Print 
PDFដោយ ខែ សុណង
2011-09-22
អាជ្ញាធរសវនកម្មជាតិ នៅថ្ងៃទី២២ ខែកញ្ញា បានបង្ហាញរបាយការណ៍សវនកម្មលើការគ្រប់គ្រងហិរញ្ញវត្ថុសាធារណៈឆ្នាំ ២០០៧ ឬការចំណាយថវិការបស់ក្រសួងស្ថាប័នរដ្ឋ។
ការផ្សព្វផ្សាយរបាយការណ៍សវនកម្មនេះ គឺគេមានគោលបំណងរួមចំណែកជួយដល់ស្ថាប័ននីតិប្បញ្ញត្តិ និងនីតិប្រតិបត្តិ ដើម្បីពង្រឹងការគ្រប់គ្រងហិរញ្ញវត្ថុសាធារណៈ។ ក៏ប៉ុន្តែមន្ត្រីបក្សប្រឆាំងបានរិះគន់ថា អាជ្ញាធរសវនកម្មជាតិ ពុំមានភាពឯករាជ្យនោះទេ។
អាជ្ញាធរសវនកម្មជាតិនិងលើកយកចំណុចខ្វះខាតទាក់ទងទៅនិងការចំណាយថវិការបស់ក្រសួង ស្ថាប័នពាក់ព័ន្ធ ដាក់ជូនទៅរដ្ឋសភា ព្រឹទ្ធសភា ដើម្បីឲ្យមានការគ្រប់គ្រងហិរញ្ញវត្ថុសាធារណៈរបស់រដ្ឋកាន់តែប្រសើរ។
ថ្លែងនៅក្នុងសន្និសីទសារព័ត៌មានស្ដីពីការផ្សព្វផ្សាយរបាយការណ៍សវនកម្មលើការគ្រប់គ្រងហិរញ្ញវត្ថុ ឆ្នាំ២០០៧ នៅរាជធានីភ្នំពេញ ថ្ងៃទី ២២ កញ្ញា លោក អ៊ុត ឈន អគ្គសវនករនៃអាជ្ញាធរសវនកម្មជាតិ បានបង្ហាញថា ស្ថាប័ននេះ នឹងលើកអនុសាសន៍កែលំអនូវរាល់ចំណុចខ្វះខាតនានា របស់ក្រសួងស្ថាប័ន ដែលបានចំណាយថវិកាមិនត្រឹមត្រូវ និងមានភាពមិនប្រក្រតីមួយចំនួន ផ្ញើជូនទៅរដ្ឋសភា ព្រឹទ្ធសភា និងរដ្ឋាភិបាល។ការធ្វើដូច្នេះ ដើម្បីឲ្យការគ្រប់គ្រងហិរញ្ញវត្ថុសាធារណៈរបស់រដ្ឋកាន់តែមានភាពប្រសើរជាងមុន។
លោក អ៊ុត ឈន៖ «ទាល់តែខ្ញុំចាត់ទុកថា ការងារនេះមិនប្រក្រតី ហើយនិយាយមិនបាន អាហ្នឹងខ្ញុំនឹងបញ្ជូនទៅអង្គភាពណាមួយ ដែលខ្ញុំចង់បញ្ជូន ដើម្បីឲ្យគេចាត់ការ។ មិនមែនចាំតែអង្គភាពប្រឆាំងអំពើពុករលួយ ឬក៏ចាំតែទៅតុលាការទេ គឺខ្ញុំត្រូវតែចាត់វិធានការទៅតាមច្បាប់ដែលមាន»។
លោក អ៊ុត ឈន បន្តថា លទ្ធផលនៃការធ្វើសវនកម្មបានបង្ហាញថា នៅមានកម្រិតនៅឡើយនោះ ដូចជា ការត្រួតពិនិត្យលើឯកសារទំនិញនាំចូលគ្មានលក្ខណៈពាណិជ្ជកម្មប្រព្រឹត្តទៅដោយពុំទាន់ពេញលេញ និងច្បាស់លាស់។ វិក្កយបត្រ និងបញ្ជីវេចខ្ចប់ទំនិញនាំចូលមួយចំនួនពុំអាចបញ្ជាក់បាននូវថ្លៃទំនិញនាំចូលជាក់ស្ដែង។ការគ្រប់គ្រងប្រមូលចំណូលពីសម្បទានរ៉ែនៅមានកម្រិត ដោយខ្វះវិធានការច្បាប់ ចំពោះក្រុមហ៊ុន ឬអាជីវករដែលមិនបានអនុតាមច្បាប់ និងការដកចំណូលយកទៅចំណាយពុំមានកត់ត្រាចូលក្នុងថវិកាជាដើម។
ទាក់ទងបញ្ហានេះ អ្នកតំណាងរាស្ត្រមណ្ឌលភ្នំពេញនៃគណបក្សសម រង្ស៊ី លោក សុន ឆ័យ បានរិះគន់ថា សវនកម្មនេះពុំបានផ្ដល់ផលប្រយោជន៍អ្វីជាដុំកំភួនដល់ប្រជាពលរដ្ឋទូទៅនោះទេ។លោកបញ្ជាក់ថា អាជ្ញាធរសវនកម្មនេះពុំមានភាពឯករាជ្យ និងបង្កើតឡើងសម្រាប់ជួយបិទបាំងការចាយវាយមិនត្រឹមត្រូវរបស់រដ្ឋាភិបាលទៅវិញ។
លោក សុន ឆ័យ៖ «របាយការណ៍ហ្នឹងមិនដឹងជាគាត់ធ្វើយ៉ាងម៉េចទេ គឺថា មកអត់ដែលទាន់ទេ។ ដូចយើងត្រូវការអនុម័តនូវការចំណាយរបស់រដ្ឋាភិបាលឆ្នាំមុនៗ នោះ ឡើងវិញអ៊ីចឹង គាត់អត់មានរបាយការណ៍ឲ្យមកយើងទេ។ ការចំណាយ ឬការរកចំណូលជូនរដ្ឋនោះមិនត្រឹមត្រូវ គឺនាំឲ្យយើងបាត់លុយច្រើនណាស់។ ខាងពន្ធដារ ខាងពន្ធគយ ជួលអចលនទ្រព្យរបស់រដ្ឋអីជាដើមនោះ វាបាត់ចំណូលមួយហើយ។ ដល់ការចាយនោះទៀត បំប៉ោងលួចចាយខុសគោលការណ៍។ ក្រសួងខ្លះទិញកុំព្យូទ័រមួយគ្រឿងតម្លៃ ៦ ពាន់ដុល្លារ»។
នេះជាលើកទី២ហើយដែលអាជ្ញាធរសវនកម្មជាតិបានបង្ហាញរបាយការណ៍សវនកម្មផ្សព្វផ្សាយជាសាធារណៈ បន្ទាប់ពីការផ្សព្វផ្សាយរបាយការណ៍សវនកម្មឆ្នាំ២០០៦។ ច្បាប់ស្ដីពីសវនកម្មត្រូវបានប្រកាសឲ្យប្រើប្រាស់កាលពីថ្ងៃទី៣ ខែមីនា ឆ្នាំ២០០០៕
0 comments:
Post a Comment