Print 
PDF
មេធាវីដើមបណ្តឹងបាននិយាយកាលពីថ្ងៃម្សិលមិញថា សំណុំរឿងក្លែងឯកសារលួចកាន់កាប់ដីចំនួន៥ហិកតានៅសង្កាត់កាកាបដោយក្មួយស្រីនាយករដ្ឋមន្រ្តី ហ៊ុន សែន កំពុងជាប់គាំងនៅសាលាដំបូងក្រុងភ្នំពេញ។
លោក កៅ ទី បានបន្តថា មូលហេតុដែលតុលាការមិនហ៊ានធ្វើសេចក្តីសម្រេចប្រឆាំងពួកគេ ព្រោះថា តុលាការភ័យខ្លាច ដោយសាររឿងក្តីនេះពាក់ព័ន្ធនឹងសាច់ញាតិរបស់នាយករដ្ឋមន្រ្តី។
លោក កៅ ទី មេធាវីអ្នកស្រី ហួត សារុំ អាយុ៦៨ឆ្នាំ ដែលដីរបស់គាត់ត្រូវបានកាន់កាប់ដោយអ្នកស្រី ឌី ព្រឹម ក្មួយស្រីនាយករដ្ឋមន្រ្តី ហ៊ុន សែន តាមរយៈការក្លែងឯកសារដោយលោក សេង យាន អតីតអគ្គនាយក នៃនាយកដ្ឋានអធិការកិច្ច របស់ក្រសួងទំនាក់ទំនងព្រឹទ្ធសភា រដ្ឋសភា បាននិយាយថា រហូតមកដល់ពេលនេះ មានរយៈពេល២ឆ្នាំហើយ ដែលរឿងក្តីបានដាក់នៅសាលាដំបូងក្រុងភ្នំពេញ ប៉ុន្តែតុលាការមិនបានជំនុំជម្រះ ឬសម្រេចសេចក្តីប្រឆាំងនឹងជនសង្ស័យទាំងពីរនាក់ឡើយ។
កាលពីឆ្នាំ២០០៩ តុលាការបានធ្វើការចោទប្រកាន់អ្នកស្រី ឌី ព្រឹម និងលោក សេង យាន ពីបទទទួលសំណូកពាក់ព័ន្ធនឹងការផ្តល់ និងទទួលប្រាក់សំណូក២០ម៉ឺនដុល្លារ ដើម្បីចេញសេចក្តីប្រកាសក្លែងក្លាយរបស់ទីស្តីការគណៈរដ្ឋមន្រ្តី ក្នុងការកាន់កាប់ដីជាង៥ហិកតា របស់អ្នកស្រី ហួត សារុំ នៅក្នុងភូមិកាកាប សង្កាត់កាកាប ខណ្ឌដង្កោ ក្រុងភ្នំពេញ៕
