Print 
PDFដោយ ដែន អយុធ្យា 2011-10-05
មន្ត្រីប៉ូលិសប៉ុស្តិ៍រដ្ឋបាលឃុំព្រែកចង្ក្រាន នាខេត្តព្រៃវែង បានធ្វើសកម្មភាពបាញ់បោះបង្កអសន្តិសុខ និងបណ្តាលឲ្យបុរសពីរនាក់របួសធ្ងន់។ប្រជាពលរដ្ឋមានលំនៅឋានក្នុងឃុំព្រែកចង្ក្រាន ស្រុកស៊ីធរកណ្ដាល ខេត្តព្រៃវែង បានព្រួយបារម្ភពីសុវត្ថិភាពផ្ទាល់ខ្លួន នៅពេលដែលមន្ត្រីប៉ូលិសប៉ុស្តិ៍រដ្ឋបាលឃុំព្រែកចង្ក្រាន បានធ្វើសកម្មភាពបាញ់បោះអនាធិបតេយ្យ ប៉ុន្តែមិនមានការផ្ដន្ទាទោសនោះ។
បុរសមិនបង្ហាញឈ្មោះដែលអះអាងថា ជាតំណាងឲ្យពលរដ្ឋនៅមូលដ្ឋានឃុំព្រែកចង្ក្រាន ស្រុកស៊ីធរកណ្ដាល ខេត្តព្រៃវែង។ លោកបានឲ្យដឹងថា កាលពីរាត្រីថ្ងៃទី២ ខែតុលា ប៉ូលិសប៉ុស្តិ៍រដ្ឋបាលឃុំព្រែកចង្ក្រាន ឈ្មោះ ជូ ស៊្រុន បានប្រើកាំភ្លើងបាញ់ឲ្យពលរដ្ឋចំនួនពីរនាក់របួសធ្ងន់ និងត្រូវបញ្ចូនទៅកាន់មន្ទីរពេទ្យ។
លោកបន្តថា រហូតមកដល់ថ្ងៃពុធ ទី៥ ខែតុលា សមត្ថកិច្ចមិនទាន់ចាប់ជនល្មើសបញ្ជូនទៅផ្តន្ទាទោសតាមច្បាប់នៅឡើយទេ។
តំណាងពលរដ្ឋចង់ឃើញប៉ូលិស ឈ្មោះ ជូ ស៊្រុន ត្រូវបានតុលាការផ្ដន្ទាទោស ជាជាងធ្វើការសម្របសម្រួលជាលុយកាក់នៅក្រៅប្រព័ន្ធតុលាការ ដើម្បីឲ្យរាងចាល ៖ «ឃើញគេចាប់ទៅសាលាស្រុក ប៉ុន្តែឮពាក្យថា ចង់សម្រុះសម្រួលឲ្យបុគ្គលហ្នឹងរួចខ្លួន ហើយខ្ញុំក្នុងនាមពលរដ្ឋនៅស្រុកស៊ីធរកណ្ដាល មានការព្រួយបារម្ភ ព្រោះជននេះតែងផឹកស្រាឡូឡាអួតអាង មានកាំភ្លើងអាងតែសមត្ថកិច្ចដើរគំរាមកំហែងគេ។ បាញ់ហើយរួចខ្លួនៗ គេដើរបាញ់គ្រប់គ្នាហើយ»។
តំណាងពលរដ្ឋបន្តថា មិនមែនជាលើកទី១ទេដែលប៉ូលិសឈ្មោះ ជូ ស៊្រុន បានបាញ់បោះ បង្កការភ័យខ្លាចដល់ពលរដ្ឋក្នុងមូលដ្ឋាន។ លោកថា ទង្វើបាញ់បោះបានកើតមានជាយូរមកហើយ ប៉ុន្តែមិនឃើញមានសមត្ថកិច្ចពីស្ថាប័នពាក់ព័ន្ធណាមួយបង្ក្រាប ឬចាប់ខ្លួនប៉ូលិសរូបនេះទៅកាន់តុលាការម្ដងណាទេ។
