Print 
PDFដោយ សួន សុផលមុន្នី
2012-11-26
តុលាការខេត្តបន្ទាយមានជ័យ បានឃុំខ្លួនមន្ត្រីយោធាម្នាក់ជាបណ្ដោះអាសន្ន នៅពន្ធនាគារខេត្តបន្ទាយមានជ័យ។ ការឃុំខ្លួននោះធ្វើឡើងក្រោមការចោទប្រកាន់ពីបទប៉ះពាល់កម្មសិទ្ធិ ឯកជន និងក្លែងលិខិតសាធារណៈទាក់ទិនទំនាស់ដណ្ដើមកាន់កាប់ដី នៅភូមិសិលាខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ចៅក្រមស៊ើបសួរនៃសាលាដំបូងតុលាការខេត្តបន្ទាយមានជ័យ លោក ធាម ច័ន្ទពិសិដ្ឋ នៅថ្ងៃទី២៦ ខែវិច្ឆិកា បានឲ្យដឹងថា តុលាការបានសម្រេចឃុំខ្លួនលោក សុខ សុបិន ជាមន្ត្រីយោធាស័ក្ដិ៥ម្នាក់ មានទីលំនៅនៅក្រុងប៉ោយប៉ែត ខេត្តបន្ទាយមានជ័យ។ ការឃុំខ្លួនមន្ត្រីយោធាស័ក្ដិ៥ បានធ្វើឡើង កាលពីថ្ងៃទី២៤ ខែវិច្ឆិកា ក្រោយពីមន្ត្រីកងរាជអាវុធហត្ថបានចុះទៅនាំខ្លួន តាមដីកាបង្គាប់របស់លោកចៅក្រមស៊ើបសួរនៃសាលាដំបូងតុលាការខេត្ត បន្ទាយមានជ័យ។
ទោះយ៉ាងណា លោកចៅក្រមពុំអាចបញ្ជាក់ពីបទចោទប្រកាន់បានទេ៖ «សំណុំ រឿងហ្នឹងខ្ញុំជាចៅក្រមក្នុងសំណុំរឿង អ៊ីចឹងដោយសារដំណើរការនៃកិច្ចស៊ើបសួរក្នុងក្រមនីតិវិធីព្រហ្មទណ្ឌ យើងមិនអាចនិយាយបានទេ ពាក់ព័ន្ធជាមួយរឿងហ្នឹង ក៏ប៉ុន្តែពាក់ព័ន្ធជាមួយបទចោទប្រកាន់រឿងអីនោះ លោកសួរលោកព្រះរាជអាជ្ញា ផាន់ វណ្ណរ័ត្ន ដែលជាអ្នកបើកការចោទប្រកាន់ក្នុងសំណុំរឿងហ្នឹង»។
ព្រះរាជអាជ្ញាតុលាការខេត្តបន្ទាយមានជ័យ លោក ផាន់ វណ្ណរ័ត្ន បញ្ជាក់ថា តំណាងអយ្យកាបានបើកការចោទប្រកាន់ទៅលើមន្ត្រីយោធារូបនោះ ពីបទប៉ះពាល់លើកម្មសិទ្ធិឯកជន និងក្លែងលិខិតសាធារណៈ ប៉ុន្តែពុំអាចធ្វើអត្ថាធិប្បាយលំអិតបានទេ រង់ចាំការស៊ើបអង្កេតបន្ត។
ប្រភពពីអ្នកភូមិបានឲ្យដឹងថា លោក សុខ សុបិន ជាមន្ត្រីយោធាបានទិញដីទំហំពីរហិកតារ នៅឃុំអូរបីជាន់ ប៉ុន្តែក្រោយមកលោក សុខ សុបិន បានកែលុបឯកសារទិញដីនោះពង្រីកទំហំដី ពីរហិកតារឡើងទៅរហូតទៅដល់ពីរហិកតារកន្លះ ប៉ះពាល់ជាមួយដីរបស់បុគ្គលម្នាក់ធ្វើពេទ្យនៅក្រុងប៉ោយប៉ែត ទើបមានការប្ដឹងផ្ដល់គ្នាទៅតុលាការ។
លោក ធាន វីរស់ នៅភូមិសិលាខ្មែរ បានបញ្ជាក់ថា លោក សុខ សុបិន ពិតជាបានទិញដី ហើយបានកែលិខិតស្នាមនោះមែន ប៉ុន្តែការធ្វើនោះ គឺមានមេភូមិសិលាខ្មែរ និងមេឃុំអូរបីជាន់ ចូលរួម៖ «បើឃុំខ្លួន គាត់ទាល់យកមេភូមិ មេឃុំទៅឃុំខ្លួនដែរទៅ ហេតុផលមកពីមេភូមិមេឃុំគាត់ចូលរួមគំនិត គាត់អ្នកលុប អ្នកលុបហើយចុះទៅវាស់ពិនិត្យ ហើយបន្ថែម ហើយមិនមែនតួនាទីរបស់ សុខ សុបិន គាត់អាចទៅពិនិត្យ ទាល់មេភូមិឃុំបានទៅពិនិត្យបាន»។
ទោះយ៉ាងនេះក្ដី វិទ្យុអាស៊ីសេរីបានព្យាយាមទាក់ទងទៅមន្ត្រីមូលដ្ឋាន នៅឃុំអូរបីជាន់ ដើម្បីសុំសេចក្ដីបញ្ជាក់ជុំវិញបញ្ហានេះ ប៉ុន្តែមិនអាចទាក់ទងបាន។ ទាក់ទិនការសម្រេចឃុំខ្លួន មន្ត្រីយោធាស័ក្ដិ ៥នេះ សមាគមអាដហុក បានស្វាគមន៍ចំពោះចំណាត់ការរបស់តុលាការខេត្តបន្ទាយមានជ័យ។
លោក ស៊ុំ ច័ន្ទគា ថ្លែងថា ការសម្រេចរបស់តុលាការនេះ បង្ហាញពីដំណើរមួយឆ្ពោះទៅរកតម្លាភាព និងយុត្តិធម៌ជូនដល់ប្រជាពលរដ្ឋ និងជនជាអ្នករងគ្រោះ។
លោកបន្តថា៖ «នេះជាដំណើរការឆ្ពោះទៅរកលទ្ធិប្រជាធិបតេយ្យ និងឆ្ពោះទៅរកការអនុវត្តច្បាប់ត្រឹមត្រូវមួយ។ តុលាការខេត្តបន្ទាយមានជ័យ កំពុងអនុវត្តច្បាប់ដោយមិនខ្លាច មិនញញើត មិនស្ថិតនៅក្រោមការបង្គាប់បញ្ជា ក្រោមនឹមរបស់គណបក្សណាមួយ និងមិនចំណុះស្ថាប័នអ្នកមានអំណាច ឬក៏ការគាប់សង្កត់អំពីគណបក្សនយោបាយ សុំឲ្យមានការចាត់ការទៅលើជនដែលបានប្រព្រឹត្ត»។
លោក សុខ សុបិន ជាមន្ត្រីយោធាពាក់ស័ក្ដិ៥ បច្ចុប្បន្នត្រូវតុលាការសម្រេចបញ្ជូនទៅឃុំខ្លួនជា បណ្ដោះអាសន្ននៅពន្ធនាគារខេត្តបន្ទាយមានជ័យ៕
0 comments:
Post a Comment