Print 
PDFកំពង់ចាមៈ លោក សេង សៀង លី ប្រធានគណបក្សសិទ្ធិមនុស្សប្រចាំខេត្តកំពង់ចាម ត្រូវប្រឈមនឹងការចាប់ខ្លួនពាក់ព័ន្ធនឹងការចែកឯកសារនៃការ បាត់បង់ទឹកដីកម្ពុជាទៅប្រទេសជិតខាង។
លោក ហួត វុទ្ធី ព្រះរាជអាជ្ញាសាលាដំបូងខេត្តកំពង់ចាម បានថ្លែង កាលពីថ្ងៃអាទិត្យថា បន្ទាប់ពីសកម្មជនគណបក្សសិទ្ធិមនុស្សពីរនាក់ ផាន ផា និង អ៊ុំ យាន ត្រូវចាប់ឃុំនៅពន្ធនាគារពីថ្ងៃទី១កញ្ញា ប្រធានគណបក្សសិទ្ធិមនុស្សប្រចាំខេត្តកំពង់ចាមម្នាក់ទៀត នឹងត្រូវចាប់ខ្លួននៅពេលខាងមុខ បន្ទាប់ពីបញ្ចប់ការស៊ើបអង្កេត។
លោកបានថ្លែងថា៖ «យើងចោទប្រកាន់ប្រធានគណបក្សសិទ្ធិមនុស្សរូបនោះ ដោយគាត់ជាមេគំនិតម្នាក់។ កូន
ចៅគាត់និយាយថា ពួកគេបានយកឯកសារនេះពីរូបគាត់។ គាត់នឹងត្រូវចាប់ខ្លួន ពីព្រោះយើងបានចោទប្រកាន់គាត់រួចហើយ»។ ប៉ុន្តែ លោកមិនបានប្រាប់ថា តើនៅពេលណានឹងត្រូវចាប់ខ្លួនលោក សេង សៀងលី នោះទេ។ ករណីចាប់ខ្លួនសកម្មជនគណបក្សសិទ្ធិមនុស្ស លោក ព្រះរាជអាជ្ញាអះអាងថា សកម្មជនទាំងនោះបានប្រព្រឹត្តអំពើញុះញង់ តាមរយៈការចែកចាយឯកសារខុសច្បាប់ពីការបាត់បង់ទឹកដី កម្ពុជាទៅប្រទេសជិតខាង។លោក សេង សៀងលី មិនសម្តែងពីក្តីព្រួយបារម្ភនោះទេពីថ្ងៃអាទិត្យ ។ លោកអះអាងថា អ្វីដែលលោកបានធ្វើ គឺដើម្បីប្រយោជន៍ជាតិ និងសង្គម។
លោក សេង សៀងលី បានបន្តទៀតថា៖ «ហេតុដូច្នេះ ប្រសិនបើរដ្ឋាភិបាល ឬតុលាការចង់ចាប់ខ្លួន ខ្ញុំមិនដឹងនិយាយយ៉ាងម៉េចទេ»។
លោក កឹម សុខា ប្រធានគណបក្សសិទ្ធិមនុស្ស បានចាត់ទុកការប៉ុនប៉ងចាប់ខ្លួនសមាជិកលោកម្នាក់នេះ ថា ជាការបង្កបញ្ហាពីតូចទៅធំរបស់រដ្ឋាភិបាល ហើយបានថា រដ្ឋាភិបាលត្រូវទទួលខុសត្រូវចំពោះបញ្ហានេះ។
លោក កឹម សុខា បានថ្លែងបន្តថា៖ «នេះបង្ហាញថា វាជារូបភាពនៃការបង្ក្រាបមួយទៅលើអ្នកនយោបាយ ដូច្នេះ សូមឲ្យគណបក្សកាន់អំណាចទទួលខុសត្រូវចំពោះបញ្ហានេះ»។ លោកបានបន្ថែមថា សមាជិកលោកមិនបានចែកឯកសារទាំងនោះទៅសាធារណជនទេ តែថា បានសរសេរជារបាយការណ៍ផ្ទៃក្នុងរបស់គណបក្សនេះតែប៉ុណ្ណោះ»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានថ្លែងថា ការចាប់ខ្លួនសកម្មជនគណបក្សសិទ្ធិមនុស្សមិនមែនជាការទទួលខុស ត្រូវរបស់គណបក្សណានោះទេ ប៉ុន្តែវាជាការអនុវត្តច្បាប់។ លោកបានបន្តថា៖ «សិទ្ធិនៃការបញ្ចេញមតិគឺខុសគ្នាទៅនឹងសកម្មភាពញុះញង់។ ការប្រើឯកសារក្លែងក្លាយនៅក្នុងការញុះញង់ប្រជាជន គឺត្រូវបានហាមប្រាមដោយច្បាប់»។
លោក នាង សុវ៉ាត មន្រ្តីអាដហុកប្រចាំខេត្តកំពង់ចាម មិនបានដឹងអំពីការប៉ុនប៉ងចាប់ខ្លួនសកម្មជនគណបក្សសិទ្ធិមនុស្ស នេះ ថាតើមានភស្តុតាងរឹងមាំឬ អត់នោះទេ តែលោកថ្លែងថា លោកនឹងស៊ើបអង្កេតករណីនេះ៕ PS
0 comments:
Post a Comment