ពលរដ្ឋនៅក្រចេះចោទអាជ្ញាធរថាឃុបឃិតគ្នាយកដីរបស់ពួកគាត់ទៅឲ្យក្រុមហ៊ុនរុស្ស៊ី

ប្រជាពលរដ្ឋនៅឃុំស្វាយជ្រះ ស្រុកស្នួល ខេត្តក្រចេះ ឱ្យដឹងថា កម្លាំងសមត្ថកិច្ចជាច្រើននាក់ បានដាក់ទប់ទល់ការតវ៉ារបស់ប្រជាពលរដ្ឋ ជុំវិញបញ្ហាដីធ្លីជាមួយក្រុមហ៊ុនរុស្ស៊ី មួយនៅទីនោះ។

ប្រជាពលរដ្ឋបានចោទអាជ្ញាធរថា បានផ្សំគំនិតគ្នាយកដីរបស់គាត់ទៅឱ្យក្រុមហ៊ុននៅទីនោះ។ ប៉ុន្តែអាជ្ញាធរបដិសេធក្នុងការចោទប្រកាន់នេះ ដោយលើកឡើងថា នេះគឺជាវិធានការនៃការអនុវត្តច្បាប់ការពារ និងគ្រប់គ្រងដីរបស់រដ្ឋ។

ប្រជាពលរដ្ឋ ៥គ្រួសារនៅឃុំស្វាយជ្រះ ស្រុកស្នួល បានសម្ដែងអារម្មណ៍សោកស្ដាយចំពោះការបាត់បង់ដីចម្ការរបស់ខ្លួន ដោយការឈូសឆាយរបស់ក្រុមហ៊ុនរុស្ស៊ី មួយនៅថ្ងៃទី១៥ និងថ្ងៃទី១៦ កក្កដា។ ដីប្រមាណជាង ២០ហិកតារ ដែលមានដាំដំឡូង និងកៅស៊ូផងនោះ ត្រូវបានខាងតំណាងក្រុមហ៊ុនកាសូទីម របស់រុស្ស៊ី ដាក់គ្រឿងចក្រឈូសឆាយដីព័ទ្ធជារបង ដែលមានការដាក់កងកម្លាំងជាច្រើននាក់ សម្រាប់ទប់ទល់ប្រជាពលរដ្ឋមិនឱ្យរារាំងការឈូសឆាយនោះ។

ប្រជាពលរដ្ឋម្នាក់រស់នៅឃុំស្វាយជ្រះ អ្នកស្រី ជា សាមួន ឱ្យដឹងថា អ្នកស្រី និងកូនរបស់គាត់ ៤គ្រួសារផ្សេងទៀត បានកាន់កាប់ដីនៅទីនោះតាំងពីឆ្នាំ២០០៥ មកម្ល៉េះ។ អ្នកស្រីបន្តថា អ្នកស្រីមានដីផ្ទាល់ខ្លួនជាង ១០ហិកតារ ដែលក្រុមនិស្សិតវាស់វែងនៅឆ្នាំ២០១២ ប៉ុន្តែនៅពេលចេញប្លង់ គឺផ្តល់ឱ្យតែ ៨ហិកតារ។ ចំណែកឯកូនអ្នកស្រី ៤គ្រួសារទៀត គឺមានដីមួយគ្រួសារចំនួន ៥ហិកតារ ក៏ប៉ុន្តែនៅពេលក្រុមនិស្សិតចុះវាស់វែងចេញប្លង់កម្មសិទ្ធិ គឺបានមួយគ្រួសារជាង ១ហិកតារតែប៉ុណ្ណោះ ដោយថា ប៉ះពាល់លើដីរបស់រដ្ឋផ្តល់សម្បទានសេដ្ឋកិច្ចទៅឱ្យក្រុមហ៊ុនកាសូទីម នៅទីនោះទៅហើយ។

អ្នកស្រី ជា សាមួន៖ «អភិបាលខេត្តធ្លាប់ប្រកាសប្រាប់ប្រជាជនទូទាំងខេត្តដែរ ប្រាប់ថាកាសូទីម លែងមានទៀតទេ កាលមុនពេលយើងចុះប្លង់ហ្នឹង។ ទាំងនិស្សិតទាំងអី គេហៅប្រជាជនប្រមូលទៅប្រជុំទាំងអស់។ គេថាដីឱ្យប្រជាជនចុះយកធ្វើបានម៉ាន ចុះយកប៉ុណ្ណឹង ប៉ុន្តែស្រាប់តែដល់ថ្ងៃហ្នឹងស្រាប់តែចេញអភិបាលខេត្តអីចេញមកថាជាដីរបស់រដ្ឋជាដីរបស់កាសូទីម»។

អ្នកស្រីបន្ថែមថា វាជារឿងមិនត្រឹមត្រូវនោះទេ ពីព្រោះអ្នកស្រីបានដាំដំណាំជាយូរមកហើយ បែរជាត្រូវរងគ្រោះដោយការទន្ទ្រានយកដោយខុសច្បាប់នោះ។ អ្នកស្រីគ្រោងនឹងសុំកិច្ចអន្តរាគមន៍ពីខាងអាជ្ញាធរថ្នាក់លើ និងអង្គការក្រៅរដ្ឋាភិបាលបន្តទៀត ជុំវិញបញ្ហានេះ។

មេឃុំស្វាយជ្រះ លោក វ៉ាន់ វ៉េត មានប្រសាសន៍ថា លោកមិនបានដឹងច្បាស់ថា ដីនោះភាគីជម្លោះទាំងពីរនរណាជាអ្នកមកមុននោះទេ ហើយការសម្រេចដោះស្រាយថាយ៉ាងនោះ ក៏ខាងឃុំមិនបានដឹងច្បាស់នោះដែរ។

