លោក ហ៊ុន សែន ប្រតិកម្មលើរបាយការណ៍លោក ស៊ូប៊ែរឌី

Friday, 05 October 2012 By Borosrath

ភ្នំពេញៈ លោកនាយករដ្ឋមន្ត្រី ហ៊ុន សែន បានប្រតិកម្មខ្លាំងៗ ទៅលើរបាយការណ៍រិះគន់ពីការរំលោភសិទ្ធិមនុស្ស និងដំណើរការប្រជាធិបតេយ្យនៅក្នុងប្រទេសកម្ពុជា របស់អ្នករាយការណ៍ពិសេស របស់អង្គការសហប្រជាជាតិ ហើយលោកបានហៅរបាយការណ៍នេះថា ជាគំនិតរបស់បុគ្គល មិនឆ្លុះបញ្ចាំងពីអនុសាសន៍របស់អង្គការសហប្រជាជាតិ (អ.ស.ប)ទេ។

ថ្លែងក្នុងពិធីចែកសញ្ញាបត្រទៅនិស្សិតសាកលវិទ្យាល័យធនធានមនុស្ស នៅវិទ្យាស្ថានជាតិអប់រំ លោក ហ៊ុន សែន ដែលសង្កត់ធ្ងន់ទៅលើរបាយការណ៍រិះគន់ពីការរំលោភសិទ្ធិ មនុស្ស ជម្លោះដីធ្លី ការបណ្ដេញប្រជាពលរដ្ឋទាំងបង្ខំ និងអំពីដំណើរការបោះឆ្នោត លោកមិនបានបញ្ចេញឈ្មោះអ្នករាយការណ៍ពិសេសរបស់ អ.ស.ប នេះទេ ប៉ុន្តែ គេអាចកាត់យល់ថា លោកថ្លែងដៅទៅរកលោក សុរិយា ស៊ូប៊ែរឌី អ្នករាយការណ៍ពិសេសផ្នែកសិទ្ធិមនុស្សនៅកម្ពុជា។

លោក ហ៊ុន សែន មានប្រសាសន៍ថា ៖ «គាត់គួរតែទៅជួយប្រទេសគាត់ទៅជាជាងមកជួយប្រទេសខ្មែរ។ គាត់តាំងខ្លួនជាសាស្ត្រាចារ្យច្បាប់ ហេតុអីបានជាគាត់មិនទៅជួយដល់ប្រទេសគាត់សរសេររដ្ឋធម្មនុញ្ញ»។

លោក ហ៊ុន សែន បានចាត់ទុករបាយការណ៍លោក ស៊ូប៊ែរឌី ថាជារបាយការណ៍គ្មានមូលដ្ឋាន និងមិនមែនជាអនុសាសន៍របស់ អ.ស.ប ប៉ុន្តែ វាជារបាយការណ៍បុគ្គល ស៊ូប៊ែរឌី ទៅវិញទេ។ ប៉ុន្តែផ្ទុយទៅវិញ របាយការណ៍នេះ មានការគាំទ្រទាំងស្រុងពីគណបក្សប្រឆាំង និងសង្គមស៊ីវិល និងក្រុមប្រឆាំងផ្សេងៗទៀត ដែលបានចាត់ទុកថា ជាអនុសាសន៍ អ.ស.ប ហើយត្រូវ លោក ហ៊ុន សែន ហៅក្រុមទាំងនេះថាជា«មនុស្សភ្លើ»ដែលចាត់ទុករបាយការណ៍ បុគ្គលថា ជាអនុសាសន៍របស់ អ.ស.ប.។

