ជំនាញពេទ្យសត្វខេត្តកណ្តាលសប្បាយប្រមូលលុយពីការនាំចូលមាន់ ទា ជ្រូកក្រហម ពីស្រុកយួនតាមច្រកជ្រៃធំ

ភាពអនាធិបតេយ្យនៃការនាំចូលនិងដឹកជញ្ជូនមាន់កសិកម្ម ទា ស៊ុត និងត្រី ជាពិសេសជ្រូកក្រហមរបស់ក្រុមឈ្មួញទាំងតូចទាំងធំ តាមច្រកជ្រៃធំ នៃស្រុកកោះធំនៃខេត្តកណ្តាលឡើងមកតាមផ្លូវជាតិ ២១បេ យកមកចែកចាយក្នុងខេត្តកណ្តាល និងរាជធានីភ្នំពេញ មានភាពគគ្រឹកគគ្រេងខ្លាំងឡើងៗ ហើយមន្ត្រីជំ នាញពេទ្យសត្វខេត្តកណ្តាលក៏ដូចជាសមត្ថកិច្ចពាក់ព័ន្ធដែលប្រចាំការតាមដងផ្លូវច្រើនស្អេកស្កះសុទ្ធតែទទួលបានប្រយោជន៍ច្រើនសន្ធឹកសន្ធាប់ពីការនាំចូលមាន់ ទា និងជ្រូកក្រហម ពីស្រុកយួន ផ្ទុយពីបទបញ្ជារបស់រដ្ឋាភិបាលផងដែរ។

នៅក្នុងសេចក្តីថ្លែងការណ៍សាធារណៈកន្លងមក លោកនាយករដ្ឋមន្ត្រី ហ៊ុន សែន បានចេញបទបញ្ជា ឲ្យមន្ត្រីជំនាញនិងសមត្ថកិច្ចពាក់ព័ន្ធគ្រប់លំដាប់ថ្នាក់យកចិត្តទុកដាក់ទប់ស្កាត់នូវការដឹកជញ្ជូនមាន់ ទា ស៊ុត និងជ្រូកក្រហមមកពីប្រទេសជិតខាង ព្រោះពេលបច្ចុប្បន្ននេះ កំ ពុងផ្ទុះឡើងនូវជំងឺផ្តាសាយបក្សី និងជំងឺជ្រូកត្រចៀកខៀវ ដែលអាចធ្វើឲ្យប៉ះពាល់ដល់សុខភាពពលរដ្ឋខ្មែរ។ ប៉ុន្តែការអនុវត្តជាក់ស្តែងមន្ត្រីជំនាញ ពេទ្យសត្វមិនបានយកចិត្តទុកដាក់អនុវត្តន៍បទបញ្ជារបស់រដ្ឋាភិបាលឲ្យ មានប្រសិទ្ធភាពនោះទេ បែរជានាំគ្នា ឃុបឃិតជាមួយក្រុមឈ្មួញរកស៊ីនាំចូល មាន់ ទា និងជ្រូកក្រហមយ៉ាងអនាធិបតេយ្យ ដោយមន្ត្រីនិងសមត្ថកិច្ចអស់ទាំងនោះ សប្បាយក្នុងការរាប់ក្បាលឡានដឹកមាន់ ទា ជ្រូក យកលុយតែប៉ុណ្ណោះ។

បើតាមសេចក្តីរាយការណ៍ពីខេត្តកណ្តាលបានឲ្យដឹងថា បច្ចុប្បន្ននេះនៅចំណុចព្រែកស្បូវ ក្នុងឃុំសំ ពៅពូន ស្រុកកោះធំ ខេត្តកណ្តាល មានឈ្មួញជាច្រើនកំពុងសម្រុកនាំចូលមាន់ ទា និងជ្រូកក្រហមពីស្រុកយួន ហើយដឹកជញ្ជូនតាមផ្លូវជាតិលេខ២១បេ យ៉ាងអនាធិបតេយ្យមកលក់ចែកចាយដល់រាជធានីភ្នំ ពេញ គឺមិនដែលរំខានដល់មន្ត្រីជំ នាញ និងសមត្ថកិច្ចពាក់ព័ន្ធនោះ ទេ។ ភាពអនាធិបតេយ្យនៃការដឹក ជញ្ជូនមាន់ ទា ជ្រូកក្រហម ឆ្លងកាត់ស្រុកចំនួន៣ នៃខេត្តកណ្តាលនេះ ធ្វើឡើងទាំងយប់ទាំងថ្ងៃ គ្មានក្រែងញញើតចំពោះបទបញ្ជារបស់រដ្ឋាភិ បាលនោះទេ ព្រោះក្រុមឈ្មួញទាំងនោះបានត្រូវដៃត្រូវជើងជាមួយមន្ត្រីជំនាញ និងសមត្ថកិច្ចពាក់ព័ន្ធដោយមានការបង់លុយថ្លៃក្បាលឡាននិងបង់លុយប្រចាំខែមិនដែលមានផលរមាសស់អ្វីឡើយ។

