2011-10-06 ដោយ មណ្ឌលកែវ
នៅឯឃុំកំពង់ពោធិ៍ ស្រុកក្រគរ ខេត្តពោធិ៍សាត់ មានមនុស្ស ៧នាក់បានស្លាប់ និងជាង ៥០នាក់ ត្រូវបានដឹកទៅសង្គ្រោះបន្ទាន់នៅឯមន្ទីរពេទ្យ ដោយការពុលស្រា។
មនុស្សចំនួន ៧នាក់បានស្លាប់ ដោយសារបានហូបស្រាក្នុងពិធីកំដរបុណ្យសពមួយនៅខេត្តពោធិ៍សាត់។ មនុស្សទាំង ៧នាក់នោះ ស្លាប់នៅកន្លែងកើតហេតុចំនួន ៣នាក់ និង ៤នាក់ផ្សេងទៀតស្លាប់នៅពេលដឹកយកមកដល់មន្ទីរពេទ្យ។
លោកគ្រូពេទ្យ ស៊ឹម វណ្ណា នៃបន្ទប់សង្គ្រោះបន្ទាន់នៅមន្ទីរពេទ្យខេត្តពោធិ៍សាត់ បានឲ្យដឹងថា មានប្រជាពលរដ្ឋពុលស្រាចំនួន ៥៤នាក់ ដែលបានដឹកមកធ្វើការសង្គ្រោះបន្ទាន់កាលពីយប់ថ្ងៃទី៥ តុលា។
បុរសឈ្មោះ មុំ ថា អាយុ ២៨ឆ្នាំ ជាប្រជាពលរដ្ឋនៅភូមិមាត់ព្រៃ ឃុំកំពង់ពោធិ៍។ គាត់កំពុងព្យួរសេរ៉ូម ក្នុងមន្ទីរពេទ្យទាំងទឹកមុខស្លេកស្លាំង។ គាត់បានឲ្យដឹងថា គាត់បានញ៉ាំស្រាក្នុងពិធីបុណ្យសពអ្នកភូមិម្នាក់ នៅថ្ងៃទី៤ តុលា តែពុំទាន់មានបញ្ហាអីកើតឡើងទេ។ លុះដល់ថ្ងៃបន្ទាប់ គឺថ្ងៃទី៥ តុលា ក៏មានពិធីបុណ្យសពអ្នកភូមិម្នាក់ទៀត។ គាត់រួមនឹងអ្នកភូមិជាច្រើននាក់ក៏នាំគ្នាជួយកំដរបន្ត និងនាំគ្នាញ៉ាំស្រាដែលម្ចាស់ផ្ទះគេបានទិញមក ក៏ស្រាប់តែមានអ្នកភូមិខ្លះចាប់ផ្ដើមទន់ក។
ដំបូងស្មានតែអ្នកភូមិនោះស្រវឹងធម្មតាទេ គេក៏ទុកឲ្យគាត់ដេក តែដល់ពិនិត្យទៅទើបដឹងថា អ្នកភូមិនោះបានដាច់ខ្យល់ស្លាប់ទៅហើយ។ បន្ទាប់មកក៏មានអ្នកភូមិមួយចំនួនទៀតដួលដេកជាបន្តបន្ទាប់ ទើបអ្នកភូមិផ្សេងទៀតនាំគ្នាផ្អើលឆោឡោឡើងដឹកយកអ្នកស្រវឹងទៅមន្ទីរពេទ្យ ៖ «វាមានអាការៈឈឺក្បាលខ្លាំង ឯមនុស្សចាស់ៗគាត់ទទួលអាការៈងងឹតភ្នែក។ ថ្ងៃភ្លឺចែសគាត់សួរថា តើយប់ហើយមែនទេ?»។
មេឃុំកំពង់ពោធិ៍ គឺលោក ភី ភឿន។ លោកបានឲ្យដឹងនៅយប់ថ្ងៃទី៥ តុលា ថា ប្រជាពលរដ្ឋក្នុងឃុំកំពង់ពោធិ៍ ២នាក់ និងប្រជាពលរដ្ឋក្នុងឃុំអូរសណ្ដាន់ ម្នាក់ បានស្លាប់ភ្លាមនៅនឹងកន្លែងធ្វើបុណ្យ មួយចំនួនទៀតកំពុងត្រូវបានសាច់ញាតិដឹកយកទៅសង្គ្រោះបន្ទាន់នៅឯមន្ទីរពេទ្យបង្អែកខេត្ត ៖ «ដែលដឹកទៅពេទ្យនោះ ខ្ញុំអត់ដឹងថា អស់ប៉ុន្មានទៀតទេ។ តែនៅកន្លែងបុណ្យស្លាប់អស់ ៣នាក់ហើយ។ ២នាក់ក្នុងឃុំខ្ញុំ និងម្នាក់នៅខាងឃុំអូរសណ្ដាន់។ មួយចំនួនបានដឹកទៅពេទ្យពោធិ៍សាត់ហើយ តែមិនដឹងជាសង្គ្រោះបានប៉ុន្មាន ហើយអស់ប៉ុន្មានទៀតទេ»។
នៅវេលាម៉ោង ៨ និង ៣០នាទីយប់ថ្ងៃទី៥ ខែតុលា នៅឯបន្ទប់សង្គ្រោះបន្ទាន់ នៃមន្ទីរពេទ្យបង្អែកខេត្តពោធិ៍សាត់ គេឮតែសំឡេងស្រែកហៅគ្រូពេទ្យឲ្យជួយសង្គ្រោះយ៉ាងទ្រហឹង។ គ្រូពេទ្យជាង ១០រូបបានមមាញឹកក្នុងការជួយសង្គ្រោះ។
អាជ្ញាធរប៉ូលិសបានឲ្យដឹងថា គេកំពុងយកស្រាដែលនៅសល់យកទៅធ្វើការពិសោធន៍នៅឯភ្នំពេញ តែពុំទាន់មានលទ្ធផលនៅឡើយ។
កាលពីខែកុម្ភៈ នៅឯភូមិក្សេត្របូរី នៃស្រុកភ្នំក្រវាញ ប្រជាពលរដ្ឋ ៣នាក់ បានស្លាប់ដោយការពុលស្រា ហើយនៅពាក់កណ្ដាលខែសីហា កន្លងទៅ នៅឯភូមិស្ទឹងថ្មី ឃុំប្រមោយ ស្រុកវាលវែង ខេត្តពោធិ៍សាត់ ក៏មានប្រជាពលរដ្ឋ ៦នាក់បានស្លាប់ និង ២៤នាក់ទៀតត្រូវបានសង្គ្រោះបន្ទាន់ដោយសារការពុលស្រាផងដែរ៕
0 comments:
Post a Comment