បច្ចុប្បន្ននៅចំណុចច្រកព្រំដែនប៉ោយប៉ែត គេសង្កេតឃើញស្ថាប័នកាំកុងត្រូល ស្ថិតក្រោមការគ្រប់គ្រងរបស់លោក អ៊ុត សុភាព បានបង្កើតឲ្យមានរឿងអាស្រូវជាច្រើន ដូចជាការប្រើប្រាស់មន្ត្រីចូលនិវត្តន៍ឲ្យបន្តបំពេញការងារប្រមូលលុយពីក្រុមឈ្មួញរកស៊ីដឹកជញ្ជូនទំនិញឆ្លងកាត់ច្រកប៉ោយប៉ែតជាដើម។ ក្នុងនោះលោក អ៊ុត សុភាព បានដាក់ ពង្រាយមន្ត្រីសំខាន់ៗចំនួន៣ក្រុមឲ្យចាំប្រមូលលុយទាំងការដឹកជញ្ជូន ទំនិញស្របច្បាប់និងទំនិញខុសច្បាប់ យ៉ាងអនាធិបតេយ្យបំផុតដែលពេល ខ្លះក៏មានការឈ្លោះប្រកែកគ្នាជាមួយ កម្មករអូសរទេះដឹកទំនិញធ្វើឲ្យផ្អើលដល់ភ្ញៀវទេសចរដែលធ្វើដំណើរឆ្លងកាត់ច្រកព្រំដែនប៉ោយប៉ែតផងដែរ។
លោក អ៊ុត សុភាព បានបង្កើតក្រុមការងារពិសេសចំនួន៣ក្រុម គឺក្រុមទី១ ដឹកនាំដោយលោក លន់ ស៊ីថា ដែលបានបន្តបង្កើតកូនចៅជំនិតៗចំនួន២នាក់ទៀតឲ្យចុះទៅប្រចាំការនៅប៉ុស្តិ៍ជជុះ ទី២មានការចាត់តាំងឲ្យឈ្មោះ ស៊ាន ស៊ីណាត ដែលមានតួនាទីជាអនុប្រធានកាំកុងត្រូលត្រួតពិនិត្យលើការដឹកជញ្ជូនទំនិញនៅចំណុចប្រាសាទកំពូល៣ ដោយធ្វើសកម្មភាពជំរិតទារប្រាក់ពីកម្មករអូសរទេះក៏ដូចជាក្រុមឈ្មួញដឹកជញ្ជូនទំនិញដោយគ្មានការយោគ យល់អ្វីឡើយ។ អាចបញ្ជាក់បានថា មានមនុស្សសំខាន់ៗចំនួន ៣នាក់ប៉ុណ្ណោះដែលលោក អ៊ុត សុភាព និងលោក លន់ ស៊ីថា បានប្រើប្រាស់ក្នុងការប្រមូលប្រយោជន៍ច្រកហោប៉ៅផ្ទាល់ខ្លួនមិនខ្វល់ខ្វាយពីការត្រួត ពិនិត្យគុណភាពទំនិញអ្វីឡើយចង់ក្រុមឈ្មួញនាំចូលទំនិញខូចគុណ ភាពដូចជាសាច់មាន់ ប្រហិតត្រី និងគ្រឿងឧបភោគ បរិភោគ ជាច្រើនប្រភេទទៀត ក៏ជំនាញកាំកុងត្រូលនៅតែសុខស្រួល ចាំអង្គុយរាប់រទេះដឹកទំនិញយកលុយតាមចិត្ត។
