ្នែករបស់ពួកគេរលីមរលាមដូចអាបសម្លឹងរកមើលប្រជាពលរដ្ឋដែលជិះម៉ូតូមិនពាក់មួកសុវត្ថិភាព គ្មានស្លាកលេខឬគ្មានកញ្ចក់ដើម្បីជំរិតយកលុយ ហើយប្រើពាក្យសំដីអសុរោះគួរឱ្យស្អប់ខ្ពើមបំផុត។
មជ្ឈដ្ឋានប្រជាពលរដ្ឋ និងមន្ត្រីរាជការក្នុងរាជធានីភ្នំពេញបានរិះគន់ថាមួយរយៈពេលចុងក្រោយនេះមិនថាតែមន្ត្រីនគរបាលចរាចរណ៍ខណ្ឌទួលគោកទេ ដែលខំប្រឹងប្រែងរកលុយនៅមុនពេលបុណ្យចូលឆ្នាំថ្មីប្រពៃណីខ្មែរ គឺនគរបាលចរាចរណ៍ នៅតាមបណ្តាខណ្ឌនានា ដូចជាខណ្ឌសែនសុខ និងខណ្ឌពោធិ៍សែនជ័យក៏ធ្វើសកម្មភាពមិនខុសពីក្រុមចោរប្លន់ដែរ។ នៅតាមកែងភ្លើងស្តុបនិងតាមដងផ្លូវនានានគរបាលចរាចរណ៍ពុករលួយទាំងនោះតែងតែធ្វើសកម្មភាពជំរិតយកលុយពីពលរដ្ឋដោយគ្មានសេចក្តីអៀនខ្មាស ខ្វះសេចក្តីថ្លៃថ្នូរ គឺធ្វើយ៉ាងណាឱ្យតែបានលុយចូលហោប៉ៅពួកគេត្រេកអរបំផុត។ សកម្មភាពមិនគប្បីរបស់សមត្ថកិច្ចនគរបាលចរាចរណ៍ទូទាំងរាជធានីភ្នំពេញ កំពុងធ្វើឱ្យមជ្ឈដ្ឋានប្រជាពលរដ្ឋ និងមន្ត្រីរាជការទូទៅស្អប់ខ្ពើមយ៉ាងខ្លាំង ហើយតែងតែជេរប្រទេចដាក់បណ្តាសាទាំងយប់ទាំងថ្ងៃ។ បងប្អូនប្រជាពលរដ្ឋដែលមានសាច់ញាតិជាមន្ត្រីនគរបាលចរាចរណ៍គួរតែជួយប្រាប់ដល់ពួកគេខ្លះៗផង ព្រោះទង្វើរបស់នគរបាលចរាចរណ៍គឺជាអំពើអាក្រក់ផុតលេខជាអំពើដែលធ្វើឱ្យប្រជាពលរដ្ឋស្អប់ខ្ពើម ហើយថ្កោលទោសជារៀងរាល់ថ្ងៃ។ មន្ត្រីនគរបាលចរាចរណ៍ទាំងនោះធ្វើអ្វីៗដើម្បីប្រមូលលុយទុកសម្រាប់ចូលរួមបុណ្យចូលឆ្នាំថ្មីប្រពៃណីខ្មែរ ដោយមិនខ្លាចទេវតាឆ្នាំថ្មីបរាមុខពួកគេឱ្យទទួលបាបកម្មយ៉ាងទាន់ហន់នោះឡើយ។
ទាក់ទងនឹងបញ្ហាខាងលើនេះលោកឧត្តមសេនីយ៍ឯក ជួន សុវណ្ណ ក៏ដូចជាប្រធានការិយាល័យនគរបាលចរាចរណ៍រាជធានីភ្នំពេញ ត្រូវពិនិត្យមើលអំពើអាក្រក់របស់មន្ត្រីនគរបាលចរាចរណ៍រាជធានី ក៏ដូចជានគរបាលចរាចរណ៍តាមបណ្តាខណ្ឌនានាជាបន្ទាន់បំផុត ដើម្បីកុំឱ្យប្រជាពលរដ្ឋក្តៅក្រហាយតទៅទៀត។ លោកស្នងការនគរបាលរាជធានី និងលោកប្រធានការិយាល័យចរាចរណ៍ជើងគោករាជធានីមិនគួរបណ្តោយឱ្យនគរបាលចរាចរណ៍ធ្វើសកម្មភាពដូចក្រុមចោរប្លន់នៅមុនពេលបុណ្យចូលឆ្នាំថ្មីប្រពៃណីខ្មែរបែបនេះទេ ព្រោះអាចធ្វើឱ្យប្រជាពលរដ្ឋខឹងសម្បា ហើយបួងសួងទេវតាឱ្យបរាមុខពួកគេ ដែលចាយវាយលុយជាញើសឈាមរបស់ពួកគាត់។មុននឹងជំរិតយកលុយពីប្រជាពលរដ្ឋគឺសមត្ថកិច្ចនគរបាលចរាចរណ៍ទាំងឡាយគួរតែចេះមានសេចក្តីអៀនខ្មាសចំពោះអំពើអសីលធម៌របស់ខ្លួនខ្លះផង កុំយកតួនាទី និងភារកិច្ចរបស់ខ្លួនទៅធ្វើបាបប្រជាពលរដ្ឋតទៅទៀត ហើយត្រូវធ្វើការបម្រើប្រជាពលរដ្ឋក្នុងនាមជាកម្លាំងសមត្ថកិច្ចរបស់រដ្ឋាភិបាល ដែលមានតួនាទីបម្រើប្រជាពលរដ្ឋ៕
0 comments:
Post a Comment