Social Icons

Friday, August 24, 2012Print Friendly Version of this pagePrint Get a PDF version of this webpagePDF

អ្នក​ភូមិ​ដែល​រង​ការ​បាញ់​ប្រហារ​ប្រតិកម្ម​លើ​ចំណាត់​ការ​តុលាការ​ខេត្ត​បាត់ដំបង

អ្នក​ភូមិ​ជា​ជន​រង​គ្រោះ​ក្នុង​អំពើ​បាញ់​ប្រហារ បាន​សម្ដែង​ប្រតិកម្ម​ទៅ​លើ​ចំណាត់​ការ​របស់​តុលាការ​ខេត្ត​បាត់ដំបង ដែល​បាន​សម្រេច​ដាក់​ពួក​គាត់​ដែល​ជា​ជន​រង​គ្រោះ ឲ្យ​ស្ថិត​នៅ​ក្រោម​ការ​ត្រួត​ពិនិត្យ​តាម​ផ្លូវ​តុលាការ ប៉ុន្តែ​ពុំ​មាន​ចំណាត់​ការ​ចំពោះ​ជន​ដៃ​ដល់ ដែល​បាន​បាញ់​ប្រហារ​ឲ្យ​ពួក​គាត់​មាន​របួស​នៅ​ក្នុង​ជម្លោះ​ដីធ្លី​ជាមួយ​ក្រុមហ៊ុន​ឯកជន​មួយ នៅ​ស្រុក​ភ្នំ​ព្រឹក ខេត្ត​បាត់ដំបង នោះ​ទេ។

២៤-សីហា-២០១២៖ លោក សឹង ហៀង (ឆ្វេង) ដែល​ជា​ជន​ជាប់​ចោទ​និង​លោក ហេង សាយហុង (ស្តាំ) ជា​មន្ត្រី​អង្គការ​លីកាដូ។

