Print 
PDF
(លោក អ៊ុំ ណាត ស្ថិតក្នុងឯកសណ្ឋានទាហាន
ត្រូវបានអ្នកបឹងកក់អះអាងថា មានបញ្ហាស្មារតី
ដង្ហែចូលរួមជាមួយប្រជាសហគមន៍បឹងកក់/រូបភាពដោយលោក ញឹម សុខន)
បុរសម្នាក់ស្លៀកពាក់ជាទាហាន
និងបានចូលរួមការតវ៉ាជាមួយអ្នកបឹងកក់ កាលពីព្រឹកថ្ងៃអង្គារ
ត្រូវបានចាប់ខ្លួននៅរសៀលថ្ងៃនេះ
យកទៅសាកសួរពាក់ព័ន្ធនឹងការចូលរួមជាមួយសហគមន៍មានជម្លោះដីធ្លី។
នៅព្រឹកថ្ងៃអង្គារនេះ ពលរដ្ឋបឹងកក់
បានប្រមូលផ្តុំគ្នានៅខាងមុខតុលាការកំពូល ដើម្បីសុំឲ្យស្ថាប័នមួយនេះ
ពន្លឿនសវនាការលើសកម្មជនដីធ្លី អ្នកស្រី យ៉ោម បុប្ផា។
ពលរដ្ឋប្រមាណជា១០០នាក់
បានដើរពីតុលាការកំពូលមកសុំអន្តរាគមន៍នៅសហភាពអឺរ៉ុប
ក្បែរផ្ទះលោកនាយករដ្ឋមន្ត្រីហ៊ុន សែន
ដោយមានការឃ្លាំមើលពីកម្លាំងសមត្ថកិច្ចជិត១រយនាក់។ ក្នុងការតវ៉ានោះ
បុរសម្នាក់ ស្លៀកពាក់ជាទាហាន បានចូលរួមសកម្មភាពតវ៉ាជាមួយអ្នកបឹងកក់។
អ្នកបឹងកក់ អះអាងថា បុរសម្នាក់នោះមានបញ្ហាសតិអារម្មណ៍។
ព្រះតេជគុណ ខាន់ ថេន ព្រះជន្ម២៥ព្រះវស្សា
ដែលត្រូវជាសាច់ញាតិរបស់ទាហានត្រូវបានចាប់ខ្លួននោះ មានសង្ឃដីកាថា
បុរសម្នាក់នោះ ឈ្មោះ អ៊ុំ ណាត ជាអតីតទាហានមកពីខេត្តព្រះវិហារ។
ព្រះតេជគុណបន្តថា លោក អ៊ុំ ណាត ត្រូវបានចាប់ខ្លួន
នៅរសៀលម៉ោងប្រមាណជាមួយកន្លះនេះ ដោយយកទៅសាកសួរនៅប៉ុស្តិ៍ខណ្ឌដូនពេញ។
ព្រះតេជគុណ បញ្ជាក់ថា បុរសម្នាក់នោះ ពិតជាមានបញ្ហាសតិអារម្មណ៍មែន។
ព្រះតេជគុណ ខាន់ ថេន មានសង្ឃដីកាបន្ថែមថា
ដោយសារ លោក អ៊ុំ ណាត ឃើញការតវ៉ារបស់អ្នកបឹងកក់ ដូច្នេះ លោកក៏ចូលរួមដើរ
និងស្រែកនឹងគេទៅ។
VOD មិនទាន់អាចទាក់ទងមន្ត្រីពាក់ព័ន្ធ
ដើម្បីអធិប្បាយលើការចាប់ខ្លួននេះ បាននៅឡើយទេ។ តែព្រះតេជគុណ ខាន់ ថេន
មានសង្ឃដីកាថា ឥឡូវនេះ លោក អ៊ុំ ណាត
ត្រូវបានបញ្ជូនទៅកងរាជអាវុធហត្ថស្ទឹងមានជ័យ ដើម្បីសាកសួរបន្ថែម
ហើយលោកនឹងត្រូវបានបញ្ជូនទៅខេត្តព្រះវិហារវិញ នៅថ្ងៃពុធស្អែកនេះ៕
សរសេរមកកាន់ លោក
ស៊ុន ណារិន តាមរយៈ sun_narin@vodhotnews.com
Sorcheat, khmernationalist
0 comments:
Post a Comment