Print 
PDF2011-09-28 ដោយ មណ្ឌល កែវ
គ្រាប់បែកដៃមួយគ្រាប់បានផ្ទុះឡើងនៅរាត្រីថ្ងៃភ្ជុំបិណ្ឌនៅឯផ្ទះមន្ត្រីថ្នាក់ខេត្តម្នាក់នៃខេត្តកំពង់ឆ្នាំង។យ៉ាងហោចណាស់ក៏មានមនុស្សម្នាក់បានស្លាប់ភ្លាមនៅនឹងកន្លែងឯមនុស្ស ៥នាក់ផ្សេងទៀត បានរងរបួសធ្ងន់ដោយជនល្មើសបានគប់គ្រាប់បែកដៃចូលក្នុងរបងផ្ទះ។
ប្រធានការិយាល័យនគរបាលព្រហ្មទណ្ឌកម្រិតធ្ងន់ខេត្តកំពង់ឆ្នាំង គឺលោក ជឹម ប៊ុនធឿន។ លោកបានឲ្យដឹងនៅព្រឹកថ្ងៃទី២៨ កញ្ញា ថានៅវេលាម៉ោងប្រមាណ ៨យប់ ថ្ងៃទី២៧ កញ្ញា ដែលជាថ្ងៃភ្ជុំបិណ្ឌ មានជនមិនស្គាល់អត្តសញ្ញាណបានគប់គ្រាប់បែកមួយគ្រាប់ចូលក្នុងរបងផ្ទះប្រធានមន្ទីរសង្គមកិច្ច អតីតយុទ្ធជន និងយុវៈនីតិសម្បទាខេត្តកំពង់ឆ្នាំង គឺលោក ចូ វណ្ណា បណ្ដាលឲ្យលោករងរបួសជាទម្ងន់។ ភរិយា និងសាច់ញាតិរបស់លោក ៣នាក់ រងរបួសធ្ងន់ និងម្នាក់ទៀតបានស្លាប់នៅនឹងកន្លែង ៖ «ឥឡូវយើងកំពុងប្រមូលព័ត៌មាន។ យើងមិនទាន់អាចនិយាយអីកើតទេ ព្រោះបើនិយាយច្រើនវានឹងបែកការណ៍។ តែយើងអាចកំណត់បានត្រឹមថា នេះជាបញ្ហាគំនុំផ្ទៃក្នុងរបស់គាត់...»។
លោក ពេញ វិបុល ជាព្រះរាជអាជ្ញាអមសាលាដំបូងខេត្តកំពង់ឆ្នាំង។ លោកបានទៅដល់ទីកើតហេតុភ្លាម បន្ទាប់ពីបានឮស្នូរគ្រាប់ផ្ទុះ បានមានប្រសាសន៍ថា ទិដ្ឋភាពដំបូងដែលលោកបានឃើញនោះ គឺមានមនុស្សជាច្រើននាក់ដេករនូតរណែលក្នុងថ្លុកឈាមដែលក្នុងនោះមានស្ត្រីម្នាក់ និងកុមារម្នាក់ផង។ លោកថាពិនិត្យលើតឹកតាងបញ្ជាក់ថា គ្រួសារនេះកំពុងជួបជុំគ្នាក្នុងពិធីបរិភោគអាហារមួយនៅក្នុងទីធ្លាខាងមុខផ្ទះ ដែលមានចម្ងាយពីផ្លូវប្រមាណ ១៥ម៉ែត្រ។ ជនល្មើសបានគប់គ្រាប់បែកពីក្រៅរបងចូលមកចំតុអាហារ ៖ «យើមិនទាន់អាចកំណត់មុខសញ្ញាបានទេ ព្រោះវាជាពេលយប់ ហើយចំពេលដែលគ្រួសារនេះកំពុងបរិភោគអាហារ។ តែបើតាមការពិនិត្យរបស់ខ្ញុំ យើងអាចសន្មតថា អ្នកគប់គ្រាប់នេះមានជំនាញខាងប្រើគ្រាប់បែក...»។
មន្ត្រីសាលាខេត្តកំពង់ឆ្នាំងដែលសុំមិនបញ្ចេញឈ្មោះបានឲ្យដឹងថា អំពើហិង្សានេះកើតចេញពីគំនុំ។ មន្ត្រីរូបនេះបានឲ្យដឹងទៀតថា មុនកើតហេតុប៉ុន្មានថ្ងៃ មានជនម្នាក់បានសរសេរសំបុត្រអនាមិកមួយច្បាប់ផ្ញើឲ្យលោក ចូ វណ្ណា ប្រធានមន្ទីរសង្គមកិច្ច អតីតយុទ្ធជន និងយុវៈនីតិសម្បទាខេត្តកំពង់ឆ្នាំង ដោយរៀបរាប់ពីកំហឹងឈឺចាប់ដែលលោក ចូ វណ្ណា បានប្រព្រឹត្តចំពោះខ្លួន។
លោក ចូ វណ្ណា ត្រូវបានសាច់ញាតិដឹកទៅសង្គ្រោះបន្ទាន់នៅឯមន្ទីរពេទ្យកាល់ម៉ែត្រ នាទីក្រុងភ្នំពេញ វេលាម៉ោង១០ និង៣០នាទីយប់ ថ្ងៃដដែល បន្ទាប់ពីបានចូលសង្គ្រោះបឋមនៅមន្ទីរពេទ្យបង្អែកខេត្តរួចមក។ ប៉ូលិសបានឲ្យដឹងថា គេកំណត់បានមុខសញ្ញាខ្លះៗ រួចហើយ ក្នុងករណីអំពើហិង្សាដោយការគប់គ្រាប់បែកនេះ៕
0 comments:
Post a Comment