Print 
PDFដោយ ខែ សុណង
2011-11-03
លោក ហ៊ុន សែន ដែលបានកាន់អំណាចអស់រយៈពេលជិត ៣០ឆ្នាំមកហើយនោះ បានប្រកាសថា ការគ្រប់គ្រងអំណាចរបស់លោកគឺធ្វើឡើងទៅតាមការបោះឆ្នោតផ្ដល់ សេចក្ដីទុកចិត្តដោយប្រជាពលរដ្ឋ មិនមែនដូចមេដឹកនាំផ្ដាច់ការមួយចំនួននៅលើសកលលោកនោះទេ។
១៥-មិថុនា-២០១១៖ លោកនាយករដ្ឋមន្ត្រី ហ៊ុន សែន ថ្លែងក្នុងឱកាសចែកសញ្ញាបត្រដល់និស្សិតនៅសាកលវិទ្យាល័យ វិទ្យាសាស្ត្រសុខាភិបាល រាជធានីភ្នំពេញ។
លោកនាយករដ្ឋមន្ត្រី ហ៊ុន សែន បានអះអាងថា រដ្ឋាភិបាលរបស់លោកមិនអាចដួលរលំដោយការធ្វើរដ្ឋប្រហារទម្លាក់ អំណាចរបស់លោកដូចមេដឹកនាំប្រទេសនៅប៉ែកមជ្ឈិមបូព៌ានោះឡើយ។
លោកនាយករដ្ឋមន្ត្រី ហ៊ុន សែន បានថ្លែងដូច្នេះ នៅក្នុងពិធីសម្ពោធបើកការដ្ឋានសាងសង់ស្ពានជ្រោយចង្វារទី២ កាលពីថ្ងៃទី២ ខែវិច្ឆិកា ឆ្នាំ២០១១ ថា កុំប្រៀបប្រដូចរូបលោកទៅនឹងមេដឹកនាំផ្ដាច់ការនៅមជ្ឈិមបូព៌ា គឺលោក មូអាមឺរ៍ ហ្គាដាហ្វ៊ី (Moammar Gadhafi) ប្រសិនជាមិនចង់ឲ្យសង្គ្រាមផ្ទុះឡើងនោះ។
លោកថ្លែងដូច្នេះ៖ «កុំមកចាត់ទុកអី ថ្ងៃមុនថា ហ៊ុន សែន មានវាសនាដូច ហ្គាដាហ៊្វី។ ថ្ងៃ២៣ តុលា និយាយនៅភ្នំពេញថា ហ៊ុន សែន នឹងមានវាសនាដូច ហ្គាដាហ្វ៊ី អ៊ីចឹងបើមានវាសនាដូចជា ហ្គាដាហ្វ៊ី មានតែវាយគ្នា? ព្រោះ ហ្គាដាហ្វ៊ី ធ្លាក់ដោយសារគេវាយ។ បើចង់វាយគ្នាអូខេ ញឹក ប៊ុនឆៃ ធ្លាប់ស្គាល់ហើយតើ ហ៊ុន សែន វាយបាក់ឆ្អឹងខ្នងរហូតមកដល់ថ្ងៃនេះ។ ហ្គាដាហ្វ៊ី ដោយសារពួកណាតូ វាយ ជួយសង្គ្រាមពីក្រោមបានគេធ្វើឲ្យស្លាប់ ហ្គាដាហ្វ៊ី អ៊ីចឹងមានតែអ្នកឯងចង់ធ្វើសង្គ្រាម? បើចង់ធ្វើសង្គ្រាម ខ្ញុំសូមជូនអាវុធមួយឃ្លាំង។ និយាយអ៊ីចឹងមិនមែនយើងគាំទ្រ ហ្គាដាហ៊្វី ទេ តែពួកនេះយូរៗទៅយកឯងទៅប្រៀបធៀបជាមួយ ហ្គាដាហ្វ៊ី»។
លោក ហ៊ុន សែន បានថ្លែងដូច្នេះ បន្ទាប់ពីមានការរិះគន់ពីមន្ត្រីអង្គការសង្គមស៊ីវិល អ្នកវិភាគនយោបាយ មន្ត្រីនៃគណបក្សដែលលើកឡើងថា ការស្លាប់របស់អតីតមេដឹកនាំផ្ដាច់ការនៅប្រទេសលីប៊ី គឺលោក មូអាមឺរ៍ ហ្គាដាហ៊្វី ជាសារមួយដ៏សំខាន់សម្រាប់មេដឹកនាំផ្ដាច់ការមួយចំនួននៅប្រទេសខ្លះ ក្នុងពិភពលោក ដើម្បីពិចារណានូវការទាមទារឲ្យចុះចេញពីតំណែងរបស់ពលរដ្ឋខ្លួន ហើយថា ការដឹកនាំរបស់លោកនាយករដ្ឋមន្ត្រី ហ៊ុន សែន វិញមានពលរដ្ឋខ្មែរខ្លះទាំងក្នុងប្រទេសក្រៅប្រទេស បានព្រមានថា លោក ហ៊ុន សែន ដែលប្រើអំណាចគាបសង្កត់សិទ្ធិសេរីភាព និងពោរពេញទៅដោយអំពើពុករលួយ បក្សពួកនិយម អាចនឹងមានវាសនាដូចជាមេដឹកនាំខ្លះក្នុងបណ្ដាប្រទេសនៅអារ៉ាប់។
ទន្ទឹមនឹងគ្នានេះ លោក ហ៊ុន សែន ក៏បានប្រតិកម្មទៅនឹងមេដឹកនាំបក្សប្រឆាំង លោក សម រង្ស៊ី ដែលលោកកំពុងធ្វើចលនាឲ្យសហគមន៍អន្តរជាតិ មិនទទួលយកលទ្ធផលនៃការបោះឆ្នោតនាពេលខាងមុខ។
លោក ហ៊ុន សែន បញ្ជាក់ដូច្នេះ៖ «ប្រាំឆ្នាំបោះឆ្នោតម្ដង ឥឡូវឆ្នាំ២០១៣ ប្រឹងឲ្យឈ្នះទៅ ប៉ុន្តែអត់ទាន់បោះឆ្នោតផង គេថា ឥឡូវចាប់ផ្ដើមធ្វើយុទ្ធនាការឲ្យសហគមន៍អ៊ឺរ៉ុប កុំទទួលស្គាល់លទ្ធផលបោះឆ្នោត ចុះគិតអីអ៊ីចឹងៗ ធ្វើម៉េច? សូមផ្ដាំទៅអស់លោកធ្វើចុះ អាណិតសូមកសាង សូមថែរក្សាសន្តិភាព ហើយសូមកុំប្រើហិង្សា។ សូមទោសចុះ! បើអស់លោកចង់លេងល្បែងសង្គ្រាម ខ្ញុំក៏អូខេ តែខ្ញុំមិនចង់ទេ ហើយលោកក៏គ្មានអ្នកកាន់អាវុធដែរ បើកាន់អាវុធគ្រាន់តែពួកលួចលាក់តែប៉ុណ្ណឹង ដូចជាអាចលនា ស៊ីហ្វេសហ្វេស ទើបតែដោះលែងប៉ុន្មានថ្ងៃមុន ដោយសារការដោះលែងអត់អោនជូនទៅផងទេ សរសេរសំបុត្រមកខ្ញុំប៉ុន្មានដងនោះ»។
ទាក់ទងបញ្ហានេះ លោក យឹម សុវណ្ណ អ្នកនាំពាក្យគណបក្ស សម រង្ស៊ី បានអះអាងថា ការលើកឡើងរបស់លោក ហ៊ុន សែន គឺជាការឆ្លុះបញ្ចាំងអំពីការចង់ប្រើប្រាស់នូវអំពើហិង្សាណាមួយ។ ប៉ុន្តែគណបក្ស សម រង្ស៊ី គឺជាគណបក្សមានគោលនយោបាយអហិង្សា។
លោក យឹម សុវណ្ណ៖ «យើងចង់ធ្វើនយោបាយប្រកបដោយសន្តិវិធី ប្រើគំនិត សតិសម្បជញ្ញៈ ប្រើចុងប៉ិច ដើម្បីតស៊ូមតិ ការពារផលប្រយោជន៍ជាតិ ការពារទឹកដី ហើយប្រយុទ្ធតស៊ូដើម្បីកសាងសង្គមជាតិ១ ដែលគ្មានអំពើពុករលួយ ដែលគ្មានអំពើអយុត្តិធម៌នៅក្នុងសង្គម អ្នកណាគេចង់ចូលចិត្តធ្វើសង្គ្រាម អានេះជារឿងរបស់គេ ប៉ុន្តែចំពោះគណបក្ស សម រង្ស៊ី គោលនយោបាយរបស់យើងតស៊ូដោយអហិង្សា»។
លោកនាយករដ្ឋមន្ត្រី ហ៊ុន សែន បានដឹកនាំប្រទេសកម្ពុជា រហូតមកដល់សព្វថ្ងៃនេះមានរយៈពេល ២៦ឆ្នាំមកហើយ។ លោក ហ៊ុន សែន ធ្លាប់បានប្រកាសថា ដរាបណាលោកមានជីវិត លោកនឹងបន្តដឹកនាំប្រទេសកម្ពុជា រហូតដល់អាយុ ៩០ឆ្នាំ៕
0 comments:
Post a Comment