Print 
PDF
ក្រុមសហជីពកម្មករ បានឱ្យដឹងថា គេមានគម្រោងជួបជាលក្ខណៈពិសេសជាមួយមន្ត្រីថ្នាក់ជាតិរបស់រដ្ឋាភិបាលកម្ពុជា និងមានគម្រោងជួបជាមួយស្ថានទូតបារាំងប្រចាំកម្ពុជា។
១០-តុលា-២០១១៖ ក្រុមសហជីព និងកម្មករ ធ្វើកូដកម្មនៅមុខសណ្ឋាគារ Angkor Village Botanical Resort ខេត្តសៀមរាប។
ការជួបនេះ គឺដើម្បីឱ្យដាក់សម្ពាធទៅលើថៅកែសណ្ឋាគារអង្គរវិលេក បូតានិកខល រីសត (Angkor Village Botanical Resort) ក្នុងខេត្តសៀមរាបឱ្យគោរពច្បាប់ការងាររបស់ប្រទេសកម្ពុជា និងទទួលយកបុគ្គលិកកម្មករចំនួន ៦៧ នាក់ ដែលគេបានបញ្ឈប់ពីការងារឱ្យចូលធ្វើការវិញ។
កូដកម្មដែលទាមទារឱ្យម្ចាស់សណ្ឋាគារអង្គរវិលេក បូតានិកខល រីសត ទទួលយកបុគ្គលិក និងកម្មករចំនួន ៦៧ នាក់ បានចូលធ្វើការវិញនោះ បានបង្ហាញរូបភាពកាន់តែធំឡើងៗ នៅព្រឹកថ្ងៃចន្ទទី១០ ខែតុលា។
បញ្ហានេះ បានបណ្ដាលឱ្យសមត្ថកិច្ចរៀបចំដាក់ពង្រាយកម្លាំងប៉ូលិសអន្តរាគមន៍ប្រដាប់ដោយខែល និងដំបងគ្រោងនឹងបំបែកហ្វូងកូដកម្ម និងព្រះរាជអាជ្ញារងរបស់តុលាការខេត្តសៀមរាប បានចេញមុខហាមឃាត់ ឱ្យកូដកម្មនោះបញ្ឈប់ជាបន្ទាន់។
ចាប់តាំងពីម៉ោងជាង ៨ ព្រឹករហូតដល់ម៉ោង ១២ ថ្ងៃត្រង់ មានសហជីពចំនួន ៧ ក្រុមមកពីទីក្រុងភ្នំពេញ និងមកពីតាមកន្លែងការងារផ្សេងៗ នៅក្នុងខេត្ត ដែលមានគ្នាប្រមាណជាង ២០០ នាក់បាននាំគ្នាធ្វើកូដកម្មជារូបភាពធំ ខុសពីកូដកម្មកាលពីពេលមុនៗ។
លោក អាត់ ធន់ ជាប្រធានសហភាពការងារមកពីទីក្រុងភ្នំពេញ បានចូលរួមធ្វើកូដកម្មនោះ។ លោកមានប្រសាសន៍ថា លោកមានការសោកស្ដាយជាទីបំផុត ក្រោយពីការចរចាកាលពីថ្ងៃទី ៨ ខែតុលា កន្លងទៅបានបរាជ័យ ដោយថៅកែមិនព្រមទទួលយកបុគ្គលិកចំនួន ៦៧ នាក់ ដែលគេបានបញ្ឈប់ពីការងារ ដោយសារតែការបង្កើតសហជីពនោះ ឱ្យបានចូលធ្វើការវិញ។
លោក អាត់ ធន់ បានបញ្ជាក់ថា ក្រុមបុគ្គលិក និងកម្មកររបស់សណ្ឋាគារអង្គរវិលេក បូតានិកខល រីសត និងសណ្ឋាគារអង្គរវិលេកទាំងអស់ ដែលគេបានបញ្ឈប់នោះ មិនត្រូវការលុយសំណង ដើម្បីបញ្ចប់ការងារទេ គឺពួកគេត្រូវការចូលបម្រើការងារវិញ។
