រុស្ស៊ីផ្តល់លុយឲ្យវៀតណាមខ្ចីសម្រាប់សង់ស្ថានីយអគ្គិសនីបរមាណូ

នាយករដ្ឋមន្រ្តីរុស្ស៊ី Vladimir Putin (ឆ្វេង) និងលោកប្រមុខរដ្រុស្ស៊ី Dmitry Medvedev នៅវិមាន Kremlin ថ្ងៃទី ១៧វិច្ឆិកាឆ្នាំ ២០១១

ថ្ងៃ ២៣/១១/២០១១
កិច្ចព្រមព្រៀងស្តីពីការផ្តល់ឥណទាននេះ ត្រូវបានចុះនៅទីក្រុង ហាណូយរវាងក្រសួងហិរញ្ញវត្ថុប្រទេសទាំងពីរ ក្នុងជំនួបថ្ងៃ ២១វិច្ឆិកាកន្លងទៅ រវាង ឧបនាយករដ្ឋមន្ត្រីរុស្ស៊ីទី១ លោក Igor Shuvalov និង ឧបនាយករដ្ឋមន្ត្រីវៀតណាម លោក Hoang Chung Hai ដែលជាសហប្រធាននៃ “គណៈកម្មការអន្តររដ្ឋាភិបាលស្តីអំពី "សហប្រតិបត្តិការលើវិស័យ ពាណិជ្ជកម្ម សេដ្ឋកិច្ច វិទ្យាសាស្ត្រ និងបច្ចេកទេស”។
ទោះបីសេចក្តីជូនដំណឹងអំពីការចុះកិច្ចព្រមព្រៀងដើម្បីផ្តល់លុយឲ្យវៀតណាមខ្ចីនោះ ឥតមាននិយាយពីទំហំទឹកប្រាក់កម្ចីក្តី ក៏នៅតាមមធ្យោបាយឃោសនាមហាជនរុស្ស៊ី ធ្លាប់មានបង្ហើបឲ្យដឹងទៅហើយថា ស្ថានីយអគ្គិសនីបរមាណូដែលគ្រោងសង់ឡើងនៅវៀតណាមនោះ គឺទាមទារឲ្យចំណាយមិនតិចជាង ៤.០០០លានដុល្លារអាមេរិកឡើយ។

គឺកាលពីខែវិច្ឆិកាឆ្នាំ ២០០៩ ដែលរដ្ឋសភាវៀតណាម បានអនុម័តផែនការខាងសាងសង់ជា“រោងចក្រផលិតភ្លើងអគ្គិសនីដោយប្រើថាមពលបរមាណូ”។ វានឹងក្លាយទៅជា ស្ថានីយអគ្គិសនី បរមាណូទី១ មិនគ្រាន់តែនៅវៀតណាមប៉ុណ្ណោះទេ តែក៏នៅអាស៊ីអាគ្នេយ៍ទាំងមូលតែម្តង។

លុះក្នុងខែធ្នូឆ្នាំ ២០០៩នោះឯងនៅម៉ូស្គូមានចុះទៅហើយជា អនុស្សរណៈ ស្តីអំពី សហប្រតិបត្តិការក្នុងការសាងសង់នេះ - ចុះ រវាងក្រុមហ៊ុនសាជីវកម្មរដ្ឋរុស្ស៊ីខាងថាមពលបរមាណូ RosAtom និង ក្រុមហ៊ុនសាជីវកម្មអគ្គិសនីរដ្ឋវៀតណាម EVN។

ហើយនៅទីបំផុត ថ្ងៃ៣១តុលាឆ្នាំ ២០១០ គូភាគីបានចុះហត្ថលេខាលើ “កិច្ចព្រមព្រៀង អន្តររដ្ឋាភិបាល” ស្តីអំពីការសង់ស្ថានីយអគ្គិសនីបរមាណូដំបូងបង្អស់នៅខេត្ត Ninh Thuan ខេត្តដែលស្ថិតនៅភូម៌ភាគកណ្តាលប្រទេសវៀតណាម។ រោងចក្រភ្លើងនេះនឹងមាន ម៉ាស៊ីន ប្រតិករនុយក្លេអ៊ែរ ចំនួន២ ដែលនីមួយៗប្រកបដោយកម្លាំងភ្លើងពី ១.០០០ ដល់១.២០០ Megawatt។ វានឹងត្រូវ ចាប់ផ្តើមសង់ឡើង គឺក្នុងឆ្នាំ ២០១៤ហើយនឹងដាក់ឲ្យដំណើរការទៅទល់ឆ្នាំ ២០២០។

ស្របនឹងផែនការរដ្ឋាភិបាលវៀតណាម ទៅទល់ដំណាច់ឆ្នាំ ២០៣០ នៅតាមខេត្តចំនួន៥ នៃប្រទេស នឹងមានសង់បានស្ថានីយអគ្គិសនីបរមាណូដល់ទៅ ៨កន្លែងដែលនឹងមានកម្លាំងភ្លើងសរុបទៅ ១៥.០០០ Megawatt ឬស្មើនឹង១០% នៃរាល់តែថាមពលអគ្គិសនី ដែល ផលិតបាននៅទូទាំងប្រទេសវៀតណាម៕