Print 
PDFដោយ សុខ សេរី
2011-12-09
ដំណើរ ទស្សនកិច្ចរបស់អ្នករាយការណ៍ពិសេស អ.ស.ប លោក សុរិយា ស៊ូប៊ែឌី មកកម្ពុជាលើកនេះ លោកចាប់អារម្មណ៍លើកិច្ចការបោះឆ្នោត និងការបើកចំហឲ្យមានការបញ្ចេញមតិ និងការរិះគន់ឲ្យបានច្រើន នៅក្នុងដំណើរលទ្ធិប្រជាធិបតេយ្យ។
៩-ធ្នូ-២០១១៖ លោក សុរិយា ស៊ូប៊ែឌី (Surya Subedi) អ្នករាយការណ៍ពិសេសរបស់អង្គការសហប្រជាជាតិ។
ការអំពាវនាវនេះ ដោយសារតែលោកបានទទួលព័ត៌មានជាច្រើនឲ្យដឹងថា ការបោះឆ្នោតនៅកម្ពុជាកន្លងមក គណបក្សប្រឆាំងមិនមានលទ្ធភាពស្មើគ្នា ចំពោះការប្រើប្រាស់ប្រព័ន្ធផ្សព្វផ្សាយ នៅក្នុងដំណើរការរៀបចំការបោះឆ្នោត។ ចំនួនអ្នកទៅបោះឆ្នោតបានថយចុះ ដោយសារតែជួបប្រទះការលំបាក និងភាពស្មុគស្មាញ នៅពេលបោះឆ្នោត។
គណបក្សកាន់អំណាចបានប្រើប្រាស់ធនធានរបស់រដ្ឋ ដូចជា រថយន្តជាដើម ដើម្បីឃោសនាបោះឆ្នោត។ មានការគំរាមកំហែងលើសកម្មជនគណបក្សប្រឆាំងជាដើម។
អ្នករាយការណ៍ពិសេសរបស់អង្គការសហប្រជាជាតិ លោក សុរិយា ស៊ូប៊ែឌី មានប្រសាសន៍នៅក្នុងសន្និសីទកាសែត នៅថ្ងៃទី ៩ ខែធ្នូថា លោកនឹងដាក់បញ្ចូលព័ត៌មានទាំងនោះ ក្នុងរបាយការណ៍របស់លោក ជូនក្រុមប្រឹក្សាសិទ្ធិមនុស្ស នៅខែកញ្ញា ឆ្នាំ ២០១២។ លោកមានប្រសាសន៍តាមរយៈការបកប្រែភាសាខ្មែរថា គេត្រូវការសង្គមមួយបើកចំហ ដើម្បីឲ្យមានការរីកចំរើន។
ប្រសាសន៍លោក សុរិយា ស៊ូប៊ែឌី៖ «ម្យ៉ាងវិញទៀត គណបក្សប្រឆាំង អាចធ្វើការជាមួយរដ្ឋាភិបាល ក្នុងការកៀងគរប្រជាពលរដ្ឋ ឲ្យចូលរួមកាន់តែច្រើនឡើងថែមទៀត។ ជាពិសេស ក្នុងករណីបោះឆ្នោតតែម្ដង ព្រោះថា អត្ថប្រយោជន៍ឲ្យទាំងសងខាង ទាំងរដ្ឋាភិបាល ទាំងគណបក្សប្រឆាំង បើសិនជាប្រជាពលរដ្ឋមកចូលរួម»។
អគ្គលេខាធិការ គ.ជ.ប លោក ទេព នីថា ថ្លែងថា ការលើកឡើងនូវការចោទប្រកាន់នោះ ប្រធាន គ.ជ.ប លោក អ៊ឹម សួស្តី បានបកស្រាយពន្យល់រួចហើយ៖ «នេះជាការសន្និដ្ឋានរបស់គាត់ ហើយអ្វីដែលគាត់បានលើកឡើងជាសំណូមពរនោះ គឺជាការងារ ដែល គ.ជ.ប ត្រូវធ្វើ និងបានធ្វើកន្លងមកហើយ ហើយកំពុងតែជំរុញ ធ្វើឲ្យល្អប្រសើរថែមទៀត»។
លោក សុរិយា ស៊ូប៊េឌី ដែលបានមកបំពេញទស្សនកិច្ចលើកទី ៦ នៅកម្ពុជា និងបញ្ចប់ទស្សនកិច្ចនេះ នៅថ្ងៃទី ១១ ខែធ្នូ ឆ្នាំ ២០១១ ក្រោយពីបានជួបជាមួយមន្ត្រីជាន់ខ្ពស់រដ្ឋាភិបាលកម្ពុជា ដូចជា រដ្ឋមន្ត្រីក្រសួងមហាផ្ទៃ លោក ស ខេង ជាឧបនាយករដ្ឋមន្ត្រី។ ជួបជាមួយមេដឹកនាំ គ.ជ.ប។ ជួបជាមួយមេដឹកនាំអង្គការសង្គមស៊ីវិល។
លោកក៏បានជួបជាមួយមេដឹកនាំគណបក្សនយោបាយមួយចំនួន ដើម្បីប្រមូលព័ត៌មាន និងស្វែងយល់ការពិត ផ្ដោតលើប្រព័ន្ធបោះឆ្នោតនៅកម្ពុជា៕
0 comments:
Post a Comment