លោក សឹង ហៀង អាយុ​៣៤​ឆ្នាំ រស់​នៅ​ភូមិ​អូរដា ឃុំ​ចក្រី ស្រុក​ភ្នំព្រឹក ខេត្ត​បាត់ដំបង បាន​ថ្លែង​នៅ​ថ្ងៃ​ទី​២៤ ខែ​សីហា ថា ការ​សម្រេច​របស់​តុលាការ គឺ​ជា​រឿង​អយុត្តិធម៌។ កង​ការពារ​ក្រុមហ៊ុន​ដែល​បាន​ប្រើ​កាំភ្លើង​បាញ់​ឲ្យ​អ្នក​ភូមិ​មាន​របួស កាល​ពី​ចុង​ឆ្នាំ​២០១១ នោះ តុលាការ​ពុំ​បាន​ចាត់​ការ​ទៅ​តាម​ផ្លូវ​ច្បាប់​ទេ៖ «កាល​ពី​ថ្ងៃ​ទី​១២ ខែ​ធ្នូ ឆ្នាំ​២០១១ នោះ ជម្លោះ​កើត​ឡើង​គឺ​បាញ់​ចំ​ខ្ញុំ​ចំ​ភ្លៅ​ខាង​ស្ដាំ គឺ​ចូល​ពី​ខាង​ស្ដាំ​ចេញ​មក​ខាង​ឆ្វេង បណ្ដាល​ឲ្យ​របួស​ចំ​កណ្ដាល​ភ្លៅ។ ឥឡូវ​នេះ ខ្ញុំ​ជា​ជន​រង​គ្រោះ​ដោយ​ការ​បាញ់​ប្រហារ បែរ​ជា​គេ​ដាក់​ខ្ញុំ​ទៅ​ជា​ជន​ល្មើស​ដាក់​ក្នុង​ឲ្យ​តុលាការ​ស៊ើប​អង្កេត​ទៅ​វិញ»។
តុលាការ​ខេត្ត​បាត់ដំបង កាល​ពី​ថ្ងៃ​ទី​២៣ និង​ថ្ងៃ​ទី​២៤ ខែ​សីហា បាន​ចេញ​ដីកា​សម្រេច​ដាក់​ឲ្យ​ជន​ត្រូវ​ចោទ ស្ថិត​ក្រោម​ការ​ត្រួត​ពិនិត្យ​តាម​ផ្លូវ​តុលាការ ដោយ​តម្រូវ​ឲ្យ​ជន​ត្រូវ​ចោទ​បំពេញ​នូវ​កាតព្វកិច្ច ដូច​ជា មិន​ត្រូវ​ចេញ​ទៅ​ក្រៅ​ព្រំដែន​ដី នៃ​ព្រះរាជាណាចក្រ​កម្ពុជា ត្រូវ​ទៅ​បង្ហាញ​ខ្លួន​តាម​ការ​កំណត់​នៅ​អធិការដ្ឋាន​នគរបាល​ស្រុក​ភ្នំព្រឹក នៅ​ថ្ងៃ​ទី​២៣ រៀល​រាល់​ខែ​នីមួយៗ រហូត​ដល់​តុលាការ​សម្រេច​អង្គ​សេចក្ដី។
ទាក់​ទិន​ការ​សម្រេច​របស់​តុលាការ​នេះ លោក សឹង ហៀង ថ្លែង​ថា វា​មាន​ភាព​អយុត្តិធម៌។ ពួក​គាត់​ពុំ​អាច​ទទួល​យក​សេចក្ដី​សម្រេច​របស់​តុលាការ​ទេ៖ «ខ្ញុំ​សូម​បដិសេធ​ដាច់​ខាត ព្រោះ​ខ្ញុំ​មិន​បាន​ប្រព្រឹត្តិ​អ្វី​ទៅ​តាម​ការ​ចោទ​របស់​គេ​នោះ​ទេ។ នៅ​ក្នុង​ឯកសារ​ដែល​គេ​ដាក់​អោយ​ខ្ញុំ​ស្ថិត​នៅ​ក្រោម​តុលាការ ខ្ញុំ​នឹង​ធ្វើ​ទៅ​តាម​នីតិវិធី ប៉ុន្តែ​គ្រាន់​តែ​ថា ខ្ញុំ​មិន​ទទួល​ស្គាល់​ពាក្យ​ចោទ។ ប៉ុន្តែ​អ្វី​ដែល​ដាក់​ឲ្យ​ខ្ញុំ​ធ្វើ​ទៅ​តាម​៤​ចំណុច ធ្វើ​ទៅ​តាម​រាល់​ថ្ងៃ​ទី​២៣ ឲ្យ​ខ្ញុំ​ឡើង​ទៅ​ជួប​អធិការ​ក៏​ដោយ ខ្ញុំ​ក៏​ធ្វើ​ទៅ​តាម​ហ្នឹង។ ប៉ុន្តែ​រាល់​ពាក្យ​ចោទ​ទាំង​អស់ គឺ​ខ្ញុំ​អត់​ទទួល​យក​ទេ»។
