Print 
PDFដោយ ហង្ស សាវយុធ
2011-10-09
អង្គការសិទ្ធិមនុស្សក្នុងខេត្តឧត្តរមានជ័យ ដែលជាខេត្តជាប់ព្រំដែនខ្មែរ-ថៃ បានអំពាវនាវដល់មេបញ្ជាការជាន់ខ្ពស់នៃកងយោធពលខេមរៈភូមិន្ទ សុំឱ្យរឹតបន្តឹងទៅលើការប្រើប្រាស់អាវុធ។
អ្នកកាសែតក្នុងស្រុកពីររូប បានអះអាងថា គេបានដាក់ពាក្យបណ្ដឹងទៅកាន់តុលាការខេត្តឧត្តរមានជ័យ ប្រឆាំងចំពោះពលទាហានម្នាក់ ដែលបានប្រើអាវុធភ្ជង់គំរាម និងប្រមាថដល់អាយុជីវិតពួកគេផង កាលពីពេលថ្មីៗ។
លោក ប៉ាត សុខរាជ ជាភ្នាក់ងារព័ត៌មានចល័តរបស់អង្គភាពកាសែតតាព្រហ្ម។ លោកបានមានប្រសាសន៍ថា ទាហានម្នាក់ឈ្មោះ ប៉ូឡូ នៅក្នុងវរលេខ៦១ ចំណុះឱ្យកងពលលេខ៦ ដែលមានមូលដ្ឋាននៅស្រុកត្រពាំង បានយកកាំភ្លើងម៉ាក AK47 ស្វ័យបត់មកភ្ជង់គំរាមប្រមាថដល់ជីវិតរបស់លោក និងបុរសម្នាក់ទៀតឈ្មោះ រដ្ឋ ផល្លា ជាភ្នាក់ងារកាសែតតាព្រហ្មប្រចាំខេត្តឧត្តរមានជ័យ ៖ "ល្ងាចថ្ងៃទី៦ (ខែតុលា) វេលាម៉ោង ៦និង៣៩នាទី នៅតំបន់ផ្លូវយុទ្ធសាស្ត្រព្រំប្រទល់ស្រុកអន្លង់វែង និងត្រពាំងប្រាសាទ។ ខ្ញុំថតគោយន្តដឹកគ្រញូងចេញពីច្រកកងពល ខ្ញុំថតទៅទាហាននោះទាញកាំភ្លើងចេញពីកន្លែងកុងត្រូលមករកគំរាមបាញ់សម្លាប់ខ្ញុំ។ ខ្ញុំលើកដៃសំពះលោកគេថាកុំបាញ់កុំអី ចាំខ្ញុំលុបរូបភាពចោល"។
លោក ប៉ាត សុខរាជ បានឱ្យដឹងទៀតថា ចាប់តាំងពីថ្ងៃទី៦ ខែតុលា មក លោកបានដាក់ពាក្យបណ្ដឹងជាច្រើនច្បាប់ប្រឆាំងអំពើនេះ ទៅកាន់អធិការដ្ឋាននគរបាល និងទីបញ្ជាការដ្ឋានកងរាជអាវុធហត្ថស្រុកអន្លង់វែង និងបានដាក់ទៅកាន់តុលាការខេត្តឧត្តរមានជ័យ។
លោក កូយ កាន់យ៉ា ជាព្រះរាជអាជ្ញាអមសាលាដំបូងខេត្តឧត្តរមានជ័យ។ លោកបានមានប្រសាសន៍ថា លោកបានទទួលបណ្ដឹងស្ដីពីករណីទាហានប្រើអាវុធសម្លុតគំរាមលើអ្នកកាសែតទាំង២នាក់នោះហើយ។
មន្ត្រីតុលាការដដែលបានមានប្រសាសន៍ថា លោកនឹងចាត់ការទៅតាមនីតិវិធីច្បាប់ចំពោះករណីនោះឱ្យបានឆាប់ៗ ព្រមទាំងធ្វើការស្រាវជ្រាវរកសាវតារទាហានម្នាក់នោះឱ្យបានប្រាកដផង។
ចំណែកលោកស្រី ណារេន អ្នកសម្របសម្រួលរបស់សមាគមការពារសិទ្ធិមនុស្សអាដហុក (ADHOC) ប្រចាំខេត្តឧត្តរមានជ័យ បានមានប្រសាសន៍ថា លោកមានការព្រួយបារម្ភចំពោះអំពើគំរាមកំហែងដោយអាវុធ ដែលចេះតែកើតមានខ្លះៗ នៅតាមតំបន់ព្រំដែនកន្លងទៅថ្មីៗ ៖ "ពេលមានសភាពការណ៍ព្រំដែន ការប្រើប្រាស់អាវុធឃើញមានការប្រសើរឡើង ក៏ប៉ុន្តែក្រោយពេលដែលយើងចប់សមរភូមិ មើលទៅឃើញថាទាហានមួយចំនួន
មានការប្រើប្រាស់នូវអាវុធហាក់បីដូចជាមិនប្រើទៅតាមច្បាប់ ព្រោះការបាញ់គំរាមអីហ្នឹងនៅមានច្រើន"។សមាគមការពារសិទ្ធិមនុស្សអាដហុកបានឱ្យដឹងថា ចាប់តាំងពីអំឡុងដើមខែកញ្ញា រហូតមកដល់ដើមខែតុលានេះ គេបានទទួលព័ត៌មានពីក្រុងសំរោង ពីស្រុកអន្លង់វែង និងស្រុកត្រពាំងប្រាសាទ នៃខេត្តឧត្តរមានជ័យ ស្ដីពីករណីទាហានខ្លះប្រើអាវុធបាញ់គំរាមទៅលើប្រជាពលរដ្ឋមានចំនួន ៤ករណីហើយ៕
0 comments:
Post a Comment