ដោយ វោហារ ជាតិ 2011-10-13
ជម្លោះដីដ៏រ៉ាំរ៉ៃមួយរវាងក្រុមហ៊ុនសីលាដាម៉ិច (Seladamex) ជាមួយសហគមន៍ និងប្រជាពលរដ្ឋជាង ១៩១គ្រួសារ នៅឃុំសាយ៉ង់ ស្រុកគូលេន ខេត្តព្រះវិហារ នៅតែបន្តកើតមានមិនអាចដោះស្រាយបាន។សព្វថ្ងៃទំនាស់នេះ បានក្លាយទៅជារឿងចោទប្រកាន់គ្នាទៅវិញទៅមក ដោយភាគីអ្នកភូមិចោទក្រុមហ៊ុនថា ក្រុមហ៊ុនរំលោភយកដីប្រជាពលរដ្ឋ និងដីព្រៃរដ្ឋ រីឯក្រុមហ៊ុនបានចោទអ្នកភូមិវិញថា មានអ្នកញុះញង់នៅពីក្រោយខ្នងឲ្យប្រឆាំងនឹងការអភិវឌ្ឍរបស់ក្រុមហ៊ុន។
អ្នកភូមិជិត ២០០គ្រួសាររស់នៅក្នុងភូមិចំនួន២ នៅតំបន់ទន្លេម្រេច ក្នុងឃុំស្រយ៉ង់ ឃុំស្រយ៉ង់ ស្រុកគូលេន ខេត្តព្រះវិហារ បានតវ៉ាថា ក្រុមហ៊ុនសីលាដាម៉ិច បានរំលោភយកដីពួកគាត់ជាង ១.៦០០ហិកតារ ក្នុងពេលដែលក្រុមហ៊ុនបានឈូសឆាយដីព្រំប្រទល់ក្រុមហ៊ុន នៅចុងខែកញ្ញា និង ដើមខែតុលា ឆ្នាំ២០១១។
លោកស្រី មាស រ៉េន ម្ចាស់ដើមបណ្ដឹងតំណាងឲ្យអ្នកភូមិ ១៩១គ្រួសារ ដែលបានប្ដឹងមកអង្គការសិទ្ធិមនុស្ស អាដហុក (Adhoc) ពីរឿងទំនាស់ដីនេះ បានចោទថា ក្រុមហ៊ុននៅតែឈូសឆាយដីស្រែចម្ការអ្នកភូមិ បើទោះបីជាលោកស្រីដាក់ពាក្យបណ្ដឹងមកអង្គការអាដហុក និងអាជ្ញាធរខេត្តព្រះវិហារ ឲ្យដោះស្រាយទំនាស់នេះយ៉ាងណាក្ដី។ លោកស្រីថា ក្រុមហ៊ុនធ្វើដូច្នេះជាការរំលោភច្បាប់ ព្រោះថា ទំនាស់នេះកំពុងដោះស្រាយ ក្រុមហ៊ុនគួររង់ចាំការដោះស្រាយហើយសិនចាំឈូសឆាយ ទើបយុត្តិធម៌។
ដូចក្នុងពាក្យបណ្ដឹងចុះថ្ងៃទី១៩ កញ្ញា ដែលលោកស្រីបានចោទក្រុមអាជ្ញាធរភូមិ និងឃុំថា បានចូលដៃជាមួយក្រុមហ៊ុន ហើយក្បត់ប្រជាពលរដ្ឋឯង ហើយមិនត្រឹមតែប៉ុណ្ណោះ លោកស្រីចោទថា អាជ្ញាធរបានគំរាមប្រជាពលរដ្ឋកុំឲ្យហើបមាត់តវ៉ាទៀត។
លោក ហោ នាថ មន្ត្រីសម្របសម្រួលអង្គការអាដហុក ប្រចាំខេត្តព្រះវិហារ បញ្ជាក់ថា ក្រុមហ៊ុន សីលាដាម៉ិច បានឈូសឆាយដីស្រែចម្ការអ្នកភូមិដូចបណ្ដឹងនេះមែន ហើយលោកបានអំពាវនាវឲ្យមានគណៈកម្មការមួយឯករាជ្យដោះស្រាយទំនាស់នេះឲ្យបានឆាប់ ដើម្បីឲ្យអ្នកភូមិបានបង្កបង្កើនផលទាន់ពេលវេលា។
