ភ្នំពេញៈ តុលាការរាជធានីភ្នំពេញ នៅថ្ងៃនេះបានបើកសវនាការកាត់ទោសបុរស ៦នាក់ ក្រោមការចោទប្រកាន់ពីបទបង្កើតចលនាកម្លាំងប្រដាប់អាវុធខុសច្បាប់ ដែលមានឈ្មោះថា «ចលនាកងទ័ពសុវណ្ណភូមិ» នៅកម្ពុជា។
លោក ឌុច គឹមសន ប្រធានចៅក្រមក្រុមប្រឹក្សាជំនុំជម្រះ បានថ្លែងថា ជា សារ៉ាន់ អាយុ ៤៩ឆ្នាំ អតីតសមាជិកគណបក្ស សម រង្ស៊ី, លីវ សុខសុវណ្ណ អាយុ ៤៩ឆ្នាំ អតីតសមាជិកគណបក្ស សម រង្ស៊ី, ជុំ វិស័យ ហៅ គ្រូជ័យ កម្មកររ៉ែ, ផ្លត វី អាយុ ៦២ឆ្នាំ គ្រូឱសថបុរាណ, យ៉ម ហេវ អាយុ ៤១ឆ្នាំ កសិករ និងឈ្មោះ ពោត ផន អាយុ ៤៦ឆ្នាំ កសិករ ត្រូវបានចោទប្រកាន់កាលពីថ្ងៃទី០៤ ខែមេសា ឆ្នាំ២០១១ ពីបទបង្កើតចលនាកងកម្លាំងប្រដាប់អាវុធខុសច្បាប់នៅកម្ពុជា។
លោកបន្ថែមថា បុរសទាំង ៦នាក់នេះ ត្រូវបានកម្លាំងកងរាជអាវុធហត្ថចាប់ខ្លួនកាលពីថ្ងៃទី៣១ ខែមីនា ឆ្នាំ២០១១ នៅភោជនីយដ្ឋានសេវិនប្រាយ ស្ថិតនៅខណ្ឌទួលគោក នៅពេលអ្នកទាំងនោះកំពុងជួបប្រជុំគ្នានិយាយអំពីចលនាកម្លាំងប្រដាប់អាវុធខុសច្បាប់ និងការជ្រើសរើសកម្លាំងប្រដាប់អាវុធខុសច្បាប់សម្រាប់ចលនារបស់ពួកគេ។
0 comments:
Post a Comment