លោក ហ៊ុន សែន ថ្លែងថា៖ «ខ្ញុំសូមបញ្ជាក់ថា សេចក្ដីសម្រេចរបស់មហាសន្និបាតអ.ស.ប.មិនមែនមានចរិតបង្ខំបែប នេះទេ។ មានសេចក្ដីសម្រេចតែមួយគត់របស់ក្រុមប្រឹក្សាសន្តិសុខ ដែលមានចរិតបង្ខំ។ ប៉ុន្តែ ទម្រាំសេចក្ដីសម្រេចរបស់ក្រុមប្រឹក្សាសន្តិសុខចេញមួយៗ វាមិនងាយស្រួលនោះទេ»។ លោកលើកឧទាហរណ៍មួយពីបញ្ហាប្រទេសស៊ីរី ថា រហូតមកដល់ពេលនេះសេចក្ដីសម្រេចនៃក្រុមប្រឹក្សាសន្តិសុខ មិនទាន់ចេញនៅឡើយ។

លោក ហ៊ុន សែន បញ្ជាក់ថា លោកធ្លាប់បន្ទោសលោក សុរិយា ស៊ូប៊ែរឌី នៅពេលលោកមកដល់កម្ពុជាលើកដំបូង ហើយបានរាយការណ៍ មិនពិតអំពីស្ថានភាពនៅកម្ពុជា។ លោកបន្តថា នៅពេលនោះ លោក ស៊ូប៊ែរឌី ចង់ជួបលោកនាយករដ្ឋមន្ត្រី ប៉ុន្តែ លោកមិនបានឲ្យលោក ស៊ូប៊ែរឌី ជួបឡើយ ព្រោះលោកមានជំងឺ ហើយលោក ស៊ូប៊ែរឌី ក៏បានរាយការណ៍មិនពិតពីស្ថានភាពនៅកម្ពុជា។ ប៉ុន្តែលោកមិនបានថ្លែងថា លោកចង់បណ្ដេញលោក ស៊ូប៊ែរឌី ចេញពីកម្ពុជានោះទេ ខុសប្លែកពីលោក យាស ហ្គាយ (Yash Ghai) ដែលត្រូវបានលោក ហ៊ុន សែន បណ្ដេញចេញពីកម្ពុជា ព្រោះតែលោករិះគន់ខ្លាំងៗទៅលើរដ្ឋាភិបាលលោក ហ៊ុន សែន ទាក់ទងនឹងការរំលោភសិទ្ធិមនុស្ស និងជម្លោះដីធ្លី។

លោក យឹម សុវណ្ណអ្នកនាំពាក្យគណបក្សសមរង្ស៊ីមិនភ្ញាក់ផ្អើលនឹងអ្វីដែល លោក ហ៊ុន សែន បានហៅបក្សប្រឆាំងថា«មនុស្សភ្លើ»ទេ លោកថា វាមិនមែនជាលើកទី១ទេ ដែលលោក ហ៊ុន សែន ប្រមាថគណបក្សប្រឆាំងនោះ។ ប៉ុន្តែថា របាយការណ៍លោក ស៊ូប៊ែរឌី គឺឆ្លុះបញ្ចាំងពីអនុសាសន៍ អ.ស.ប. ព្រោះលោក ស៊ូប៊ែរឌី គឺជាអ្នកតំណាង អ.ស.ប.ផ្នែកសិទ្ធិមនុស្សនៅកម្ពុជា។

លោក យឹម សុវណ្ណ ថ្លែងថា៖ «ដូច្នេះ អ្វីដែលលោកសរសេរជារបាយការណ៍គឺមានមូលដ្ឋានត្រឹមត្រូវ ឆ្លុះបញ្ចាំងពីការពិតយ៉ាងពិតប្រាកដ ហើយវាក៏មានការយល់ព្រមពី(ក្រុមមន្ត្រី)ពាក់ព័ន្ធនៅក្នុង អ.ស.ប.ដែរ។ លោក ស៊ូប៊ែរឌី ធ្វើរបាយការណ៍ដោយផ្អែកទៅលើការពិតដែលលោកបានឃើញ និងផ្អែកតាមការិយាល័យ អ.ស.ប.ប្រចាំកម្ពុជា។ ដូច្នេះ របាយការណ៍អ្នកតំណាងពិសេសនេះ គឺជាជំហររបស់ អ.ស.ប.»៕

Social Icons

Pages

Friday, October 5, 2012Print PDF