Print 
PDFដោយ ទីន ហ្សាការីយ៉ា
2012-05-28
ប្រធានសមាគមខ្មែរកម្ពុជាក្រោម លោក ថាច់ សេដ្ឋា បានឲ្យដឹងនៅថ្ងៃទី២៧ ខែឧសភា ថា លោកកំពុងស្វែងរកទីតាំងនៅទីក្រុងភ្នំពេញ ដើម្បីរៀបចំធ្វើពិធីរំលឹកខួប ៦៣ឆ្នាំនៃថ្ងៃបាត់បង់ទឹកដីខ្មែរកម្ពុជា។
៤-មិថុនា-២០១០: ប្រធានសមាគមខ្មែរកម្ពុជាក្រោម លោក ថាច់ សេដ្ឋា ថ្លែងសុន្ទរកថាក្នុងពិធីបុណ្យរាប់បាត្រ និងប្រារព្ធទិវាកាន់ទុក្ខនៃថ្ងៃបាត់បង់ទឹកដីកម្ពុជាក្រោម នៅវត្តសាមគ្គីរង្សី ស្ថិតក្នុងខណ្ឌមានជ័យ រាជធានីភ្នំពេញ។
លោក ថាច់ សេដ្ឋា មានប្រសាសន៍ថា លោកបានដាក់លិខិតស្នើសុំទីតាំងនេះទៅសាលារាជធានីភ្នំពេញ កាលពីថ្ងៃទី៦ ឧសភា ប៉ុន្តែខាងសាលារាជធានីភ្នំពេញ បានផ្ដល់ដំណឹងឲ្យលោកវិញថា ទីតាំងនៅទីធ្លាមុខវត្តបទុមវតីនោះ សាលារាជធានីបានផ្ដល់ជូនគណៈកម្មាធិការសម្របសម្រួលខ្មែរកម្ពុជាក្រោម រួចហើយ ដែលដឹកនាំដោយលោក គឹម វណ្ណឆេង។
លោក ថាច់ សេដ្ឋា បញ្ជាក់ថា សាលារាជធានីភ្នំពេញ បានផ្ដល់ទីតាំងឲ្យលោក គឹម វណ្ណឆេង នេះ ដោយសារតែលោក គឹម វណ្ណឆេង ជាអ្នកគាំទ្រគណបក្សប្រជាជនកម្ពុជា។
ឯកសារប្រវត្តិសាស្ត្របានសរសេរថា កាលពីថ្ងៃទី៨ ខែមិថុនា ឆ្នាំ១៩៤៩ ប្រធានាធិបតីបារាំង បានចុះកិច្ចព្រមព្រៀងប្រគល់ទឹកដីខ្មែរកម្ពុជាក្រោមឲ្យវៀតណាម ដោយវៀតណាម យល់ព្រមបង្កើតរដ្ឋាភិបាលយៀកណាមមួយ នៅក្នុងក្រុមសហភាពបារាំង ហៅថា រដ្ឋយៀកណាម។ ហើយបារាំងសង្ឃឹមថា ការប្រគល់កម្ពុជា ក្រោមទៅឲ្យស្ដេច បាវ ដាយ គេអាចនឹងរក្សានូវឥទ្ធិពលរបស់ខ្លួនបានយូរអង្វែងនៅទឹកដី កូសាំងស៊ីន ព្រមទាំងទប់ស្កាត់ឥទ្ធិពលរបស់កុម្មុយនិស្តនិយម ហូជីមិញ (Ho Chi Minh)។
លុះដល់ថ្ងៃទី៤ ខែមិថុនា ឆ្នាំ១៩៤៩ ដដែល ប្រធានាធិបតីបារាំង វ៉ាងសង់ អូរីយ៉ូល (Vincent Auriol) បានប្រកាសជាផ្លូវការប្រគល់ទឹកដីខ្មែរកម្ពុជាក្រោមឲ្យវៀតណាម ជាផ្លូវការ ដែលឯកសារខ្លះថា មានចំនួន ៦ខែត្រ ប៉ុន្តែឯកសារខ្លះថា មានចំនួន ២១ខែត្រ។ គិតមកទល់ពេលនេះ ការបាត់បង់ទឹកដីកម្ពុជាក្រោម មានរយៈពេល ៦៣ឆ្នាំហើយ៕
0 comments:
Post a Comment