ដោយ អ៊ុក សាវបូរី
2011-10-14
ក្នុងពេលទឹកកំពុងជន់លិចខេត្ត ខណ្ឌនានាជាច្រើននៅប្រទេសកម្ពុជា ឈ្មួញលក់អង្ករបានដំឡើងថ្លៃអង្ករផងដែរ។
ឈ្មួញ និងអង្គការជួញដូរអង្ករឲ្យដឹងនៅថ្ងៃសុក្រ ទី១៤ តុលា ឆ្នាំ២០១១ ថា អង្ករបានឡើងថ្លៃបន្តិច បើធៀបនឹងខែកញ្ញា កន្លងទៅ។
បុគ្គលិកគ្រប់គ្រងទីផ្សារអង្កររបស់អង្គការសេដាក (CEDAC) លោក លឹម សុគុណារុន ឲ្យដឹងថា អង្គការនេះបានឡើងថ្លៃអង្ករក្នុង១គីឡូក្រាម ៥០រៀល។ ការឡើងថ្លៃអង្ករនេះមិនសំដៅលើមហន្តរាយនៃគ្រោះទឹកជំនន់
ទេ។ អង្ករឡើងថ្លៃគឺមកពីតម្លៃដឹកជញ្ជូន និងសេវាកម្មផ្សេងទៀតបានឡើងថ្លៃ។លោកថា ម៉ាស៊ីនស្រូវដែលអង្គការសេដាក សហការនោះ បានកិនដល់ទៅ ២កន្លែង នៅក្នុងខែកញ្ញា និងតុលា ព្រោះតម្រូវការរបស់អ្នកទិញកើនច្រើនទ្វេដង៖ «ខាងខ្ញុំវាលំបាកប្រៀបធៀបតម្លៃជាមួយនឹងទីផ្សារ ដោយសារអង្ករខាងខ្ញុំ គឺអង្ករ បើផ្កាម្លិះ គឺវាសុទ្ធ ១០០% អ៊ីចឹងហើយអង្ករយើងវាសរីរាង្គទៀត ប៉ុន្តែបើនៅទីផ្សារ ភាគច្រើនជាអង្ករលាយ លាយអង្ករផ្សេងៗទៅ គេអាចលក់តម្លៃមួយដែលថោក»។
អាជីវករលក់អង្ករនៅមុខស្ថានីយរថភ្លើងក្រុងភ្នំពេញ សុំមិនប្រាប់ឈ្មោះឲ្យដឹងថា ថៅកែម៉ាស៊ីនស្រូវបានដំឡើងលើថ្លៃអង្ករក្នុង១បាវ ២.០០០រៀល គ្រប់ប្រភេទអង្ករ។ ពួកគាត់ទទួលលក់អង្ករបន្ត ក៏យកចំណេញក្នុង១បាវ ១.០០០ ទៅ ២.០០០រៀលដែរ៖ «គឺថា អត់មានស្រូវកិនអ៊ីចឹង វាចេះតែឡើងថ្លៃម្ដងបន្តិចៗ តែប៉ុណ្ណឹងទេ វាឡើងតិចៗទេ វាមិនឡើងគំហុកខ្លាំងច្រើនទេ អត់ទេ។ យើងលក់ធ្វើម៉េចឲ្យយកលុយទៅទិញពីរោងម៉ាស៊ីនមកវិញបានហ្នឹង។ ក្នុង១អាទិត្យវាឡើង ២ពាន់អ៊ីចឹង»។
ការឡើងថ្លៃតម្លៃស្រូវអង្ករនេះ គឺម្ចាស់រោងម៉ាស៊ីននានាឲ្យដឹងថា ដោយសារខេត្តផលិតស្រូវធំៗក្នុងប្រទេសកម្ពុជា ត្រូវទឹកជំនន់បានពន្លិចឲ្យស្រូវច្រើនម៉ឺនហិកតាររលួយក្នុងទឹក។
