Social Icons

Friday, August 24, 2012Print Friendly Version of this pagePrint Get a PDF version of this webpagePDF

ពលរដ្ឋ​ចោទ​មន្ត្រី​បរិស្ថាន​ពី​បទ​គំរាម​កំហែង​និង​រឹបអូស​ឈើ​មាន​ច្បាប់​នៅ​ព្រះវិហារ

តុលាការ​ខេត្ត​ព្រះវិហារ​មាន​គម្រោង​កោះ​ហៅ​មន្ត្រី​បរិស្ថាន ស្រុក​រវៀង ខេត្ត​ព្រះវិហារ ចំនួន​២​នាក់ មក​សាកសួរ ក្រោយ​ពី​មាន​ពាក្យ​ប្ដឹង​ពី​ប្រជាពលរដ្ឋ ចោទ​ប្រកាន់​ថា​មន្ត្រី​បរិស្ថាន​ទាំង​២រូប​នោះ បាន​ប្រើ​អាវុធ​គំរាម​ប្រជាពលរដ្ឋ និង​រឹបអូស​ឈើ​ដែល​មាន​ច្បាប់​ត្រឹមត្រូវ។

ប្រជាពលរដ្ឋ​ចំនួន​២នាក់ នៅ​ភូមិ​អូរ​ពោធិ ឃុំ​រមណីយ ស្រុក​រវៀង ខេត្ត​ព្រះវិហារ បាន​ដាក់​ពាក្យ​ប្ដឹង​ទៅ​តុលាការ​ខេត្ត​ព្រះវិហារ អំពី​សកម្មភាព​មន្ត្រី​បរិស្ថាន​ចំនួន​២រូប​បាន​គំរាម​កំហែង​ពួក​គាត់ ដោយ​ប្រើប្រាស់​អាវុធ និង​សុំ​ឲ្យ​មាន​ការ​ផ្ដន្ទាទោស និង​សង​ជំងឺ​ចិត្ត។
លោក ខាន់ សេងគីម ជា​ប្រជាពលរដ្ឋ​ដែល​បាន​ដាក់​ពាក្យ​ប្ដឹង មាន​ប្រសាសន៍​ថា កាល​ពី​ចុង​ខែ​មេសា ឆ្នាំ​២០១២ លោក​បាន​ដឹក​ឈើ​យក​មក​សង់​ផ្ទះ​មាន​ប្រមាណ​២ម៉ែត្រ​គូប។ ឈើ​ទាំង​នោះ​មាន​សុំ​ច្បាប់​ត្រឹមត្រូវ តែ​មាន​មន្ត្រី​បរិស្ថាន​បឹងពែរ មក​ឃាត់ និង​ទាមទារ​យក​ឈើ​ទៅ​ទីស្នាក់ការ ដោយ​មាន​ការ​ប្រកែក។ មន្ត្រី​បរិស្ថាន​ពីរ​រូប ម្នាក់​ឈ្មោះ សុខ ឌីម និង​ម្នាក់​ទៀត​ឈ្មោះ សុវន្ថា បាន​គំរាម​ដោយ​ប្រើប្រាស់​អាវុធ ដើម្បី​យក​ឈើ​ទៅ​ទីស្នាក់ការ​ឲ្យ​ទាល់​តែ​បាន។ លោក​បាន​ដាក់​ពាក្យ​ប្ដឹង​ទៅ​តុលាការ​ខេត្ត​ព្រះវិហារ កាល​ពី​ចុង​ខែ​កក្កដា។
លោក ខាន់ សេងគីម៖ «ពេល​ខ្ញុំ​ដឹក​យក​មក​ធ្វើ​ផ្ទះ គេ​មក​ដល់​មុខ​ផ្ទះ គេ​ហ្នឹង គេ​មក​ចាប់​ឈើ​ខ្ញុំ​មាន​ច្បាប់ យក​អាវុធ​មក​បើក​សោ​អា​មេ មក​ភ្ជង់​ខ្ញុំ ហើយ​នឹង​ប្រមាថ​ដាក់​ខ្នោះ​ដាក់​អី​ខ្ញុំ​ទៀត ដោយ​សារ​ខ្ញុំ​សំអាង​លើ​ច្បាប់​ហ្នឹង អត់​អោយ​យក​ឈើ​ហ្នឹង​ទៅ ប្រកែក​គ្នា​អ៊ីចឹង»។
