ភ្នំពេញ: ក្នុងសារផ្ទាល់មាត់ ក្រោយកិច្ចប្រជុំគណៈរដ្ឋមន្ត្រីពិសេស កាលពីរសៀលថ្ងៃទី១៣ តុលា លោកនាយករដ្ឋមន្ត្រី ហ៊ុនសែន បានប្រកាសអំពីការលុបចោលរាជពិធីបុណ្យអុំទូកដែលនឹងប្រព្រឹត្តទៅនៅដើមខែវិច្ឆិកាឆ្នាំនេះ គឺដោយសារតែមានមហន្តរាយគ្រោះទឹកជំនន់ធ្ងន់ធ្ងរ ខណៈដែលលោកអះអាងថា មកដល់ពេលនេះមានអ្នករងគ្រោះបាត់បង់ជីវិតដល់ទៅ ២៤៧នាក់ហើយ។
ក្នុងសេចក្តីថ្លែងសារផ្ទាល់មាត់ ប្រមាណ៣០នាទី នៅវិមានសន្តិភាព លោកនាយករដ្ឋមន្ត្រី ហ៊ុន សែន បានលើកហេតុផលពីការលុបចោលរាជពិធីបុណ្យអុំទូកនៅឆ្នាំនេះថា ដោយសារតែបញ្ហាទឹកធំឡើងខ្ពស់ជាងឆ្នាំ២០០០។ លោកមានប្រសាសន៍ថា៖ «រហូតដល់ថ្ងៃទី១៣តុលា ឆ្នាំ២០១១ ទឹកទន្លេនៅតែឡើងធំ លើសពីកម្រិតប្រកាស
អាសន្ន នៅគ្រប់ទីកន្លែង ពិសេសនៅភ្នំពេញ មុខព្រះបរមរាជវាំង ដែលជាកន្លែងប្រារព្ធពិធីបុណ្យអុំទូក គឺទឹកឡើងខ្ពស់ ដែលអាចបង្កគ្រោះថ្នាក់ជាយថាហេតុ ដល់ក្រុមអ្នកអុំទូក ង ដែលមានប្រមាណមិនតិចជាង ៤០០ គ្រឿង»។រាជពិធីបុណ្យអុំទូកឆ្នាំនេះ ដែលគ្រោងនឹងធ្វើនៅថ្ងៃទី៩ ,១០ និងទី១១វិច្ឆិកា នៅភ្នំពេញលោកនាយករដ្ឋមន្រ្តីលើកឡើងថា គឺនឹងមានកម្លាំងចំណុះទូក ជាប្រជា-កសិករមកពីតាមបណ្តាខេត្តនានានៅ ទូទាំងប្រទេស ឡើងមកភ្នំពេញ ដែលនាំឲ្យខាតពេលវេលា ក្នុងការធ្វើស្រែចម្ការនៅពេលទឹកស្រក។ ម្យ៉ាង រដ្ឋាភិបាលក៏ត្រូវចាត់កម្លាំងការពារសន្តិសុខ និងចំណាយថវិកាមិនតិចជាង១០លានរៀលទេ។ លោកបញ្ជាក់ថា៖ «ដូច្នេះយើងត្រូវសន្សំថវិកា និងធនធានមួយចំនួន ដើម្បីស្តារឡើងវិញនូវគ្រោះទឹកជំនន់»។
ទោះជាលោកនាយករដ្ឋមន្ត្រី បានប្រកាសឲ្យផ្អាកបុណ្យអុំទូកថ្នាក់ជាតិក្តី ក៏លោកនៅបានអនុញ្ញាតឲ្យប្រជាពលរដ្ឋ និងអាជ្ញាធរ ប្រារព្ធពិធីបុណ្យអុំទូក នៅតាមវត្តអារាម និងតាមខេត្តស្រុក នានា ទៅតាមលទ្ធភាពបានដែរ ក្នុងរយៈពេល៣ថ្ងៃ នៃពិធីបុណ្យប្រពៃណីជាតិនេះ។ ចំណែកមន្ត្រីរាជការស៊ីវិល គឺនៅតែអនុញ្ញាតឲ្យឈប់សម្រាក៣ ថ្ងៃទៅតាមប្រតិទិនបុណ្យជាតិដដែល។
លោកនាយករដ្ឋមន្ត្រី ក៏ជម្រាបជាសារទៀតដែរថា ពិធីបុណ្យផ្សេងៗទៀត មានបុណ្យឯករាជជាតិ នាថ្ងៃទី៩ វិច្ឆិកា គឺនៅតែប្រារព្ធដូចរាល់ឆ្នាំ។ ចំណែកពិធីបុណ្យចំរើនព្រះជន្មអតីតព្រះមហាក្សត្រ សម្តេចឪ នរោត្តម សីហនុ នៅថ្ងៃទី៣០តុលា គឺនៅតែធ្វើដដែល ដោយភ្ជាប់ជាមួយនឹងពិធីបុណ្យគម្រប់២០ឆ្នាំ នៃដំណើរយាងនិវត្តន៍របស់សម្តេចនរោត្តម សីហនុ យាងចូលមកកាន់មាតុប្រទេសវិញ កាលពីឆ្នាំ១៩៩១ នោះផង។