មន្ត្រី​អង្គការ​លីកាដូ ប្រចាំ​ខេត្ត​បាត់ដំបង លោក ហេង សាយហុង បាន​ថ្លែង​ថា ការ​សម្រេច​របស់​តុលាការ គឺ​ស្រប​ទៅ​នឹង​សំណុំ​រឿង​របស់​ភាគី​ដើម​បណ្ដឹង ដែល​ពុំ​មាន​ទម្ងន់។ ម្យ៉ាង​វិញ​ទៀត ករណី​ប្ដឹង​ផ្ដល់​គ្នា​មក​តុលាការ ដោយ​សារ​បញ្ហា​ទំនាស់​ដីធ្លី តុលាការ​ចេះ​តែ​សម្រេច​ឃុំ​ខ្លួន។ ការ​សម្រេច​ឃុំ​ខ្លួន​មនុស្ស បាន​ធ្វើ​ឲ្យ​មនុស្ស​មាន​ការ​ឈឺ​ចាប់ និង​បាត់​បង់​ការងារ​អភិវឌ្ឍ​សេដ្ឋកិច្ច នៅ​ក្នុង​សង្គម​គ្រួសារ។ ទោះ​យ៉ាង​ក្ដី លោក​សង្កត់​ធ្ងន់​ថា ការ​សម្រេច​នេះ​វា​ជា​នីតិវិធី​របស់​តុលាការ​ក្នុង​ការ​ស៊ើប​អង្កេត។
លោក ហេង សាយហុង៖ «យើង​ចង់​ឲ្យ​តុលាការ​ផ្ដល់​យុត្តិធម៌​ឲ្យ​ជន​រង​គ្រោះ ព្រោះ​រឿង​នេះ​ខ្ញុំ​មើល​ទៅ​គ្មាន​ហេតុផល​អី​ជា​ដុំ​កំភួន​អី​ទេ យើង​សុំ​ឲ្យ​មាន​ការ​លើក​លែង តម្កល់​ទុក​រឿង កុំ​ឲ្យ​មាន​ការ​ចោទ​តទៅ​ទៀត»។
ជន​ទាំង​បី​នាក់​មាន ឈ្មោះ សឹង ហៀង ជោត គុណ និង​ផាវ បុត្រ រស់នៅ​ស្រុក​ភ្នំ​ព្រឹក ខេត្ត​បាត់ដំបង។ អ្នក​ភូមិ​ទាំង​បី​នាក់ ត្រូវ​បាន​លោក សាអឿន កោសល្យមុនី ចៅក្រម​ស៊ើប​សួរ​ចេញ​ដីកា​បង្កាប់​ឲ្យ​ចូល​ខ្លួន​តាម​សំណុំ​រឿង​ព្រហ្មទណ្ឌ​លេខ​៨៦៨ ចុះ​ថ្ងៃ​ទី​២៣ ខែ​ធ្នូ ឆ្នាំ​២០១១ ដែល​មាន​ភាគី​ដើម​បណ្ដឹង​ឈ្មោះ ចាន់ នី ជា​កង​កម្លាំង​ការពារ​ឲ្យ​ក្រុមហ៊ុន សួន មានសម្បត្តិ។ អ្នក​ទាំង​បី​ត្រូវ​តុលាការ​ចោទ​ពី​បទ​ប្រើ​ហិង្សា មាន​ស្ថាន​ទម្ងន់​ប្រព្រឹត្តិ​នៅ​ភូមិ​ភ្នំ​ប្រាំពីរ ឃុំ​ចក្រី ស្រុក​ភ្នំ​ព្រឹក ខេត្ត​បាត់ដំបង កាល​ពី​ថ្ងៃ​ទី​១២ ខែ​ធ្នូ ឆ្នាំ​២០១១។ បទល្មើស​ព្រហ្មទណ្ឌ​នេះ មាន​ចែង​​ឲ្យ​ផ្ដន្ទា​ទោស​តាម​បញ្ញត្តិ​មាត្រា​២១៨ នៃ​ក្រម​ព្រហ្មទណ្ឌ ចុះ​ថ្ងៃ​ទី​៣០ ខែ​វិច្ឆិកា ឆ្នាំ​២០០៩៕

0 comments:

 

Total Pageviews

Followers

ផេក សម្លេងខ្មែរជាតិនិយម

សូមស្វាគមន៍មកកាន់គេហទំព័រ សម្លេងខ្មែរជាតិនិយម ។ សម្លេងខ្មែរជាតិនិយម និងផ្សព្វផ្សាយ នូវទស្សនៈនយោបាយពិតនៃសង្គម ដើម្បីជាកញ្ចក់សម្រាប់ប្រជាជាតិខ្មែរ យកទៅសិក្សា ស្វែងយល់អំពីបញ្ហាប្រទេសជាតិ ដែលដឹកនាំដោយជនផ្តាច់ការអាយ៉ងយួន ហ៊ុន សែន និងអាណានិគមយួនឈ្លានពាន ហើយរួបរួមគ្នាដើម្បីរំដោះ ជាតិ សាសនា ប្រជាជាតិខ្មែរ ឱ្យមាន សន្តិភាព ឯករាជ្យភាព និងប្រជាធិបតេយ្យពិតប្រាកដនៅក្នុងប្រទេសកម្ពុជា។