វិទ្យុអាស៊ីសេរី មិនទាន់អាចទាក់ទងភាគីតំណាងក្រុមហ៊ុន លោក ឃួន ភារុណ បានទេនៅថ្ងៃទី១៦ កក្កដា។

យ៉ាងណាក៏ដោយ អភិបាលរងខេត្តក្រចេះ ទទួលបន្ទុកដោះស្រាយទំនាស់ដីធ្លី លោក ខ័ណ្ឌ ចំណាន មានប្រសាសន៍ថា ប្រជាពលរដ្ឋ ៥គ្រួសារនោះ គឺអាជ្ញាធរបានចេញប្លង់កម្មសិទ្ធិផ្តល់ជូនពួកគាត់ដែលមានដីទំហំសរុប ១៦ហិកតាររួចទៅហើយ ហើយដីដែលមានជម្លោះនោះ គឺជាដីដែលពួកគាត់ទៅកាប់ទន្ទ្រានក្រោយបទបញ្ជា០១របស់រដ្ឋាភិបាលដោយខុសច្បាប់។ លោកបន្តថា ដីនោះ គឺជាដីសម្បទានរបស់រដ្ឋដែលបានផ្តល់ជូនក្រុមហ៊ុនកាសូទីម វិនិយោគកាលពីឆ្នាំ២០០៦ ដើម្បីដាំដំណាំកៅស៊ូនៅទីនោះ ពុំមែនជាដីរបស់ លោក ឃួន ភារុណ នោះទេ ប៉ុន្តែ លោក ឃួន ភារុណ គឺជាតំណាងឱ្យក្រុមហ៊ុនកាសូទីម។

លោក ខ័ណ្ឌ ចំណាន៖ «អាមិនព្រមចេញហ្នឹងបើគាត់ទៅចង្អុលដីព្រៃ គេម៉េចវាស់ឱ្យ! គេវាស់តែដីមានដំណាំហ្នឹង។ ហ្នឹងហើយ អ៊ីចឹងដល់ពេលចេញប័ណ្ណ ហើយពង្រីកទៅគាត់ចេញតែធ្វើថែមទៅ ទោះបីជាយើងផ្សព្វផ្សាយ យើងចុះទៅបោះបង្គោលទៅឱ្យពួកគាត់ឡើងវិញក៏ដោយ ក៏ពួកគាត់អត់ស្តាប់ទេ។ អ៊ីចឹងក្នុងនាមគណៈកម្មាធិការគ្រប់គ្រងដីរដ្ឋ គឺយើងការពារដីរបស់រដ្ឋ»។

លោកបន្ថែមថា ចំពោះដីដែលប៉ះពាល់ ខាងក្រុមហ៊ុនគឺមានគោលនយោបាយជាសំណងជូនប្រជាពលរដ្ឋទាំងនោះក្នុង ១ហិកតារ ២៥០ ទៅ ៣០០ដុល្លារ ជាថ្លៃកម្លាំងពលកម្មកន្លងមក។ លោកក៏សុំអំពាវនាវឱ្យប្រជាពលរដ្ឋទាំងឡាយ បញ្ឈប់ការទន្ទ្រានដីព្រៃរបស់រដ្ឋ ក្រោយបទបញ្ជា០១របស់រាជរដ្ឋាភិបាលតទៅទៀត ពីព្រោះអាជ្ញាធរមិនអាចដោះស្រាយជូនបាននោះទេ។

ប្រធានអង្គការសិទ្ធិមនុស្សដើម្បីតម្លាភាព និងសន្តិភាព និងជាប្រធានគណៈកម្មាធិការឯករាជ្យប្រឆាំងអំពើពុករលួយ អ្នកស្រី ម៉ម ស៊ីថា មានប្រសាសន៍ថា ប្រជាពលរដ្ឋមានសិទ្ធិតវ៉ាតទៅទៀត ពីព្រោះការសម្រេចរបស់ខេត្តនេះ គឺជារឿងមិនត្រឹមត្រូវសម្រាប់ប្រជាពលរដ្ឋ ព្រោះគ្មានការចូលរួម និងគ្មានការជូនដំណឹងដល់ពួកគាត់ឡើយ៖ «ការដោះស្រាយរបស់ខេត្តមិនបានប្រើប្រាស់ គឺថាយន្តការរបស់ខ្លួនហ្នឹង អាចឱ្យប្រជាពលរដ្ឋទទួលយកបាននោះទេចា៎!»។

អ្នកស្រីបានទទួលរបាយការណ៍ពីប្រជាពលរដ្ឋមកថា ក្រុមហ៊ុនកាសូទីម នោះ បានផុតអាណត្តិក្នុងការគ្រប់គ្រងដីតំបន់នោះ តាំងពីឆ្នាំ២០០៧ ហើយអភិបាលខេត្តក្រចេះ ក៏ធ្លាប់បានប្រកាសពីបញ្ហានេះដល់ប្រជាពលរដ្ឋដែរ។ អ្នកស្រីនឹងដាក់ពាក្យបណ្ដឹងមួយ ជូនទៅក្រសួងពាណិជ្ជកម្ម ដើម្បីឱ្យបញ្ជាក់ថា ក្រុមហ៊ុនកាសូទីម នោះ ពិតជាផុតអាណត្តិមែន ឬយ៉ាងណា ដើម្បីកុំឱ្យចេះតែយកឈ្មោះក្រុមហ៊ុនខ្មោចមកប្រើប្រាស់ធ្វើបាបប្រជាពលរដ្ឋតទៅទៀត៕
ប្រភពដើមៈ RFA