នួន ជា ថា សាលាក្ដីយកតែខ្លួនក្រពើមកវិនិច្ឆ័យ ចោលក្បាលនិងកន្ទុយ

អង្គារ 22 វិច្ឆិការ 2011 6:01 PM | ស បទុម

គ្មានភាពតក់ស្លុតឡើយ បងធំទី២នៃរបបខ្មែរក្រហម បានប្រើប្រាស់វោហារស័ព្ទ វាយប្រហារទៅលើសាលាក្ដីខ្មែរក្រហមយ៉ាងធ្ងន់ដៃថា បានយកតែខ្លួនក្រពើ មកធ្វើការវិនិច្ឆ័យ តែចោលក្បាលនិងកន្ទុយ ។ ពោលគឺសាលាក្ដីនេះបានចាប់តែក្រុមខ្លួន យកមកធ្វើការកាត់ទោស ដោយមិនអើពើចំពោះភាគីពាក់ព័ន្ធផ្សេងទៀត ដែលជាបុព្វហេតុបង្កើតឲ្យមានរបបខ្មែរក្រហម ។

នួន ជា បងធំទី២នៃរបបខ្មែរក្រហម

ដោយផ្ដើមនូវគារវកិច្ចចំពោះព្រះសង្ឃ អ្នកស្នេហាជាតិ គ្រប់ជំនាន់ ដែលបានបានបាត់បង់ជីវិតក្នុងបុព្វហេតុការពារទឹកដីខ្មែរឲ្យបាន គងវង់រហូតមកដល់ពេលនេះ នួន ជា ប្រធានសភា នៃរបបខ្មែរក្រហមបានលើកឡើងដោយសម្លេងម៉ាត់ៗថា ” បើសុខភាពរបស់ខ្ញុំអំណោយផល ខ្ញុំនឹងព្យាយាមឆ្លើយបំភ្លឺ ដើម្បីប្រវត្តិសាស្ត្រមួយដ៏ត្រឹមត្រូវ មិនមែនប្រវត្តិសាស្ត្រក្នុងនយោបាយនោះទេ។ ខ្ញុំគិតថា តុលាការនេះ មានភាពមិនយុត្តិធម៌សម្រាប់ខ្ញុំ តាំងពីដើមដំបូងមកម្ល៉េះ ដោយហេតុថា យកតែបញ្ហាមួយចំណែកប៉ុណ្ណោះ មកជំនុំជម្រះ ខ្ញុំសូមនិយាយថា សត្វក្រពើមួយទាំងមូល គេយកតែខ្លួនមកនិយាយ តែមិនយកក្បាល និងកន្ទុយ ដែលជាចំណែកសំខាន់ ក្នុងការបម្រើដល់សកម្មភាពរាល់ថ្ងៃ របស់វា ឬក្នុងន័យម្យ៉ាងទៀត គឺថា ឫសគល់ និងបច្ច័យរបស់វា…. តុលាការនេះ មិនយកមកពិចារណាទេ”។

ជាមួយគ្នាអតីតបងធំទី២វ័យ៨៦ឆ្នាំរូបនេះ ក៏បានថ្លែងច្រានចោលរាល់ការចោទប្រកាន់ទាំងអម្បាលមាណរបស់ ព្រះរាជអាជ្ញាសាលាក្ដីពីបទឧក្រិដ្ឋកម្មប្រឆាំងមនុស្សជាតិ ថាជាការមិនពិត ដោយបានទម្លាក់ការទទួលខុសត្រូវចំពោះបរទេស ក្នុងនោះបានសង្កត់ធ្ងន់ទៅលើប្រទេសយួន ។
នួន ជា បានលើកឡើងដូច្នេះថា ” ចំពោះអ្វីទាំងប៉ុន្មានដែលបានចោទប្រកាន់នោះសុទ្ធតែជារឿងមិន ពិត ។ គោលជំហររបស់ខ្ញុំក្នុងការតស៊ូក្នុងបដិវត្តន៍គឺដើម្បីផល ប្រយោជន៍ជាតិនិងប្រជាជាតិជាធំ ។ខ្ញុំសូមជម្រាបថា ការរស់នៅក្រោមការគាបសង្កត់ និងភាពអយុត្តិធម៌សង្គមគ្រប់បែបយ៉ាង បានជម្រុញឲ្យខ្ញុំនូវគំនិតលះបង់គ្រួសារ ដើម្បីទៅតស៊ូរំដោះជាតិមាតុភូមិ ពីនឹម អាណានិគម គឺការឈ្លានពានគាបសង្កត់ពីពួកចោរបរទេស លួចទឹកដី ..” ។
ដោយបានពន្យល់ពីគោលការណ៍នៃបក្សកុម្មុយនិស្តរបស់ខ្លួនថា ” មាគ៌ានយោបាយរបស់បក្សកុម្មុយនិស្តកម្ពុជាគឺ ដើម្បីរំដោះប្រទេសជាតិពីខ្ញុំកញ្ជះបរទេស និងកសាងសង្គមមួយដែលស្អាតស្អំ ឯករាជ្យ គឺមិនមែនកាប់សម្លាប់ប្រល័យពូជសាសន៍ស្អីនោះទេ..”។
គួរបញ្ជាក់ថា នៅក្នុងសវនាការកាលពីពេលកន្លងទៅ ខៀវ សំផន អតីប្រធានគណៈប្រធានរដ្ឋ ដែលពុំមានសេសសល់ទ្រព្យធន់អ្វីពីការឡើងកាន់អំណាចរបស់ខ្លួន ក្រៅពីផ្ទះកញ្ចាស់តូចមួយនៅតំបន់ប៉ៃលិននោះ ក៏បានថ្លែងដូច នួន ជា នៅពេលនេះដែរ ដោយថា នឹងត្រៀមលក្ខណជានិច្ចដើម្បីសហការជាមួយសាលាក្ដីក្នុងការបង្ហាញ ការពិតទាក់ទងទៅនឹងរបបកម្ពុជាប្រជាធិបតេយ្យរបស់ខ្លួនដែលត្រូវ ចោទថា បានធ្វើឲ្យពលរដ្ឋខ្មែរយ៉ាងហោចណាស់ជាង២លាននាក់ស្លាប់បាត់បង់ ជីវិតនោះ៕

Social Icons

Pages

Tuesday, November 22, 2011Print PDF