Print 
PDF
ភ្នំពេញៈ កសិករកម្ពុជានៅតែរងគ្រោះខ្វះខាតស្បៀងអាហារ សម្រាប់បរិភោគខ្លាំងជាងគេ ដោយសារការប្រែប្រួលអាកាសធាតុ កំណើនប្រជាជន និងភាពខ្សត់ខ្សោយនៃធនធានដូចជា ដីកសិកម្ម និងទឹកក្នុងការផលិតស្បៀងអាហារ។
យោងតាមសេចក្តីប្រកាសព័ត៌មានមួយ របស់សម្ព័ន្ធអង្គការមិនមែនរដ្ឋាភិបាលដែលរៀបចំពិព័រណ៍ស្បៀងអាហារ និងផលិតផលកសិកម្ម ដើម្បីគាំទ្រកសិករខ្នាតតូច កាលពីម្សិលមិញ បានឲ្យដឹងថា កសិករនៅតាមទី
ជនបទ នៅតែប្រឈមមុខ និងការខ្វះខាតស្បៀង ខណៈកម្ពុជាផលិតស្រូវបានជាង៧លានតោន នៅក្នុងឆ្នាំ ២០១០។ ចំនួននេះ អាចចិញ្ចឹមប្រជាជននៅក្នុងប្រទេសបានគ្រប់គ្នា ហើយសេសសល់អាចនាំចេញទៅក្រៅប្រទេសបានថែមទៀត តែផ្ទុយទៅវិញ ប្រជាពលរដ្ឋក្រីក្រនៅតែរងគ្រោះ។ សេចក្តីប្រកាសព័ត៌មាន បានលើកឡើងថា៖ «អ្នកផលិតស្បៀងខ្នាតតូច ជាពិសេសស្ត្រី នៅតាមទីជនបទ នៅតែប្រឈមមុខនឹងកង្វះខាតស្បៀងអាហារ» ដោយបន្តថា តម្លៃទំនិញបន្តកើនឡើង ហើយគ្រោះមហន្តរាយធម្មជាតិ កើតឡើងកាន់តែញឹកញាប់ និងធ្ងន់ធ្ងរជាងមុន។លោកស្រី ជេត ចរិយា នាយិកាប្រតិបត្តិ អង្គការស្តារកម្ពុជា ដែលជាអង្គការមួយក្នុងចំណោមអង្គការ៧ ដែលបានចូលរួមរៀបចំតាំងពិព័រណ៍នោះ បានថ្លែងថា ចំនួនមនុស្សកាន់តែកើនឡើង តែផ្ទៃដីសម្រាប់ធ្វើកសិកម្ម នៅតែដដែល គឺជាដើមហេតុ ដែលធ្វើឲ្យកសិករខ្វះខាតស្បៀង។ លោកស្រីនិយាយថា៖ «យើងព្រួយបារម្ភ ដោយសារប្រជាពលភាគច្រើន ប្រកបរបរកសិកម្ម តែគាត់មិនមានលទ្ធភាពគ្រប់គ្រាន់ទាំងបច្ចេកទេសទាំងដីធ្លី និងទាំងថវិកា»។ លោកស្រីបន្តថា បញ្ហាសំខាន់ជាងគេ គឺប្រជាកសិករ ខ្វះខាតដីធ្លី សម្រាប់ធ្វើកសិកម្ម។ លោកស្រី ជេត ចរិយា បានអំពាវនាវដល់រដ្ឋាភិបាល ឲ្យរៀបចំយុទ្ធសាស្រ្ត ធ្វើយ៉ាងណាត្រូវកសាងប្រព័ន្ធធារាសាស្ត្រ សម្រាប់កសិករ ឲ្យអាចធ្វើស្រែបានចំនួនពីរដងក្នុងមួយឆ្នាំ។
ប្រទេសកម្ពុជាកំពុងតែទទួលផលប៉ះពាល់ ដោយសារគ្រោះទឹកជំនន់យ៉ាងធ្ងន់ធ្ងរ ដែលបានបំផ្លាញស្រូវជាដង្ហើមរស់របស់កសិកររាប់ម៉ឺនហិកតា។ ជាមួយគ្នានេះ អង្ករនៅតាមទីផ្សារ កំពុងត្រូវបានពួកឈ្មួញកណ្តាលឆ្លៀតឱកាសដំឡើងថ្លៃ។
អនុរដ្ឋលេខាធិការ ក្រសួងកសិកម្ម លោក គិត សេង បានទទួលស្គាល់ថា ឈ្មួញតែងតែឆ្លៀតឱកាស នៅក្នុងពេលស្ថានភាពបែបនេះ ដើម្បីកេងយកចំណេញ ដោយដំឡើងថ្លៃអង្ករ។
ទោះបីជាបែបនេះក្តី លោក គិត សេង បញ្ជាក់ថា ក្រសួងកសិកម្ម មិនមានចេញបម្រាម ដើម្បីទប់ស្កាត់អង្ករមិនឲ្យឡើងថ្លៃឡើយ ដោយលោកបង្វែរសំណួរ ឲ្យទៅសួរក្រសួងពាណិជ្ជកម្មវិញ។
រដ្ឋលេខាធិការ ក្រសួងពាណិជ្ជកម្ម លោក ម៉ៅ ថូរ៉ា បញ្ជាក់ថា ក្រសួងពាណិជ្ជកម្ម នៅមិនទាន់ចេញលិខិតអ្វីមួយ ទាក់ទិនទៅនឹងតម្លៃអង្ករ ដែលកំពុងល្បីថា ឡើងថ្លៃនេះទេ គឺត្រូវរង់ចាំរហូតដល់មន្ត្រីនៃក្រសួងនេះ ចុះទៅស្រាវជ្រាវព័ត៌មានជាក់លាក់ជាមុនសិន។ លោកបាននិយាយថា៖ «យើងមិនទាន់ដឹង យើងចេះតែឮៗ ទាល់តែនាយកដ្ឋាន គេទៅស្រាវជ្រាវសិន»៕
0 comments:
Post a Comment