មានការបញ្ជាក់ផងដែរថាឈ្មោះ ស៊ាន ស៊ីណាត ក្នុងនាមជាប្រធានក្រុមបានចាត់ចែងបញ្ជាឲ្យឈ្មោះ ស៊ាន តារា និងឈ្មោះ ខៀវ ពេជ្រតារាវឌ្ឍនា ឲ្យឈរជើងនៅចំណុចប្រាសាទកំពូល៣ ដើម្បីចាំជំរិតទារលុយពីកម្មករអូសរទេះជាចំហ។ ប៉ុន្តែក្រោយពេលបែកធ្លាយរឿងអាស្រូវនេះ និងមានការបញ្ជូនកម្លាំងសម្ងាត់ឲ្យចុះទៅស៊ើបអង្កេតពីអំពើពុករលួយ នៅច្រកព្រំដែនប៉ោយប៉ែតគេសង្កេត ឃើញលោក អ៊ុត សុភាព ប្រាប់ឲ្យកូនចៅរបស់ខ្លួនប្រុងប្រយ័ត្នតាមរយៈការបញ្ជាឲ្យកម្មករអូសរទេះ និងក្រុមឈ្មួញរកស៊ីដឹកជញ្ជូនទំនិញចូលទៅបង់លុយនៅក្នុងទីស្នាក់ការរបស់ពួកគេ ដើម្បីកុំឲ្យសាធារណជន មើលឃើញពីភាពអនាធិបតេយ្យ ឬការប្រព្រឹត្តអំពើពុករលួយខ្លាំងពេក។ កន្លងមកជំនាញកាំកុងត្រូលរបស់លោក អ៊ុត សុភាព បានត្រឹមតែធ្វើការបង្ក្រាបឈ្មួញតូចតាច និងឈ្មួញថ្មីថ្មោងដែលរកស៊ីដឹកជញ្ជូនទំនិញមិនប្រក្រតីមកពីស្រុកសៀម ហើយក្រោយការបង្ក្រាបក៏ចាប់ផ្តើមសម្រប សម្រួលឲ្យក្រុមឈ្មួញថ្មីថ្មោងទាំងនោះចូលមកបង់លុយជាប្រចាំខែ ឬប្រចាំជើង ដើម្បីកុំឲ្យមានផលរមាស់ទៅថ្ងៃខាងមុខ។
បច្ចុប្បន្ននេះជំនាញកាំកុងត្រូលដែលបានឈរជើងនៅចំណុចច្រក ព្រំដែនអន្តរជាតិប៉ោយប៉ែត មិនបានយកចិត្តទុកដាក់អនុវត្តន៍ការងារឲ្យបានត្រឹមត្រូវ តាមការចង្អុលបង្ហាញរបស់ថ្នាក់លើនោះទេ គឺគេឃើញជំ នាញកាំកុងត្រូលនាំគ្នាប្រព្រឹត្តអំពើ ពុករលួយគាបជំរិតប្រជាពលរដ្ឋដែលរកស៊ីដឹកជញ្ជូនទំនិញ ដោយគ្មានការយោគយល់អ្វីឡើយ។ ប៉ុន្តែសម្រាប់ឈ្មួញធំៗវិញ មានឱកាសរកស៊ីដឹកជញ្ជូនទំនិញតាមអំពើចិត្ត មិនដែលមានផលរមាស់អ្វីឡើយ ព្រោះឈ្មួញធំៗអស់ទាំងនោះមានទំនាក់ទំនងផលប្រយោជន៍ជាមួយជំនាញកាំកុងត្រូល និងធ្លាប់ទំនាក់ ទំនងបង់លុយដោយផ្ទាល់ជូនលោក អ៊ុត សុភាព ជាប់ជាប្រចាំផងដែរ។ក្រុមហ៊ុនធំៗចំនួន១២ ដែលរកស៊ីដឹកជញ្ជូនទំនិញមកពីស្រុកសៀមឆ្លងកាត់ច្រកព្រំដែនប៉ោយប៉ែតក្នុងមួយខែៗជាប់កាតព្វកិច្ចបង់លុយជូនជំនាញកាំកុងត្រូលមិនតិចជាង ៥ម៉ឺនបាតនោះទេ សម្រាប់មួយក្រុម ដូច្នេះតួលេខប្រាក់ក្រោមតុដែលជំនាញកាំកុងត្រូលរបស់លោក អ៊ុត សុភាព ប្រមូលបានជាប្រចាំថ្ងៃនោះមានច្រើនសន្ធឹកសន្ធាប់មិនដឹងជាយកទៅធ្វើអ្វីអស់ទេ។