ក្រុមមន្ត្រីដែលទទួលបានប្រ យោជន៍ច្រើនជាងគេ ពីការឃុបឃិតឲ្យក្រុមឈ្មួញនាំចូលមាន់ ទា និងជ្រូកក្រហម តាមចំណុចព្រែកស្បូវ នៃស្រុកកោះធំយ៉ាងអនាធិបតេយ្យនោះ គឺលោក លឹម ងួនគ្រុយ ជាអនុប្រធានមន្ទីរកសិកម្មខេត្តកណ្តាល និងលោក ពួច ជាប្រធានក្រុមបង្ក្រាបការដឹកជញ្ជូនសត្វ និងជាប្រធានកុងត្រូលជជុះរបស់ពេទ្យសត្វ។ មានការបញ្ជាក់ផងដែរថា លោក ពួច មានដាក់ពង្រាយមន្ត្រីរបស់គាត់នៅតាមប៉ុស្តិ៍ជជុះដែលប្រចាំការតាមផ្លូវជាតិលេខ២១បេ លេខ២ លេខ៣ លេខ ១និងលេខ១១០អង្គុយចាំរាប់ក្បាល ឡានដឹកមាន់ ទា ជ្រូកក្រហម យ៉ាងអនាធិបតេយ្យបំផុត។ សូមបញ្ជាក់ផងដែរថាមានឈ្មួញជាច្រើន ដែលរកស៊ីដឹកជញ្ជូន មាន់ទា និង ជ្រូកក្រហម មកពីស្រុកយួនតាមច្រកជ្រៃធំ ដូចជា១.ឈ្មោះ ធឿន ២. ឈ្មោះ អឿន និង៣.ឈ្មោះ វណ្ណា ហើយការដឹកជញ្ជូនមាន់ ទា ជ្រូក ក្រហម ទាំងនោះប្រើប្រាស់រថយន្តកូរ៉េ។

មានការបញ្ជាក់ផងដែរថា សម្រាប់ការដឹកជញ្ជូនមាន់ ទា គឺក្រុមឈ្មួញបានប្រើប្រាស់រថយន្តកូរ៉េចំណុះ៥តោន ពាក់ស្លាកលេខ៣អា ០៤៧៦ ពណ៌ខៀវ ហើយសម្រាប់ការដឹកជញ្ជូនជ្រូកក្រហមវិញ គឺប្រើប្រាស់រថយន្តកូរ៉េចំណុះ១តោនកន្លះ ពាក់ស្លាកលេខ ២អា កំពង់ស្ពឺ ៣១ ៧៥។ មន្ត្រីតូចតាចមួយចំនួនបានបង្ហើបឲ្យដឹងថាក្រុមឈ្មួញរកស៊ីដឹកជញ្ជូនជ្រូក មាន់ ទា ជ្រូកក្រហមតាម ចំណុចព្រែកស្បូវ និងច្រកជ្រៃធំ គឺកើតមានច្រើនខែមកហើយ គេមិន ដែលឃើញអាជ្ញាធរ និងសមត្ថកិច្ចពាក់ព័ន្ធហ៊ានចេញមុខទៅទប់ស្កាត់ ឬបង្ក្រាបក្រុមឈ្មួញទាំងនោះម្តងណាឡើយហើយមន្ត្រី និងសមត្ថកិច្ច ពាក់ព័ន្ធចេះតែសុខស្រួលក្នុងការឃុប ឃិតឲ្យក្រុមឈ្មួញរកស៊ីនាំចូលមាន់ ទា ជ្រូកក្រហម យ៉ាងអនាធិបតេយ្យ ដោយមិនខ្វល់ខ្វាយពីបទបញ្ជារបស់រដ្ឋាភិបាលសូម្បីតែបន្តិច។

ដើម្បីបង្ហាញពីការយកចិត្តទុកដាក់ចំពោះសុខភាពពលរដ្ឋខ្មែរ នៅ ពេលដែលជំងឺផ្តាសាយបក្សីកំពុងផ្ទុះឡើង មន្ត្រីជំនាញនិងសមត្ថកិច្ចពាក់ព័ន្ធត្រូវតែចាត់វិធានការបិទ ច្រកព្រែកស្បូវ និងច្រកដទៃទៀត កុំឲ្យក្រុមឈ្មួញនាំចូលមាន់ទាមកពីស្រុកយួនជាពិសេសការនាំចូលជ្រូកក្រហម ព្រោះវាបង្កផលប៉ះពាល់ខ្លាំងសម្បើមណាស់ចំពោះសុខភាពរបស់ប្រជាពលរដ្ឋខ្មែរ ដែលងាយ នឹងឆ្លងជំងឺដូចបានរៀបរាប់ពីខាងដើម។ យ៉ាងណាក៏ដោយ លោក អភិបាលខេត្តកណ្តាល ឈុន ស៊ីរុន ត្រូវតែចាត់វិធានការក្តៅជាបន្ទាន់ដើម្បីបង្ការបង្ក្រាបនិងទប់ស្កាត់ការដឹកជញ្ជូន មាន់ ទា និងជ្រូកក្រហមដែលកំពុងកើតមានយ៉ាងគគ្រឹកគគ្រេងក្នុងភូមិសាស្ត្រខេត្តកណ្តាល និងជាច្រកដ៏សំខាន់បំផុតដែលក្រុម ឈ្មួញនាំចូលរាជធានីភ្នំពេញ រីឯមន្ត្រីខិលខូចឃុបឃិតឲ្យក្រុមឈ្មួញនាំចូល មាន់ ទា ជ្រូកក្រហម ចូលដោយខុសច្បាប់ដើម្បីប្រយោជន៍៕