ក្រៅពីប្ដឹងក្រុមហ៊ុន បណ្ដឹងអ្នកភូមិដែលមានស្នាមមេដៃនោះ បានប្ដឹងចោទលោក តាត់ ស៊ី មេឃុំស្រយ៉ង់ ជំទប់ឃុំ ឈ្មោះ ក្រូច ឡាម និងមន្ត្រីភូមិម្នាក់ទៀត។ ក៏ប៉ុន្តែលោក ក្រូច ឡាម បានបដិសេធ។
ចំណែកលោកមេឃុំ តាត់ ស៊ី ដែលអ្នកភូមិចោទថា បានចូលដៃជាមួយក្រុមហ៊ុនលក់ដីអ្នកភូមិនោះ បានបញ្ជាក់ថា អាជ្ញាធរមូលដ្ឋាន ព្រមទាំងប៉ូលិស មិនបានគំរាមអ្នកភូមិទេ តែផ្ទុយទៅវិញលោកកំពុងប្រឹងប្រែងជួយប្រជាជនដោះស្រាយជម្លោះនេះឲ្យបានឆាប់។
ជម្លោះដីនេះបានកើតឡើងតាំងពីឆ្នាំ២០១០ មកម្ល៉េះ។ ក្រុមអ្នកភូមិបានប្ដឹងដល់លោកនាយករដ្ឋមន្ត្រី ហ៊ុន សែន ម្ដងរួចមកហើយ ហើយលោកនាយករដ្ឋមន្ត្រីបានចារមកឲ្យអាជ្ញាធរខេត្តដោះស្រាយ។
លោក ហោ នាថ មន្ត្រីអង្គការអាដហុក ប្រចាំខេត្តព្រះវិហារ បានបង្ហាញឯកសារថា ក្រុមហ៊ុនសីលាដាម៉ិច បានទទួលដីសម្បទានទំហំ ៩.០០០ហិកតារពីរដ្ឋាភិបាលដើម្បីដាំកៅស៊ូ និងកប្បាសនៅតំបន់នោះ តែលោកថា ក្រុមហ៊ុនមិនត្រឹមតែប៉ះពាល់ដីអ្នកភូមិទេ ថែមទាំងប៉ះពាល់ដីព្រៃសហគមន៍ ដែលមានក្បាលដី ៦០០ម៉ែត្រ បណ្ដោយ ៦.០០០ម៉ែត្រទៀតផង។
ទាក់ទងបណ្ដឹងនេះ លោក អ៊ី រតនៈ តំណាងក្រុមហ៊ុន សីលាដាម៉ិច បានទទួលស្គាល់ថា ក្រុមហ៊ុនបានឈូសឆាយប៉ះពាល់ដីអ្នកភូមិខ្លះមែន តែលោកថា មិនមែនប៉ះច្រើនដូចពាក្យចោទប្រកាន់ទេ។ម្យ៉ាងវិញទៀត លោកថា ក្រុមហ៊ុនមានគម្រោងប្រមូលផ្ដុំអ្នកភូមិដែលកំពុងរស់នៅរកេតរកូតដាច់ដោយឡែកពីគ្នាឲ្យនៅមួយកន្លែង ហើយក្រុមហ៊ុននឹងជួយអភិវឌ្ឍភូមិឲ្យមានផ្លូវថ្នល់ ប្រឡាយទឹក សាលារៀន និងមន្ទីរពេទ្យ តែអ្នកខ្លះព្រមទទួល និងមានខ្លះម្ដងថាព្រមម្ដងជំទាស់។
លោកបន្ថែមថា ចំពោះដីដែលឈូសប៉ះដីអ្នកភូមិក្រុមហ៊ុនសុខចិត្តសងវិញ។
យ៉ាងណាក្ដី មន្ត្រីសិទ្ធិមនុស្សអាដហុក លោក ហោ នាថ អះអាងថា ទំនាស់នេះនៅមិនទាន់បានដោះស្រាយបានភ្លាមៗនៅឡើយទេ បើទោះបីជាកន្លងមកមានចំណារអន្តរាគមន៍ពីលោកនាយករដ្ឋមន្ត្រី ហ៊ុន សែន បញ្ជាឲ្យអាជ្ញាធរខេត្តដោះស្រាយជម្លោះនេះយ៉ាងណាក្ដី៕
0 comments:
Post a Comment