Print 
PDFចាប់កូនចៅប្រធានក្រុមប្រឹក្សាស្រុកសេសាន៣នាក់រឿងគ្រឿងញៀន
ទឹងត្រែងៈ មនុស្សបីនាក់ដែលត្រូវជាកូនប្រសានិងចៅ របស់លោកប្រធានក្រុមប្រឹក្សាស្រុកសេសាន ខេត្តស្ទឹងត្រែងត្រូវបានកម្លាំងកងរាជអាវុធហត្ថ ខេត្តចាប់ខ្លួនពីបទជួញដូរគ្រឿងញៀន កាលពីថ្ងៃទី០៥ ខែកញ្ញា នៅលំនៅដ្ឋានមួយកន្លែង របស់លោកប្រធានក្រុមប្រឹក្សាស្រុកនៅចំកណ្តាលក្រុងស្ទឹងត្រែង ហើយនឹងត្រូវបញ្ជូនទៅកាន់តុលាការខេត្តនៅថ្ងៃសុក្រនេះ ដើម្បីសាកសួរ និងចោទប្រកាន់តាមផ្លូវច្បាប់។
លោក អនុសេនីយ៍ឯក កាន់ សុធារ៉ា ប្រធានការិយាល័យប្រឆាំងគ្រឿងញៀនអាវុធហត្ថខេត្ត បានឲ្យដឹងថា ការចាប់ខ្លួនជន សង្ស័យទាំងបីនាក់ ដែលមានយុវជន២នាក់ និងស្ត្រីម្នាក់ នៅក្នុងផ្ទះលោក ស នូ ប្រធានក្រុមប្រឹក្សាស្រុកសេសាន បានកើតឡើងក្រោយពីមន្ត្រីជំនាញអាវុធហត្ថបង្ក្រាបគ្រឿងញៀនធ្វើ ការតាមដានអស់ពេលជាង១០ថ្ងៃកន្លងមក ហើយការចាប់ខ្លួននេះបានធ្វើឡើងដោយមានការចូលរួមពីលោកស្រី ស៊ុន យ៉ឺត ព្រះរាជអាជ្ញារងអមសាលាដំបូងខេត្តស្ទឹងត្រែងនេះផងដែរ។
លោកបានបន្តថា នៅក្នុងប្រតិបត្តិការចុះចាប់ក្រុមជួញថ្នាំខាងលើនោះសមត្ថកិច្ចរក ឃើញថ្នាំញៀនពីរប្រភេទ គឺម៉ាទឹកកក និងប្រភេទថ្នាំញៀនគ្រាប់ចំនួនពីរកញ្ចប់តូច ជញ្ជីងថ្លឹងថ្នាំញៀន ប្រាក់ដុល្លារ និងប្រាក់រៀលមួយចំនួនផងដែរ។
លោកបញ្ជាក់ថា៖ «ពួកគេជាកូនប្រសារនិងចៅរបស់លោកប្រធានក្រុមប្រឹក្សាស្រុកសេសានស នូ។ ពួកគេបានយកផ្ទះរបស់ឪពុកធ្វើជាទីតាំងលួចជួញដូរ និងប្រើប្រាស់គ្រឿងញៀន។ លោក ស នូ មិនជាប់ពាក់ព័ន្ធនឹងរឿងនេះទេ ពីព្រោះគាត់មិនបានដឹងថា កូនចៅរបស់គាត់ប្រព្រឹត្តអំពើបែបនេះឡើយ»។
ជន សង្ស័យដែលត្រូវ ឃាត់ខ្លួន ឈ្មោះ នូ គឹមណាល់ ភេទស្រីអាយុ៤២ឆ្នាំ និង អ៊ី ហ្គាណា ភេទប្រុស អាយុ១៧ឆ្នាំ ត្រូវជាកូននិងឈ្មោះ ធិន ថា ភេទប្រុស អាយុ២៣ឆ្នាំ។ ពួកគេត្រូវជាបងប្អូនជីដូនមួយនឹងគ្នា។ នេះបើតាម ការឲ្យដឹងពីលោក កាន់ សុធារ៉ា ហើយថា ៖ «ពួកគេកំពុងត្រូវបានឃុំខ្លួននិងសាកសួរដើម្បីកសាងសំណុំរឿង បញ្ជូនទៅកាន់ តុលាការខេត្តនៅព្រឹកថ្ងៃសុក្រនេះ។ យើងចោទប្រកាន់ពួកគេ ពីបទជួញដូរគ្រឿងញៀន»៕
0 comments:
Post a Comment