ដោយ ដែន អយុធ្យា
2011-10-13
ប្រជាពលរដ្ឋរងគ្រោះដោយទឹកជំនន់នៅខេត្តកំពង់ចាម កំពុងជួបប្រទះភាពអត់ឃ្លាន។
ប្រជាពលរដ្ឋត្រូវជម្លៀសចេញពីលំនៅមករស់នៅទីទួលសុវត្ថិភាពប្រមាណ ៧០កន្លែង នាខេត្តកំពង់ចាម កំពុងប្រឈមមុខជាមួយការលំបាកប្រចាំថ្ងៃ ដោយសារទឹកជំនន់លិចត្រាំត្រែងយូរពេក ហើយពួកគេបានអំពាវនាវឲ្យរដ្ឋាភិបាល និងស្ថាប័នពាក់ព័ន្ធ ជួយសម្រាលការលំបាករបស់ពួកគេ។
ពលរដ្ឋបានឲ្យដឹងថា សព្វថ្ងៃនេះសម្រាប់ពលរដ្ឋក្រីក្រដែលរកប្រាក់កម្រៃចិញ្ចឹមជីវិតបាន ១ថ្ងៃសម្រាប់តែ១ថ្ងៃ
កំពុងរកអង្ករច្រកឆ្នាំងពុំបាន។ ពួកគេទាមទារឲ្យស្ថាប័នពាក់ព័ន្ធជួយផ្ដល់ជំនួយសង្គ្រោះជាបន្ទាន់។ប្រជាពលរដ្ឋបន្ថែម៖ «ខ្វះខាតតាំងពីស្បៀងរហូតដល់រោងគោរកអីប្រក់គ្មានទេ។ អណ្ដែតតាមទឹក ខ្វះសព្វគ្រប់។ ខ្វះខាតអង្ករ និងថ្នាំពេទ្យ។ ខ្ញុំអរគុណណាស់បើបានជួយ ខ្ញុំអរមួយជីវិត»។
ពលរដ្ឋបន្តថា បច្ចុប្បន្នពួកគាត់ប្រឈមការខ្វះស្បៀងក្នុងអំឡុងពេលទឹកជំនន់។ ប៉ុន្តែនៅក្រោយទឹកស្រកពួកគាត់ក៏ប្រឈមនឹងការខ្វះលំនៅឋានរស់នៅថែមទៀត ព្រោះផ្ទះរបស់ពួកគាត់ត្រូវទឹកជំនន់បំផ្លាញអស់គ្មានសល់។
ទាក់ទងការលំបាករបស់ប្រជាពលរដ្ឋ លោក ហ៊ុន ណេង ជាអភិបាលខេត្តកំពង់ចាម បានឲ្យដឹងថា កាកបាទក្រហមខេត្ត និងរដ្ឋាភិបាល បានត្រៀមអង្ករជាង ៣០០តោន សម្រាប់ជួយសង្គ្រោះពលរដ្ឋដែលកំពុងប្រឈមមុខការអត់ឃ្លាន។
លោកបន្តថា ការចែកស្បៀងទៅដល់ពលរដ្ឋលិចទឹក អាជ្ញាធរផ្ដល់ជូនចំពោះពលរដ្ឋទាំងឡាយណាដែលជម្លៀសពីលំនៅមករស់នៅលើទីទួលសុវត្ថិភាព ហើយជាជនក្រីក្រពិតប្រាកដ។
លោក ហ៊ុន ណេង បន្ថែម៖ «យើងដោះស្រាយបន្តបន្ទាប់ ឥឡូវគឺកាកបាទក្រហមខេត្តបានទិញជាង ១០០តោន ហើយរដ្ឋាភិបាលបានផ្ដល់ជូន ២០០តោនទៀត។ យើងចែកជូនបងប្អូនគឺសំដៅលើទីទួលមានសុវត្ថិភាព។ ឥឡូវយើងកំពុងតាមចែកដល់ពលរដ្ឋដែលទៅជ្រកនៅតាមផ្ទះបងប្អូនប្រមាណ ១ពាន់គ្រួសារទៀត»។
លោក ហ៊ុន ណេង បានឲ្យដឹងថា ទឹកជំនន់ទន្លេមេគង្គឆ្នាំ២០១១ បានបណ្ដាលឲ្យស្រុកចំនួន ៨ ក្នុងខេត្តកំពង់ចាម ត្រូវលិចលង់ និងមានប្រជាពលរដ្ឋរាប់ពាន់គ្រួសារ ត្រូវជម្លៀសមកកាន់ទីទួលសុវត្ថិភាពចំនួន ៧០ទីតាំងផ្សេងគ្នា។
ទឹកជំនន់ក៏បានបំផ្លាញផ្ទះអស់ជាង ៨០ខ្នង និងបានសម្លាប់មនុស្សជិត ៥០នាក់ ព្រមទាំងបានបំផ្លាញផ្ទៃដីកសិកម្មដំណាំស្រូវកសិករជាង ១ម៉ឺន៥ពាន់ហិកតារ។ លោកបន្តថា សម្រាប់ពលរដ្ឋរងគ្រោះបាត់បង់ផ្ទះសម្បែងពីគ្រោះទឹកជំនន់ អាជ្ញាធរកំពុងពិនិត្យតាមលទ្ធភាពជាក់ស្ដែង ដើម្បីសាងសង់ជម្រកជូនពួកគាត់ឡើងវិញ បន្ទាប់ពីទឹកជំនន់បានស្រក៕
0 comments:
Post a Comment