ប្រជាពលរដ្ឋ​មួយ​រូប​ទៀត​ឈ្មោះ រុំ សំណាង ជា​ភរិយា​របស់​ឈ្មោះ ខាន់ សេងគីម បាន​រៀបរាប់​ហេតុការណ៍​ចាប់​ឈើ​មាន​ច្បាប់​ត្រឹមត្រូវ​នោះ​ថា មន្ត្រី​បរិស្ថាន​បាន​ប្រើ​អាកប្បកិរិយា​មិន​ត្រឹមត្រូវ និង​អាង​អំណាច មិន​ស្ដាប់​ការ​ពន្យល់​ហេតុផល​ទាល់​តែ​សោះ។
លោកស្រី រុំ សំណាង៖ «ពេល​ហ្នឹង​មាន​ន័យ​ថា គាត់​ប្រកែក​សម្ដី​គ្នា ដោយ​សារ​ប្ដី​ខ្ញុំ​គាត់​សំអាង​លើ​ច្បាប់​លោក​មេ​ឃុំ មេ​ភូមិ​អី ប្រធាន​សហគមន៍​អី គេ​ធ្វើ​ច្បាប់​អោយ​ត្រឹមត្រូវ ដល់​ពេល​អ៊ីចឹង យើង​ហ្នឹង​សំអាង​ច្បាប់​ហ្នឹង ដល់​ពេល​អ៊ីចឹង​មាន​ការ​ទាស់​ប្រកែក​គ្នា​មួយ​ម៉ាត់​ពីរ​ទៅ គេ​ក៏​បាន​បើក​សោ​មក​អា​មេ​មក​គេ»។
លោកស្រី រុំ សំណាង បាន​សុំ​ឲ្យ​តុលាការ​ពន្លឿន​ការ​កោះ​ហៅ​ជន​សង្ស័យ​ប្រព្រឹត្ត​បទល្មើស មក​សាកសួរ និង​ចោទ​ប្រកាន់​ផ្ដន្ទាទោស​តាម​ផ្លូវ​ច្បាប់​ឲ្យ​បាន​ឆាប់​រហ័ស។
លោក សុវន្ថា ជា​មន្ត្រី​បរិស្ថាន​មួយ​រូប ក្នុង​ចំណោម​មន្ត្រី​បរិស្ថាន​២រូប ដែល​ប្រជាពលរដ្ឋ​បាន​ប្ដឹង​នោះ បាន​បដិសេធ​ថា រូប​លោក​មិន​បាន​គំរាម​កំហែង​ប្រជាពលរដ្ឋ​ឡើយ៖ «អា​ហ្នឹង​ម្ចាស់​ខ្លួន​ធម្មតា​ទេ ចាប់​ប្រជាពលរដ្ឋ​អើ គេ​រក​រឿង​រក​អ៊ីចឹង​ណា យើង​មិន​បាន​គំរាម​គេ​ទេ យើង​ធ្វើ​តាម​តួនាទី​យើង​ទេ
តាម​បញ្ជា​ពី​លើ​មក។ ធម្មតា​បទល្មើស​មិន​បាន​ត​ដៃ​ត​អី​ទេ។ ប៉ុន្តែ​គាត់​ថា​យើង​ធ្វើ​តាម​តួនាទី​យើង​ទេ គេ​វា​រក​រឿង​ដែរ ព្រោះ​អ្នក​ស្រុក​គេ​ច្រើន​បង ហើយ​យើង​ទទួល​បញ្ជា​ពី​នាយក​មក អ៊ីចឹង​ទៅ យើង​ក៏​ធ្វើ​តាម​គាត់។ ខ្ញុំ​ធ្វើ​ម៉េច​បង គាត់​ត្រូវ​អោយ​តែ​ចាប់​អោយ​បាន»។
ប្រភព​មន្ត្រី​តុលាការ​ខេត្ត​ព្រះវិហារ បាន​ឲ្យ​ដឹង​ថា តុលាការ​ខេត្ត​ព្រះវិហារ​មាន​គម្រោង​កោះ​ហៅ​ជន​ពាក់ព័ន្ធ​ពាក្យ​ប្ដឹង​នេះ ឲ្យ​ឡើង​មក​តុលាការ​នៅ​ថ្ងៃ​ទី​២៩ ខែ​សីហា ខាង​មុខ​នេះ។
