Print 
PDFពលរដ្ឋសហគមន៍បឹងកក់ប្រមាណជិត៣០នាក់ តំណាងឲ្យ៤៧គ្រួសារ មកពី៣ភូមិនៅព្រឹកថ្ងៃព្រហស្បតិ៍ទី១កញ្ញានេះ បានស្វែងរកអន្តរាគមន៍ពីនាយករដ្ឋមន្ត្រី ដោយចោទថា អាជ្ញាធរបានប្រព្រឹត្តអំពើពុករលួយលើគម្រោងបែងចែក ដីធ្លីដែលត្រូវបានសម្រេចផ្ដល់ឲ្យដោយរដ្ឋាភិបាលកាលពីថ្ងៃទី១១ខែសីហា កន្លងទៅ ។
អ្នកភូមិបឹងកកដែលស្វែងរកអន្តរាគមន៏ពីហ៊ុនសែនព្រឹកមិញ
អ្នកស្រី ទេព វណ្ណី តំណាងអ្នកភូមិបាននិយាយនៅក្រោមដើមពោធិ៍មុខវត្តបទុម ទីដែលអ្នកភូមិផ្ដុំគ្នាដើម្បីធ្វើការតវ៉ានោះថា ដោយសារអំពើពុករលួយ ខ្វះសេចក្ដីស្មោះត្រង់របស់អាជ្ញាធរ បាននាំឲ្យមានការកាត់ពួកគាត់ចេញពីគម្រោង បែងចែកដីធ្លីទំហំ១២,៤៤ហិកតារ ។ ដោយលើកឡើងថា ” អាជ្ញាធរត្រូវតែប្រាប់ឲ្យច្បាស់ថា ហេតុអីបានជាកាត់ពួកខ្ញុំចេញពីគម្រោងបែងចែកដី សម្រាប់ការអភិវឌ្ឍន៍លំនៅដ្ឋាននៅនឹងកន្លែង “។
ជាអ្វីដែលគេបានគិតថា ដោយសារការប្រឹងប្រែងរបស់អ្នកភូមិរួមផ្សំការដាក់សម្ពាធពីស្ថាប័នម្ចាស់ជំនួយនោះបានជំរុញឲ្យរដ្ឋាភិបាលខ្មែរ កាត់ចំណែកដី១២,៤៤ហិកតារ ពីផ្ទៃដី១៣៣ហិកតារ នៃតំបន់បឹងកក់ ដែលទទួលបានសិទ្ធិវិនិយោគដោយក្រុមហ៊ុនស៊ូកាគូអ៊ីនរបស់ព្រឹទ្ធសមាជិកពីបក្សប្រជាជន ឡាវ ម៉េងឃីន មក
ឲ្យប្រជាពលរដ្ឋជាម្ចាស់ដី សម្រាប់សាងសង់លំនៅដ្ឋាននៅនឹងកន្លែងតាមរយៈអនុក្រឹត្យមួយ កាលពីថ្ងៃទី១១ សីហា ។ ប៉ុន្តែប្រជាពលរដ្ឋបានឲ្យដឹងថា ពួកគាត់៤៧គ្រួសារ ពុំទទួលបានសិទ្ធិក្នុងការទទួលបានចំណែកដីឡើយ ។អ្នកស្រី ទេព វណ្ណី បាននិយាយថា ពួកគាត់ទាំង៤៧គ្រួសារ គឺស្ថិតនៅក្នុងចំណោមគ្រួសារ៧៩៤ គ្រួសារដែលមានសិទ្ធិ ទទួលបានចំណែកដី ។ ដោយចោទថា ចុះហេតុអី បានជាពួកគាត់ត្រូវបានកាត់ចេញពីគម្រោង។ដោយអ្នកស្រីបាននិយាយថា នឹងធ្វើការតស៊ូឲ្យដល់ទីបញ្ចប់រហូតបានទទួលជោគជ័យ ៕