លោក លី អឿន ជាមេឃុំព្រែកចង្ក្រាន ស្រុកស៊ីធរកណ្ដាល ខេត្តព្រៃវែង។ លោកទទួលស្គាល់ថា ប៉ូលិសប៉ុស្តិ៍រដ្ឋបាលឃុំព្រែកចង្ក្រាន ឈ្មោះ ជូ ស៊្រុន ហៅ ភារុន ពិតជាបានប្រើកាំភ្លើងបាញ់ឲ្យពលរដ្ឋចំនួនពីរនាក់នៅមូលដ្ឋានលោករបួសធ្ងន់ ពេលផឹកស្រាស្រវឹងពិតមែន។
លោកថា ករណីបង្ករបួសស្នាមនេះ សមត្ថកិច្ចជំនាញថ្នាក់ស្រុក និងខេត្តកំពុងមានវិធានការទៅលើជនល្មើសនោះ ៖ «មួយនោះគាត់ត្រូវកដៃបាក់ឆ្អឹង។ ទៅដល់ពេទ្យកាល់ម៉ែតហើយ ប៉ុន្តែមិនកាត់ទេ គេអបឆ្អឹង និងពលរដ្ឋម្នាក់ទៀតដែលចូលរួមផឹកស៊ីជាមួយ ត្រូវឆ្អឹងដងកាំបិតបៀមគ្រាប់។ ពេទ្យបានជួយសង្គ្រោះរួចហើយ»។
យ៉ាងនេះក្ដី លោក យ៉ុន សុណេត ជាអធិការស្រុកស៊ីធរកណ្ដាល ខេត្តព្រៃវែង។ លោកបានឲ្យដឹងថា មន្ត្រីប៉ូលិសរដ្ឋបាលឃុំព្រែកចង្ក្រាន ឈ្មោះ ជូ ស្រុន ដែលបាញ់ពលរដ្ឋពីរនាក់ឲ្យរបួសធ្ងន់កាលពីរាត្រីថ្ងៃទី២ ខែតុលា សមត្ថកិច្ចបានចាប់ខ្លួន និងកំពុងរៀបចំបញ្ជូនសំណុំរឿងទៅកាន់តុលាការខេត្តព្រៃវែង នៅថ្ងៃទី៥ ខែតុលា ដើម្បីចាត់ការតាមនីតិវិធីច្បាប់។
លោក យ៉ុន សុណេត បន្ថែម ៖ «ខ្ញុំឃាត់បានអស់ហើយ និងកំពុងបញ្ជូនសំណុំរឿងទៅកាន់តុលាការ។ ចាប់ពីម្សិលមិញ (៤ តុលា)។ ជនសង្ស័យឈ្មោះ ជូ ស៊្រុន គាត់ជាមន្ត្រីប៉ូលិស»។
រាជរដ្ឋាភិបាលអាណត្តិទី៤ នៃរដ្ឋសភា បានដាក់ចេញនូវគោលនយោបាយភូមិ- ឃុំមានសុវត្ថិភាពចំនួន ៥ចំណុច ឲ្យអាជ្ញាធរមូលដ្ឋានអនុវត្តឲ្យមានប្រសិទ្ធភាព ដើម្បីរក្សាសេចក្ដីសុខជូនពលរដ្ឋ។
គោលនយោបាយទាំងនោះរួមមាន សមត្ថកិច្ចត្រូវទប់ស្កាត់បទល្មើសរំលោភ អំពើហិង្សាក្នុងគ្រួសារ បង្ក្រាបក្មេងទំនើង ឬបងតូចបងធំ បង្ក្រាបល្បែងស៊ីសង និងបង្ក្រាបក្រុមចោរឆក់ប្លន់ជាដើម។
ប៉ុន្តែពលរដ្ឋបានអះអាងថា គោលនយោបាយទាំង ៥ចំណុចរបស់រដ្ឋាភិបាល អាជ្ញាធរថ្នាក់ក្រោមអនុវត្តមិនបានទេ។ ផ្ទុយទៅវិញសមត្ថកិច្ចខ្លួនឯងបានប្រើអាវុធបង្កការភ័យខ្លាច ឬគំរាមកំហែងទៅលើពលរដ្ឋទៅវិញ។ តួយ៉ាងដូចជាករណីប៉ូលិសប៉ុស្តិ៍រដ្ឋបាលឃុំព្រែកចង្ក្រាន ស្រុកស៊ីធរកណ្ដាល ខេត្តព្រៃវែង ឈ្មោះ ជូ ស្រុន ជាឧទាហរណ៍៕
0 comments:
Post a Comment