លើកអំពីរបាយការណ៍នៃគ្រោះមហន្តរាយ ដោយទឹកជំនន់វិញ លោក ហ៊ុនសែន ប្រកាសឲ្យដឹងថា ស្រូវសន្ទូងប្រមាណជាង ៣៩ ម៉ឺនហិកតា រងផលប៉ះពាល់ ស្មើនឹង១៦ ភាគរយនៃផ្ទៃដីដាំដុះ។ រីឯផ្លូវលំប្រវែង ៤ ៤៦៦ គីឡូម៉ែត្រ បានខូចខាត។ ចំណែកផ្លូវដែលទឹកហូរច្រោះដាច់ប្រវែង ៥៨៣ គីឡូម៉ែត្រ និងផ្លូវជាតិត្រូវខូចខាត ប្រវែង៨៧ គីឡូម៉ែត្រ។ ប៉ុន្តែ ទោះជាយ៉ាងដូចនេះក្តី រដ្ឋាភិបាលនៅតែមានសុទិដ្ឋិនិយមពីកំណើនសេដ្ឋកិច្ច នៅឆ្នាំ២០១១ នេះ ដោយសង្ឃឹមថា នឹងស្ថិតក្នុងរង្វង់ ៦ ភាគរយ ឬអាចឡើងលើសនេះផង។
លោកនាយករដ្ឋមន្ត្រី ក៏បានបញ្ជាក់ ក្នុងសារផ្ទាល់មាត់នេះដែរថា គិតត្រឹមថ្ងៃទី១៣ ខែតុលា ម្សិលមិញ ទឹកជំនន់សម្លាប់មនុស្សអស់២៤៧នាក់ នៅទូទាំងប្រទេស ហើយលោកក៏បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្នខ្ពស់ ចំពោះការគ្រោះថ្នាក់ដោយសារទឹកជំនន់ឆ្នាំនេះ។
នៅចំពោះមុខគ្រោះមហន្តរាយទឹកជំនន់ដ៏ធំនេះ លោកនាយករដ្ឋមន្ត្រី ក៏បានលើកឡើងថា រដ្ឋាភិបាលកម្ពុជា បានសហការជាមួយកាកបាទក្រហមកម្ពុជា និងសប្បុរសជននានា បានផ្តល់ជំនួយសង្គ្រោះបន្ទាន់ដល់ប្រជាពលរដ្ឋរងគ្រោះ ដែលគិតមកដល់ពេលនេះ មានប្រជាពលរដ្ឋរងគ្រោះ៧៦ ៥៩៥ គ្រួសារបានទទួលជំនួយពីរដ្ឋាភិបាលរួចហើយ ហើយខាងកាកបាទក្រហមកម្ពុជា ក៏ផ្តល់ជំនួយដល់ប្រជាពលរដ្ឋចំនួន ៥២ ១៣៦ គ្រួសារដែរ។ ដោយឡែក សប្បុរសជននានា ក៏បានផ្តល់ដល់ពលរដ្ឋរងគ្រោះចំនួន១ ៩៧៩ គ្រួសារ ហើយនិងអង្គការក្រៅរដ្ឋាភិបាល ក៏បានផ្តល់ជំនួយដល់ពលរដ្ឋរងគ្រោះបានចំនួន ៥ ៣៤០ គ្រួសារហើយដែរ។
ទាក់ទិនជំនួយបរទេស លោក ហ៊ុន-សែន ក៏បានលើកឡើងថា ប្រទេសចិនបានផ្តល់ជំនួយច្រើនជាងគេ ប្រមាណ ៨ លានដុល្លារ រួមជាមួយថ្នាំពេទ្យ។ ចំណែក រដ្ឋាភិបាលប្រទេសជប៉ុនបានផ្តល់ជំនួយគិតជាទឹកប្រាក់៣០ម៉ឺនដុល្លារអាមេរិក។ រីឯសហរដ្ឋអាមេរិក ក៏បានផ្តល់ជំនួយប្រមាណជា ៥ ម៉ឺនដុល្លាររួចហើយដែរ។
លោក ហ៊ុន សែន ចាត់ទុកការខូចខាតបណ្តាលមកពីគ្រោះទឹកជំនន់ពេលនេះថា មានទំហំធំធេងណាស់ ប៉ុន្តែ លោកមិនបានបញ្ជាក់ពីការវាយតម្លៃខូចខាតនោះនៅឡើយ ដោយគ្រាន់តែប្រកាសអំពាវនាវឲ្យមានការរួបរួមគ្រប់និន្នាការនយោបាយទាំងអស់ ដើម្បីជួយប្រជាពលរដ្ឋកំពុងរងគ្រោះ៕
0 comments:
Post a Comment