Print 
PDFដោយ កែវ និមល
2011-12-15
ជាថ្មីម្ដងទៀត លោក ខៀវ សំផន ដែលជាប្រមុខរដ្ឋរបស់របបកម្ពុជាប្រជាធិបតេយ្យ បានប្រាប់ចៅក្រមសាលាក្ដីខ្មែរក្រហមថា លោកមិនមានអំណាចអ្វីទាំងអស់នៅក្នុងរបបកម្ពុជាប្រជាធិបតេយ្យ។
២៩-មិថុនា-២០១១៖ ខៀវ សំផន ក្នុងអំឡុងពេលសវនាការបឋមសំណុំរឿង ០០២ នៃសាលាក្ដីខ្មែរក្រហម ថ្ងៃទី៣
ចាប់ផ្ដើមឆ្លើយសំណួរនានារបស់ចៅក្រមសាលាក្ដីខ្មែរក្រហម លោក ខៀវ សំផន បានច្រានចោលការចោទប្រកាន់របស់សហព្រះរាជអាជ្ញាសាលាក្ដីខ្មែរក្រហម មកលើរូបលោកថា ជាជនមានអំណាច និងបានហៅការចោទប្រកាន់ទាំងនោះថា ជាការមិនពិត។
លោក ខៀវ សំផន បានបញ្ជាក់ថា លោកចូលរួមក្នុងចលនាខ្មែរក្រហម ដោយសាររូបលោកត្រូវកំលាំងប៉ូលិសសម្ងាត់តាមដាន និងត្រូវអាជ្ញាធរសម័យឆ្នាំ១៩៦៧ ប្រុងចាប់ខ្លួនយកទៅកាត់ទោសនៅតុលាការសឹក។
អតីតប្រធានរដ្ឋក្នុងរបបរខ្មែរក្រហមរូបនេះបានរៀបរាប់ថា រាល់ការតែងតាំងមុខងារលោកតាំងពីសម័យតស៊ូរបស់ចលនាខ្មែរក្រហម ក្នុងរាជរដ្ឋាភិបាលរួបរួមជាតិកម្ពុជា មកម្ល៉េះ គឺ ប៉ុល ពត ជាអ្នកផ្សាយចេញឈ្មោះរបស់លោក ដោយសាមីខ្លួនមិនទាំងដឹងខ្លួនផង។
លោក ខៀវ សំផន បានឲ្យដឹងថា លោកមានតួនាទីនៅក្នុងចលនាខ្មែរក្រហម ដោយសារលោកជាអ្នកសម្របសម្រួលទំនាក់ទំនងរវាងបក្សកុម្មុយនិស្តកម្ពុជា ជាមួយសម្ដេចព្រះ នរោត្តម សីហនុ ដែលកាលពេលនោះមានឋានៈជាប្រធានរដ្ឋាភិបាលរួបរួមជាតិកម្ពុជា។
លោក ខៀវ សំផន បានលើកឡើងថា ចំពោះការចូលរួមក្នុងសកម្មភាពជាសមាជិកបក្សកុម្មុយនិស្តកម្ពុជា លោកមិនមានប្រវត្តិរូប និងវណ្ណៈស្អាតស្អំដូចបក្សចង់បាននោះឡើយ។
អតីតប្រមុខរដ្ឋរបបកម្ពុជាប្រជាធិបតេយ្យ បានរៀបរាប់ថា លោកមិនមានអំណាចសម្រេចអ្វីទេក្នុងនាមជាសមាជិកត្រៀមរបស់បក្ស កុម្មុយនិស្តកម្ពុជានោះ សូម្បីតែត្រួតត្រាអង្គភាពកងកំលាំងប្រដាប់អាវុធមួយក្រុមក៏មិនមាន ផង។
លោក ខៀវ សំផន សង្ឃឹមថា ឆ្លងតាមការរៀបរាប់ប្រវត្តិសកម្មភាពការងាររបស់លោកក្នុងសម័យតស៊ូ និងកាន់អំណាចរបស់របបខ្មែរក្រហមនេះ អាចធ្វើឲ្យសាធារណជនបានយល់ដឹងថា តើការទទួលខុសត្រូវរបស់លោកមានកម្រិតណា?
លោក ជុំ ម៉ី អតីតអ្នកជាប់ឃុំឃាំងក្នុងគុកទួលស្លែង បាននិយាយថា លោកពុំជឿថា លោក ខៀវ សំផន មិនមានអំណាចក្នុងនាមជាអ្នកដឹកនាំជាន់ខ្ពស់ក្នុងរបបខ្មែរក្រហម នោះឡើយ។ លោក ជុំ ម៉ី បានបន្ថែមថា លោក ខៀវ សំផន លើកឡើងពីចំណុចនានា ថាមិនដឹងនោះ ដើម្បីគេចចេញពីការទទួលខុសត្រូវការស្លាប់របស់ប្រជាពលរដ្ឋកម្ពុជា ក្នុងរបបកម្ពុជាប្រជាធិបតេយ្យដែលមានរូបលោក ខៀវ សំផន ជាប្រមុខរដ្ឋ។
លោក វ៉ាន់ថាន់ ពៅតារា ជានាយករងមជ្ឈមណ្ឌលឯកសារកម្ពុជា។ លោកបានតាមដានការកាត់ក្ដីនៅសាលាក្ដីខ្មែរក្រហម និងបានស្ដាប់ការរៀបរាប់របស់លោក ខៀវ សំផន។ លោកបានមានប្រសាសន៍ថា ការលើកឡើងរបស់លោក ខៀវ សំផន ត្រូវមានការឆ្លើយតបពីខាងសហព្រះរាជអាជ្ញាសាលាក្តី។
លោក ខៀវ សំផន ជាអតីតប្រធានគណៈប្រធានរដ្ឋក្នុងរបបកម្ពុជាប្រជាធិបតេយ្យ ឬហៅថា របបខ្មែរក្រហមដែលកាន់អំណាចនៅកម្ពុជា ពីខែមេសា ឆ្នាំ១៩៧៥ ដល់ខែមករា ឆ្នាំ១៩៧៩។ លោកជាជនជាប់ចោទមួយរូបក្នុងចំណោមជនជាប់ចោទ ៤រូប នៅក្នុងសំណុំរឿង ០០២ ដែលត្រូវកាត់ទោសដោយសាលាក្ដីខ្មែរក្រហម ទាក់ទងការស្លាប់របស់ប្រជាពលរដ្ឋជិត ២លាននាក់៕
0 comments:
Post a Comment