Print 
PDF |
| Add caption |
ភាពអនាធិបតេយ្យនៃការធ្វើអាជីវកម្មរ៉ែមាសខុសច្បាប់នៅខេត្តព្រះវិហារ កំពុងកើតឡើងយ៉ាងពេញបន្ទុក ប៉ុន្តែមិនឃើញអាជ្ញាធរខេត្ត និងមន្ទីរពាក់ព័ន្ធចាត់វិធានការទប់ស្កាត់តាមច្បាប់នោះទេ ហើយទុកឱ្យបទល្មើសកើតឡើងកាន់តែខ្លាំងក្លាថែមទៀត។ តាមសេចក្តីរាយការណ៍ពីប្រជាពលរដ្ឋនិងមន្ត្រីអង្គការក្រៅរដ្ឋាភិបាលក្នុងខេត្តព្រះវិហារបានឱ្យដឹងថា ធនធានរ៉ែមាសជាច្រើនកន្លែងនៅក្នុងស្រុករវៀង ខេត្តព្រះវិហារ បានទទួលរងនូវការជីកកកាយធ្វើអាជីវកម្មខុសច្បាប់ស្ទើររលត់រលាយ ហើយអ្នកប្រព្រឹត្តគឺក្រុមហ៊ុនចិននិងជនជាតិយួនដែលអាងអ្នកមានអំណាច ធ្វើជាខ្នងបង្អែក។ លោក អ៊ុំ ម៉ារ៉ា អភិបាលខេត្តព្រះវិហារ មិនបានចាត់វិធានការទប់ស្កាត់បទល្មើសបំផ្លាញរ៉ែមាសយ៉ាងពេញបន្ទុកនោះទេ ចំណែកប្រធានមន្ទីរឧស្សាហកម្មរ៉ែ និងថាមពលខេត្តព្រះវិហារឈ្មោះ គង់ មករា បែរជាប្រឹងដោះសាយករួចខ្លួនដោយពុំមានសេចក្តីអៀនខ្មាស។
តាមសេចក្តីរាយការណ៍ពីមន្ត្រីអង្គការក្រៅរដ្ឋាភិបាលក្នុងខេត្តព្រះវិហារ បានអះអាងថានៅពេលដែលរដ្ឋាភិបាលអាណត្តិទី៤ ជិតផុតអាណត្តិគឺសកម្មភាពនៃការធ្វើអាជីវកម្មរ៉ែមាសខុសច្បាប់ក្នុងខេត្តព្រះវិហារ មានសភាពកាន់តែខ្លាំងក្លា។ ប្រជាពលរដ្ឋរស់នៅឃុំរមណីយ ស្រុករវៀង បានបញ្ជាក់ថាការជីកដីលុងថ្មភ្នំ ដើម្បីយករ៉ែមាសនៅក្រោមដី ដោយប្រើម៉ាស៊ីនកំពុងកើតឡើងជាច្រើនកន្លែងអស់រយៈពេលច្រើនខែមកហើយក្នុងភូមិសាស្ត្រនៃឃុំរមទម្យ។ ប្រជាពលរដ្ឋបានឱ្យដឹងទៀតថាទោះបីក្រុមហ៊ុនចិន និងជនជាតិយួនធ្វើសកម្មភាពជីករូងក្រោមដីលុងយករ៉ែមាសជាច្រើនកន្លែង ក៏ដោយ ក៏មិនទាន់ឃើញអាជ្ញាធរខេត្ត និងប្រធានមន្ទីរឧស្សាហកម្មរ៉ែ និងថាមពលខេត្តព្រះវិហារគិតគូរចាត់វិធានការទប់ស្កាត់ឱ្យបានទាន់ពេលឡើយ។ ប្រជាពលរដ្ឋរស់នៅក្នុងភូមិភ្នំដែក ឃុំរមណីយ ស្រុករវៀង ជាច្រើននាក់បានអះអាងកាលពីថ្ងៃទី៣១ ខែសីហា ឆ្នាំ២០១៣ថា ជនជាតិយួនមួយចំនួនបាននាំគ្នាចូលទៅធ្វើសកម្មភាពជីករូងក្រោមដីដើម្បីលុងយករ៉ែមាសតាមអំពើចិត្ត។ បច្ចុប្បន្ននេះជនជាតិយួនទាំងនោះកំពុងប្រើគ្រឿង ម៉ាស៊ីនជីករករ៉ែមាសជាច្រើនកន្លែងនៅភូមិរំដេង និងតំបន់ភ្នំលុង ហើយអាជ្ញាធរឃុំ អាជ្ញាធរស្រុក និងសមត្ថកិច្ចមូលដ្ឋានមិនដែលធ្វើដឹងធ្វើឮទាល់តែសោះប្រហែលជាពួកគេទទួលបានផលប្រយោជន៍ពីជនជាតិយួនទាំងនោះហើយមើលទៅ។ ប្រជាពលរដ្ឋបានឱ្យដឹងទៀតថា ជនជាតិយួនខ្លះអត់ចេះនិយាយភាសាខ្មែរផងពួកគេមកទំនាក់ទំនងជាមួយអាជ្ញាធរដែនដី រួចអាចមានសិទ្ធិ ធ្វើអាជីវកម្មរ៉ែខុសច្បាប់ដោយប្រើម៉ាស៊ីនពាក់កណ្តាលស្វ័យប្រវត្តិដោយពួកគេបញ្ឆេះម៉ាស៊ីនភ្លើងប្រើគ្រឿងចក្រលុងភ្នំ តភ្លើងចូលក្នុងរណ្តៅរ៉ែតែម្តង។ ប្រជាពលរដ្ឋបានឱ្យដឹងទៀតថានៅតំបន់ភ្នំលុង និងតំបន់មួយទៀតក្នុងភូមិរំដេង ជនជាតិយួនជីកច្រើនរណ្តៅណាស់ហើយក្នុងមួយថ្ងៃៗគេអាចធ្វើការចម្រាញ់យករ៉ែមាសបានប្រហែល៣០តម្លឹងឯណោះ។ តាមប្រភពក្រៅផ្លូវការខ្លះបានឱ្យដឹងថាអ្នកនៅពីក្រោយខ្នងជនជាតិយួនធ្វើអាជីវកម្មរ៉ែមាសខុសច្បាប់នោះ គឺជាឧកញ៉ា ព្រោះនៅតំបន់ភ្នំនិងដីមានរ៉ែមាសត្រូវបានគេដឹងថាសុទ្ធតែជាដីឧកញ៉ាម្នាក់ឈ្មោះ ថន។ សកម្មភាពនៃការធ្វើអាជីវកម្មរ៉ែមាសខុសច្បាប់គឺប្រព្រឹត្តដោយជនជាតិយួន ក្រុមហ៊ុនចិន និងអ្នកមានអំណាច ប៉ុន្តែសម្រាប់ប្រជាពលរដ្ឋគ្រាន់តែទៅកើបយកអាចម៍ដីដែលគេជីកចោលមករែងក៏រងការគំរាមកំហែងដែរ។ ភាពអនាធិបតេយ្យនៃការធ្វើអាជីវកម្មរ៉ែមាសខុសច្បាប់នោះបើគ្មានការបើកដៃពីអាជ្ញាធរខេត្តព្រះវិហារ និងពីប្រធានមន្ទីរឧស្សាហកម្មរ៉ែនិងថាមពលខេត្តព្រះវិហារទេ គឺមិនអាចធ្វើទៅបានឡើយ ព្រោះគ្រាន់តែប្រជាពលរដ្ឋធ្វើអាជីវកម្មក្នុងលក្ខណៈប្រពៃណីក៏ត្រូវគេទប់ស្កាត់ដោយពុំមានការយោគយល់ឡើយ។ ទាក់ទងបញ្ហាខាងលើនេះប្រធានមន្ទីរឧស្សាហកម្មរ៉ែនិងតាមពលខេត្តព្រះវិហារ ឈ្មោះ គង់ មករា បែរជានិយាយយករួចខ្លួនថាជារៀងរាល់ឆ្នាំនៅរដូវវស្សា ដែលមានទឹកដក់គ្រប់ទីកន្លែងគឺប្រជាពលរដ្ឋរស់នៅជិតតំបន់រ៉ែមាស តែងតែនាំគ្នាលួចរែង បើទោះបីជាអាជ្ញាធរចុះទៅបង្ក្រាបជាញឹកញាប់ក៏ដោយ។ មិនតែប៉ុណ្ណោះ ប្រធានមន្ទីរឧស្សាហកម្មរូបនេះបានព្យាយាមបិទបាំងថាខ្លួនមិនទាន់បានដឹងរឿងជនជាតិយួនចូលទៅធ្វើសកម្មភាពរុករករ៉ែមាសខុសច្បាប់ដូចដែលប្រជាពលរដ្ឋរាយការណ៍នោះឡើយ។ ការព្យាយាមបិទបាំងបែបនេះត្រូវបានប្រជាពលរដ្ឋរិះគន់ថាទំនងជាប្រធានមន្ទីរឧស្សាហកម្មរ៉ែនិងថាមពលខេត្តព្រះវិហារ ទទួលបានប្រយោជន៍ពីក្រុមជនជាតិយួនធ្វើអាជីវកម្មរ៉ែមាសខុសច្បាប់ទើបព្យាយាមបិទបាំងការពិតឥតអៀនខ្មាស។ ប្រជាពលរដ្ឋរស់នៅក្នុងស្រុករវៀង ខេត្តព្រះវិហារបានឱ្យដឹងថាឥឡូវនេះជនជាតិយួនយ៉ាងច្រើនកំពុងធ្វើសកម្មភាពបំផ្លាញរ៉ែមាសនៅតំបន់ភ្នំលុង និងនៅភូមិរំដេង យ៉ាងអនាធិបតេយ្យ ហើយមិនឃើញអាជ្ញាធរ និងសមត្ថកិច្ចចាត់វិធានការទប់ស្កាត់ទាល់តែសោះ។ មិនតែប៉ុណ្ណោះជាច្រើនឆ្នាំកន្លងទៅនេះ មានក្រុមហ៊ុនចិននិងក្រុមឈ្មួញដែលការពារដោយអ្នកមានអំណាចខ្លះនៅតែបន្តធ្វើសកម្មភាពជីកយករ៉ែមាសនៅក្នុងមូលដ្ឋានស្រុករវៀងចម្ងាយប្រមាណជាង ៤០គីឡូម៉ែត្រភាគខាងកើត ឆៀងខាង ជើងទីរួមខេត្តព្រះវិហារយ៉ាងអនាធិបតេយ្យដូចមុនដដែល មិនឃើញមានសមត្ថកិច្ច ឬអាជ្ញាធរណាបង្ក្រាបឡើយ៕Sorcheat, khmernationalist
0 comments:
Post a Comment