លោក ឡោ ចាន់ ប្រធាន​អង្គការ​អាដហុក ខេត្ត​ព្រះវិហារ មាន​ប្រសាសន៍​ថា បើ​សិន​ជា​ចៅក្រម​តុលាការ​រក​ឃើញ​ថា មាន​ពិរុទ្ធភាព​ដូច​ពាក្យ​ប្ដឹង​មែន​នោះ មន្ត្រី​បរិស្ថាន​ត្រូវ​មាន​ទោស​ជា​មិន​ខាន៖ «យោង​តាម​ពាក្យ​បណ្ដឹង​របស់​ជន​រង​គ្រោះ​បាន​ប្ដឹង​ចោទ​ទៅ​លើ​មន្ត្រី​បរិស្ថាន​ទាំង​២នាក់ ពី​បទ​គំរាម​កំហែង​ដោយ​ប្រើប្រាស់​អាវុធ​ខុស​ច្បាប់ ហើយ​តាម​ទស្សនៈ​របស់​ខ្ញុំ បើ​សិន​ជា​លោក សុខ ឌីម និង​លោក សុវន្ថា ដែល​ជា​មន្ត្រី​បរិស្ថាន​ស្ថិតនៅ​ក្រោម​ឱវាទ​របស់​លោក វ៉ុន ធឿន នាយ​ដែន​ជម្រក​សត្វព្រៃ​បឹង​ពែរ ពិត​ជា​បាន​គំរាម​កំហែង​ទៅ​លើ​ជន​រង​គ្រោះ​ពិត​មែន​នោះ គឺ​ខុស​ទៅ​នឹង​ក្រម​ព្រហ្មទណ្ឌ​មាត្រា​២៣១ ពី​បទ​គំរាម​កំហែង ហើយ​បើ​សិន​ជា​ករណី​ហ្នឹង កើត​មាន​ឡើង គឺ​មន្ត្រី​បរិស្ថាន​ទាំង​២​អាច​ជាប់​ពន្ធនាគារ​អាច​ជាប់​ពី​មួយ​ខែ​ទៅ​ប្រាំមួយ​ខែ និង​ពិន័យ​ជា​ប្រាក់​ពី​១សែន​ទៅ​១លាន​រៀល»។
លោក ឡោ ចាន់ មាន​ប្រសាសន៍​ថា ករណី​ប្រជាពលរដ្ឋ​ប្ដឹង​មន្ត្រី​បរិស្ថាន​នៅ​ស្រុក​រវៀង នោះ ធ្លាប់​កើត​មាន​ជាច្រើន​លើក​មក​ហើយ។
នៅ​ក្នុង​ពាក្យ​ប្ដឹង​របស់​ប្រជាពលរដ្ឋ​ឈ្មោះ ខាន់ សេងគីម និង​រុំ សំណាង ទៅ​តុលាការ​ខេត្ត​ព្រះវិហារ បាន​សុំ​ឲ្យ​តុលាការ​ផ្ដល់​យុត្តិធម៌ និង​ទាមទារ​ជំងឺ​ចិត្ត​ជា​ប្រាក់​ចំនួន​៥​ពាន់​ដុល្លារ​អាមេរិក៕

0 comments:

 

Total Pageviews

Followers

ផេក សម្លេងខ្មែរជាតិនិយម

សូមស្វាគមន៍មកកាន់គេហទំព័រ សម្លេងខ្មែរជាតិនិយម ។ សម្លេងខ្មែរជាតិនិយម និងផ្សព្វផ្សាយ នូវទស្សនៈនយោបាយពិតនៃសង្គម ដើម្បីជាកញ្ចក់សម្រាប់ប្រជាជាតិខ្មែរ យកទៅសិក្សា ស្វែងយល់អំពីបញ្ហាប្រទេសជាតិ ដែលដឹកនាំដោយជនផ្តាច់ការអាយ៉ងយួន ហ៊ុន សែន និងអាណានិគមយួនឈ្លានពាន ហើយរួបរួមគ្នាដើម្បីរំដោះ ជាតិ សាសនា ប្រជាជាតិខ្មែរ ឱ្យមាន សន្តិភាព ឯករាជ្យភាព និងប្រជាធិបតេយ្យពិតប្រាកដនៅក្នុងប្រទេសកម្ពុជា។