លោក អាត់ ធន់៖ «គឺយើងនឹងរៀបចំកិច្ចប្រជុំពិសេសជាមួយស្ថានទូតបារាំង ដើម្បីបញ្ជាក់ឱ្យច្បាស់ពីការរំលោភរបស់ថៅកែបារាំង។ ទី២ គឺយើងនឹងរៀបចំជួបជាលក្ខណៈពិសេសជាមួយឯកឧត្ដម ថោង ខុន រដ្ឋមន្ត្រីក្រសួងទេសចរណ៍ ដើម្បីបញ្ជាក់ពីរឿងនេះ។ ទី៣ គឺយើងនឹងរៀបចំបណ្ដឹងទៅគណៈកម្មការដោះស្រាយបញ្ហាកូដកម្មនៅគ្រប់មុខសញ្ញា ឯកឧត្ដម អ៊ិត សំហេង ជាប្រធានថ្នាក់ជាតិឯកឧត្ដម ស៊ូ ភិរិន្ទ ជាប្រធានគណៈកម្មការប្រចាំខេត្តសៀមរាប ត្រូវដោះស្រាយរឿងនេះជាបន្ទាន់»។
អាជ្ញាធរបានហៅសកម្មភាពរបស់ក្រុមសហជីពកាលពីព្រឹកថ្ងៃចន្ទថា វាលែងជាអំពើកូដកម្មទៀតហើយ។ ប៉ុន្តែ វាបានប្រែក្លាយទៅជាសកម្មភាពបាតុកម្មវិញ។
លោក ច័ន្ទ សុខុមចិត្តា ជាប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តសៀមរាប។ លោកមានប្រសាសន៍ថា នៅពេលនេះមន្ទីរការងារ និងមន្ទីរទេសចរណ៍ ផុតសមត្ថកិច្ចក្នុងការផ្សះផ្សារទំនាស់រវាងក្រុមកម្មករ និងថៅកែសណ្ឋាគារអង្គរវិលេក បូតានិកខល រីសតហើយ។ ក៏ប៉ុន្តែ លោកយល់ឃើញថា តំណាងសហជីពគួរតែធ្វើពាក្យបណ្ដឹងដាក់ទៅតុលាការប្រសើរជាងការនាំគ្នាមកធ្វើកូដកម្ម ដែលនាំឱ្យប៉ះពាល់សណ្ដាប់សាធារណ និងមានការភ្ញាក់ផ្អើលដល់ភ្ញៀវទេសចរណ៍។
លោក ច័ន្ទ សុខុមចិត្តា៖ «ក្រុមប្រឹក្សាអាជ្ញាកណ្ដាលកាត់អីហើយ។ នេះវានៅតែអត់មាននីតិវិធីតទៅទៀត។ គាត់ត្រូវដឹកដៃគ្នាទៅតុលាការ ដើម្បីឱ្យតុលាការដោះស្រាយនីតិវិធីថា ត្រូវតែបញ្ចប់យ៉ាងម៉េច។ ប៉ុន្តែ ឥឡូវនីតិវិធីហ្នឹងអត់ទាន់មានខាងណាប្ដឹងទៅតុលាការទេ»។
កាលពីម៉ោងប្រមាណ ១១ ព្រឹកថ្ងៃច័ន្ទ លោក អ៊ុយ សំភា ជាព្រះរាជអាជ្ញារងអមសាលាដំបូងខេត្តសៀមរាប បានចេញមុខប្រាប់ទៅក្រុមសហជីពឱ្យបញ្ឈប់ធ្វើកូដកម្មរបស់ខ្លួន និងដាក់ពាក្យបណ្ដឹងទៅកាន់តុលាការ ដោយលោកបានសន្យាថា ក្នុងរយៈពេល ១ សប្ដាហ៍យ៉ាងយូរតុលាការនឹងមានចំណាត់ការផ្លូវច្បាប់ចំពោះរឿងនេះ តែបើសហជីពនៅតែបន្តធ្វើកូដកម្មទៅទៀត លោកនឹងប្រើកម្លាំងប៉ូលិស ដើម្បីបំបែក។
ក្រុមសហជីពកម្មករ បានឱ្យដឹងថា គេបានយល់ព្រមផ្អាកការធ្វើកូដកម្មនៅមុខសណ្ឋាគារអង្គរវិលេក បូតានិកខល រីសត ជាបណ្ដោះអាសន្នចំនួន ១ សប្តាហ៍សិន ដើម្បីរកដំណោះស្រាយតាមផ្លូវតុលាការ។ ក៏ប៉ុន្តែ បើហួសរយៈពេល ១ សប្ដាហ៍ហើយ តុលាការនៅតែមិនដោះស្រាយបញ្ហានោះ គឺពួកគេនឹងប្រមូលផ្តុំគ្នាធ្វើកូដកម្មសាជាថ្មី។
ជម្លោះរវាងថៅកែសណ្ឋាគារ អង្គរវិលេកបូតានិកខលរីសត និងក្រុមបុគ្គលិកកម្មករបានអូសបន្លាយតាំងពីដើមខែសីហារហូតមកដល់ពេលនេះ បណ្ដាលឱ្យក្រុមសហជីពបានធ្វើកូដកម្មជាច្រើនលើកមកហើយ៕
0 comments:
Post a Comment