Print 
PDFTuesday, 03 January 2012 12:02
- ម៉ៃ ទិត្យថារ៉ា
លោក ចេង ឈឺន ជនជាតិភាគតិចកួយ អាយុ៥៩ឆ្នាំ បានថ្លែងថា អ្នកភូមិប្រមាណ១០០នាក់មកពីភូមិពីរក្នុងឃុំសាលាវិស័យបាននាំ គ្នាមកតវ៉ានៅសាលាខេត្តនេះ ដោយសារមន្ត្រីបរិស្ថានបានប្រាប់ថា ដីដែលគាត់កំពុងរស់នៅគឺស្ថិតនៅក្នុងខេត្តព្រះវិហារ។
លោកបន្តថា រដ្ឋាភិបាលបានផ្តល់សម្បទានដីសេដ្ឋកិច្ចទៅក្រុមហ៊ុនឯកជន ដើម្បីអភិវឌ្ឍចម្ការកៅស៊ូ។ លោកថា ៖ «យើងបានរស់នៅ និងធ្វើការលើដីនោះ ដោយមិនបានគិតថា តើវាជាដីនៅក្នុងខេត្តព្រះវិហារ ឬខេត្តកំពង់ធំនោះទេ យើងគ្រាន់តែធ្វើស្រែចម្ការលើដីនោះ និងធ្វើតាមទំនៀមទម្លាប់តែប៉ុណ្ណោះ»។
លោកបានបន្តទៀតថា អ្នកភូមិដែលនាំគ្នាមកតវ៉ា គឺគ្រាន់តែចង់ដឹងថា ហេតុអ្វីបានជាក្រុមហ៊ុនយកដីអ្នកភូមិ និងហេតុអ្វីបានជាដីនោះស្ថិតនៅក្នុងខេត្តព្រះវិហារ និងសូមឲ្យខេត្តដោះស្រាយរឿងនេះឲ្យអ្នកភូមិ។
លោកនិយាយដែរថា៖ «បើអាជ្ញាធរខេត្តមិនដោះស្រាយឲ្យពួកយើង យើងនឹងសម្លាប់ខ្លួនពីព្រោះយើងគ្មានអីជាទីពឹងទេ»។
មានក្រុមហ៊ុនចំនួនពីរ គឺក្រុមហ៊ុន Phor Khouch បានឈូសឆាយដីស្រែចម្ការរបស់ប្រជាជនប្រហែល ២០ ហិកតា តាំងពីថ្ងៃទី២៨ ខែធ្នូ និងក្រុមហ៊ុន Ream Na បានឈូសឆាយដីស្រែចម្ការរបស់ប្រជាជនប្រហែល១០០ ហិកតា តាំងពីដើមខែកញ្ញា ឆ្នាំ២០១១។
អ្នកស្រី ប៊ុន សេត ជាជនជាតិកួយ អាយុ៤០ឆ្នាំ បានថ្លែងថា អ្នកភូមិទាំងអស់បានសម្រេចចិត្ត ត្រឡប់ទៅផ្ទះវិញ ដោយសារសន្តិសុខសាលាខេត្តប្រាប់ថា អភិបាលខេត្តមិនមកធ្វើការទេរហូតដល់ថ្ងៃពុធ ដូច្នេះ បីថ្ងៃក្រោយក្រុមអ្នកភូមិនឹងត្រឡប់ទៅវិញ។ គាត់ថា៖ «បើយកដីស្រែចម្ការយើងហើយ គេគួរតែសម្លាប់ពួកយើងទៅ»។
អ្នកស្រីបានបន្តថា៖ «អ្នកភូមិប្រហែល ៣៤០ គ្រួសារ មានជម្លោះដីធ្លីជាមួយក្រុមហ៊ុនពីរ លើដីទំហំ ៣៥០ហិកតា ឥឡូវនេះពួកគេមិនប្រាកដថា តើខេត្តណាដែលពួកគេកំពុងរស់នៅ ពីព្រោះក្រុមហ៊ុនប្រាប់ថា អ្នកភូមិខ្លះរស់នៅក្នុងស្រុករវៀង ខេត្តព្រះវិហារហើយអ្នកភូមិខ្លះរស់នៅក្នុងស្រុកប្រាសាទបល្ល័ង្ក ខេត្ត កំពង់ធំ។
លោក អឹម អន មេឃុំសាលាវិស័យ បានថ្លែងថា ក្រុមហ៊ុនចំនួនពីរបានទទួលសម្បទានដីសេដ្ឋកិច្ចពីរដ្ឋាភិបាលកាលពី ខែកញ្ញា ឆ្នាំ២០១១ មានក្រុមហ៊ុន ប៉ោ គួច ទទួលបានដី ៣៥០ហិកតា និងក្រុមហ៊ុន រៀម ណា បានទទួលដីចំនួន ៤១០ ហិកតា លោកបន្តថា លោកគ្មានសមត្ថភាពដោះស្រាយបញ្ហានេះទេ។ លោកបានបន្តទៀតថា៖ «តើខ្ញុំអាចធ្វើយ៉ាងដូចម្តេចទៅ អ្នកភូមិបាន និងកំពុងរស់នៅអស់រយៈពេលជាយូរមកហើយ ប៉ុន្តែ ក្រុមហ៊ុន បានទទួលពីរដ្ឋាភិបាល ដូច្នេះ ភាគីទាំងពីរត្រូវតែស្វែងរកដំណោះស្រាយខ្លួនឯង»។
លោកអភិបាលរង អ៊ូច សំអូន បានបដិសេធមិនធ្វើអត្ថាធិប្បាយ ហើយបានថ្លែងថា លោកមិនទទួលបន្ទុកបញ្ហានេះទេ។ ដោយឡែក លោក ហ៊ុន វណ្ណនិត អភិបាលរងមិនអាចទាក់ទងសុំការធ្វើអត្ថាធិប្បាយបានទេពីថ្ងៃចន្ទ ម្សិលមិញ។
លោក ឆោម រុន មន្ត្រីសម្របសម្រួលរបស់អង្គសិទ្ធិមនុស្សលីកាដូប្រចាំខេត្តកំពង់ធំ បានថ្លែងឲ្យដឹងថា នៅក្នុងតំបន់នោះមានក្រុមហ៊ុនចំនួនបីបានទទួលសម្បទានដីសេដ្ឋកិច្ច លើដីរបស់ជនភាគតិចកួយ។
លោក ឆោម រុន បន្តថ្លែងដែរថា៖ «រាជរដ្ឋាភិបាលមិនគួរផ្តល់ដីនោះទៅឲ្យក្រុមហ៊ុនឯកជនធ្វើការ អភិវឌ្ឍទេ។ វាមិនគួរយកដីរបស់ប្រជាជនភាគតិចកួយនោះទេ»៕
0 comments:
Post a Comment