Print 
PDF
ដោយ វរមានជ័យ
អ្នកភូមិបឹងកក់ក្នុងរាជធានីភ្នំពេញដែលប្រឈមនឹងបញ្ហាដីធ្លីតាំងពីច្រើនឆ្នាំណាស់មកហើយនោះ បានទទួលផលក្នុងអត្ថន័យខុសគ្នាពីទិវាសិទ្ធិមនុស្សដែលត្រូវបានគេប្រារព្ធធ្វើកាលពីថ្ងៃសៅរ៍ទី១០ធ្នូម្សិលមិញ។ អ្នកភូមិបឹងកក់មួយក្រុមត្រេកអរបន្ទាប់ពីបានទទួលប័ណ្ណកម្មសិទ្ធិដីធ្លីពីអាជ្ញាធរក្រុងភ្នំពេញ រីឯអ្នកភូមិមួយក្រុមទៀតកំពុងអង្គុយកើតទុក្ខមិនដឹងជាត្រូវដោះស្រាយបែបណា។ ក្រុមចុងក្រោយនេះកំពុងតែរៀបចំផែនការតវ៉ាថ្មីទៀតដើម្បីទាមទារសិទ្ធិអភិវឌ្ឍន៍នៅនឹងកន្លែង។
ទិវាសិទ្ធិមនុស្សអន្តរជាតិថ្ងៃទី១០ធ្នូម្សិលមិញនេះមានអត្ថន័យពីរខុសគ្នាសម្រាប់អ្នកភូមិបឹងកក់។ អ្នកភូមិមួយក្រុមបានចូលរួមទិវាសិទ្ធិមនុស្សដោយកាន់ទុក្ខក្រៀមក្រំជាមួយសម្លៀកបំពាក់ពណ៌ខ្មៅដើម្បីសម្តែងការកើតទុក្ខចំពោះការបាត់បង់ផ្ទះសម្បែងដែលក្រុមហ៊ុនឯកជនកំពុងបូមខ្សាច់ពន្លិចបន្តិចម្តងៗ។ តំណាងអ្នកភូមិម្នាក់បានប្រាប់វិទ្យុបារាំងអន្តរជាតិនៅថ្ងៃនេះថា ពួកគេកំពុងរៀបចំផែនការថ្មីដើម្បីទាមទារសិទ្ធិរស់នៅលើដីភូមិរបស់ខ្លួន។
កាលពីថ្ងៃម្សិលមិញ ប្រជាពលរដ្ឋតំបន់បឹងកក់ប្រមាណជាង ១០០ នាក់បាននាំគ្នាប្រារព្ធទិវាសិទ្ធិមនុស្សថ្ងៃ១០ធ្នូនៅក្នុងតំបន់បឹងកក់ដែលមានជម្លោះដីធ្លីដ៏រ៉ាំរ៉ៃដោយស្លៀកពាក់ពណ៌ខ្មៅ ។ ការជួបជុំសាទរទិវាសិទ្ធិមនុស្សនេះ អ្នកភូមិបឹងកក់ចង់ប្រាប់ទៅអាជ្ញាធរថា ប្រជាពលរដ្ឋទាំងអស់នៅតំបន់បឹងកក់ក៏មានសិទ្ធិស្មើគ្នាហើយក៏ចង់ឲ្យអាជ្ញាធរបែងចែកដីឲ្យពួកគេដែរ។
ដោយឡែក អាជ្ញាធររាជធានីភ្នំពេញក៏បានជ្រើសរើសយកថ្ងៃទិវាសិទ្ធិមនុស្ស១០ធ្នូដើម្បីចែកប័ណ្ណកម្មសិទ្ធិដីធ្លីឲ្យទៅអ្នកភូមិបឹងកក់មួយក្រុមទៀត។ ពលរដ្ឋបឹងកក់២៥៤គ្រួសារបានចូលរួមទិវាសិទ្ធិមនុស្សនេះក្នុងសាលារាជធានីភ្នំពេញដោយទទួលបានប័ណ្ណកម្មសិទ្ធិរួចហើយ។ អភិបាលរាជធានីភ្នំពេញ លោក កែប ជុតិមាដែលបានចែកប័ណ្ណកម្មសិទ្ធិដោយផ្ទាល់ដៃដល់ក្រុមអ្នកភូមិបឹងកក់បានមានប្រសាសន៍ថា ពលរដ្ឋដែលត្រូវទទួលបានប័ណ្ណកម្មសិទ្ធិនៅលើទំហំដីជាង១២ហិកតាដែលលោកនាយករដ្ឋមន្ត្រីហ៊ុន សែន កាត់ជូនប្រជាជននោះមានទាំងអស់សរុបជាង៧០០ប្លង់។ ប៉ុន្តែ ក្នុងជំហានទី១នេះ ពលរដ្ឋជាង២៥០គ្រួសារបានទទួលមុនគេ។ អ្នកដែលនៅសេសសល់នឹងទទួលបានយ៉ាងយូរត្រឹមថ្ងៃ៧មករាឆ្នាំ២០១២។
សូមបញ្ជាក់ថា ដីតំបន់បឹងកក់ត្រូវបានរដ្ឋាភិបាលប្រគល់សិទ្ធិឲ្យក្រុមហ៊ុនស៊ូកាគូអ៊ីនដើម្បីអភិវឌ្ឍន៍តាំងពីឆ្នាំ២០០៧មក។ ប្រជាពលរដ្ឋមួយចំនួនបានសុខចិត្តទទួលយកការដោះស្រាយពីអាជ្ញាធរដើម្បីចាកចេញដោយសន្តិវិធី។ ប៉ុន្តែ ពលរដ្ឋមួយចំនួនទៀតមិនព្រមទទួលយកសំណងដ៏តិចតួចពីអាជ្ញាធរទេដោយសុខចិត្តបន្តការតវ៉ា។ រហូតមកទល់ពេលនេះ ពលរដ្ឋមួយក្រុមនៅតែមិនទទួលបានកម្មសិទ្ធិនៅឡើយ។ ថ្លែងក្នុងទិវាសិទ្ធិមនុស្សកាលពីថ្ងៃទី១០ធ្នូដែរ លោក សូរិយ៉ា ស៊ូប៊ែឌី អ្នករាយការណ៍ពិសេសរបស់សហប្រជាជាតិទទួលបន្ទុកសិទ្ធិមនុស្សប្រចាំកម្ពុជាបានអះអាងថា លោកចង់ឃើញរដ្ឋាភិបាលដោះស្រាយបញ្ហាដោយត្រឹមត្រូវនិងគ្មានអ្នកណាម្នាក់ត្រូវបានផាត់ចេញពីដំណោះស្រាយដ៏ត្រឹមត្រូវនេះបានឡើយ៕
0 comments:
Post a Comment