ម្ចាស់រោងម៉ាស៊ីនស្រូវនៅខេត្តតាកែវ លោក ង៉ែត ឲ្យដឹងថា គាត់ដើរទិញស្រូវ ត្រូវកសិករអ្នកផលិតស្រូវលក់បានទារថ្លៃស្រូវក្នុង ១គីឡូក្រាម ១.៥០០រៀល ព្រោះគេសំអាង សំបូរឈ្មួញចុះទិញស្រូវច្រើន និងឲ្យតម្លៃ ១.៤៥០រៀល ទៅ ១.៥០០រៀល។ លោកថា គាត់ក៏បានដំឡើងថ្លៃអង្ករ ១ម៉ឺនរៀលដែរ ក្នុង១បាវ ទម្ងន់ ៥០គីឡូក្រាម ព្រោះលំបាកដើររកទិញស្រូវមកកិនជាអង្ករលក់។ លោកថា កាលពីឆ្នាំមុន នៅខែកញ្ញា និង តុលា កសិករប្រមូលផលស្រូវបង្កើនរដូវ គេលក់ឲ្យគាត់តែតម្លៃ ៩០០រៀល ទៅ ១.០០០រៀលទេ។ ប៉ុន្តែឆ្នាំនេះគេទារថ្លៃខ្ពស់ដល់ទៅ ១.៥០០រៀល៖ «ទិញស្រូវអត់បាន ដូចថា ទុកអង្ករឆ្នាំក្រោយ...។ មកពីតំបន់ខ្លះហ្នឹងវាលិចទឹកអស់»។
សហគមន៍គ្រួសាររុងរឿងនៅខេត្តកំពត ដែលប្រមូលទិញស្រូវសរីរាង្គ លោក អួន សុផល ឲ្យដឹងថា មិនបានដំឡើងថ្លៃលក់ស្រូវទេ ព្រោះការបញ្ចេញស្រូវលក់ទៅឲ្យឈ្មួញ គឺបានលក់នៅមុនដំណឹងពីគ្រោះទឹកជំនន់៖ «អត់បានទប់ទល់សភាពការណ៍ ដោយសារសហគមន៍ដែលនៅកម្រិតតូចៗអ៊ីចឹង មានទន់តិចតួច ហើយកសិករគាត់ចេះតែព្រួយបារម្ភខ្លាចស្រូវចុះថោកអ៊ីចឹង ដល់ពេលស្រូវបានឡើងថ្លៃបន្តិច គាត់ចាប់ផ្ដើមលក់តែម្ដង»។
កសិករឃុំតាភេម ស្រុកត្រាំកក់ ខេត្តតាកែវ ឈ្មោះ ឆែម ឲ្យដឹងថា គាត់លក់ស្រូវបាន ១.៤៥០រៀល ថ្លៃជាងរាល់ឆ្នាំ ព្រោះឈ្មួញចុះមកប្រមូលទិញយកទាំងអស់។ គាត់សប្បាយចិត្ត ព្រោះគ្រោះទឹកជំនន់បានជួយឲ្យតម្លៃស្រូវគាត់បានឡើងថ្លៃ៖ «គេអ្នកទិញហ្នឹងវាឡើងទិញដល់តាមផ្ទះ ១គីឡូ ១.៤៥០»។
ទោះបីជាអង្ករនៅលើទីផ្សារឡើងថ្លៃបន្តិចមែន តែមកទល់ពេលនេះ មន្ត្រីរដ្ឋាភិបាលអះអាងថា ប្រទេសកម្ពុជា មិនខ្វះអង្ករទេ ហើយការមានទឹកលិចលង់ខេត្ត ខណ្ឌ មួយចំនួននោះ មិនប៉ះពាល់ដល់គម្រោងនាំស្រូវចេញប្រចាំឆ្នាំរបស់ប្រទេសកម្ពុជាឡើយ៕
0 comments:
Post a Comment