ទិដ្ឋភាពដែលជំនាញកាំកុងត្រូលអង្គុយចាំយកលុយពីកម្មករអូសរទេះដឹកទំនិញនៅចំណុចប្រាសាទកំពូល ៣ គឺជាអំពើមិនថ្លៃថ្នូរនិងផ្ទុយពីគោលការណ៍របស់រដ្ឋាភិ បាល ដូច្នេះអគ្គនាយកដ្ឋានកាំកុងត្រូលគួរតែចាត់វិធានការទប់ស្កាត់ភាពអនាធិបតេយ្យរបស់ជំនាញកាំកុងត្រូលច្រកប៉ោយប៉ែតឡើងវិញជាបន្ទាន់ ធ្វើយ៉ាងណាទប់ស្កាត់ការហូរចូលទំនិញខូចគុណភាព ចំណីអាហារមានជាតិពុល ដើម្បីការពារសុខភាពពលរដ្ឋជាអ្នកបរិភោគ។ វត្តមានរបស់ជំនាញកាំកុងត្រូលដែលចាំតែរាប់រទេះប្រមូលលុយ មិនមានស្មារតីទទួលខុសត្រូវក្នុងការទប់ស្កាត់ចំណីអាហារខូចគុណភាពដែលក្រុមឈ្មួញនាំចូលពីស្រុកសៀម យ៉ាងអនាធិបតេយ្យនោះ មានដូចជាស៊ុតមាន់ទា សាច់មាន់ ជង្គង់មាន់ ភេសជ្ជៈខូចគុណភាព ប្រហិតត្រី ដែលមានជាតិថ្នាំគីមី ក្នុងមួយថ្ងៃៗរាប់រយរទេះ ដោយជំនាញកាំកុងត្រូលបានបង្ខំឲ្យបង់ប្រាក់ក្នុងមួយរទេះប្រមាណ ២ម៉ឺនទៅ ៤ម៉ឺនរៀល ជាការស្រេច ហើយជំនាញកាំកុងត្រូលមិនដែលឈឺក្បាលវិលមុខ ក្នុងការត្រួតពិនិត្យឬទប់ស្កាត់ការហូរចូលទំនិញគុណភាពនិងចំណីអាហារមានជាតិគីមីនោះទេ បើទោះបីជាក្រសួងពាណិជ្ជកម្មធ្លាប់បានចេញសេចក្តីណែនាំឲ្យជំនាញកាំកុងត្រូលគ្រប់ច្រកព្រំដែនទាំងអស់ យកចិត្តទុកដាក់ទប់ស្កាត់បញ្ហានេះឲ្យមានប្រសិទ្ធភាពយ៉ាងណាក៏ដោយ។
លោក អ៊ុត សុភាព បានបង្កើតឲ្យមានអំពើពុករលួយនិងបក្ខពួកនិយមខ្លាំងបំផុត បន្ទាប់ពីគាត់បានកាន់តំណែងជាប្រធានកាំកុងត្រូលប្រចាំច្រកប៉ោយប៉ែតឡើងដុះស្លែទៅហើយ គឺលោក អ៊ុត សុភាព អាចក្តោបក្តាប់មុខសញ្ញាក្រុមឈ្មួញដែលរកស៊ីដឹកជញ្ជូនទំនិញខុសច្បាប់និងទំនិញគេចពន្ធមកពីស្រុកសៀម តាមច្រកប៉ោយប៉ែតយ៉ាងច្បាស់ដូចថ្ងៃរះ។ ឥឡូវនេះក្រុមឈ្មួញធំៗជាច្រើន ដែលមានវត្តមានរកស៊ីដឹកជញ្ជូនទំនិញនៅច្រកប៉ោយប៉ែតបាន ក្លាយជាមិត្តភក្តិឬជាសាច់ញាតិរបស់លោក អ៊ុត សុភាព អស់ទៅហើយ ទើបការរកស៊ីដឹកជញ្ជូនទំនិញរបស់ពួកគេមិនដែលមានការបង្ក្រាបពីសមត្ថកិច្ចម្តងណាឡើយ៕
0 comments:
Post a Comment