Print 
PDFដោយ គឹម ពៅ
2011-05-20
បញ្ហា វិបត្តិដីធ្លីនៅកម្ពុជា អាចនឹងក្លាយទៅជាចំណុចចាប់អារម្មណ៍នៅក្នុងសភាអឺរ៉ុប ក្រោយពីដំណើរក្រៅផ្លូវការរបស់សមាជិកសភាអឺរ៉ុបមកកាន់ប្រទេស កម្ពុជា រយៈពេលប៉ុន្មានថ្ងៃនេះ។
សមាជិក សភាសហគមន៍អឺរ៉ុប លោកស្រី សេស៊ីលីយ៉ា វិកស្រ្តម (Cecilia Wikstrom) [ស្ដាំ] និងជនរងគ្រោះដីធ្លី (រូបឈរ) នៅក្នុងសន្និសីទកាសែត នារាជធានីភ្នំពេញ នៅថ្ងៃទី២០ ខែឧសភា ឆ្នាំ២០១១។
ថ្លែងនៅក្នុងសន្និសីទកាសែតនៅថ្ងៃសុក្រ ទី២០ ខែឧសភា លោកស្រីសមាជិកសភាអឺរ៉ុប សេស៊ីលីយ៉ា វិកស្រ្តម បានហៅកម្មវិធី អ៊ី.ប៊ី.អេ (EBA= Everything but Arms Initiative) របស់សហគមន៍អឺរ៉ុប ដែលសំដៅទៅលើការបង្កើនការនាំចេញផលិតផលពីកម្ពុជា ទៅកាន់សហគមន៍អឺរ៉ុបថា កំពុងតែដើរលើផ្លូវខុស ដោយសារតែកម្មវិធីនោះបានផ្ដល់អត្ថប្រយោជន៍ដ៏ច្រើនទៅដល់ក្រុមហ៊ុន វិនិយោគ ដូចជាក្រុមហ៊ុនស្ករស ប៉ុន្តែផ្ទុយទៅវិញ ក្រុមហ៊ុននោះមិនបានជួយបម្រើ ឬលុបបំបាត់នូវភាពក្រីក្រនោះទេនៅលើការវិនិយោគលើទឹកភ្នែករបស់ ប្រជាពលរដ្ឋ។
លោកស្រីមានប្រសាសន៍បន្ថែមថា ៖ “ខ្ញុំសូមបន្ទោសទៅលើអាជ្ញាធរ ដែលអនុញ្ញាតឲ្យមានបញ្ហានេះកើតឡើង គឺអាជ្ញាធរ និងរដ្ឋាភិបាលនៃប្រទេសនេះដែលបណ្ដាលឲ្យមានដីសម្បទានសេដ្ឋកិច្ច ក្នុងរយៈពេល ៩៩ឆ្នាំ។ នេះគឺជារឿងធ្ងន់ធ្ងរដែលត្រូវមានការដោះស្រាយ"។
ការបន្ទោសរបស់លោកស្រីសមាជិកសភាអឺរ៉ុបទៅលើរដ្ឋាភិបាលខ្មែរ បានធ្វើឡើងក្រោយពីលោកស្រីបានធ្វើដំណើរក្រៅផ្លូវការមកកាន់ កម្ពុជា ដើម្បីស៊ើបអង្កេតបញ្ហាទាំងឡាយនៅក្នុងប្រទេសនេះ ដោយបានជួបជាមួយអ្នករងគ្រោះដោយសារវិបត្តិដីធ្លីនៅកោះកុង កំពង់ស្ពឺ នៅតំបន់បឹងកក់ និងនៅតំបន់ផ្សេងទៀត ដែលបានរៀបរាប់ពីការឈឺចាប់នៃការរឹបអូសយកដីធ្លីនៅក្នុងកិច្ច សម្បទានសេដ្ឋកិច្ច។
តាមមាត្រាទី១៥ នៃបទបញ្ញត្តិស្ដីអំពីសិទ្ធិមនុស្សនៃកម្មវិធី អ៊ី.ប៊ី.អេ លោកស្រីនឹងទទូចឲ្យមានការដាក់សម្ពាធផ្នែកប្រព័ន្ធអនុគ្រោះពន្ធលើ វិស័យផលិតផលកសិកម្មរបស់កម្ពុជា ដែលមានចំនួនប្រហែល ១០% នៅសហភាពអឺរ៉ុប ឬការមិនឲ្យផលិតផលកសិកម្មនៃប្រទេសនេះនាំចូលទៅអឺរ៉ុបជាដើម។ លោកស្រីបានទាមទារឲ្យរដ្ឋាភិបាលខ្មែរផ្អាកផលិតកម្មធ្វើស្ករអំពៅ ដោយផ្អែកលើមូលដ្ឋានរំលោភសិទ្ធិមនុស្សដែលក្រុមហ៊ុនផលិតស្ករសបាន ធ្វើទៅលើអ្នកស្រុកក្រីក្រ។
លោកស្រី សេស៊ីលីយ៉ា វិកស្រ្តម មានប្រសាសន៍ដូច្នេះ ៖ "ព្រឹទ្ធសភា នាយករដ្ឋមន្ត្រី និងមន្ត្រីរដ្ឋាភិបាលដែលទទួលបានការជ្រើសតាំងពីពលរដ្ឋ មិនមែនត្រូវគេជ្រើសតាំងដើម្បីប្រើប្រជាពលរដ្ឋ ឬត្រួតប្រជាពលរដ្ឋនោះទេ ប៉ុន្តែគេជ្រើសតាំងដើម្បីនិយាយ និងធ្វើការឲ្យប្រជាពលរដ្ឋ"។
មន្ត្រីអ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បានថ្លែងថា ការទទូចទាមទាររបស់សមាជិកសភាអឺរ៉ុបនោះ គឺជាទស្សនៈផ្ទាល់ខ្លួនក្រៅផ្លូវការ ហើយការទាមទារនោះកំពុងធ្វើឡើងដោយការអូសទាញរបស់មន្ត្រីគណបក្ស ប្រឆាំងប៉ុណ្ណោះទេ។ ផ្ទុយមកវិញ រដ្ឋាភិបាលខ្មែរមានកាតព្វកិច្ចគិតគូរអំពីប្រជាពលរដ្ឋខ្មែរច្រើនជាង លោកស្រីទៅទៀត។
របាយការណ៍របស់អង្គការសហប្រជាជាតិស្ដីអំពីដីសម្បទាននៅប្រទេស កម្ពុជា បានបញ្ជាក់ថា ក្នុងចំណោមដីធ្លីប្រើប្រាស់ចំនួនជាង ១៤% កាលពីឆ្នាំ២០០៦ កន្លងទៅ ការផ្ដល់ដីសម្បទានមានចំនួនដល់ទៅ ៥% ទៅហើយ។ ប្រជាពលរដ្ឋដែលធ្លាប់អាស្រ័យផលលើដីធ្លីរបស់ខ្លួនដែលពីមុនរក ចំណូលបានជាង ១ម៉ឺនរៀលក្នុងមួយថ្ងៃ ប៉ុន្តែបច្ចុប្បន្នបានធ្លាក់ថ្លៃមកត្រឹម ៥.០០០រៀល ទៅ ១.០០០រៀលប៉ុណ្ណោះ ដោយធ្វើជាអ្នកស៊ីឈ្នួលដាំដុះនៅក្នុងក្រុមហ៊ុនវិនិយោគដីសម្បទាន នោះ នៅគ្រាដែលពីដីធ្លីពួកគាត់ត្រូវគេរឹបអូសយក៕
0 comments:
Post a Comment